ኦይን ዮሐንስ ጌዮጝ {ኚያጝ እን ኡፌ ዳቢ ዾዮኩጝ} ¹ ከኦካ ውርካ ኤርጎ ሶጳን ጊታይ ጎሚ ዞንጶ ሶጳጝ ክየም ኩኔ ዋይሼ ኣን እያጝ፤ «ኩዋባ፤ ሃዹዋልሼባ እን ኮምሼንካ ኩጳሞ ታቺ እን ኡፌን ኦካ ሙዋን ጁዋናን ክያኑጝ። ² ቢታንካ ዳሊዻ ጋሽክያ ከእሺ ኩጳሞ፤ ውር ጊታይ ቆቤን ዳሊ ክያኒዻ ከኦካ ኩጳሞ ኣሽክዬ ጆሌን ኔኒ ጮያ ከኣላላ። ³ ከኦይን ጩዋ ውርካ ኤርጎ እን ቦሼያ ኣን ከመንፈስ እያጝካ ቦናጝ፤ ከኦይን ኚያጝ ክየም ኡፌ ዳቢ ጫጩጉ ኬና ቋቁሼ ከሮጝካ ይሪኔኔ፣ ኬና ኣኔ ሹቦ ሶጳዬ ሃጌይያ። ⁴ ኚያጝ እንዻ ኩላሌን ኣፓላ ሹቃ ኬና ኣይ ጫጩጉዬ ጊያ፤ ፕርዻ ሻምሼ ሩዋ ኔኒ ክያኒ ወርቄዬ፣ ባይ ጊታይ ጎቢዬዬ ኦግታይ ኣይ ሹቃሹቃዬ ጊያ፤ ከኦካ ቡዋ ኔኒ ጎም ዞንጶ ጋራካ ኩጳሞ ኬናካ ምኒሺሽ ውሬ ጊያ። ⁵ ከኦካ ማሪ ኔኒዻ ቶኩሼ ሮጝካ ድኬን ኬና ሺጝ እያጝ፤ ጁዋኔካ ባቢሎን ታቺ እኔ፣ ካጊታይ ኣሽኪኔጆል ኩጳሞዬ ኦኬ ጋራ ጊታይካ ዳሊዬ። ⁶ ኚያጝ እንዻ ጮይኬ ኒያቡካ ውር ጊታይካ ይሁኔኔ ከኒያቡካ ማኚካ ኢየሱሴ ሃጌይያ። ከሺ እን ሃጌዬዻ ሃጎሺያ እሺ ካሎን። ⁷ ከኦይን ጩዋ ውርካ ኤርጎ እን ዋይሼ ኣን እያጝ፤ ሃናንዳካኦ የጎሺዮጝ? ሃሜይሼ እንባ ኦካ ድኬንካ ኚያጝ እጜ፣ ዳቢ እን እሺ ኡፌዬ፣ ፕርዻ ዳቢ እን ኣኔ ሹቦ ሶጳዬ ሼይህ ታጵዬ። ⁸ ዳቢ እን ሃጌዬዻ እባ ከሌሜንዻ ኣኔባ፤ ዬ ጋን ኣኔኬን፤ ከታካ ሁርዻ ቱልባ ከኦካ ይጊን እን ኣይ ቱሎጝ፤ ኩይሼባ ሃምካ ካዮዻ፤ ካርሲኬ ኦባ ሙኔ ፔኔ ውር ጊታይ ቶኩሼ ሮጝ ጊዬይ ከኦካ ወርቀትካ ዻቆዬ ማር ጌይኔን ጊታይ ቆቤን ዳሊ ክያኑጝ እባ ከሌሜንዻ ዳቢ እን ኣኔባ፣ ዬ ጋን እን ማር ኣኔኑጝ፣ ጌያ እንካ ኩዋው ከታካ ሁርዻያጝ ጎሺባ። ⁹ ውር እን ኣኔ ፓካልማሞ እንዻ ኣንሺሽባ ሹቦ። ሹባን ሶጳን ጊታይ ሃጋጋን ሶጳን ጊታይ ኚያጝ እን ካኡፎጝ፤ ¹⁰ ፕር እንግንዻ ሃቢታን ሶጳን ጊታይ። ቾናን ቡዳ፤ ክየም ኣኔባ፤ ፕር ኑዋ ካኒ ኩንኬን፤ ዬ ኩናያጝ ኡፑኖጝ ካሁሉኩሼ እሹጝ ሃካ ሹ ጩዋማ። ¹¹ ዳቢ ባካ እባ ኣኔዬ እንካ ጋን ማር ኣኔኔ ሃቢቲ እንካ ሎንካይሳጝ፤ እሺዻ ከኦካ ኣዬ ሶጳን ኣይኒን ክየሙጝ ኩይሼባ ሃምካ ካዮጝ። ¹² ሼይህ ታጳን ጊታይ ሃጌዮጝ፤ ሃባታን ታጳን ጊታይ ካኒ ማር ጌጳሞ ጌዬኑጝ፤ ኣይባዬ ካጌዬኬ ዳቢ እጝ ጌጳሞካ ሰዓት ክየሙጝ ጌይባ ጌጳሞ። ¹³ ጋኔ ቃቦ ኬና ኣይ ክየምዻ፤ ጋይባ ዳቢ እጝ ቁዋቅት ጊዬይዬ ጌጳሞ ጊዬይዬ፤ ¹⁴ እንግንዻ ባሌንባ ከማድር እጝ፤ ዬ ማድር እጝ ባሺ እንግንባ፤ ናንዳካ ኦ እሺ ሃታቺካ ታታቻኔ ቢቲካ ቢታኔ፤ ጊታይ ኣይኬ እሺዬ ሺዎጝ፣ ጊታይ ጊድዬዬ ጊታይ ኣምዽዳዬ ባሺሜንባ ከጋጝ። ¹⁵ ውርካ ኤርጎ እንዻ ዋይሼ ኣን እያጝ፤ ሙዋን ጊታይ ኚያጝ እን ኣሽኪኔጆል ኩጳሞ ኡፌዬ የጌዮጝ፥ ሃውሬ፣ ውር ጁዋኑዬ፣ ዛርሲዬ ቶጓኔ። ¹⁶ ዳቢ እጜ ሼያን ታጳን ጊታይ የጌዬዬ ፓቅባ ኚያጝ እን ኣሽኪኔጆል ኩጳሞጝ፤ ኦቼባ እሺ ማም እያይኔ ቡንዱርቆዬ። ቃውባ ኣሩጝ ኔኒዻ፤ ኡዱባ ከጉዻ። ¹⁷ ሌይ ሃም ክያጃካ ባሪዮ ካሙኒኖጝ ካሹዋጴ ቃቦ ጊዬዩጝ፣ ፕርዻ ካቱምዬኬ ቃቦ ክየሜ ካጋዬ ጌጳሞ ጊዬይ ዳቢ እኑጝ ኣጁጝ ቃቦ ይጝ ሻን ጊዬይ ክያኑጝ ሃባሪዮዬ። ¹⁸ ኚያጝ እን የጌዮጝ ሃከተማ ታቺ እጝ ካማትሼ ቢታንካ ዳሉጝ ቢቱጝ።