¹ ኤያ ቃቦንሳ ጆጋም ዬራ ዜርምሳንግያንዳና ግዶር ክሳ ቃቦንካ ሃማንቴ ኪም ቱዛዽማ ችማቴ። ² ኤዲ ካላሳ እምነትኖ ዬር ውልም ክእꬄኻናንቴና ኮጌያይ፤ ኮዶን ኤያ ዋ እምነትን ዋቻዻድማ ዎ ሶጎና ክእሣይ። ³ ኤያ ዬር ውልም እꬃያ ኤያ እꬅማም ቦዋን ክጋሬ፤ ኤያ እꬅማኻሞ ኤያ ኢꬃያም ዻብንሻን ክጋሬ፤ ኦጎኖኻሞ ባርያ ኪም ክቻዶንታኻና። ⁴ ኤያ ዋናንቴ ዋድማን ኣሽካያዛራ ብቶን ታኻያ ያ ሃውቴ? ኖ ይድኒናኻሞ ይዎይናኻሞ ይሳ ጌጳ ናንቴና ጌጳ ኪም ዎይሳናንቴ ክቻላንታኻ፣ ኖ ዎያና ክዎያይ። ⁵ ኤዲ ካላ ሮሮ ካላም ሮራና ዋኒ ካላ ጫራጚ ሃያንቴና ክፓይዳይ፤ ኤያ ዋ ሮራና ፓይላ ካላና ኬዶ ሃማንቴና ክቃባይ። ኤዲ ፓይላ ይሳ ቃቦም ፃሊ ሃያንቴ ኮሼዴ። ⁶ ኤያ ሮራ ዋም ዋኒ ካላ ሳጊ ሃያንቴ ሼዳያ፣ ኦጎንታ ክያያይኖ ጌጳናንቴ ሃማንቴና፤ ኤያ ዋን እꬃያኻሞ ባርያም ክጎሻንታኻ ጌጳናንቴ ሃማንቴና ክእꬃይ ኤያ እꬅማኻሞ ይንናንቴ ክእꬅሞኖ ጌጳናንቴ ሃማንቴና ባርያምካሞ ጎሻና ክጎሻይ። ⁷ ዎግዶር ኤዲ ይናንቴ ዳያ ቆልማሞ፣ ኤዲ ይናንቴ ጃያኻሞ ቆልማሞ። ⁸ ዎዳና ጌጳናንቴና ዎዳይ፤ ዎጅናኻሞ ጌጳናንቴና ዎጃይ፤ ኣጋታኻ ዎዳናኻሞ ዎጅናኻሞ ጌጳ ውቲ ጋንቲና። ⁹ ኣጋናንቴ ሃማንቴ ክርስቶስ ኤና ጃዳናናንቴቤ ኤና ሳዳንካ ዳናናንቴቤሳ ጌጵ ማታናንቴ ጃይዲና፤ሳዳንካኻሞ ዻጵዲና። ¹⁰ ታ ናንሲ ያ ሃምባ ናሳዛራ ብቶን ሃርናንቴ ሃታኬ? ያ ሃምባ ናሳም ሃርናንቴ ሃቦዌ? ውቲ ፓይላ ውል ዎዳዛራ ባርያሳ ብቶን ቦርኮቶንሳ ዎትሮ ዎያና ዎያይ፤ ¹¹ ይንታ ሃማንቴ ኡካዽዲና፦ “እንታ ላይን ዳያ እዶንታኻ’፤ ‘ቦቆ ፓይላ ውል እናንቴ ኮምፓርሳና ኮኮምፓርሳይ፤ ኣታጵና ፓይላ ባርያናንቴ ማጚና ኬዳይ’ና ” ክያማይ ጌጳ። ¹² ኣጋታኻ ውቲ ፓይላ ባርያናንቴ ዎሳ ዬር ማሳናዎማሳይ። ¹³ ኣጋታኻ ውቲ ኪም ዻብንሻሮኻ ዎም ዎማንኬ፤ ኦጎናንቴ ሃምባ ናሳሳ ጎይሮ ዱርሚ ጁምፓያ ዎዳን ጋራናንቴ ዎይካሞ ዛኒ ዻኻን ጋራናንቴ ቃብማቴ። ¹⁴ እꬃሮ ይባራንካ ጫራጝ ትማ ዳ ኮቆልሞንም እንታ ጌጳ ኢየሱስካ ዳንቴ ዼስዲና፤ ኮዶን ኤዲ ካላ ዬር ካላም ጫራጝ ክትሞንም ይፓይዳያዳና፣ ዬራ ኣጋ ክናንቴ ጫራጝ ትማሞ። ¹⁵ ሃምባ ናሳ ዳኣንታ ሃእꬃያም ክናሽምና፣ ያ ናሽማኻ ያያድማሞ፤ ክርስቶስ ይንናንቴ ይጃዳ ሃምባ ናሳም እꬃሮኻ ሃማንቴ ሃካይስናኖ። ¹⁶ ያ ዬራ ፃሊና ሃማንቴ ሃቃባይናም ዬር ዛርቦ ሃያንቴ ሼዳዼኻናንቴ ሃይናኖ። ¹⁷ ባርያ ማንግትስኖ ጋዛሞቤ፣ ፃላሞቤ ኡሲ ጋዛኻ ዳ ዋዛ ጋንትቤና፣ እꬃሮቤ ዎጮቤ ጋንት ትማሞ፤ ¹⁸ ኤያ ክርስቶስናንቴ ዴንታ ኣጋኻ ዋድማያ ባርያም ዋዝንሳናክዋዝንሳይ፤ ኤናኻላኻሞ ጎሻዻና ክጎሻዻይ። ¹⁹ ኣጋታኻ ፃላሞን ይንግዶር ሃፓዻንቤ ክንካ ዎም ካላ ሃያንቴ ዎይሳያ ዬር ዎጫጌ። ²⁰ ዳኣኖናንቴ ሃማንቴ ባርያሳ ዋድማን ሃሴስናኖ። ዬር ፓይላ ውል ጫንቃሊና ኮዶ፤ ኮዶን ኤያ ዋም ሴሳያ ዬር እꬃ ኣጋ ሴሶና። ²¹ ሃምባ ናሳም ሴሳያ ዋ እꬃ ጋራቤ፣ ዎይን ውጫ ጋራቤ፣ ዎይካሞ ዬር ኣብ ኪም ሴሳያ ኣሽክንቶ ጋራ ፃሊና። ²² ታ ናንሲ፣ ዬራ ክና ግዶር ሃሳ እምነታ ዳ ሃቤ ባርያቤ ጋንት ክዴ፤ ዬራ ካ ልኪና ሃማንቴ ኣምናንቴ ይኣሽክና ዎይላምንካ ይሳ ዬራ ኣጋ ዛርቦና ሃማንቴ ቃብማ ኤያ ኣጋ ፑጋዻዳና። ²³ ኮዶን ዬራ እምነትካ ሃይዻድምና ፓይላ ሴሶ ኬዶንታኻ ኤያ ኢን ካዻያ ዳኣኖ ክእꬅና እምነትካ ክእꬃድሞንታኻ ክዛራ ዻባሞን ካዽዲና።