ኦይን ዮሐንስ ጌዮጝ {ቶኦካ ይሁኔን እን ኣኔን ኤፌሶን} ¹ ናንዳካ ቶኦካ ይሁኔን እን ኣኔን ኤፌሶኑጝ ሺጝ እያጜ ቶኳ ሜርሜር፤ እጝ ጎሚ ቢሊ ሶጳ ከቡዋ ቡዎኑጝ፣ ከእን ሙኔን ከኦካ ጫቃንካ መቅረዝካ ወርቄ ሶጳንዻጝ ሺጝ እያጝ፤ ² ሃእባጅያ ዋድማ ኑኑዻ፣ ኦኬ ዎሼን ኑኑዬ ኦኬ ዶንሺዬን ኑኑዬ። ኦኬ ጋራን ጊታይዻ ከማር ድርግትሼ ሳጊዬኔ፣ ጊታይ ማርባ ሐዋርያት ኣዬንዻዬ ዋጅጌን ኡዋው ሃኣያ ሐዋርያታንዻጝ የእያምዬ የጌዬ ጊታይ ኣይካ ሾሮዻዽጝ ሃኣባጅያ። ³ ፕርዻ ከኦኬ ዶንሺዬ ሌምዬን ኑኑዬ የጌዬ ጋሎ ናንዳካ ሮጝ ናኒዻጝ ሃእባጅያ፤ ከኦካ ጊታጝዻ ፓይላ የካኔ ዻቺኬን። ⁴ ካኣይባዬ ኦኬናካ ዻቢሺዬ እን ኣኔባ፤ ይንዻ የኦይዲያ ናሺማ ኑኑ ባካ ሌሜኑጝ። ⁵ ኣኪ ቃቢባ እን የቡዴ ኦኑጝ፤ ሁሉክ ይሁኔኔ ሻምባ ኦግታባ የኣኒኔ እባ ከሌሜን ኣሽክዬኑጝ፤ የማርያ ይሁኔን ሁሉኬንያጝ፤ ሃኩንዬ ሃቦውባ መቅረዝኑኑ ከኦይን ኣኖጝ። ⁶ ኣይባዬ የኣኔ ኦኬ ሹቃ ይዕጝ፤ ዋድማ ውርካ ኒቆላውያን እጝ ኣን ሃሚኖጝ እንዻ የሚኔያ። ⁷ መንፈስ እን ሜይሼ ቶኦካ ይሁናን፣ ካጝ ኣኔ ናቡጝ ካዋይባ፣ እንካ ባሺ ከእን ኣኔን ኦካ ገነትካ ባሪዮጝ ካኣሜኬ ኦካ ሻሪካ ዻቆጝ ሃሻሚባ። {ቶኦካ ይሁኔን እን ኣኔን ሰምርኔስ} ⁸ ናንዳካ ቶኦካ ይሁኔን እን ኣኔን ሰርምኔስ ሺጝ እያጜ ቶኳ ሜርሜር፤ እንካ ካርሲዬ እንካ ቱንሲዬ፣ እን ባ ኣርሺዬ ኣይ እያይኔ ሺጝ እያጝ፤ ⁹ ሃእባጅያ ጋሎ ኑኑዬ ኩፒ ኣዬን ኑኑዬ፤ ካኣይባዬ የኣይ ሆድሞ፤ ጊታይ ማርባ አይሁድ ኣዬኔ ሺጜን ሃኣያ ኣይሁዴ ካይሲዬን ሮጝ ኑኑጝ ሃእባጅያ፤ ዬ እንግን ጋይ ማህባርካ እጁጝ። ¹⁰ ኦይ ጋሎን እን ኣኔን እን ዬክሼን ሪግሺኔን። እየዎ፤ ዲያብሎስ ካፓታንሲዬ እየው ዾቁሼባ እየው ክየም ክየም ኦካ ቶኦካ ቁሜን። የጌያባ ጋሎዻ ሹ ታጲ፤ ሌይ ሃምካ ሄክሽቴ ሃምካ ኣርሼኑጝ ማቲባ ጊታኬና ኣይ ሹቃ፤ ኣንዻ ሃኣይባ እን ጌጳሞካ ዻቆ። ¹¹ መንፈስ እን ሜይሼ ቶኦካ ይሁናን ካጝ ኣኔ ናቡጝ ካዋይባ፤ እን ባሽ ኣርሼን ከኣርሼን እንካ ላንሳጝ ክየምጵንዻ ጊዬሜንኬን። { ከኦካ ቶኦካ ይሁኔን እን ኣኔን ጴርጋሞኑጝ} ¹² ከኦካ ቶኦካ ይሁኔን እን ኣኔን ጴርጋሞን ሺጝ እያጜ ቶኳ ሜርሜር፤ እን ጎሚ ኤቤል እን ቶጮል ኣይ ጫሩጝ ሺጝ እያጝ፤ ¹³ የኡፑኔ ኦይን ኣና ኦካ ኡፌንካ እጁጙጝ ሃእባጅያ፤ ኣይባዬ የጎምያ ሮጝ ናኒ ከሹቃ። ከኦይን እጁጝ ኡፎጝ ከኦካ ከተማ ጉዩ ማኚ ሹቃ እን ናኒ ኒሾጝ ኣይኒን ከቦንባ ኣንቲጳስ ኣኖጝ፣ እምነት እን ኑኑ ኣኔን ከኣኑጝ ካኒ ዻችኬን። ¹⁴ ካኣይባዬ የኣኔ ኦኬ ጩዋማ ጊታኬና ካዻቢሺዬ እን፤ ሃንታካ እስራኤል ካኣሜ ምሽ እን ቡልሼ ኦግታይ ኣይኬ ኦካ ባሪዮ ሹኑክ ጋላዬ ካኩጳሲምኖጝ የኣጅጜ ኦካ ሌሜን ጊዬይ ኦካ ካትምኔኑጝ እርሮ እንካ በለዓምን ባላቅን እርርሲዮጝ ውር ክየም ክየም ጊታይ ዻዮጝ ኣኔባ ኦካ ጫቃን ኑኑ፤ ¹⁵ ውር ጊታይ ዻዬ እርርሲኔንካ ኒቆላውያኑጝ ኣኔባ ከኦኑኑ። ¹⁶ ዬ ሁሉክ ይሁኔን፤ የማሪያ እያይ ሻሜንያጝ ሃኩንሼ እንባ ይሪካ፤ ሃቶኩባ እየውዻ ከኤቤል እን ኣኔን ኦካ ቶግ ናኑጝ። ¹⁷ መንፈስ እን ሜይሼ ቶኦካ ይሁናን ካጝ ናቡ ኣኖጝ ካዋይባ፤ ናንዳካ እን ባሺ ኣይባ ከኦካ መና እን ድኮጝ፤ ፕርዻ ከኦካ ውር እን ቦውጝ እንቃ እን ውር ክየምጵንዻ ማሬ እባጄኑጝ ሃኣይባ እሺ ባይ ፎልቼን እን ቶኩሼ ሮጝ ሃሉጝ። {ከኦካ ቶኦካ ይሁኔን እን ኣኔን ትያጥሮን} ¹⁸ ከኦካ ቶኦካ ይሁኔን እን ኣኔን ትያጥሮን ሺጝ እያጜ ቶኳ ሜርሜር፤ ካርቡ ጊታይ ዊ ሌሉጝካ ጉወ ጃፍ ጊታይ ሙኔን ከወርቄ ኮኑጝ ፓቅሼ ጉሁ ክያኒዬ ጫጩጝ ውዋካ ባሪዮ ሺጝ እያጝ፤ ¹⁹ ሃእባጅያ ኦኬዋድምዬን ኑኑ፣ ናሺማ ኑኑ፣ እምነት ኑኑ፣ ዋድማ ኑኑዬ ኦኬ ዶንሺዬን ኑኑዬ፤ ፕርዻ ከኦካ ዋድማ ባ ኑኑካ ሌሜን ሳጊ እንካ ጋን ካሳጊዮጝ ሃእባጅያ። ²⁰ ካኣይባዬ ሃኣኔ ኦኬናካ ዻቢሺዬ እን፤ ኚያጝ እን ሺጜን ኣን ሃኣይ ውርካ ቶካ ባሪዮጝ ድርግትሼያ ኤልዛቤል፤ እሺ ውርካ ዋድማን ናኒ ካኣሽክዬ ኩጳሞዬ ካኣሜ ምሽ እን ቡልሼ ኦግታይ ኣይኬ ኦካ ባሪዮ ሺኑጝ ጋላጝ ካቃውባዬ ጊያምሺሻ። ²¹ ከኦካ ኩጳሞ ኣሽክዬን ኔኒ ካሁሉኬ ይሁኔኑጝ ሃኣይያ እሺ ሹዋን፤ ዬ እሺ ካኒ ናሺኬን። ²² ዬ ሃፓቅሼባ እሺ ከኦካ ጋሎካ ኣልጋ ክያኒ፤ ጊታይ ኣሽክዬን ከእሺዻ ኩጳሞጝ፣ ከኦካ ጉዋር ኔኒ ማራ ይሁኔን ሻወንያጝ፣ ሃቦሼባ እንግን ጋሎ ኬና ኣይ ቁዋቃ፤ ²³ ሃቃጥባ ሃንታ ኔኒዻ ከኣርሼን፤ ከኦይን ጩዋ ውርካ ቶኦካ ይሁኔን ፓይላ እንካ ቶይ ሻኔ ቃቦዬ ሹቃጝ ካኣዬ ኣኑጝ ጊባጅባ፤ ናንዳካ እንግን ክየም ክየም ሃካሺሼ እንግንባ ከእያይ ዋድምዮጝ፤ ²⁴ እየው ጊታይ ማር እርርሲኔን ኔኒ ዋዬኔ ጊታይ ማር ኦይን ሺጜ ሃኦካ ድኬንካ እጁጝ ዋዬኑጝ፣ ዬ ናንዳካ እየው ጊታይ ሺዺ ኦካ ትያጥሮን ሃሜይሼባ እየው ይዕጝ፤ ሃኣይሼን እየው ኦኬ ዴጩጉ እንቃ፤ ²⁵ ሌይ ሃም ኣንካ ኩዋዎጝ ጎም ሹቃ እን ኣንኬ እየውጝ። ²⁶ እንካ ባሺዬ እንካ ሹዋጵሼ ዋድማ ኔኒ ሌይ ሃምካ ቱንሱጝ ከኦካ ኣሕዛብ ሃኣይባ ጌጳሞ፤ እሺዻ፥ ²⁷ ሻምሼባ እንግን ሃሚን ጊዬይ ከሴጋካ ዛው፤ ዺዽባ እንግንዻ ከኣንቲትካ ጁ፤ ይንዻ ከእያይ ሃኣን ሃጌዬኬ ኦካ ባባ ጌጳሞጝ፤ ²⁸ ኣንዻ ሃኣይባ እሺ ቢሊካ ሃሪሻ። ²⁹ መንፈስ እን ሜይሼ ቶኦካ ይሁኔን ካጝ ኣኔ ናቡ ካዋይባ።