ኦይን ዮሐንስ ጌዮጝ {መንግስት እንካ ቦን ሺ} ¹ ውርካ ኤርጎ እን ጎሚ ቁሉፍ እንካ ቦው ኦይን ኣይ ቱሌዬ ጎሚ ሳንሳላ ታቺ እኔ ጎብኬ ፎላ ክያኒዬ ሃጌይያ። ² እሺዻ ጎም ቻች ባካሌሜኔ፣ ዴውኔ፣ እንዻ ሃዲያብሎስ ወይ እጁጜ ቁማ ቦን ሺ። ³ ሌይ ሃምካ ሹዋጴ ቦ ሺዻጝ ካርሲኬ ኦይኔ ካማሬ ዛርሲ ጊያምሺሼኑጝ ፓቅሼያ ሃም ኣይ ቱሎጝ፤ ሃጌያዻ፤ ካትሼያ ኦይ እሺ ኣኔዻ ከማህትም። ከኦይን ጩዋ ካቡሌኬ ሹ ጩዋማጝ ሁሉኩሼባ። ⁴ ከኦይን ጩዋ ሃጌይያ ኦይንካ ቆቤጃሌኑጝ፤ ከኦይንካ ቆቤጃሌንዻ ሃጌይያ ውር ጊታይ ጋዬ ጌጳሞካ ውር ኮምሼጃሌን ቆቤዬ፤ ፕርዻ ናንዳካ ማኝካ ኢየሱሴ ናንዳካ ክያጃካ ባሪዮዬ ሃጌይያ ናፒሲካ ውር ጊታይ ኒቄኬ ኤቤሉጝ። እንግንዻ ካኒ ይወንካ ዳቢ እን ወይ ካኒ ይወንኬን ኦግታይ እሺ ኣሽክዬ ከቡዋጝ፤ ካኒ ሻምሼኬን ኦካ ማሪ ጊዬይ ወይ ኦካ ቡዋ ጊዬይ ቃንዺካ ኦካ ዹዋልሺኔንካ ዳቢ እዕጝ፤ እንግንዻ ናሹጝኬ ኦጉዋይ ጋርሼዬ ቢታዽያ ከክርስቶስ ቦን ሺ። ⁵ ዬ ውር ጊታይ ኣርሺዬ ሺዺ ሌይ ሃም ቦን ሺ እን ካጅክኖጝ ካኒ ናሹጝኬን፤ ይንዻ ሃናሹጜን እንካ ሌሜኑጝ። ⁶ ውር ጊታይ ጌይ ናሹጜን እንካ ሌሙኑጝ ጋይ ውርካ ይሁኔኔ ጊታኬና ኣይ ጫንቃሌ። ኣርሼን እንካ ላንሳጝ ኣኔኬን ጌጳሞ ኦግዬይ፤ ኣይባዬ ማቲባ ውርካ ዋድማካ ባሪዮዬ ካክርስቶሴ፤ ቢታዽባ ከእሺዻ ቦን ሺ። {ዕጣካ እጁጝ እን ኣይካ ቱንሱጝ} ⁷ ቦን እን ኣይ ሺ ጃኬናያጝ ቡልባ እጁጝ ከኦካ ቁሜኔን፤ ⁸ ዛርሳን ካዳሊ ጊታይ ኣይኬ ዳሊ ሊኩጝ፥ ጊያምሺሽ ውር ጊታይካ ፌኔ ናሹጝጋ እንግን ሃምካ ፓር ይዕሲሼን፤ ጁዋንቲ ጊዬይዻ ሃኬካ ይያጪ ጊታይ ኣኔን ኦካ ላቅካ ኛፓሱጝ ⁹ እንግንዻ ቱልሼ ሃምካ ዳሊ ፓይላዬ ሻዋ ሃምካ ከተማካ ውር ጊታይካ ይሁኔኔ ሃምካ ከተማ እን ናሺዬያጝ፤ ኣይባዬ ጉሁ ጎቤን ከፎላ ዾዮኬ ቃዋ እንግን። ¹⁰ ዲያብሎስ እን ጊያምሺሽ እንግንዻ፣ ዳቢ እኔ ውርካ ቶካ ባሪዮ እንካ ሾሮዻዬ ፓቅሼያ ሃምካ ጉሁ እንካ ኛፓስ ላሉጜን፤ እንግንዻ ጋሊዬንባ ከሹሼ ምክሬ ከቦንካ ቦኔ። {ኮምሼያ ውር ጊታይ ኣርሹጝ} ¹¹ ከኦይን ጩዋ ሃጌይያ ኦካ ቆቤን ኬና ኣይ ፎልቼኔ ጊታይ ቆቤ እኔን ኦይኔ፤ ዳሊዬ ፎላዬ ጉካ ከኦካ ሌሜን ጊዬይ፤ ካኒ ጌይኬን ራቅካ ቆቤንዻ። ¹² ጊታይ ኣርሺዻ ታታቻኔ ሃይሻይሻኔ ጎር ኦካ ሌሜንካ ኦይንካ ቆቤጃሌኔ ሃጌይያ፤ ወርቀትዻ ይያሼና። ወርቀት እንቃ እሺዻ፤ ወርቀት ኬና ኣይካ ዻቆ ይያሼና፤ ጊታይ ኣርሺዻ ከእያይ ቶኩሼ ወርቀት ክያኒዬ ጌዬኑጝ ኮምሼያ እንግን ከእያይካ ዋድማ ጊዬዩጝ ¹³ ኛፓስዻ ኣዬና ጊታይ ኣርሼ ኣኔን ቱዎጝ፤ ኣርሼኔ ሲኦሌ ኣዬና ጊታይ ኣርሺዬ ኣኔን ኦግዬይ ቱዎጝ፤ ኮምሼያ እንግን ክየም ክየም ከእያይ ጋሽክዮጝ። ¹⁴ ከኦይን ጩዋ ጊታይ ኣርሺዬ ኣኔን ሲኦል ክያኒዬ ፓቅሼያ ሃምካ ጉካ ኛፓሱጝ፤ ጉሁ እንካ ኛፓሱጝ ሃኣርሼን እንካ ላንሳጝ። ¹⁵ ጊታይ ማሬ ሮጝ ጊዬይ ኦካ ወርቀትካ ዻቆዬ ማር ጌይኔን ፓይላ ፓቅሼያ ሃምካ ጉካ ኛፓሱጝ።