15
1
ውቲ ኤና ዋችና፣ ኤና ቃጅናም ዎኬልሼኻናንቴ ዛግሳና ኮዛግሳይ፣ ዎም ሶጎ ዋዝንሣን ዎጋሬ።
2
ውቲ ኤና ፓይላ ውል ዎሳ ጉልን ኤያም ዋችሻናንቴ፣ ክናንቴኻሞ ዬር ፃል ኮዴኻናንቴ ኪም ዬር ዋዝንሣያ ዎኣሽኬኻናንቴ ዛግሳና ኮዛግሳይ፤
3
ክርስቶስ ዪም ዋዝንሣድማሞ፤ ኮዶን “ኢሪማ ይንካ ሃም ኬእራዳ እዛራ ዬስክዲና” ሃማንቴ ኡካዻዳግያ ክዛራ ማትዲና።
4
ውቲ ዋቻዻንቴ፣ ሌንሥንቶን ዋርቃትን ጋዛን ይእማንካ ሃማንቴ ቃሞ ዎቁንፄኻናንቴ ዬራ ኣና ብራንቴ ዋርቃትሮ ኡካዻዳና ፓይላ ኮባራኻ ዎታማረኻናንቴና ኡካዻዶ።
5
ባርያ ዋቻሞንቤ ሌንሦንቤም እማያ፣ ኢየሱስ ክርስቶስም ዬጫግና፣ ዬሳ ባክሮ ቃቦ ካላ ክእሜ፤
6
ኣጋኻሞ ዎይላም ካላኻቤ ኣፖ ካላኻቤ ዳንቴ፣ ጌጳ ኢየሱስ ክርስቶስሳ ባርያቤ እምባቤም ዬጎሼኻናንቴና።
7
ታ ናንሢ ባርያናንቴ ጎሺ ኮዴኻናንቴ፣ ክርስቶስም ዬናሻዳግያ፣ ኪም ናሽማቴ።
8
ዎምባናናንቴ ኣፖን ጌይዻዶንም ኣሽካናንቴ ባርያሳ ዼላቅንናንቴ ሃማንቴ ክርስቶስ ኣይሁድሳ
ዋድማ ኤድ ክዶንም ዬናንቴ ጌያና እጌያይ፤
9
ሃያንቴኻሞ ቶርስና ባርያሳ ፃላሞንካ ሃማንቴ ባርያም ኬጎሼኻናንቴና፤ ኦጎኖኻሞ ይንታ ሃማንቴ ኡካዻዳግያና፦
“ኣጋታኻ፣ ቶርስናሳ ባክሮ ሃም ጎሻና እጎሻይ፤
ሃሳ ናብንናንቴኻሞ ዋርሳ ዻሳና እዻሳይ።”
10
ፕርካሞ
“ቶርስና ክሳ ዛርስን ማላ
ዋዝንዽማቴ” ና ኮያማይ።
11
ፕርካሞ፣
“ዬቲ ቶርስና ፓይላ ጌጳም ጎሽማቴ፤
ዬቲ ዛርስኖ ፓይላ ኪም ጎሽማቴ” ና ኮያማይ።
12
ኢሳይስካሞ ኣጋንታ
“ቶርስን ውልዛራ ብትማያ እሴይ ጫጫ ናኣና ክናኣይ፤
ቶርስና ክዛራ ቃሞ ቁንፃና
ኮቁንፃይ” ክያማይ።
13
ክንካ ዬኣምንዶንታኻ ዬራ ይንዛራ ቃሞን ይቁንፃዻዳሳ ባርያ ዋዛንቤ ፃላሞንቤም ፓይላ ዬግዶር ክፆኦሴ፤ ኦጎኖኻሞ ቃሞን ቁንፅንቶኖ ኡስን ጋዛንሣ ካንታካ ዬግዶር ጱፅ ኮዴኻናንቴና።
14
ዎምባ ናናቶ፣ ዬቲ ዬባራንካ ፃላሞን ይፆፃዳናቤ፣ ዼስንቶን ውልም ይንሣ ይዳናቤ፣ ኪም ክላናንቴኻሞ ዬቻላይንቤም እንታ እባራንካ ፃሊ ሃያንቴ ዼስዲና።
15
ባርያ እናንቴ ክእማዶን ፃላሞንካ ፕር ዬናንቴ ጶቅሳናንቴ ዬራ ዋኒም ዋርቃት ግዶር እንታ ዬናንቴ ቦክንዾ ቆልማ ኡክዲና፣
16
ፃላማ ኣጋ እናንቴ ክእማዳ ባርያሳ ሜርሜርን ፃሊን ቶርስናናንቴ ጌይቴ ባርያሳ ዳምብን ኣሽካይናግያ ዳንቴ ኢየሱስ ክርስቶስሳ ዋድማ ኤድ ዳናንቴና፤ ኦጎኖኻሞ ቶርስና ኡስን ጋዛንካ ጫራጝማንቴ ባርያ ይቻዳና ቁሊ ኡካዻዳ ኬዳኻናንቴና።
17
ኣጋታኻ ባርያናንቴ እዋድማዳኻ ክርስቶስ ኢየሱስካ እንታ ፖኻራና እፖኻራይ።
18
ዬራ እጌያዳናኻቤ እኣሽካዳናኻቤ ቶርስና ባርያናንቴ ኬኤሳሬኻናንቴ ክርስቶስ እንካ ክኣሽካዳና ዋድማናሳ ኦባራ ዬር ኣብ ጌያናንቴ እንታ ቻልማሞ፤
19
ዬራ እግና ይንታ ኬያማዶኖ ኡስን ጋዛንሣ ካንታካ ዬራ ሃሊና ሃምማንግያንዳናቤ ዬራ ሃምማንቴ ዼስማኻቤና። ጎያ ኣጋኻ ዬሩሳሌም ግዶርካ ቻንቴ እልዋሪቆን ዴሞንዛራ ክርስቶስሳ ሜርሜርን ፃሊን ፓይላ እንታ ጌያቴ ቱንሥዲና።
20
ኤዲ ኣብ ይንግዶር ይኣሽካዳግዶር እንታ ኣሽክማሞ ሃማንቴ፣ ክርስቶስሳ ናብን ይንግዶር ግስንዻድምና ራቅና ግዶር ሜርሜርን ፃሊን ጌያናንቴ ሮሮ ውል ኣጝርዽቴና እዶ።
21
ኦጎኖኻሞ፣
“ኤና ዼላቅን ክሳም ይንናንቴ ጌይዻድምና ኤሳራና ኬኤሳራይ፤
ኤና ኤሳራድምናኻሞ ዼሳና ኬዼሳይ” ሃማንቴ ኡካዻዳግያና።
22
ኣጋኻ ሃማንቴ ዬዛራ ናኣን እጋሬኻናንቴ ሮሮ ጱፅ ኢም ማርዽዲና።
23
ኮዶን ታ ራቅና ክና ግዶር ዋድማ እኣሽካያ ኮቆልሞንታኻቤ፣ ኣና ካርሳንቴ ዬም ሼዳናንቴ ኣጝርዽቴ እዶንታኻቤ፣
24
ቃባ ካም እስፔንዛራ እያኣን ዋዳንካ ኣሽካናንቴ እንታ ቃባና እቃባይ። ኦጎዛራ እያኣን ዋዳንካ ዬም ሼዳናንቴቤ ዬላማ ክንካ ሮሮ ቄታ ካፓንቴ ፖሽኮና እሳም ቱንሣንቴ ኢይና ዬራ እናንቴ ጎይሮ ሳግሳይናኻ ኢም ዬኬልሻይንም እንታ ዬዛራ ቃሞ ቁንፅዲና።
25
ኮዶን ታ እንታ ዬሩሳሌም ግዶር ዳና ባርዮን ኤና ጫራጝናናንቴ ዋድማናንቴ ኦጎዛራ ይቴና እዶ።
26
ኣጎኖኻሞ ኤና መቄዶንያቤ ኣካይያቤ ግዶር ዳና ዬሩሳሌም ግዶር ባርዮን ኤና ጫራጝናሳ ባክሮ ዳና ኩፕናም ኬልሻናንቴ ኬዻጳዶንታኻና።
27
ኬ ኬም ኬልሻናንቴ ዛግዲና፤ ጎንዼ ኬ ኬሳ ባዛ ኤዲና። ቶርስና ኣይሁድናኻ ሃማንቴ ባርያሳ ዎድማሞን ኬያፓዳና፣ ዎድማሞና ፔን ኮሮ ኬያፓዳናም ኣይሁድና ማላ ኬካሽሜኻናንቴ ኬ ኣይሁድናሳ ባዛ ኤዲና።
28
ኣጋታኻ ብሬን ፑኡሻዻዶንም ዬሩሳሌምዛራ ባኣቴ ቃልቴ ኬናንቴ እማንቴ እስፔንዛራ ያኣና እያኣይ፣ ኣጋኻኻሞ ዬም ሼዳና እሼዳይ።
29
ዬዛራኻሞ እኒና ክርስቶስሳ ዎድማሞንካ ዳንቴ እናኣይንም እንታ ዼስዲና።
30
ዎምባ ናናቶ፣ እናንቴ ባርያም ምስክቴ እሳ ዋድማንሣ ዴሞሮ እላማ ክንካ ዬዎዬኻናንቴ ጌጳ ዎሳ ኢየሱስ ክርስቶስካቤ ኡስን ጋዛንሣ ናሽማንካቤ ዬም ምስካና እምስካይ።
31
ይሁዳ ግዶር ዳና ኤና ባርያም ኣምንምናሳ ኣንሮ እዻቄኻናንቴቤ፣ ዬሩሳሌም ግዶር ዳና ባርዮን ኤና ጫራጝናሳ ዎትሮ ዋድማኖ እሳ ናሽዺ ኮዴኻናንቴ እናንቴ ባርያም ምስክማቴ፤
32
ኣጋኻሞ ባርያሳ ቃቦንካ ዬዛራ ዋዛኻ እኔኻናንቴቤ፣ ዬላማ ክንካ ዎይላም እሳ ኮቃጀኻናንቴና።
33
ፃላሞንሣ ባርያ ዬላማ ክንካ ክዴ፤ ኣሜን።