ኦይን ዮሐንስ ጌዮጝ {ቡዴንካ ባቢሎን} ¹ ከኦይን ጩዋ ውርካ ኤርጎ ኬና ኣኔ ጌጳሞ ታቺ ጎብኬ ፎላ ዾዮኬ ሃጌይያ፤ ከእን ናሹጝኬ ካርቡ ቶኬንካ ጎቢንታ ኔኒዻ ዳሊ ሼሽክያ፤ ² እንግንዻ ከናቅዲ ኬና ኣይ ታቺ ሺጝ እያጜ ጉቹካ፤ «ባቢሎን ታቺ እን ቡዳ/ ቡዳ/ ኦካ ቆቤንካ ቤሮ፣ መንፈስካ ኦኬ ጋራ ጊታይ ፓይላ ማቲያ ኦካ ጊድምሺኔን፣ ኩባር ጊታይ ኣይ ጋራዬ ኣይካ ሙኒሺኔኔ ፓይላ ማቲያ ቶኦ። ³ ዛርሲ ፓይላ ማታ ኣላላካ ማኒትካ ኚያጝ እን ኣሽክዬኔጆል ኩጳሞጝ፤ ቢታን ጊታይካ ዳሊዻ ኣሽኪያ ከእሺ ኩጳሞ፤ ናጋዳንካ ዳሊዻ ከእን ናሹጝኬ ቁዋቅት ጁዋኑካ ኣግንታ ኔኑጝ ሳጊያ። ⁴ ፕር እንቃ ሃዋይያ ከፎላ ዾዮክ ናቅዲ ኬና ሺጝ እያጝ፤ «ዛርሲ ናኒ ዮ፤ ከማርቴ ከሴሶ ኔኒ ማቲዬኑጝ፣ ከማርቴ ከኦካ ኦኬ ጋራ ኔኒዻ ካሺምኔኑጝ ቱልባ ከኦኔኒ፤ ⁵ ሴሶ ኔኒ ጎርትሜኔ ዬክሻ ፎላ ክያኒ፤ ባሪዮዻ ጶቅሲያ ኚያጝ እንካ ሴሶጝ። ⁶ ከእያይ ጋዬ እየው ዋሽቴ እሺባ ብድራን ኔኒ፤ ሌምቴዬ ካሺቴ እሺባ ኦግታይ ኣሽክዬዻ፤ ከኦካ ዞንጶ እን ኔኒ ሌምቴዬ ዋሽቴ እሺባ። ⁷ ከእያይ ኣዬ እሺ ኤምኑ ጎብንታዬ ኣግንታዬ፣ ዾቅሼያ እሺ ጋሎዬ ሞይካዾዬ፤ ኬሸን ኔኒዻ ሺጜን እያጜ ካዬንባ። ⁸ ዬ ኦኬ ጋራን ኩንሼ እሺባ ከሹ ክየም፤ ማቲሼባ እሺ ኣርሼን፣ ሞይካዾዬ ካሼ፤ እንካ ኮምሾጝ ናንዳካጝ ባሪዮ ታቺ እን ኣዬ ቁዋቃጝ፣ ኡዱባ እሺ ከጉ። ⁹ ቢታንካ ዳሊ ጊታይ ኣሽክዬን ከእሺ ኩጳሞዬ ቆቤንኬ ኣግንታጝ፣ ጉዱብ እሺዬ ጊያ ጩቡይ እን ቶኬ ኦኔኒያጝ ጎቆርባ ናንዳካ እሺ፤ ሞይካዽባዻ። ¹⁰ ከጋሎ ኔኒዻ ሪግሺኔን ጎር ዹኬ ሺጝባ እያጝ፤ «እን ከተማ ታቹጝ ሃይ/ ሃይ/» እን ባቢሎን ከተማ ቁዋቃ እጝ፣ ኮምሺኔን ኑኑ ኩና ከሰዓት ክየም።» ¹¹ ኣንቲቲ ጊዬይዻ ካርሲኬ ጋኔ ውር ኬናካ ኡዋሩጝ ናንዳካጝ ሜሬ ኣኔኑጝ፣ ነጋዳካ ዳሉጝዻ ጎቆሬንባ ናንዳካ እሺዻ፤ ሞይካዽባዻ፤ ¹² ኣንቲቲ ጊታይዻ፥ ሃወርቄ፣ ሃቢሬ፣ ሃባይ ጊታይ ጎቢዮጝ፣ ሃኦግታይ ኣይ ሹቃሹቃጝ፣ ሃኣፓላ ዽታኬ ኬና ጋሽክዬ ከጃፍካ ታልባ፣ ሃኣፓላ ኬና ኣይ ሹቃ፣ ሃኣፓላ ኬና ኣይ ሐር፣ ሃኣፓላ ኬና ኣይ ጫጩጉ፣ ሻሪ ጊታይ ኣኔ ካይህ ሹቃጝ ፓይላ፣ ኦግታይ ጋሽክዬ ከኒጊካ ኑዋር፣ ኦግታይ ጋሽክዬ ከሻሪ ጊታይ ኣይ ቁዋቃጝ፣ ከቢሬዬ ከኣኒቲቲ ጊታይ ጋሽክዬ ከኮይሶዬ ከእብነ በረዴ ፓይላ፣ ¹³ {ሃቀረፌዬ፣ ቅመሜ፣ ከርቤኔ፣ ቅባቴ፣ ቁኛዬ፣ ኣላላዬ፣ ዋቃትካ ወይራዬ፣ ዽል ኬና ሮዬዬ፣ ሱንድዬ፣ ቢወ፣ ማድሬ፣ ፋርዳዬ፣ ፓርዳ ጊታይ ናሬ ጆሌ ውሬ፣ ፕርዻ ሃውር ጊታይካ ዋድማዬ ናፒሲካ ውሬ።} ¹⁴ እንግንዻ ሺጜን ካርቡካ ሻሪ ጊታይ የኣርግንዽዮጝ ዹካትሻ ከኦኑኑ፤ ሳጊዬን ኑኑዬ ጎቢንታ ኑኑዬ ፓይላ ካህያ፤ ዋኬ ኩንኬን እንቃ» ¹⁵ ከኦግታይ ኡዋሩጝሼን ነጋዳን ጊታይ ሆድንዽ ከእሹጝ ሪግሼን ጋሎ ኔኒዬ ጎርባ ዹክ፤ እንግንዻ ጎቆሬንባ፤ ሞይካዽባዻ፤ ¹⁶ ሻም ናቅዲ ጊዬይ ዼግዻዬ ሺጝባ እያጝ፤ «ጃፍካ ታልባ እን ኣይ ዽታኮጝ፣ እን ኪሚ ኣፓላ ሹቃ እን ኣይ ጫጩጉጝ፣ እን ሻምሼ እሺ ኤምኑ ወርቄዬ፣ ባይ ጊታይ ጎቢዬዬ ኦግታይ ኣይ ሹቃሹቃዬ፣ ከተማ ታቺ እን ሃይ/ ሃይ/ ¹⁷ ሆድማሞ እን ፓይላ ካህያ ከክያጝካ ሰዓት ክየም። «ውር ታታቻንካ ጋጊ ፓይላ፣ ውር ጊታይ ቁዋሌን ከጋጉጝ ፓይላ፣ ውር ጊታይ ቁዋሌ ጆል ጋጊዬ ውር ጊታይ ቆቤን ኛፓስ ክያኒዬ ፓይላ ጎርባ ዹክ። ¹⁸ ጉዱብ እሺዬ ጌያ ጩቡይ እን ቱሌኬ ኦኔኒያጝ፣ ሺጜን ከተማ ታቺ ኬና ዊ ይጝ ጌይኬ ኦኔ ጉቹካ። ¹⁹ ጉትሼን እንግን ኤታጋን ቡቡኒዬ ጎቆሬንዻዬ ሞይካዽዻዬ ሺጜን እያጜ ጉቹካ፤ «ውር ጊታይ ጋጊዬ ኣኔን ኛፓስ ክያኑጝ ፓይላ፣ ጊታይ ሳጎኬ ሆድማሞ ኔኑጝ፣ ናንዳካ ከተማ ታቺ እን ሃይ/ ሃይ/ ካህያ ከሰዓት ክየም። ²⁰ ፎላ ዮ፤ ዋዝንዻባ ከእሺ፤ ውር ጊታይካ ይሁኔኔ፣ ሐዋርያታኔ ውር ጊታይካ ቶካ ባሪዮዬ ዋዝንዽባ፤ ናንዳካ ኦይን ሻምሼ እየው ባሪዮ ኮምሼያ እሺዬ። ²¹ ከኦይን ጩዋ ውርካ ኤርጎ ቁዋቃ ክየም፣ ቲት ባይ ታቺ ክየም ኬና ሙኔን ማዶካ ባዬ ፓቅሼያ ኛፓስ ክያኒ፤ ሺጝ እያጝዻ፤ «ከተማ ታቺ እንካ ባቢሎኑጝ፣ ባካ ከቁዋቅት ታቺ ኬና ኣኔን እያጝ፤ ዋኬ ጌዬንኬንዻ። ²² ናቅዲካ ውራን ጊታይ ካቴን ቾንጉዬ ካውር ጊታይ ባጜኔ ጆል ይያሪዬ፣ ናቅዲካ ውራን ጊታይ ትብዬን ቱሉንጎቴ ጊታይ ትብዬን ሙራዬ፣ እንቃ ዋይኬን ከኦኑኑ፤ ውራን ፓካላ ጊታይ ኣሽክዬን ዋድማካ ቡዋጝ፣ እንቃ ጌይኬን ከኦኑኑ፤ ናቅዲካ ባይዻ፣ እንቃ ዋይኬን ከኦኑኑ። ²³ ላሉጜንካ ፓኖስዻ፣ እንቃ ላሉጝኬን ከኦኑኑ፤ ናንቅዲካ ኡማዬ ካኡታ እኔ፣ እንቃ ዋይኬን ከኦኑኑ፤ ነጋዳን ኑኑዻ እባ ጋይ ውር ታታቺካ ፌን፤ ከኣስማት ኑኑዻ ጊያ ምሺሻ ዛርሲ ፓይላ። ²⁴ ከኦኔኒዻ ጌያ ኒያቡካ ውርካ ቶካ ባሪዮዬ ጊታይካ ይሁኔኔ፣ ጊታይ ኒሼ ዳሊ ክያኒዻጝ ፓይላ።