16
1
ክንክራኦስ ግዶር ባርዮን ኤናሳ ባክሮ ዳንቴ ባርያናንቴ
ዋድማይኖ ዎምባ ናን ፌቤንም እንታ ዬናንቴ ኤልቅማና እኤልቅማይ።
2
ባርዮን ኤናም ጎይን ይንካ ቻዻንካ ኮም ጌጳ ናብንካ ፃሊንካ ዬቼኻናንቴቤ፣ ዬራ ዬኻላ ኮናንቴ ዛግሳይና ውልካ ኮም ዬኬልሼኻናንቴ ዬናንቴ ጌያና እጌያይ፤ ኦኖኖኻሞ ና ኤዲ ጱፅናንቴቤ እናንቴቤ ኬልሾ ጌጲ ኮማታዶንታኻና።
3
ኤና ክርስቶስሳ ዋድማን እላማ ክንካ ኣሽካይና ጵርስቅላቤ
ኣቂላቤሳ እናንቴ ዎፖ ችማቴ።
4
ኬ እናንቴ ሃማንቴ ሳዳን ይሳም ጋሎ ጌጲናንቴ እምዲና፤ እንታ ሶጎ ትማሞ፣ ቶርስና ባርዮን ኤናኻሞ ፓይላ ኬም ጎሽቴና ኬዶ።
5
ኬሳ ኦኖሮ ኤና ባርዮን ምስካይናሳ እናንቴ ዎፖ ችማቴ።
እስያ ፔሮ ብራንቴ ክርስቶስዛራ ማታዳ እሳ ናሽዻ ኣጤኔጦንሳ እናንቴ ዎፖ ችማቴ።
6
ዬናንቴ ሃማንቴ ዋድምቴ ጌጲ ቃጃዶን ማርያምሳ እናንቴ ዎፖ ችማቴ።
7
ኤና እላማ ክንካ ዻክን ኦኖሮ ዻኻዻዳና እሳ ኤዳና ኣንዲራኒቆንሳቤ ዩልያቤሳ እናንቴ ዎፖ ችማቴ፤ ኬ ኤና ይእስድና ግዶር ኜሙትንካ ዳናቤ ክርስቶስም ኣምናንካ ኢም ብራዳናና።
8
ኤያ ጌጳኻ እናሻያ ጵልያጦንሳ እናንቴ ዎፖ ችማቴ።
9
ክርስቶስካ ሃማንቴ ዎላማ ክንካ ዋድማያ ኢሩባኖንቤ እሳ ናሽዻ ስንጣክንቤሳ እናንቴ ዎፖ ችማቴ።
10
ክርስቶስዛራ ዶን ክሳ እምነትኖ ሼዳዻዃ ጎሻዻዳ ኤጤሌንሳ እናንቴ ዎፖ ችማቴ፤
ኣርስጣባሉ ሞሮንባራኻ ናኣዳ ኤናሳ እናንቴ ዎፖ ችማቴ።
11
እሳ ኤዳስ ሄሮድዮናሳ እናንቴ ዎፖ ችማቴ፤
ጌጳኻ ዳና ንርቀሱ ሞሮ ኤናሳ እናንቴ ዎፖ ችማቴ።
12
ጌጳኻ ዳና ሜና ዋቻዻንቴ ዋድማይና፣ ፕሮፊሞናቤ ጢሮፊሞናቤሳ እናንቴ ዎፖ ችማቴ።
ጌጳኻ ዳንቴ ጌጲ ዋድማዶኖ ኤስኖ ዋ ናሽዽኖ ጠርሲዳሳ እናንቴ ዎፖ ችማቴ።
13
ጌጳኻ ካማዻዳ ሩፎንቤ እሳኻሞ እንዳ ማታዶኖ ክሳ እንዳንቤሳ እናንቴ ዎፖ ችማቴ።
14
ኣስቀሪጦንቤ፣ ኣፕለጎንቤ፣ ሄሮሜንቤ፣ ጳጥሮባንቤ፣ ሄርማንቤ፣ ኤና ኬማላን ዳና ዎምባናናቤሳ እናንቴ ዎፖ ችማቴ።
15
ፕሎሎጎንቤ፣ ዩልያንቤ፣ ኔርያቤ ክሳ እንዳናንቤ፣ ፕርካሞ ኣልንጦንቤ ባርዮን ኤና ጫራጝና ኬማላን ዳናቤሳ ፓይላ እናንቴ ዎፖ ችማቴ።
16
ናሽማ ጎንዼ ዳኻ ኪም ጌስማቴ። ኤና ክርስቶስም ጫጋይና ፓይላ ዬሳ ዎፖ ቻና ኬቻይ።
17
ዎምባ ናናቶ፣ ኤና ፓሽሞን ባኣይናቤ ታማርን ዬታማራዶንም ናሽምና ዬሳ ጎይሮ ዱርሚን ማታይናኻላ ዬም ዬማንኬኻናንቴ ዬናንቴ ጌያና እጌያይ፣ ኬ ኻላንካ ፔጌ ዳማቴ።
18
ኤና እግናግያንዳና ይንናንቴ ኬዋድማይኖ ጌጳ ዎሳ ኢየሱስ ክርስቶስናንቴ ትማሞ፣ ኬዋድማይኖ ይሳ ኢንናንቴና፤ ኬ ይሳ ኣፖን ዳፃሞንካቤ ይሳ ሱድማንካቤ ኤና ሌምናም ኬታይሳይ።
19
ባርያናንቴ ኤሳራይና ዬዶንም ኤና ፓይላ ኤሳርዲና፤ ኣጋኻ እንታ ጌጲ ዋዝንዽዲና። ኮዶን ዬርን ፃሊንናንቴ ኤዲ ሃሚ ዬዴኻቤ፣ ዬራ ዛርቦናናንቴ ሌሚ ዬዴኻናንቴ ዛጋና እዛጋይ።
20
ፃላሞንሣ ባርያ ሜሺን ዬሳ ራንሣ ቾባራ ጋጫና ክጋጫይ።
ጌጳ ኢየሱስሳ ፃላሞኖ ዬማላ ክንካ ኮዴ።
21
እላማ ክንካ ዋድማያ ጢሞቴዎስቤ እሳ ኤዳና ሉቂዮስቤ፣ ኢያሶንቤ፣ ሱሲጴጥሮስቤ ዬሳ ዎፖ ቻና ኬቻይ።
22
ዋርቃታ ካም ኡካዳ እንታ ጤርጥዮስ ጌጳኻ ዬሳ ዎፖ ቻና እቻይ።
23
እቤ ባርዮን ኤና ኮታር ዳና ፓይላቤም ቾችንሻንቴ ዎም ዋዝንሣያ ጋይዮስ ዬሳ ዎፖ ቻና ክቻይ።
ካታማሮ ዶን ኮይሶን ኦኖን ዻቃናያ ኤርስጦስቤ ዎምባ ናሳ ቁኣስጥሮስቤ ዬሳ ዎፖ ቻና ኬቻይ።
24
ጌጳ ዎሳ ኢየሱስ ክርስቶስሳ ፃላሞኖ ዬፓይላ ማላ ክንካ ኮዴ፤ ኣሜን።
25-26
ባርያ ላይን ዳያሳ ጌይዻዳኻ ቶርስና ፓይላ ኣምናንቴ ክናንቴ ኬኤሳሬኻናንቴ፣ ኤና ባርያሳ ኣፖን ጌያይናሳ ዋርቃትሮኻ ታ ማይ ማታዶንካ፣ ዼላቅና ቦንና ጱፅና ኣና ሳጋዳና ዋዳንካ ኣችምን ዳና ማይ ይያማዶንካ ሃማንቴ፣ እታማርሳዶን ሜርሜርን ፃሊንካቤ ኢየሱስ ክርስቶስም ጌይዻንካ ዬም ዋችሻናንቴ ቻላያ፤
27
ኖ ሶጎ ዬርን ዼሳዳ ባርያናንቴ ኢየሱስ ክርስቶስካ ጎሺኖ ላይ ኮዴ፤ ኣሜን።