1

¹ ኢየሱስ ክርስቶስሳ ካይስታ ጳውሎስ፣ ኤዲ ይእሳዻዳ ክማቴኻናንቴ ግስንዻዳቤ ባርያሳ ሜርሜርን ፃሊንናንቴ ካማዻዳ ፤ ² ሜርሜርን ኮሳ ዬር ባርያ ኤና ኣፖን ጌያይናኻ ዋርቃትን ጋዛሮ ኣና ብርሳንቴ ጌይዲና። ³ ሜርሜሮኻሞ ክሳ ናሳ፣ ዳዊት ማኣስን ቢዛሮ ዳሳቤ፣ ⁴ ጫራጝማሞን ኡስንካኻሞ ¹ ዴምጵንባራኻ ክዻጳዶንሳቤ፣ ባርያ ናሳ ክዶንቤ ካንታንካ ሃፕንዻዳ ² ዎሳ ጌጳ ኢየሱስ ክርስቶስሳና ኮጌያይ። ⁵ ክባራንካ ክሳ ናብንካ ሃማንቴ ቶርስና ውልግዶርካ ኤና እምነትን ጎይንካ ባርያም ኬኤሳሬኻናንቴ ኬም ዎግስሜኻናንቴ ባርያሳ እምንቶንቤ ኤዲ ይእሳዻዳ ዳዻይንም ውቲ ቻይዲና። ⁶ ዬቲካሞ ኤና ኢየሱስ ክርስቶስ ጋን ኬዴኻናንቴ ግስንዻዳና ግዶሪና ዬዶ።

⁷ ዬቲ ባርያኻ ናሻዻዳና ኤዲ ጫራጚ ዬዴኻናንቴ ግስንዻዳና ሮሜ ግዶር ዳና ፓይላ፣ ባርያ ዎምባቤ ጌጳ ኢየሱስ ክርስቶስቤባራ ፃላሞንቤ ኡስን ቻይንቶቤ ዬናንቴ ኮዴ። ⁸ ዬሳ እምነትኖ ፔ ውል ግዶር ኮኤሳርማዶንታኻ፣ ዬር ውል ካላንካ ብርሳንቴ ዬንካ ሃማንቴ ባርያ እሳም ኢየሱስ ክርስቶስካ ጎሻና እጎሻይ። ⁹ ሮሮ ውል ዬም ሃሞንታ እቃባይንም፣ ክሳ ናሳሳ ሜርሜርን ፃሊን ጌይቴ ዎይላም ካላኻ ይንናንቴ እዋድማያ ባርያ እሳ ማኚና፤ ¹⁰ ባርያም እምስክና ሮሮ ውል ዬናንቴ ምስክቴ፤ ታ ቱንስሮ ባርያሳ ቃቦኻ ዬዛራ እኔኤኻናንቴ ጎይ እናንቴ ክቡሌኻናንቴ ኪም ኦይሳና እኦይሳይ።

¹¹ ዬዋቻዼኻናንቴ ዬም ሃይሳይን ኡስን ጋዛንሳ እምንቶን ዬናንቴ ካሻናንቴ፣ ዬም ሃፓናንቴ እንታ ፖሽካዻና እፖሽካዻይ። ¹² ኦጎኖኻሞ ዬቤ እቤ ውቲ ፓይላ ዎሳ እምነትንካ ኪም ሶቦርሳናንቴና። ¹³ ኣባ ናናቶ፣ ቶርስና ዋኒ ግዶር እናንቴ ኮኣጋዳግያ፣ ዬግዶርካሞ ኣፒ ሃፓናንቴ እንታ ዬዛራ ናኣናንቴ ሮሮ ጱፅ ቃባንቴ፣ ታ ካዛራ ኢም ማርዻዶንም ዬዼሴኻናንቴ ዛጋና እዛጋይ።

¹⁴ ግሪክ ኤናናንቴቤ ግሪክ ኤድ ትምናናንቴቤ፣ ኤና ሃምናናንቴቤ፣ ኤና ዬርን ዼስምናናንቴቤ፣ እንታ ባዛ ኤዲና፤ ¹⁵ ዬቲ ኤና ሮሜ ግዶር ዳናናንቴ ሜርሜርን ፃሊን ጌያናንቴ እዛጋዶኖ ኦጎናንቴና።

¹⁶ ሜርሜርን ፃሊንካ እንታ ቦክንዽማሞ፤ ኦጎኖኻሞ፣ ብራቴንካ ኣይሁድ ኤናናንቴ ሃያንቴኻሞ ቶርስን ኤናናንቴ፣ ኤና ኣምናይና ፓይላናንቴ ዻቆን ዳይኖ ባርያሳ ካንታኖና። ¹⁷ ሜርሜርን ፃሊንካ ባርያሳ ጋዛሞኖ ሃፕንዽዲና፤ “ኤያ ጋዛስ እምነትካና ³ ክዳይ” ሃማንቴ ኡካዻዳግያ፣ ክሳ ጋዛሞኖኻሞ ካርስሮኻ ቻንቴ ላይ ቱንስንዛራ እምነትንካ ዳያና። ¹⁸ ኤና ይሳ ዛርባሞንካ ጎንዼን እሽካንቴ ዬዳይናዛራ፣ ባርያሳ ዋጭኖ ኬሳ ሴሶንቤ ዛርባሞንቤዛራ ፓይላ ፖላንባራ ናኣና ኮናኣይ፤ ¹⁹ ኦጎኖኻሞ ባርያ ኬናንቴ ማዪ ክሃያዶንታኻ፣ ኪም ይንካ ዼሳዻን ጎይኖ ኬናንቴ ማዪና ኮዶ። ²⁰ ፔን ዎዳዻዶሮኻ ካርሳንቴ ባርያሳ ዴንታኖ ሃፓዽሞኖ፣ ኦጎኖኻሞ ካንታኖ ክሳ ላይን ዶንቤ፣ ኖ ባርያ ክዶንቤም፣ ዬራ ክፕጃዳናኻ ማዪና ኮዶ፤ ኣጋታኻ ኤና ይሳ ዋድማና ዛርቦናም ጎይ ይንካ ኬክጫያ ኬሳ ቆልማሞ።

²¹ ኬ ባርያም ይዼሳዶንካሞ፣ ኖ ባርያና ሃማንቴ ኪም ጎባድማሞ፤ ኬ ክናንቴ ጎሺ እማድማሞ፤ ኮዶን ቃቦኖ ኬሳ ካይዲና፣ ኬሳ ዎይላምኖ ዬርን ጶቅስሞኖኻሞ ፅፕዲና። ²² ውቲ ኤና ዬርን ዼሳዳናና ይያምናኻሞ ኬ ኤዲ ዴምጲ ማትዲና፤ ²³ ባርያ ላይን ዳያሳ ጎሺን ኤና ካያይናኻቤ፣ ካርያናኻቤ፣ ዳብናኻቤ፣ ዳብና ፔሮ ጉችማይናቤኻ ኬ ኦስክዲና።

²⁴ ኣጋታኻ ኬሳ ዎይላምሮ ሴሶን ፆፃዶንሳ ኣጝርማንካ ሃማንቴ ኪም ኬሴሴኻናንቴ ባርያ ኬም ሳስካቴ እምዲና። ²⁵ ባርያሳ ጎንዼን ፖጋሞኻ ኬ ኦስክዲና፤ ባርያ ዎዳዳም ጋራንቴ ዬራ ዎድድናም ኬ ምስክዲና፣ ኬናንቴኻሞ ዋድምዲና፤ ኮዶን ባርያ ዎዳዳ ላይ ጎሻዻዳና፤ ኣሜን።

²⁶ ኣጋታኻ ባርያ ኬም ኣጝርማ ዛርቦንናንቴ ሳስካቴ እምዲና፤ ኬሳ ሜናኻሞ ኬናንቴ ጌይዻዶን ጎይንካ ኣንጌና ማላ ዎዻዻን ጋራንቴ ሜና ላማ ክንካ ዎዺዲና። ²⁷ ሃያንቴ ኣንጌናኻሞ ኬናንቴ ጌይዻዶን ጎይንካ ሜና ላማ ዎዻዻን ጋራንቴ ኪምና ኬኣጝርዻይ፤ ኣንጌና ክንካ ዎዽዲና፤ ይሳ ዋድማና ዛርቦናናንቴ ኬናንቴ ካይሶን ዛግሳን ኬ ይዛራ ባእዲና።

²⁸ ኣጋሳ ጳባራ ይሳ ቃቦንካ ባርያም ዼስንቶ ዛግስማሞ ኬያማዶንታኻ፣ ዬርን ሃይዽሞንም ኬኣሽኬኻናንቴ ባርያ ቃቦ ዛርቦናንቴ ኬም ሳስካቴ እምዲና። ²⁹ ኬ ሴሶንካቤ፣ ዛርባሞንካቤ፣ ማዛንካቤ፣ ዴንታን ዛርቦንካቤ ፓይላ ኬ ፆፅዲና፤ ፆላሳሞንካቤ፣ ዴሶንካቤ፣ ዋጭንካቤ፣ ታይሶንካቤ፣ ጋሮንካቤ ኬ ፆፂዲና። ኬ ኤና ቆፅማይናቤ፣ ³⁰ ኤናሳ ናብን ሴሳይናቤ፣ ባርያም ቶዛዻይናቤ፣ ኢሪማይናቤ፣ ሾይናቤ፣ፖራዻይናቤና፤ ኬ ዋድማን ዛርቦን ይኣሽካይን ጎይንና ኬቃባይ፤ እምባናቤ እንዳናቤናንቴ ኬ ኤሳርምናና። ³¹ ኬ ኤና ዬርን ጶቅስምና፣ ዼላቃ ይቱማዳም ኮስንሣይና፣ ኤናናንቴ ቡርቃዽምና፣ ሃያንቴኻሞ ኬ ኤዲ ጋሊና። ³² ኤና ኦጎንታ ሃያይና ፓይላ ኬጄኻና ኮዛግሳይ ሃማይን ልክን ዶን ባርያሳ ዳምቢን ይዼሳዶንካሞ፣ ዬራ ክናም ሃያ ሶጎ ጋራንቴ፣ ኤና ኦጎንታ ሃያይናምካሞ ሶቦርሳና ኬሶቦርሳይ።