ኦይን ዮሐንስ ጌዮጝ ሃሌ ሉያ ¹ ከኦይን ጩዋ ሃዋይያ ናቅዲ ታቺ ኬና ሙኔን ናቅዲካ ውር ጁዋኑ ከፎላ ክያኒ ሺጝ እያጜ፤ ሃሌ ሉያ/ ባይሺኔን፣ ጎቢንታዬ ቁዋቅትዬ ሃካ ኣምላክ ጉዋዩ፤ ² ኮምሺኔን ኔኒዻ ሃኣኩሉኬ ጫንቃሌ፤ እን ጊያምሺሼ ከኦካ ዳሊካ ኩጳሞጝ፣ ኮምሼያ እን ኣሽክዬን ኩጳሞ ታቹጝ፤ ቦዋ ናንዳካ ኒያቡካ ውርካ ዋድማን ኔኒዻ። ³ ፕርዻ ሺጝ እያጝ፤ ሃሌ ሉያ/ ጩቡይ ቱልባ ከኦኔኒ ከቦንካ ቦን። ⁴ ውር ጌጵሹጋን ላማታም ኦይዳኔ ዳቢ ጊታይ ሙኔ ኣይ እያይኔ ኣኔን ኦይካ ቆቤኑጝ ኮምፓርሲዬ ይወና ኣምላክ፤ ሺጜን እያጝዻ፤ «ኣሜን፣ ሃሌ ሉያ/» ⁵ ከኦይን ጩዋ ናቅዲ ኬና ሺጝ እያጝ ዋዬና ከፎላ ክያኒ፤ «እየው ውርካ ዋድማን ፓይላ፣ ጊታይ ሪግሼን እሹጝ፣ ሃይሻይሻኔ ታታቻኔ፣ ጎሺባ ኣምላክ ጉዋዩ/» ⁶ ፕርዻ ናቅዲ ኬና ሙኔንካ ዛርሲ ጁዋኑ፣ ኬና ሙኔን ኮሺዬንካ ሙዋካ ሮሙ ኬና ዉቢ፣ ናቅዲ ኬና ሙኔንካ ጉጉናትዻ ሺጝ እያጜ ሃዋይያ፤ ሃሌ ሉያ/ ኣምላክ ታቺ እን ጉዋዩ ኣይ ሹቃካ ፓይላጝ ቢታዽያዬ። ⁷ ናንዳካጝ ዴሞጾቃካ ማድር እጝ ሄክሾጝ፣ ኡታ ኔኒዻ ናንዳካጝ ኡፌ ሼኪሙጝ፣ ካኣይሼ ኡዋባ ባሺ፤ ካዋዝንዽባዻ፤ ካጎቢባዻ። ⁸ ካኪሜ ኣፓላ ኬናካ ቶክ ካርቡዬ ኬና ኣይ ጫንቃሉጝ፣ ጋያ እሺ ኣፓላ ዽታኬ ኬና ጋሽክዬ ከጃፍካ ታልባ። ኣፓላ ዽታኬ እን ጋሽክዬ ከጃፍካ ታልባጝ ሃዋድማ ጫንቃል እንካ ውርካ ይሁኔኑጝ። ⁹ ውርካ ኤርጎ እንዻ ዋይሼ ኣን፣ ሺጝ ጊታይ ሺውሼ ሃምካ ዴሞጾቃካ ማድር እኑጝ ጋይ ጫንቃሌ ቶኳ፤ ፕርዻ ዋይሼ ኣን ጊታጝ ሃክያጃ ኣኩሉክ ጊታይካ ባሪዮጝ። ¹⁰ ኣንዻ ሃቡድያ ኦካ ጃፍ ኔኒ ይሁኔን፤ ዬ እሺ ዋይሼ ኣን፣ «ኦይድባ/ ኦይ ይጝ ሻሜን/ ኣንዻ ከእኔ ከጪኒጌን ጊታይ ኑኑ ጎሚ ማኝ ኣዬንካ ኢየሱሴ ሃኣይ ውርካ ዋድማ፤ ይሁንቴ ባሪዮ፤ ማኛሞካ ኢየሱስ ሃመንፈስካ ሃሳዋ ሃሳወን ዋይሼ ኣን እያይ። {እን ኡፌ ፓርዳ ፎልቼኑጝ} ¹¹ ከኦይን ጩዋ ፎላ ቦወኔ ሃጌይያ፤ እየዎ ኣኔ ፓርዳ ፎልቼን ክየም፤ «ኡፌ ኣና እን ሺጜ ሹቃዬ ኣይካ ኣኩሉኩጝ፤ እሺዻ ኮምሼባ ከጫንቃል፤ ባሌንባዻ። ¹² ካርቧን ኔኒዻ ዊ ኬካ ላሉጜንካ ጉሁ፤ ኦካ ሹቦ ኔኒዻ ኣና ዴውን ጁዋኑ፤ ከእሺ እንቃ ሮጝ ኬና ውር ክየምጵንዻ ካማሬ እባጄን ቶኩሼያ ሩዋ ኔኒ ክያኒ። ¹³ እሺ ኪማ ኣፓላ ኬና ሻሊኔ ኒያቡዬ፤ ሮጝ ኔኒዻ ሃክያጃካ ባሪዮ። ¹⁴ ፓጻናንካ ፎላዻ ኪም ኣፓላ ዽታኬ ኬና ኣይ ፎልቼኔ፣ ኬና ኣይ ጫንቃሌ ኬና ጋሽክዬ ከጃፍካ ታልባ፣ ቆቤ ፓርዳ ጊታኬና ኣይ ፎልቼኔ ጋኔን እሺ ዻዬን። ¹⁵ ኤቤል ጫሪ ኬናካ ኒቄ ዛርሲ ቱላ ከኦካ ቶግ ኔኒ፤ ሻምሼባ እንግንዻ ከሴጋካ ኮይሶ ሃሚን ኔኑጝ።» እሺዻ ባሪዮ እን ኣይ ሹቃካ ፓይላጝ ባጝባ ኦይን ኣይ ቁዋቃካ ኣላላ ቱርጵሼን። ¹⁶ ቶኩሼያ ኦካ ኣፓላ ኔኒዬ ኦካ ዱር ኔኒዬ ሮጝ ኬና ሺጝ እያጝ፤ «ቢቲካ ቢታኔ ታቺካ ታታቻኔ።» ¹⁷ ከኦይን ጩዋ ውርካ ኤርጎ ክየም ዾር ኦካ ሹሼ ሃጌይያ፤ እሺዻ ከኦካ ጫቃንካ ኩባር ጊታይ ዋሬን ፎላ ክያኑጝ ፓይላ ሺጝ እያጜ ኡቹካ ከናቅዲ ታቺ፤ «ፓዬንባ፤ ፑጪባ ሃምካ ምሻካ ቃይ ታቺ እንካ ባሪዮጝ፤ ¹⁸ ከፑጪቴዻጝ ከቃው ኣሩጝካ ቢታኔ፣ ከቃው ኣሩጝካ ውር ጊታይ ጫጭንጬጆል ፓሬ፣ ከቃው ኣሩጝካ ውር ጊታይ ኣይ ቁዋቃዬ፣ ከቃው ኣሩጝካ ኡኩሊዬ ኣሩጝካ ውር ጊታይካ ኡኩሊዬ፣ ፕርዻ ከቃውቴ ኣሩጝካ ውር ፓይላጝ፣ ይንዻ ከቃውቴ ኣሩጝካ ታታቻኔ ካውር ጊታይካ ዋድማጝ፣ ከቃውቴ ኣሩጝካ ሃይሻይሻኔ ካታታቻኔ ጊያ።» ¹⁹ ከኦይን ጩዋ ዳቢ እን፣ ቢታንካ ዳሉጝ ፑጪኬ ፓፃኗን ጊዬይዬ ሺጝኬ ፓፃኗን ጊታይ ቆቢ ኡኩሊ ክያኒ ባሊኔን ሃጌይያ። ²⁰ ኣይባዬ ጎማ ዳቢ እዕጝ፤ ውርካ ቶካ ባሪዮ ባካ ሌሜን ዹዋልሺኔጆል ኦኬዬ ኣይካ ሾሮዻ ጎማ ከጋጝ። ከዹዋልሺኔን ጊታይዻ ውራን ጊታይ ናሺዬ ጊታይ ይወን ኦግታይ ጋሽክዬ ከቡዋዌ ጊያምሺሻ። ፓይላ ከኦይን ቆቤኬ ዻቆጝ ፓቅሼያ እንግን ሃምካ ጉሁ እንካ ኛፓስ ላሉጜን። ²¹ ፕርዻ ኒሻ ጊታይ ሺዺዻ ከኤቤል እን ቱልኬ ኦካ ቶካ እን ኡፒ ፓርዳ ክያኑጝ፤ ኩባር ፓይላዻ ቃው ኣሩጝ ጊዬዬ ናዓሻ።