2
1
ኣጋታኻ ያ ኤያ ኤዲ ኣብዛራ ዻባሞን ካያ፣ ዬር ይንካ ሃም ሃክጫያ ቆልማሞ፤ ኦጎኖኻሞ ኤዲ ኣብዛራ ዻባሞን ዬራ ሃካይና ውልካ፣ ያ ሃዛራና ሃካይ፤ ኦጎኖኻሞ ያ ዻባሞን ካያ ዋዳማ ኣጋሚ ኣሽክቴና ሃዶ።
2
ኤና ኦጎንታ ዋድማይናዛራ ባርያሳ ዻባሞኖ ካዻይኖ ልኪ ኮዶንም ውቲ ዼሳና ዎዼሳይ።
3
ታ ናንሢ ያ ኤያኻ፣ ኤና ዋኒዛራ ዻባሞን ካቴ፣ ዋድማ ኣጋም ሃኣሽካያ ዳና ባርያሳ ዻብንሾንባራ ሃዻቃያግያው ሃማይሻዶ?
4
ዎይካሞ ባርያሳ ፃላሞኖ ሴሶንባራኻ ሃም ኮማሳይንም ጶቅስማ፣ ክሳ ፃላሞንቤ፣ ዬርን ክቻላንቤ፣ ክዶንሻንቤሳ ጱፃሞን ቦዋ ሃቦዋይ?
5
ኮዶን ሃሳ ዼላቅን ሃኤሳርሞንካቤ ዎይላም ሃሳ ማቲሞንካ ሃማንቴ ባርያ ዻባሞን ይካያ ሮራ ጋላ ሃዛራ ዻባሞን ፑኡሻና ሃፑኡሻይ።
6
ባርያ “ኤና ውልናንቴ ዋድማና ኬኣሽካዳናግያ ባዛናም ካሻና ክካሻይ”፤
7
ኤና ዋድማን ፃሊን ዋቻዻንቴ ኣሽክቴ ዳንቴ ጎሺንቤ፣ ጎብንቶንቤ፣ ዴንታን ላይ ዳዻይንም ዛጋይናናንቴ፣ ሳዳን ላይን ዳዻይንም ኖ ኬናንቴ እማና ክእማይ።
8
ኮዶን ኤና ዪም ናሻይና፣ ጎንዼን ጋራንቴ ዛርቦን ጫጋይናዛራ ዻብንሾንቤ ዋጭንቤ ዬስካና ኮዬስካይ።
9
ኤና ዛርቦን ኣሽካይና ውልዛራ ብራቴንካ ኣይሁድዛራ ሃያንቴኻሞ ቶርስናዛራ ጋሎቤ ቃቦቤ ናኣና ኮናኣይ፤
10
ኮዶን ኤና ዋድማን ጋዛን ኣሽካይና ውልናንቴ፣ ብራቴንካ ኣይሁድናናንቴ ሃያንቴኻሞ ቶርስናናንቴ ጎሺቤ ጎብንቶቤ ኡሲ ቻይንቶቤ ዳና ኮዳይ፤
11
ኦጎኖ ባርያ ኤዲ ሃውዛራኻሞ ክዎዽሞንታኻና።
12
ዳምቢ ኮቆልማ ኤና ሴሶን ኣሽካዳና ፓይላ፣ ዳምቢ ኮቆልማና ኬካያይ፤ ዳምቢ ኮዳዃ ኤና ሴሶን ኣሽካዳና ኬዛራ ዻባሞን ዳምቢንካና ካዻይ፤
13
ኦጎኖኻሞ ባርያሳ ዎትሮ ኤና ጋዛና ሃንዻይና ዳምቢን ኤሳራንቴ ኣሽካይናና፣ ኤና ኤሳራይና ትማሞ።
14
ቶርስና ዳምቢን ቆልምና ዬራ ዳምቢንሣ ጌይዻዳናም ዼስማ ሱን ኣሽክቴና ኬዶ፣ ኬሳ ዳምቢ ይቆልምናኻሞ ኬ ይባራንካ ይናንቴ ዳምቢና።
15
ኬሳ ዎይላምኖ ማኚ ዳንቴ ኬናንቴ ኮጌያንታኻ፣ ኬሳ ቃቦኖ ኬም ኮዻብንሻንታኻ፣ ኬም ኮማራንታኻኻሞ ዳምቢንሣ ዬራ ጌይዻዳ ኬሳ ዎይላምሮ ኡካዻዶኒና ኮዻዋይ።
16
ኣጋኻሞ ሜርሜርን ፃሊሮ እታማርሳያግያ ባርያ ክርስቶስካ ኤናሳ ዎይላምሮ ዬርን ኣችምን ዶንዛራ ብቶን ክታኻያ ሮራ ማይ ማታና ክማታይ።
17
ያ እንታ ኣይሁድ ኤዲና ሃማያዳና፣ ዳምቢንካ ሃኤርማያዳናቤ፣ ባርያ ማላ ሃዶን ዴንታንካ ፖኻራያ፤
18
ዳምቢን ጫግቴ ክሳ ቃቦን ዼሳንቴ፣ ዬራ ሊኪ ዳምካሞ ፃሊ ሃያንቴ ሃዬዳዳና፤
19
ኤና ኣፕን ካያናም ኣንሳያ ሃዳና፣ ኤና ፅፓሮን ዳናናንቴኻሞ ሮሮ ሃዶንም ሃዼሳዳና፣
20
ዳምቢንባራኻ ዼስንቶን ሃያፓዶንካቤ ጎንዼንካቤኻ ሃማንቴ ኤና ዼስምናም ኪላያ ሃዳና፣ ናናምካሞ ታማርሳያ ሃዳና፤
21
ታ ናንሢ ያ ኤና ዋኒም ታማርሳያ ያ ሃም ታማርሳይዬው? ሃድብምናኖ ሃማንቴ ያ ታማርሳያ፣ ድብማው ሃድብማይ?
22
ያ ኤናግያ ኩጳሞ ጎይ ዬይናኖ ሃማንቴ ጌያያ፣ ኩጳሞ ጎይ ሃያኣይ? ዬር ኣብ ባርዮግያ ሃያንቴ ምስካን ጋርዼ ሃማንቴ ጌያያ፣ ባርዮን ኦኖን ሃቡራይ?
23
ያ ዳምቢንካ ፖኻራያ፣ ዳምቢን ሴስቴ ባርያም ሃዾውክሳይ?
24
ኣጋኻሞ “ዬንካ ሃማንቴ ባርያሳ ናብን ቶርስን ኤናኻ ኢራና እራዻይ” ሃማንቴ ኡካዻዳግያና ኮማታዶ።
25
ዳምቢን ሃኣሽካያዳና ቃማን ታኻዻንሣ ዋጋ ዳይዲና፤ ኮዶን ዳምቢን ሃሴሳያዳና ኤዲ ቃማ ታኻዻድማግያና ሃዳይ።
26
ኤና ቃማን ታኻዻድምና ዳምቢን ይጌያይንም ኬኣሽካያዳና ቃማ ኬታኻዻዳግያ ፓይዳዻይዬው?
27
ዳምቢ ኡካዻዳቤ፣ ቃማ ታኻዻቤ ሃሳ ኮዳና፣ ኤያ ዳምቢን ሴሳዳ ሃዶንታኻ፣ ኤያ ቃማን ታኻዻድማ ዳምቢን ክኣሽካዶንታኻ ሃም ዻብንሻና ክዻብንሻይ።
28
ኤዲ ካላ ብሺን ይሳ ጳልባራ ዶንካ ኣይሁድ ኤድ ይዳና፣ ኣይሁድ ኤድ ማትማሞ፤ ቃማን ታኻዻኖ ጎንዼኖ ጳልንጋንቤ ብሺንጋንቤ ትማሞ።
29
ኮዶን ኤዲ ካላ ኣይሁድ ክማታይኖ ይሳ ኢንካ ኣይሁድ ኤድ ይዳናና። ቃማን ታኻዻኖ ቃማ ታኻዻ ኮማታይኖ፣ ዳምቢን ኡካዻዶንካ ዬር ሃይዻያ ትማሞ፣ ኮዶን ኡስን ጋዛንካ ዎይላምን ቃማ ታኻዻ ኮዳናና። ኤያ ይንታን ዳ ኣጋ ጎሺኖ ክሳ ኤዲ ካላ ሃፕማሞ፣ ባርያኻላና ክያፓይ።