ኦይን ዮሐንስ ጌዮጝ {ወርቀት እን ኣይ ቱፑምኔኔ ማድሬ} ¹ እን ኣኔን ኦይንካ ኡፌን እን ቶኩሼ ታካ ቱዎጜ ታካ ሹኑኩጝ፣ ጎም ወርቀት ኬና ቱፑኔ ካቴኬ ማህትም ሶጳ ከቡዋ ቡዎኔ ሃጌይያ። ² ውርካ ኤርጎ ቁዋቃ ክየም ከናቅዲ ታቺ፣ ሺጝ ማህትማን ጊታጝ ቡሌኔ ወርቀት ይያሼኔ ሃኒንካ ሁሉኩሾጜ? ኬራፔኔ ሃጌይያ። ³ ኣይባዬ ኣይኔን ከፎላ ዾዮኩጝ ኣይኒን ከዳሊ ክያኑጝ፣ ኣይኒን ከኦካ ዳሊ ዱቡጝ ወርቀት እን ይያሼን ወይ ካሻም ጃወ ካቶዮጝ ውር ክየምጵንዻ ኣኔኬን። ⁴ ኣንዻ ውር ኬናካ ይያሽ ወርቀት እን ወይ ካሻም ጃወ ካቶዮጝ ከእን ውር ክየምጵንዻ ማሬ ኣኔኑጝ ሃኦቆሪያ ካሎን። ⁵ ከኦይን ከኦካ ውር ጌጵሹጋን ክየም ዋይሼ ኣን ኦይ ኦቆሬን፤ እየዎ፤ ሞሆ እን ኣይኬ ኦካ ውርካ ይሁዳጝ፣ ቢዛካ ዳዊት ባሺዬ ናሹጛ፤ እሺዻ ካይያሼ ወርቀቴ ካቡሌ ማህትማን ሶጳን ቻሊባ። ⁶ ከኦይንዻ ከኦካ ቆቤኔ ከኦካ ዳቢ ኣሁራን ጊታይ ሙኔዬ ኣይ እያይ፣ ከኦካ ጫቃንካ ውር ጌጵሹጋንዻ ሃጌይያ ኦኬና ዊ ማድር ኬና ኒቄ ዾሬ፤ ማድር እንዻ ኣኔ ሼይህ ሶጳዬ ካርቡ ሶጳዬ፤ እንግንዻ ሃመንፈስካ ባሪዮ ጊታይ ይዕሲሼ ዳሊ ክያኑጝ ፓይላ። ⁷ እሺዻ ኩኔ ቦዋ ወርቀት ከኦካ ቡዎንካ እን ኡፒ ኦካ ኦይንካ ቆቤን። ⁸ ከሹ እን ቦወ ወርቀቱጝ ዳባን ኣሁራን ጊታይ ሙኔዬ ኣይ እያይኑጝ፤ ውር ጌጵሹጋን ላማታም ኦይዳን ጊታይ ቡዳ ኦካ ሌሜንካ ማድር እን ከማሪ ጊዬይ፤ እንግን ክየም ክየም ጎም ቾንጉካ ይሁኔንካ ቅዱሳኔ ኣንቲቲካ ወርቄ ኬና ቋቋ ቁኛዬ ጊያ። ⁹ ሺጜን እያጝዻዬ ኪዋ ይያሪ ሃሊ፤ «ከቦወ ወርቀቱጝ፣ ከቡሌ ማህትማኑጝ ሁሉኩሼ እንባ፤ ናንዳካኦ ኒቃ እን፤ ከኒያቡ ኑኑዻ ከኦካ ውር ፓይላ፣ ከኦካ ቶግ ፓይላ፣ ከኦካ ውር ፓይላ፣ ከኦካ ዛርሲ ፓይላ የኬራፒሼያ ውር ባሪዮ። ¹⁰ ናንዳካ ኣምላክ ጉዋዩዻ የሻምያ እንግን መንግስቴ ውርካ ቃሼ፤ እንግንዻ ጌጳዽባ ዳሊ ካይኒ። ¹¹ ከኦይን ጩዋ ሃቶይያ፤ ሃዋይያ ናቅዲካ ውርካ ኤርጎካ ባሪዮ ጁዋኑ፤ ጁዋንቲ ጊዬይዻ ሃሺወ ከኦካ ሺ ሳጊዬ፤ እንግንዻ ከኦይንካ ቆቤኔ ከኦካ ዳቢ ጊታይ ሙኔዬ ኣይ እያይ፣ ኣኔን ኦካ ማራማራካ ውር ጌጵሹጋንዻ፤ ¹² ከናቅዲ ኬና ኣይ ታቺዻ ሺጝ እያጜ ኪዋ ይያሪ፤ «ማድር እን ኒቆጝ ቁዋቅት ኔኒዬ ሆድማሞ ኔኒዬ፣ ፓካልማሞዬ ቁዋቅትዬ፤ ከቦወ ጎቢንታዬ ጌጳዬ፣ ጎሺዬ ሁሉኩሼ እንባ። ¹³ ከኦይን ጩዋ ከፎላ ዾዮኬ ከዳሊዬ፣ ከዳሊ ቱዎጜ ከኛፓሴ፣ ከኦግታይ ሙኔዬ ኣኔን ቱዎጝ ፓይላ ሺጝ እያጜ ኪወን ይያሪዬ ሃዋይያ፤ «ከእን ኡፌን ኦይን ቆቤ ጃሎጝ ማድር እጜ፣ ጊሺዬ ጌጳሞዬ፣ ጎቢንታዬ ቁዋቅትዬ፣ ከቦንካ ቦን ካኣይ ኔኒ።» ¹⁴ ዳቢ ኣሁራን ጊታይ ሙኔዬ ኣይ እያይዻ ሺጛ ኣሜን፤ ውር ጌጵሹጋን ቡድኬ ማሪ ጊዬይዬ ይወና።