ኦይን ዮሐንስ ጌዮጝ {ውርካ ኤርጓን ሶጳኔ ኦኬ ጋራን ሶጳኔ} ¹ እንቃ ሃጌይያ ኦካ ዹዋልሺኔን ኬና ኣይ ታቺዬ ኬናካ ጎሺሺዬ ከፎላ ክያኒ፤ ጊታይካ ቱንሳንዻ ሃጌይያ ውርካ ኤርጎ ሶጳ ጊታኬና ጊሚ ኦኬ ጋራ ሶጳ፤እን ሺጜ ሃካቱንሲዻ ሃናንዳካ እን ማኒትካ ባሪዮ ካሚኒኔ ከእሹጝ። ² ሃጌይያ ኦኬ ኬና ሙኔን ብርጩቆካ ኛፓስ ዎርሜን ከጉወ፤ ከኦካ ቋጩርካ ኛፓስ እንዻ ሃጌይያ ጊታይ ባሺ ዳቢ እኔ፣ ጊታይ ባሺ ኦግታይ ሙኔኬ ቡዋዌ ጊታይ ባሺ ጁዋኒቲካ ሮጝ ኔኒዬ ጎሬ፤ እንግንዻ ጎም ቾንጉ እን ባሪዮ ኣዬ እንግኔ፣ ³ ሺጜን እያጜ ጋኔን ይያሪካ ሙሴ እን ኣይ ውርካ ዋድማካ ባሪዮዬ ካማድር እኔ ኪውኔን፤ «ኣምላክ ታቺ እን ኣይ ሹቃካ ፓይላ ዮ፤ ዋድማ ኑኑ ሃኬና ኣይ ታቺዬ ኬናካ ጎሺሺዬ። ቢቱጝካ ቦናን ዮ፤ ጉዋር ኑኑ ሃኬና ኣይ ጫንቃሌ ኣኩሉኬ። ⁴ ታቹጝ ዮ፤ እን ማር እን ሪግሺኔኑጝ፣ ሃኒን ማር ሮጝ ኑኑዻ ጎቢዮኑጝ? ሃእንጵን ኣይ ቅዱሴ። ናንዳካጝ ዹዋልሺኔ ዋድማ ጫንቃል እን ኑኑጝ፣ ዛርሲ ፓይላ ፓዬንባ፤ ይወን እንባዻ ኦካ ሌሜን ኑኑ። ⁵ ከኦይን ጩዋ ሃጌይያ፤ ቶኦካ ይሁኔን እን ኣኔን ፎላ ዾዮኩጝ፣ ይንዻ ባራ እን ኣይካ ማኛሞጝ ቦወ ጊያ፤ ⁶ ውርካ ኤርጎ ሶጳን ጊታይ ጎሚ ኦኬ ጋራ ሶጳኑጝ ቱላ ከኦካ ቶኦካ ይሁኔን፤ እንግንዻ ኪም ኣፓላ ጫንቃል እጝ ጋሽክዬ ከጃፍካ ታልባዬ፣ ቁም ቋቁም ጊዬይዻ ከቃልሺካ ወርቄዬ ጊያ። ⁷ ከኦይን ጩዋ ከኦካ ዳባን ኣሁራን ጊታይ ሙኔዬ ኣይ እያይኑጝ ክየም ከእንካ ኡፑንቴ ቦንካ ቦኑጝ ዞንጶካ ወርቄ ሶጳ ጊታይ ቋቁሼ ከማኒንቲካ ባሪዮጝ ኣያ ውርካ ኤርጓን ሶጳን። ⁸ ቶኦካ ይሁኔንዻ ከኦካ ጎቢንታ ባሪዮ፣ ቋቋ ከጩቡይ እን ቱልኬ ኦካ ቁዋቅት ኔኑጝ፤ ውርካ ኤርጎ ሶጳን ጊታይ ሌይ ሃምካ ሹዋጵሾጝ ውር ክየምጵንዻ ካኒ ቻሊኬን ሃምካ ቶኦካ ይሁኔን ሁሉኬን።