ኦይን ዮሐንስ ጌዮጝ {ዞንጶካ ማኒትካ ባሪዮ ሶጳን} ¹ ከኦይን ጩዋ ዋይሼ ውርካ ኤርጓን ሶጳን፣ «ፓይባ፤ እሪቴ ዞንጳንካ ባሪዮ ሶጳን ዳሊ ክያኒ» ናቅዲ ታቺ ኬና ሺጝ እያይ ሃዋይያ ከኦካ ቶኦካ ይሁኔን። ² ውርካ ኤርጎ እንካ ሌሜን ኩዬ እሪሼያ ዞንጶ እን ዳሊ ክያኒ፤ ውራን ጊታይ ኣኔ ቃንዺካ ዳቢ እኔ ጊታይ ይወን ኦግታይ ሙኔኬ ቡዋዻጝ ጊዬ ጋራ ኬናካ ጋሊንሺ እንግን ቱልሼያ ኣእንግን። ³ ውርካ ኤርጎ እንካ ላንሳጝ እሪሼያ ዞንጶ ኛፓስ ክያኒ፤ ኛፓስ እንዻ ማቲያ ኬካ ኒያቡካ ውር ኮኑጝ ኣርሹጝ፤ ኦግታይ ኣኔ ዻቆዬ ኣኔን ኛፓስ ክያኑጝ ፓይላ ኣርሻ። ⁴ ውርካ ኤርጎ እንካ ማክንሳጝ እሪሼያ ዞንጶ ኦካ ዳራዬ ኦጉዋይካ ቅያኒዬ። ጊታይዻ ማቲያ ኒያቡ። ⁵ ከኦይን ጩዋ ከሙዋ ክያኒ ውርካ ኤርጎ እን ኣኔ ጌጳሞጝ ሺጝ እያጌ ሃዋይያ፤ እን ኣኔዬ ባካ እባካ ሌሜኔ ቅዱስ ዮ፤ ናንዳካጝ የኮምሼ እያይኑጝ፣ እን የኣይ ጫንቃል፤ ⁶ ናንዳካጝ ሜልሼ ኒያቡካ ውርካ ይሁኔኔ ካውርካ ቶካ ባሪዮጝ፣ ፕር እንዻ እንግን ካማቴ ኒያቡጝ የሻሚያ፤ ይንዻ ሃኬና ሁሉኩሼ እንግኔ።» ⁷ ፕርዻ ከኦይንካ ጋላ ቡሌጆሌኑጝ ሃዋይያ ናቅዲ ኬና ሺጝ እያጝ፤ «ይንጌ፤ ኣምላክ ታቺ እን ኣይ ሹቃካ ፓይላ ዮ፤ ኮምሺኔን ኑኑ ሃኬና ኣይ ጫንቃሌ ኣኩሉኬ» ⁸ ውርካ ኤርጎ እንካ ኦይድሳጝ ይጽሼያ ዞንጶ ሹሽ ክያኒ፤ ሹሽዻ ካኡሼ ውር ከጉውጝ ጋያ እሺ ቁዋቅቲ። ⁹ እንግንዻ ጋትያ ከሼሊምኔንካ ሹሽ ኬና ኣይ ታቺ፤ ከኦካ ኦኬ ጋራ ጊታጝዻ ካጝ ኣኔ ጌጳሞዻጝ ይራ ሮጝካ ባሪዮ ዬ ካኒ ሁሉኬን ይሁኔን፤ ካኒ ጎቢኬንዻ። ¹⁰ ውርካ ኤርጎ እንካ ዶጝሳጝ እሪሼያ ዞንጶ ኦካ ዳቢ እን ኣኔን ኦካ ቆቤኑጝ፤ መንግስትካ ዳቢ እንዻ ማቲያ ዱሙጉ፤ ውርዻ ከእን ናሹጝኬ ጋሎ ጊዬዩጝ ጋኔን ካት ጊዬይ እንጫጪኔን፤ ¹¹ ፕርዻ ከእን ናሹጝኬ ጋሎ ጊዬይዬ ከጊዬ ጊዬዩጝ ይራ ኣምላካ ፎላ ዬ ካኒ ሻውኬን ይሁኔን። ¹² ውርካ ኤርጎ እንካ ላይሳዻ ዞንጶ ኦካ ዳራ ታቺ እንካ ኤፍራጥስ፤ ካቡልሼ ቢታን ጊታይካ ፓዬንኬ ታጝ ሹሽ ቱሌ ጉዋሩጝ ሙዋካ ዳራ እን ፄዽያ። ¹³ ከኦይን ጩዋ ከኦካ ቶካ ዴውን እኔ፣ ከኦካ ቶካ ዳቢ እኔ ከኦካ ቶካ ውርካ ቶግካ ባሪዮ እንካ ሶጵሳዬ ኦኬ ጋራ ጅያን ጊታኬና ሙኔን ቋንጁ ቱሌ ሃጌይያ። ¹⁴ እንግንዻ ሃመንፈስካ ቤሮ ጊታይ ኣሽክዬን ኦኮጝ፤ ከሹካ ኣምላክ እን እባጅ ኦኬ ፓይላጝ ከፓር እንካ ባሎጝ ካፑኡሺዬ እንግኑጝ ፓይሼባ ሃምካ ቢታንካ ዳሉዑጝ ፓይላ። ¹⁵ «እየዎ፤ ሃኩንባ ኬጓርጉ፤ ካማር ቡርዱንቆ ኣዬኔ ካማር ሹሙ ኔኒ ጌዬኔ ውር እን ጬዬኔ ቶይ ኣፓላ ኔኑጝ ሃጫንቃል።» ¹⁶ እንግንዻ ፑኡሺሼያ ቢታን ኦካ ራቅ እን ከቶካ ውርካ ዕብራይስጥ ሺጜ አርማጌዶን። ¹⁷ ውርካ ኤርጎ እንካ ሶጵሳጝ ይጽሼያ ዞንጶ ፑጉ ክያኒ፤ ናቅዲ ኬና ሺጝ ኦካ ቆቤን እን ኣኔን ቶኦካ ይሁኔን ክያኑጝ «ሙኔና፤ ዋዬና። ¹⁸ ከኦይን ጩዋ ማቲያ ማኬንካ ጎት፣ ማቲያ ዋይኔንካ ናቅዲ፣ ማቲያ ኤርጊዬንካ ጉጉናቴ ሁጃሁጅኔካ ዳሊ ታቺዬ፤ ውር ካርሲኬ ኦባ ሙኔ ዳሊ ክያኒዬ ሁጃሁጅኔን ታቺካ ዳሊ ኬና ኣይ እያይ ካኒ ጌይኬን፤ ሁጃሁጅኔን ኔኒዻ ሃኬና ካሎን ኣይ ታቺ። ¹⁹ ካሺያ ከተማ እንካ ፎላጝ ክያጝ ጅያን፤ ከተማካ ዛርሲዻ ኮሲሜና፤ ባሪዮዻ ጶቅስያ ባቢሎን እን ኣይ ታቹጝ፤ ኣያ እሺ ኣላላ እን ቋቅ ከማኒት ቁዋቃጝ። ²⁰ ጎልዹ ፓይላ ጉካ፤ ጋጋንዻ ካኒ ቻሊኬን ጌይኔን። ²¹ ሄክንሺያያጝ እንግን ክየም ክየም ኬናካ ኣይ ኪሎ ግራም ቾኑጝ ሙኒሙኔንካ ጪራቲ ኬና ኣይ ታታቺ ፓቅሼና ውር ከፎላ ዾዮክ፤ ኦኬ ጋራ ጊታይዻ ናንዳካጝ ካሎን ኣዬ ጋራጝ፣ ውርን ከእን ናሹጝኬ ጋራ ኣዬንካ ሙኒሙኔንካ ጪራቱጝ ይራ ባሪዮ።