ኦይን ዮሐንስ ጌዮጝ{ዳራካ እንካ ዻቆጝ} ¹ ከኦይን ጩዋ ውርካ ኤርጎ እን ዹዋልሼያ ኣን ሙዋካ ዻቆካ ዳራ እጝ ኣይ ጫንቃል ከሼዳያዬ ቱልኬ ኦካ ኡፌ ጆሌንካ ባሪዮዬ ካማድር እኑጝ፤ ² ሙዋካ ዳራ እንዻ ኣኔን ኦግዋይካ ጉዋር ጊታይ ኣኔን ኦካ ጫቃንካ ከተማ እን እርኔን። ኦካ ዳራ እንዻ ከታካ ዋርካታዬ ከታካ ቡዎኔ ኣና ሻሪካ ዻቆ ኬና ከክያጝካ ትጌሻን ኡፑቴን ካርቡ ክያጝ ታጲላማ፤ ቃቅቴናንካ ሻሪ እንዻ ሃኬናካ ባይሺሻጆል ዛርሲ። ³ ካርሲኬ ጋኔ ኣሺሞ ኣኔኬን፤ ኦካ ኡፌጆሌንካ ባሪዮዬ ካማድር እጜ ኣይባ ኦካ ከተማ እጝ ቱዎጝ፤ ውር ጊታይካ ዋድማዻ ይወን እሺባ፤ ⁴ ቶይባ ማሪ ኔኒዻ፤ ሮጝ ኔኒዻ ኣኔባ ማሪ ጊዬይ ክያኒ። ⁵ ካርሲኬ ጋኔ ምክርሼንካ ክራ ኣኔኬን፤ ኣምላካ ታቺ እን ናንዳካጝ ካላሉጝሼ እንግኑጝ ላሉጜንካ ፓኖሴ ኡሼንካ ሹሼ ዎሺሽኬን እንግን፤ ቢታዽባ ከቦንካ ቦን። ⁶ ውር እንካ ኤርጎዻ ዋይሼ እን፤ «ክያጃን ጊታጝ ሃጊታኬና ጌርምኔዬ ኣይ ኣኩሉኬ። መንፈሳንካ ውርካ ቶካ ባሪዮ ኣምላክ ታቺ እን ኦይንካ ሙኒንቴ ከድያውጝ ካዹዋልሼ ውርካ ዋድማኑጝ ይዕሲያ ውርካ ኤርጎ። {ኢየሱስ ኩንባ} ⁷ «እየዎ፤ ሃኩኒባ ይሪካ፤ ውር እን ዻዬ ክያጃካ ወርቀቱጝ ሃጫንቃል።» ⁸ ኣን እጝ ዋይ ኦግታጜ ጌዩጝ ሃኣይ ዮሐንስ። ከሹ እን ሃዋዬ ኦግታጜ ሃጌዮጝ፣ ሃቡድያ ኦካ ጃፍካ ውርካ ኤርጎ እን ዹዋልሼ ኣን ኦግታይ ይሁኔን፤ ⁹ ዬ እሺ ዋይሼ ኣን፣ «ኦይድባ፤ ኦይ እያይ ሻሜን/ ኣንዻ ሃኣይ ውርካ ዋድማ ከእኔ ጪኒጋን ኑኑዬ ውርካ ቶካ ባሪዮዬ ፕርዻ ከውር ጊታይ ዻዬ ክያጃካ ወርቀቱጝ ፓይላጝ፤ ይሁንቴ ባሪዮ። ¹⁰ ፕርዻ ዋይሼ ኣን እያጝ፤ ሹዋን ናንዳካጝ ሄክሾጝ ኦይ ክያጃካ ወርቀቱጝ ከማህትም ካቴን፤ ¹¹ ውር እንካ ሴሶጝ ካዻዬባ ሴሶ ኔኒ፤ እንካ ጮይዻ ካጮይባ፤ እን ኣይ ጫንቃልዻ ካኣይባ ጫንቃል፤ እንካ ይሁኔንዻ ካይሁንቴባ።» ¹² «እየዎ፤ ሃኩኒባ ይሪካ ኦይንካ ካሺዮጝ ኣኔባ ከኣን፤ ሃካሺሼባ ውር ክየም ክየም ከእያይካ ዋድማ ጊዬዩጝ። ¹³ ባሳጊዬ እንካ ኩዋዌ፣ እንካ ሌሜኔ እንካ ሁሬ፣ እንካ ካርሲዬ እንካ ቱንሲዬ ሃኣን። ¹⁴ ጊታይ ጩቢ ኣፓላ ጊዬይዬ ኣኔ መብትካ ሃምካ ሻሪ እንካ ዻቆ ዬክሼኔ ሺጝኬ ዻርካ ሃፑካ ከተማ እን ሻወኑጝ ጋይ ጫንቃል። ¹⁵ ኪያናኔ፣ ጊታይካ ኣስታኔ፣ ጊታይ ኣሽኪኔጆል ኩጳሞዬ፣ ጊታይ ኒሺኔጆል ውሬ፣ ጊታይ ይሁኔጆል ኦግታይ ኣይኬ ኦካ ባሪዮ ሹኑኬ፣ ጊታይ ናሺኔጆል ሾሮዬ ሾሮሺኔጆሊዬ ፓይላ ጋኔባ ሹኑክ። ¹⁶ ኣን ኢየሱስ ሃይዕሲሼያ ውርካ ኤርጎ ናኒ ኦጉዋይካ ቶኦካ ይሁኔን ካክያጅ ኦግታጜ። ኣን ሃኣይ ጊሜይካ ዳዊቴ ቢዛዬ፣ ሃኣይ ቢሊ እን ላሉጜን ከካሪንታጝ። ¹⁷ መንፈሴ ኡታዬ፣ ሺጝባ ኩዋባ፤ ካጝ ዋይዻ ካሺጝባ ኩዋባ፤ ጊታካጝ ኮርጉ ቃዎጝ ካፓዬንባ ፓይላ፤ ካጝ ዎሹጝ ፓይላ ካቦባ ሙዋካ ዻቆ ማም እያይ። ^{19 18} ሃኣጅሺሽባ ጊታይ ዋይ ክያጃካ ወርቀቱጝ ፓይላ፤ ውር ክየምጵንዻ ሌሜያ ኦካ ክያጃ ጊታጝ ኦኬ ክየምጵንዻያጝ፣ ባሪዮ ሌሜባ ኦኬ ጋራ ጊታይ ቶኩሼ ኦካ ወርቀቱጝ፤ ¹⁹ ውር ክየምጵንዻ ጆግሺዬ ኦኬ ጊታይ ቶኩሼ ኦካ ወርቀትካ ክያጃጝ ክየምጵንዻያጝ፣ ባሪዮ ጆግሺባ ባሊ ኔኒ ከኦካ ሻሪካ ዻቆ እን ቶኩሼ ኦካ ወርቀቱጜ ከተማ እንካ ይሁኔኑጝ። ²⁰ እን ሜይሼን ኦግታጙጝ፤ «ይንጌ፤ ሺጝ ሃኩንባ ይሪካ። ኣሜን፤ ኢየሱስ ታቹጝ ዮ፤ ኩዋባ። ²¹ ኣይኔንካ ኢየሱስ ታቺ እን ካኣይሼባ ዛርሲካ ባሪዮ፤ ኣሜን።