ኦይን ዮሐንስ ጌዮጝ {ኦካ ኡፌን እን ኣኔን ፎላ ዾዮኩጝ} ¹ ከኦይን ጩዋ፣ እየዎ፤ ሃጌይያ ሃፑክ ኬና ቦወ ፎላ ዾዮክ፤ ከኦካ ሌሜንካ ይጝ ከእያይ ሃጌዮጝ ናንቅዲ ሃሳውኔ ኣኔ ሃዋዮጝ፣ ዋይሼ ኣን ኩዋው ዮጝ፤ ካርሲኬ ጋኔ ሃ ዹዋልሼ እንባ ኦይንካ ሁሉኩሾጝ» ² ይሪካ ኣንዻ ሃኣይኬ መንፈስ፤ እየዎ፤ ዾራ ኦካ ኡፌንካ ባሪዮ ፎላ ዾዮክ፤ ኣኔን ኦካ ኡፌን ኔኒዻ ኡፌን። ³ እን ኡፌ ኣኔዻ ሙኔን ዕንቁካ ኢያስጲድኔ ሰርዲኖዬ። ዚሊ እን ሙኔን መረግድካ ዕንቁዻጝ ጱዽ ኦይንካ ኡፌኔ ጊያ። ⁴ ከኦካ ማራካ ኦይንካ ቆቤን እንቃ ኣና ኦካ ቆቤን ላማታም ኦይዲ፤ ከኦግዬይዻ ኣና ውር ጌጵሹጉ ጊታኬና ኪሚ ኣፓላ ፎልቼኔ ከኦካ ሹቦ ጊዬይዻ ኣይሼ ጌጳሞካ ወርቄ ኣና ውር ጌጵሹጉ ላማታም ኦይዲ ጊታኬና ቆቢ። ⁵ ከኦይንካ ኡፌን ማኬንካ ጎቴ ናቅድዬ፣ ኤርግዬንካ ጉጉናትዻ ቱላ፤ ከኦካ ሌሜንካ ኦይንካ ኡፌንዻ ፓኖስ ሶጳ ኣኔን ላሉጜን፤ ሶጳን ጊታይዻ ሃመንፈስካ ባሪዮ። ⁶ ፕርዻ ከኦካ ሌሜንካ ኦይንካ ቆቤን ኣና ኛፓስካ ቡርጩቆ ኬና ሻምኬ ሼዳያ ጫንቃል። ከኦካ ጫቃንካ ኦይንካ ቆቤንዻ፣ ከኦካ ማራማራ ኔኒዻ ከታካ ሌሜኔ ከታካ ሁሬ ኣና ዳቢ ኣሁር ጊታኬና ቁዋቁሼ ከካርቡዬ ኣይ እያይኔ ሙኔ። ⁷ እንካ ሌሜን ሙኔዬ ኣይ እያይ ሃዳቢ፣ እንካ ላንሳዻ ሃኬና ሙኔን ቢህ፤ እንካ ማክንሳጝ ሃኬና ሙኔን ማሪካ ውር፤ ፕር እንካ ኦይድሳጝ ሃኬና ሙኔን ባሩጝቆ ኬና ዋሪ። ⁸ ኦኬ ኣሁር ጊታይ ሙኔዻ እንግን ክየም ክየም ሃጊታኬና ኣኔ ታቡጉ ላሃ ላሃ፤ ከኦካ ሩዋ ጊዬይ ሹኔኬ ቱዎጜ ሃኬና ቋቁሼ ከካርቡ፤ ከሹሼ ምክሬ ሺጜን «ቅዱስ፣ ቅዱስ፣ ቅዱስ፣ ባካ ሌሜኔ፣ ይጝ ኣኔዬ እን ሺጝካ ኩኔኔ፤ ኣምላክ ታቺ እን ኣይ ሹቃካ ፓይላጝ» ሺጜን እያይኔ ጱዽሼኬን። ⁹ ኦግታይ ሙኔዬ ኣይ እያይ ናንዳካ እን ኡፌን ኦይንካ ቆቤኔ ከቦንካ ቦን ማቲ እያይኔ ናንዳካ ጎቢንታ እንካ ኡፑጝ፣ ከሹ እን ጋዬ ጌጳሞዬ ጎቢንታጝ፣ ¹⁰ ውር ጌጵሹጋን ላማታም ኣሁራን ጊታይ ቦድ ኦካ ማሪካ እን ኡፌን ኦይንካ ቆቤዬ፣ ኣኔን እንካ ኡፑንቴ ቦን ጮሉጝ ይሁኔን፤ ኣጁጝ ጌጳሞ ጊዬይዻ ኦካ ሌሜንካ ቆቤኔ ሺጝ እያጝ፤ ¹¹ ታቺ እን ጉዋዩዬ ኣምላክ እን ጉዋዩ ዮ፤ ከቦወ ጎቢንታዬ ጌጳሞዬ፣ ቁዋቅትዻጝ ሁሉኩሼ እንባ፤ እን የሙኒያ ፓይላዬ፤ ሙና ከክያጃ ኑኑዻዬ፤ ማቲያዻዬ።»