ኦይን ዮሐንስ ጌዮጝ {ኢየሩሳሌም እን ኣይ ሃሉጝ} ¹ ከኦይን ጩዋ ሃጌይያ ፎላ ሃሊዬ ዳሊ ሃሊዬ፤ ፎላ ባካ ሌሜኔ ዳሊ ባካ ሌሜኔ ሳጊያዬ፤ ኛፓስዻ ካርሲኬ ጋኔ ኣኔኬን። ² ከተማ እንካ ይሁኔን፣ ኢየሩሳሌም እን ኣይ ሃሊጝ ሼኪኬ ኡታ እን ጎብሼ ኡማዬ ጎብኬ ዾዮክ ሃምካ ባሪዮዬ ሃጌይያ። ³ ፕርዻ ናቅዲ ታቺ ኬና ሺጝ እያጝ ኩንኬ ሃምካ ቆቤጃሌኔ ሃዋይያ፤ «እየዎ፤ ኦካ ኡጜጃሌንካ ባሪዮ ኣኔን ኦካ ጫቃንካ ውር፤ እሺ ኡፓ ከእንግን፤ እንግንዻ ማቲባ ዛርሲ ኔኒ፤ እሺ ባሪዮዻ ኣይባ ከአእንግን፤ ማቲባ ኣምላክ ጊዬይዻ። ⁴ ቋጭባ ጪራው ጊዬይ ፓይላ ከኦካ ካርቢ ጊዬይ፤ ካርሲኬ ጋኔ ኣርሼን ወይ ሞይካዾ ወይ ኦቆራ ወይ ጋሎ ኣኔኬን፤ ዴንታ ባካ ሌሜንዻ ሳጊያዬ።» ⁵ እን ኡፌ ኣኔን ኦይንካ ቆቤጃሌንዻ ሺጝ፤ እየዎ፤ ኦኬ ፓይላ ሃሻሚባ ሃሊ፤ ፕርዻ፣ ሃይሼ ኣን ክያጃጝ ናንዳካጝ ጌርሚኔዬ ኣዬ ኣኩሉኩጝ ቶኳ። ⁶ ዋይሼ ኣን እያጝዻ፤ «ሙኔና፤ ባሳጊዬ እንካ ኩዋዌ፣ እንካ ካርሲዬ እንካ ቱንሲዬ ሃኣን፤ እን ኮርጉ ቃዎጝ ከኦካ ሙዋ እንካ ዻቆጝ ካሺኬን ኣንቲቲዬ ሃኣይ እሺባ። ⁷ ካጝ ባሺ ፓይላ ጌይባ ኦግታጝ፤ ኣንዻ ሃማቲባ ኣምላክ ኔኒ፤ እሺዻ ማቲባ ውዋ ናኒ። ⁸ ኣይባዬ ጊታይ ኣይ ሪጎጝ፣ ጊታይ ማር ኣምኒዬን፣ ጊታይ ኣሽክዬን ኦኬ ጋራጝ፣ ጊታይ ኒሺኔ ጆል ውሩጝ፣ ጊታይ ኣሽኪኔጆል ኩጳሞጝ፣ ጊታይካ ኣስማቱጝ፣ ጊታይ ይወን ኦግታይ ኣይኬ ኦካ ባሪዮ ሹኑኩጝ፣ ጊታይካ ሾሮ ፓይላ ኦይንካ ሄክሽ እንግን ማቲባ ኬናካ ፓቅሼ ቅልቃጩም ክያኒዬ ኦካ ናፓስካ ጉወ። ይንዻ ሃኣርሼን እንካ ላንሳጝ። ⁹ ሶጳን ጊታይ ቋቁሼ ኦኬ ጋራ ጊታይካ ቱንሱጝ ከኦካ ውርካ ኤርጎ ሶጳን ጊታይ ጎሚ ዞንጶ ሶጳኑጝ ክየም ኩኔ፣ ዋይሼ ኣን «ኩዋባ፤ ሃዹዋልሼ ኡታ እን ማቲ ኚያጝካ ማድር እዕጝ። ¹⁰ ከመንፈስዻ ቦሼያ ኣን ኦካ ጋግ ክየም ኬና ኣይ ታቺዬ ኣይ ራጅሜዬ፤ ከተማ እንካ ይሁኔን ኢየሩሳሌም ጎብኬ ፎላ ዾዮክ ከሃምካ ባሪዮዬ ዹዋልሼያ ኣን። ¹¹ እሺዻ ሃኬና ላሉጝሼ ከጎቢንታካ ባሪዮ፤ ካሎን ላሉጜን ኔኒዻ ሃኬካ ባይ ኮኑጝ ጎቢዮጝ ሃኬካ ኢያሰጲድ፣ ሃኬና ኣይ ጫንቃል ኬካ ሼዳያ። ¹² ሃኬና ኣኔ ሃፑክ ታጲ ላማዬ ሃኬና ኣኔ ካርሚ ኬና ኣይ ታቺዬ ኬና ኣይ ራጅሜዬ፤ ኦግታይካ ሃፑካንዻ ውርካ ኤርጎ ታጲ ላማ ጎሬ ሃኬና ቶኩሼ ሮጝካ ውርካ እስራኤል ታጲ ላማን። ¹³ ከታጝ ሹሽ ቱሎጝ ኣና ሃፑክ ጅያን፣ ከታጝካ ጋጉጝ ኣና ሃፑክ ጅያን፣ ከታጝ ሹሽ ዴቆጝ ኣና ሃፑክ ጅያን፣ ከታጝካ ቷጉጝ ኣና ሃፑክ ጅያን። ¹⁴ ኦካ ካርሚካ ከተማ እንዻ ኣና ቶኦ ታጲ ላማ ጊታኬና ጋሽኪዬ፤ ከኦካ ቶኦ ጊታይዻ ቶኬ ኣኔ ሮጝካ ሐዋርያታን ታጲ ላማንካ ማድር እዕጝ። ¹⁵ ውርካ ኤርጎ ና ኣኔን ከኣን ሃሳውኔንዻ ኣኔ ካያካ ወርቄ ኬናካ ክንድዬ ከተማ እኔ፣ ሃፑካ ከተማ እኔ፣ ካርሚ ኔኒዬ። ¹⁶ ከተማ እንዻ ራጅምቴ ኔኒዬ ሆሮርማሞ ኔኒዬ ማቲ ሊኪዬ ሃኬና ኣይ ሄክንሲዬን ኣሁር። እሺዻ ክንድያ ከተማ እጝ ከካያ እዕጝ፤ ራጅምቲ ኔኒዻ ማቲያ ክንዲ ሺ ታጲ ላማ። ሆሮርማሞ ኔኒዬ ዼግ ኣዬን ኔኒዻዬ ሃእያይ። ¹⁷ ፕርዻ ክንዲያ ካርሚካ ከተማ እዕጝ፤ ራጅምት ኔኒዻ ከእን ኣይኬ ሄክንሲዬንካ ውርካ ኤርጎጝ ከሄክንሲዬንካ ውር ሃክንዲ ዽብ ክየሜ ኦይታም ኦይድዬ። ¹⁸ ካርሚ እንዻ ጋሽኪኬ ኢያሰጲድ፤ ከተማ እንዻ ሃኬና ጋሽኪዬ ከወርቄ ኬና ኣይ ጫንቃል ከሼዳያ። ¹⁹ ካርሚካ ከተማ እጝ ቶኦ ጊዬይ ሃኬና ጋሽኪዬ ከሃይነትካ ባይ ጊታኬና ጎቢዬ ፓይላ፤ እንካ ሌሜኑጝ ሃኬ ኢያሰጲድ፣ እንካ ላንሳጝ ሃኬ ሰንፔር፣ እንካ ማክንሳጝ ሃኬ ኬልቄዶን፣ እንካ ኦይድሳጝ ሃኬ መረግድ፣ ²⁰ እንካ ዶጝሳጝ ሃኬ ሰርዶንክስ፣ እንካ ላይሳጝ ሃኬ ሰርድዮን፣ እንካ ሶጵሳጝ ሃኬ ክርስቲሎቤ፣ እንካ ሎንካይሳጝ ሃኬ ቢረሌ፣ እንካ ሳልሳጝ ሃኬ ወራውሬ፣ እንካ ታጵሳጝ ሃኬ ክርስጵራስስ፣ እንካ ታጵክልሳጝ ሃኬ ያክንት፣ እንካ ታጵላንሳጝ ሃኬ ኣሜቴስጢኖስ። ²¹ ሃፑካን ታጵላማን ኣኔ ኦኬ ሹቃሹቃ ጊታኬና ኣይ ታጵላማ፤ ሃፑክ ክየም ክየም ሃኬና ጋሽክዬ ከኦኬ ሹቃ ኬና ኣይ ክየም። ጉዋር እን ኣኔን ኦካ ከተማ እጝ ኣና ወርቄ ጫንቃል ኬናካ ሼሽኪ ኬካ ሼዳያ። ²² ኣምላክ ታቺ እን ኣይ ሹቃካ ፓይላዬ ማድር እኔ ናንዳካጝ ጋዬ ቶኦካ ይሁኔን እኑጝ፣ ሃካና ጌይኬ ቶኦካ ይሁኔን ኦካ ከተማ እዕጝ። ²³ ጎቢንታካ ባሪዮ ናንዳካጝ ካኣዬ ሜሌሌ ማድር እንዻ ናንዳካጝ ኣዬ ፓኖስ ኔኑጝ፣ ከተማ እን ክያኒ ዎሺሽኬ እን ሹሼ ትጌሼ ካኡሾጝ። ²⁴ ዛርሲዻ ጃሌጆልባ ከሼሽክዬን ኔኒ፤ ቢታንካ ዳሉጝዻ ቦሼባ ሃም ኔኑጝ ጎቢንታ ጊዬይ። ²⁵ ምክርሼንካ ክራ ናንዳካጝ ማሬ ኦይን ኣኔኑጝ፣ ሃፑካን ኔኒ ከሹ እንቃዻ ሃጌንኬን። ²⁶ ጌጳሞካ ዛርሲዬ ጎቢንታ ጊዬይዬ ሻውባ ሃሚን ኔኑጝ። ²⁷ ማድር እጝ ከኦካ ወርቀትካ ዻቆ እን ቶኮጝ እንቃ፣ ኦግታይ ኣይ ጋራጝ ፓይላ፣ ጊታይ ኣኔ ኦኬ ጋራጋራዬ ጊታይ ሾሮሺኔጆሊዬ ክየምጵንዻ ሻውኬን ሃሚን ኔኑጝ።