¹ ብታሞን ቦርኮቶሮ ዳርቃዳ ዎርቃትዳ ዋርቃትን አፓን ኢን ባራቤ ጳልባራ ፃፋጶን፣ ማህተምን ሶፓንሳ ውልባራ ጶጶን ዋርቃትን ኣንን ዋራካትንካ ዮዳዳ ኤያም እንታ ሀፕድና፡፡ ² ባርያሳ ኤርጎ ኤድ ካላ ኤያ ብታ ጌጳ ማህታምንም ቡላንቴ ዋርቃንትን ዋጭ ሀያያ ሀውቴ? ሀንቴ ክኬራፕካ እንታ ሀፕድና፡፡ ኮደን ፓላርሀሞ ፔሮሀሞ፣ ፔንስ ቾባራሀሞ ኤድ ብቶ ዋርቃትን ዋጭ ሀያያቤ ዋርቃትንስ አፓን ኤድ ጌያያ ካለሀሞ ቆልማሞ፡፡ ^{3 4} እንታሀሞ ኤዲ ብቲ ዋርቃትን ዋጭ ሀያያ ወይዋርቃተን አፓን ኤድ ብቲ ጌያያ ካለሀሞ ኮቆልማታሀ እንታ ካሎን ኤፒድና፡፡ ⁵ ናንሲ ኤና ጌጵና ኤድ ካላ እግያ ይጌይና "ሀኤኘናኖ ታ ይሁዳ ቢዛን ጋንታ ዞብታ ዳዊት ቢዛስ ኣጋ ዴንጵን ባሽድና፣ ኖ ዋርቃትን ዋጭ ሀያናንቴቤ ዋርቃትን ዛራ ጰጰና ማህታምና ሶጳናም ዩስ ብታሞንካ ቡላና ክቡላይ" ሀማንቴ አግያ ጌይድና፡፡ ⁶ ናንሲ ቦኮተንሳ ዳብና ኦይድናሰቤ ኤና ጌጵናሳ ግዶሮ ማቻናጳ እያታ የሱስም ዎያንቴ ክዳሀ እንታ ሀፕድና፣ እያታሀሞ ቁሽሞ ጶጳቤ አፒ ሶጳቤ ክሳ ዳይድና፣ ዮራ እግናሀም ፔን ዛራ ንዕሳጵና ባርያሳ ኡስና ጋዛናና፡፡ ⁷ ኖሀሞ ናዴ ጌጳሞን ቦርኮቶሮ ደርቃዳካላ አና ዋርካታዛራ ዋርቃትን ዮዳዳ ካላ ዋርቃትን ቻይድና፡፡ ⁸ ዋርቃትን ከቻሷ ዳብና ኦድናቤ ኤና ጌጵና ለማታም ኦይድናሀሞ ማቻና እያታሳ ብራሮ ክናንቴ ሞምፓርስድና ኬ ፓይላ ኤና ባርዮን ኤናሳ ምስኮንቤ ባርያናንቴ ጳጳይን ቾንግንቤ ቁኛን ይንዛራ ዩንዛራ ዎዳዶን ሸርቃን ዮዳንቴና ኬዶ፡፡ ^{9 10} ዩንታ ሀንቴ ዋርሳ ሀሊ ጳስድና "ሀሳ ብታሞንካ ዋርቃትንቤ ማህታምንቤም ሀቡሌሀናንቴ ያ ጌጵና፣ አጋሀሞ ያ ኤና ናንቴ ሀማንቴ ቻይድና፣ ሀሳ መአስንካ ኤድን ቢዛ ውልባራ፣ አፓ ውልባራ፣ ኤድ ውልባራ ኤናም ፓይ ባርያ ናንቴ ያ ኬም ሻንድና፡፡ ኬሀሞ ፔሮና ኬጌጳጳይ፡፡" ¹¹ ናንሲ እሼድና ባርያሳ ኤርጎን ኤና ጱፅናስ ጴላቅም እንታ ኤሳርድና ኬሳ ጱፃሞኖ ፓይዶ ቆልማሞለ ኬሀሞ ብታሞን ቦርኮቶንቤ ዳብና ኦድና ኤና ጌጵና ለማታ ኦይድናም ታሀንቴና ኬዶ፡፡ ¹² ኬ እላታንቴ ይንታ ሀማንቴ ዋርሳ ጳክድና፣ ማቻጰ እያታናንቴ ካንታሞቤ ዎድማሞቤ ጴስንታቤ ዋቻሞቤ ጌጳሞቤ ሽድንታቤ፣ ጎሺ ክቼሀ ኮዛግሳይ፡፡ ¹³ ናሲ ፖላሮ ዳናቤ ፔሮ ዳና ኤና ፔንሳ ቾባራ ዳና ኑንቆንስ እሮዳና ዳና ሀንጰይና ፓይ ዮራ ዎድድና ይንታ ሀማንቴ ዋርሳ ክናንቴ ኬጰሳካ እንታ ኤሳርድና፣ "በታሞን ቦርኮቶሮ ዳርቃዳ ብታ ናንቴ ጎሺ፣ ሼድንታ፣ ጌጳሞቤ ካንታሞቤ ላይህ ላይህ ቱንስንዛራ ክናንቴ ኮደ ሀምድና፡፡" ¹⁴ ዳብና ኦይድናሀሞ "አሜን ኮዴ ሀምድና፣ ኤና ጌጵና ላማታም ኦይድናሀሞ ክናንቴ ኮምፓርስድና፡፡