ኦይን ዮሐንስ ጌዮጝ {ከኦካ ቶኦካ ይሁኔን እን ኣኔን ሰርዴስ} ¹ ከኦካ ቶኦካ ይሁኔን እን ኣኔን ኦካ ሰርዴስ ሺጝ እያጜ ቶኳ ሜርሜር፤ እን ጎም መንፈስካ ባሪዮ ሶጳኔ እን ጎሚ ቢላን ሶጳን ከቡዋወ ሺጝ እያጝ፤ ሃእባጅያ ዋድማ ኑኑ፤ ከሮጝ የኣይ እያይ፤ ኣይባዬ የኣርሺያ። ² ዬ ናሹጝጋ፤ እን ሄክሽ ሃምካ ኣርሼኔ ኦይን ሺዺዻ ቁዋቅትሽባ፤ ዋድማ ኑኑ ከኦካ ሌሜንካ ኣምላክ ናኒ ማቲ ካሎኔ ሃካና ጌይኬን። ³ ኣኪ ጶቅሲባ እን የቦወዬ የዋዬዬ፤ ዋይሺንቴባዻ፤ ሁሉካ ይሁኔንዻ። ዬ የማሪያ ጬይኔንያጝ ሃኩንሼ እንባ ከጓርጉ፤ ካኩዋሼ እን ከዋዳ ኬና ኣኔን እያኑጝ የእባጅኬን። ⁴ ኣይባዬ ጊታይ ማር ኣፓላ ጊዬይ ኦኬ ጋራ ክያኒ ሻምሼኑጝ ውር ጩዋማ ኣኔባ ከእን ሰርዴስ፤ እንግንዳ ኪም ኣፓላ ፎልቼኔ ፓይባ ከኣን፤ ይንዻ ሃኬናካ ሁሉኩሼ እንግኔ። ⁵ ካጝ ባሺ ኪምባ ከእንግን ኣፓላ ፎልቼን፤ ኣንዻ ከኦካ ሌሜንካ ባባዬ ከኦካ ሌሜንካ ውርካ ኤርጎዬ ሃማኚሺባ ናንዳካ ሮጝ ናኒ፤ ሃካይሲኬን ሮጝ ኔኒዻ ከኦካ ወርቀትካ ዻቆ። ⁶ መንፈስ እን ሜይሼ ቶኦካ ይሁኔን ካጝ ኣኔ ናቡጝ ካዋይባ። {ከኦካ ቶኦካ ይሁኔን እን ኣኔን ፊላድልፍያጝ} ⁷ ከኦካ ቶኦካ ይሁኔን እን ኣኔን ፊላድልፍያ ሺጝ እያጜ ቶኳ ሜርሜር፤ እን ኣይ ቅዱሴ ኣይ ኣኩሉኩጝ፣ እን ጎሚ ቁሉፍካ ዳዊትዻ ከቡዋጝ ሺጝ እያጝ፤ እን እሺ ቦዎጝ ውር ክየምጵንዻ ቻሊኬን ሃጌን፤ እን እሺ ሃጌዻጝ ውር ክየምጵንዻ ቻሊኬን ቦወን። ⁸ ሃእባጅያ ዋድማ ኑኑ፤ እየዎ፤ ሃፑክ ኬና ውር ክየምጵንዻ ካማሬ ሃጌን ቻሊዬን ሃሻምያ ከኦካ ታካ ሌሜን ኑኑ። ቁዋቅት ኑኑ ኣዬ ዽታኮጝ ሃእባጅያ፤ ኣይባዻዬ የጎምያ ክያጃ ናኒ፤ የካኔ ቡድኬን ሮጝ ናኒዻ። ⁹ እየዎ፤ ጊታይ ማርባ ውርካ አይሁድ ኣዬኔ ዋጅጌን ሃኣያ ውርካ ኣይሁዱጝ፣ ጊታይ ሾሮሼኑጝ፣ ጊታይ ኣኔን ሃምካ ማህባርካ እጁጙጝ ካፓይኔ ሃሚን ኑኑዬ ካቡዴ ኦካ ጃፍ ኑኑዬ ካይሁኖጝ፣ ኣን ሃናሺዬ እንዻ ካግባጆጝ ሃሻሚ እንግንባ። ¹⁰ ከቁዋቅትሽ ከኦኬ ዶንሺዬኔ ኤርጎ እን ናኒ ሃሜይሼ እኑጝ ናንዳካጝ የሻሜ ሹቃጝ፣ ፕር ኣንዻ ካፓታንዬ ጊታይ ቆቤን ፔኑጝ ክያኑጝ ከዋዳካ ፓታና ጊታይ ፓይንሼን ፔኑጝ ፓይላ ሃማንኪ እንባ። ¹¹ ሃኩንባ ይሪካ፤ ውር ክየምጵንዻ ካማር ጌጳሞ ኑኑ ከኦኑኑ ቦወኔ እን ኑኑ ኣኖጝ ጎም ሹቃ። ¹² እን ባሺ ከኦካ ቶኦካ ይሁኔንካ ኣምላክ ናኒ ሃሻሚባ ኣምድ፤ ክየምጵንዻ ቱልኬን ከኦይን። ሮጝካ ኣምላክ ናኒዬ ከተማካ ኣምላክ ናኒዬ ይንዻ ከኦካ ኣምላክ ሮጝካ ኢየሩሳሌም ሃሊ እንካ ጎቡጝ ሃቶኩሼባ ኦይን፤ ሃቶኩሼባ ሮጝ ናሊ እን ናኒዻ ኦኔኒ። ¹³ መንፈስ እን ሜይሼ ቶኦካ ይሁኔን ካጝ ኣኔ ናቡጝ ካዋይባ። {ከኦካ ቶኦካ ይሁኔን እን ኣኔን ሎዶቅያጝ} ¹⁴ ከኦካ ቶኦካ ይሁኔን እን ሎዶቅያጝ ሺጝ እያጜ ቶኳ ሜርሜር፤ እን ኣይ ኣሜኑጝ፣ ፕርዻ እን ኣይካ ኣኩሉኬ ኣይ ማኚ ሹቃጝ፣ እን ኣይ ሙዋካ ኦግታይ ሙኖጝ ሺጝ እያጝ፤ ¹⁵ የማሬ ጪራታ ወይ ቄጬ ኣዬኑጝ ሃእባጅያ ዋድማ ኑኑ፤ ዋንቲ የኣይያ ጪራታ ወይ ቄጬያጝ ዋቲ ሃናሺያ እን። ¹⁶ ኣኪ ናንዳካ የኣዬ ኬና ኣይ ቱልጵኑጝ ዬ ናንዳካጝ የማሬ ቄጬ ወይ ጪራታ ኣዬኑጝ ሃሺጝካ እን ከኦካ ቶግ ናኒ ቡሌ ፓልቄን። ¹⁷ የሺጜን ኣን ሃኣይ ሆድሞ፤ ሃኣይ ውርካ ኣንቲቲዬ ኦኬ ክየምጵንዻ ዎሺሼኬን ኣን፤ ኣይባዬ የኣዬ ውርካ ጋሎዬ፣ የኣዬ ውር ኬና ኣይ ጭራታዬ፣ የኣዬ ውር ኬና ኣይ ኩፒዬ፣ የኣዬ ውር ኬና ኣይ ሙሙዾዬ የኣዬ ውር ኬና ኣይ ሙዋጩጝ የካኔ እባጅኬን። ¹⁸ ዬ ከኣዬ ሆድሞጝ [ወርቄ እን ቃልኬ ጉሁ ክያኑጝ]፣ ካማር ሹሙካ ሙዋጭ ኣዬን ኑኑ ጌዬኔ ኣፓላ ፎልቼን እንኬ ኪሞጝ፣ ከቻሊዬ ጌዬኑጝ ከኡዋሩጜ ከኦናኒ ዋቃትካ ካርቡ ኑኑ ጵሼኑጝ ሃኪሊ እንባ። ¹⁹ ኣን ጎሪባ ጊታይ ሃናሺዮጝ፤ ሃቃጥባዻ። ዬ ቁዋቅትሽባ፤ ሁሉካ ይሁኔንዻ። ²⁰ እየዎ፤ ሃዾሪ ኦካ ሃፑኬ ሃቋንቁባ፤ ውር ክየምጵንዻ ዋይ ናቅዲ ናኒዬ ቦውሼያ ኣን ሃፑክያጝ ሃሁሉክ ሃሚን ኔኒዬ ሃኣሜንባ ከእሺ፤ እሺዻ ኣሜንባ ከኣን። ²¹ ከእያይ ኣን ሃባሺዬዬ ሃናሹጛ ኡፌኬ ባባ ሃምካ ኦካ ኡፌን ኔኑጝ፣ ካጝ ባሺዻ ካኡፌኬ ኣን ሃምካ ኦኬ ኡፌን ናኑጝ ሃሻሚባ። ²² መንፈስ እን ሜይሼ ቶኦካ ይሁኔን ካጝ ኣኔ ናቡጝ ካዋይባ።