3
1
ታ ናንሲ ኣይሁድ ዳዻንሳ ዋጋኖ ሃርቴ? ቃማን ታኻዻይኖኻሞ ሃር ኳዬ?
2
ጎይ ውልካኻሞ ዬሮ ሃፓዻይኖ ጱፂና፤ ዬራ ውልሳ ብራር፣ ባርያሳ ኣፖን ኬናንቴና ኤልቅንዻዶ።
3
ኤ ኤና ዋኒ ኬኣምናድምናይ? ኬ ኬኣምናድማኻ ባርያሳ ጋዛሞን ዋጋ ቆልማ ሃያውኳያይ?
4
ካላኻሞ ይንታ ሃይማሞ! ኤና ፓይላ ፖጋሞ ኤድ ኬዳና ኮዶን ባርያ ጎንዼ ክዴ፤
“ሃሳ ዼላቅንካ ሃማንቴ ጋዛና ሃዳይ፣
ብቶን ታኻዻን ዋዳንካኻሞ ባሻያና ሃዳይ” ሃማንቴ ኡካዺዲና።
5
ዎሳ ቶዛሞኖ ባርያሳ ጋዛሞን ማዪ ሃያንቴ ኮዻዋያዳና፣ ሃር ዎያሜ? ኤዲግያ ዼላቃናንቴ ባርያ ዎዛራ ዋጭን ክባኣዶኖ ልኪ ትማሞው ሃንዻይ? ኣጋም እጌያይኖ ኤዲ ይቃባያግያ ቃባዻዳናናና እያማዶ።
6
ኮዶን ይንታ ዳማሞ፤ኢኒ ኦጎንታ ኮዳና ባርያ ፔንም ሃርናንቴ ዻብንሻናንቴ ክቻሌ?
7
“እሳ ፖጋሞኖ ባርያሳ ጎንዻሞን ማይ ኳያያ ዳና፣ክሳ ጎሺንካሞ ኮሻባያ ዳና፣ኢም ሴሶ ኤድ ሃያንቴ ሃርናንቴ ላይ ካዛራ ክዻብንሼ?” ሃማንቴ ኤዲ ዜርማያ ኬዳ ዳናኮዳይ።
8
ኦጎኖ “ዬር ፃል ኮኔኤኻናንቴ ዋድማ ዛርቦ ዎኣሽኬና” ኬያማይ ሃማንቴ ኤና ዋኒ ዎዛራ ኬዼላቅሳግያና፤ኤና ክናዛራ ዻባሞን ዬስካይኖ ልኪና።
9
ታ ናንሲ ሃር ዎያሜ? ውቲ ኬኻላንካ ሳጋውዎሳጋይ?
ካላ ውቲ ካላኻሞ ሳጊ ዳማሞ፤ ኣይሁድናኻሞ ቶርስናኻሞ ፓይላ ሴሶንሳ ቾባራ ኬዶንም ብርሳንቴ ውቲ ኬም ቤርንስዲና፤
10
ኦጎኖ ይንታ ሃማንቴ ኡካዻዳግያ፦
“ኤዲ ጋዛ ቆልማሞ ካላኻሞ ቆልማሞ፣
11
ኤዲ ጶቅሳያኻሞ ቆልማሞ፤
ባርያም ዛጋያኻሞ ቆልማሞ።
12
ኤና ፓይላ ውል ሴስዲና፤
ኬ ፓይላ ውል ክንካ ዋጋ ቆልማ ማትዲና፤
ኤዲ ዬር ፃሊ ኣሽካያ፤
ካላኻሞ ቆልማሞ።”
13
“ኬሳ ቆርጭኖ ዱኪ ሃጝ ዳግያና ኮዶ፤
ኬሳ ኣታጵኖ ላይ ፖጋሞኒና ኮዼላቃይ።”
“ኬሳ ኣፖሮ ጉኖ ዼሻ ዳይዲና።”
14
“ኬሳ ኣፖሮጎ ኣሽሞ ዛርቦ ፆፅዲና።”
15
“ኬሳ ራኖ ኤዲ ዴሳናንቴ ሾልጲና”
16
ኬሳ ጎይሮጎ ካዮ ጋሎቤ ዳይዲና፤
17
“ፃሊን ጎይን ኬ ዼስማሞ።”
18
ኬሳ ዎትርጎ ባርያም ኩርትንዻ ቆልማሞ።”
19
ታ ናንሲ ኣፖኖ ፓይላ ኮድፅሜኻናንቴቤ ፔኖ ጋላፕኖኻሞ ባርያናንቴ ዬር ኮማሴኻኻናንቴ ዳምቢኖ ይጌያይኖ ፓይላ ኤና ዳምቢንሳ ቾባራን ዳናናንቴ ኮዶን ውቲ ዼሳና ዎዼሳይ፤
20
ኣጋታኻ ዳምቢ ኣሽካኻ ኤዲ ካላኻሞ ክሳ ዎትሮ ኤዲ ጋዛና ሃምዻን ቻልማሞ፤ ኦጎናንቴ ዳምቢንካ ሴሶኒና ዎዼሳይ።
21
ኮዶን ታ ዳምቢንቤ ኤና ባርያሳ ኣፖን ጌያይና ይጌያዶኖ፣ባርያሳ ጋዛሞኖ ዳምቢ ቆልማ ናእዲና።
22
ባርያሳ ኦጎኖ ጋዛሞኖ ኢየሱስ ክርስቶስም ኣምናንቴ ሃፓዻያ ጋዛሞና። ኤና ፓይላ ካላና፤
23
ኦጎኖኻሞ ኬ ፓይላ ሴሶ ኣሽክዲና፣ ባርያሳ ጎሺንካላኻሞ ኬ ጆግዲና፤
24
ኢየሱስ ክርስቶስሳ ሻንዻዶንካ ሃማንቴ ባርያሳ ፃላሞንካ ኬ ሱን ጋዛ ማትዲና፤
25
ክሳ ማኣሲንካ ሃፓዻን እምነትንካ ሃማንቴ ባርያ ኪም ይሳ ዋጭን ማሳያ ቁሊ ኡካዻዳ ሃያንቴ እምዲና፤
ኖ ኦጎንታ ክያያዶኖ ሴሶን ኣና ብራንቴ ኣሽካዻዶንዛራ ዻባሞን ካማ ዶንሻንቴ ይንካ ክሳጋዶኖ ይሳ ጋዛሞን ይዻዋዶንታኻና፤
26
ኖ ኦጎም ይንታ ክያያዶኖ ዋዳን ኮኻ ይሳ ጋዛሞን ኦጎኖኻሞ ኖ ጋዛ ዳንቴ፣ ኤና ኢየሱስ ክርስቶስካ ኣምናይናም ጋዛ ሃያያ ይዶንም ዻዋናንቴና።
27
ታ ናንሲ ቃይንታኖ ሃርዛራቴ? ኦጎኖ ሽዽዲና። ክሽዻዶኖ ዳምባ ሃማኻቴ? ዋድማን ዳምቢንካው? ኦጎኻ ትማሞ፣ እምነትን ዳምቢንካና።
28
ኤዲ ሃውካሞ ዳምቢ ኣሽካኻ ጋዛዽማሞ ፣እምነትንካ ጋዛ ማታዻይንም ዻዋናዎዻዋይ።
29
ባርያ ኣይሁድ ኤና ባርዮ ሶጎው? ኤና ቶርስናሳኻሞ ባርዮሞ? ዪኒ፣ ቶርስናሳኻሞ ባርያና፤
30
ኦጎኖኻሞ ኤና ቃማን ታኻዻዳናምካሞ እምነትንካ ጋዛ ሃያያ፣ ኤና ቃማን ታኻዻድምናምካሞ እምነትን ኦጎኻ ጋዛ ሃያያ ባርያ ካላስ ክዶንታኻና።
31
ታ ናንሲ ይንታ ዳና እምነትንካ ሃማንቴ ዳምቢን ዬር ዋጋ ቆልማ ሃያውዋያይ? ካላኻሞ ውቲ ይንታ ሃይማሞ ዳምቢን ዋችሻናዎዋችሻይ።