¹ "ፔን ሰርዴስ ግዶ ዶን ባርዩን ኦኖን ናንቴ ባርያስ ኤርጎን ኤያ ይንታ ሀማንቴ ፃፍማና ክያማዶ ባሪያስ ኡስና ጋዛናቤ ኤዝና ሶጳናቤም እንንካ ዮዳ ይንታና ክያማይ፣ እንታ ሀሳ ዋድማን ጴስድና ያ ሱን ባርዮ ኤድግያ ናብካ ሶጎና ሀዶ ኮደን ያ ጃይድና፡፡ ² አጋታሀ ቃይማ ዮራ ሀካላ ካያን ዳናቤ ዮራ ሽጰዳናቤ ፃሊ ኬም ሀይማ፣ ሀሳ ዋድማኖ እሳ ጌጰሀላ ፃሊትማ ኮደ፡፡ ³ ታ ናንሲ አና ዮራ ሀቻዳናቤ ሀኤሰርዳናቤም ቃብማ፣ ኬን ዳማ ሴሶን ባራ ማትማ፡፡ ሀማታድምና ኤድ ድቢ ግያና ሀዛራ እናአይ፣ ሰዓታ ሀማሀ ሀዛራ እናአይንም ያ ጴስድማሞ፡፡ ⁴ ኦጎንታ ኮደን ኤድ ቄታ ዋኒ ዩም ሴሳድምና ሰርዴስ ግዶ ሀላማ ዳይድና፣ ኤና እግ እለማ አፓላን ጫውልን አርሳንቴ ፓለንዛራ ያአና ኬያአይ ዮር ኦጎኖ ኬናንቴ ኮንታሀና፡፡ ⁵ ዋቻጳያ ናንቴ ኬንታ ግያ አፓላ ጫውሊ አርስና ክአርሳይኖ፣ እንታሀሞ አባ አባሳ ኤጎን ኤናሳ ዎሮ ክናንቴ ማኚ ማታና እታማታይ፣ ናን ክሳም ካ ሳዳን ጰቆን ፃፍሮ እንታ ሴስማሞ፡፡ ⁶ ባርያሳ አፓፎ ባርዩን ኦኖና ናንቴ እጌያይንም ቃሀ ዳ ክኤሳሬ፡፡ ⁷ " ፔን ፊላድልፍያ ግዶር ዶን ባርዮን ኦኖንናንቴ ባርያሳ ኤጎን ኤያ ይንታ ሀማንቴ ፃፍማና ክያማዶ ጋዛስ ጎንጳ፣ ዳዊት ሞሮን ሙልጳስ ጌጳቤ ባርያ ሞሮንሰ አርድን ሙልጳንስ ጌጳ ይንተና ክማይ ኖ ክቡልደን ኤድ ድፃያ ቆልማሞ፣ ክድፃዶንም ካ ኤድ ቡላያ ቆልማሞ፡፡ ⁸ እንታ ሀሳ ዋድማን ጴስድና ታ ኤድ ሀውካሞ ዩድፅማ ሙልጳፓ እንታ ሀሳ ዎትሮ ሀይድና፡፡ ካታ ቃጃ ሀዶን አንታ ጴስድ ኮን ያ እሳ አፓንካ ዋቻጵና ናብን እሳም ካሞ ያ ጋራድማሞ፡፡ ⁹ ባርዮ ኤድ ትማ ውቲ ባረዮ ኤድና ሀንቴ ፓግማይና ኤና ሜሽን ኤና ሀካላ ናዴ ሀሳ ራሮ ኬኮምፓርሴሀ እንታ ሀም እናሻዶን ኬጴሴሀ እንታ ሀያና እያያይ፡፡ ¹⁰ ጋሎን ዶንሻንቴ ሀዴሀ ናንቴ፣ አፓ ሀናንቴ እጌያዳሀ ሀዶን ናንቴ ሀማንቴ ታ ፔሮ ኤድን ዶን ዛራ ጋሎን ናአይን ውልባራ እንታ ሀም ማንካና እማንካይ፡፡ ¹¹ እንታ ዩሪካ ናአና እናአይ ኤድ ሀውስካሞ ሀካላ ኡስን ጋዛን ቻን ኮጋሬ ዮራ ሀላዳ ፃሊ ዮድማ፡፡ ¹² ኤያ ዋቻጳያም እንታ አባስ ፓላን ኦኖሮ ኪም ቱፓና እያያይ አጎባራ ኖ አትማሞ፡፡ እሳ ገጳሳ ናብን እስ ጌጰስ ሞሮን ናን ጥር ጌጳ እስ ባጵይ ፓላን ዴንታን ሀሊንስ ነናብን ከዛራ ዎደና እዎዳይ፣ ናብን እሳ ሀሊን ካሞ ክዛራ ዎደና እዎዳይ፡፡ ¹³ ባሪያስ አፖኖ ባርዮን ኦኖና ናንቴ እጌያይንም ቃሞሀ ዳ ክኤሳሬ፡፡ ¹⁴ ፔን ሎዶቅያ ግዶር ዶን ባርዩን ኦኖን ናንቴ ባርያሳ ኤርጎን ኤያ ይንታ ሀማንቴ ፃፍማና ክያማዶ፣ ጎንጰስ ማይህ ሀማ ባርያሳ ማኛስ፣ ዮር ውልሳ ብታ ይንታና ክያማይ፣ ¹⁵ ያ ቃጂ ወይ ኦይጳሀም ሀዳድሞታሀ እንታ ሀሳ ዋድማን ጴስድና፣ ቃጂ ወይ አይጳ ሀዳ አኒ እንታ ናሽና እናሻይ፡፡ ¹⁶ ታ ያ ሱ ቱልና ሀዶ አይጳ ወይ ቃጂ ሀዳድሞንታሀ እንታ ሀም እሳ አፓሮሀ ማማናንቴና እዶ፡፡ ¹⁷ እንታ ዋድጳቴ ጫፍድና ዮር እናንቴ አብዛግሳያ ካለሀሞ ቆልማሞ ይንታና ሀማይ፣ ታ ያ ጋሎ ኤድ፣ ምሰክማያኩሪ ሀዶን ያ ሀም ጴስማ፡፡ ¹⁸ አጋታሀ ዎድሞ ሀዴሀ ናንቴ ወርቄንቤ፣ ፑርዱንቆ ሃዳን ጋሬሀ ናንቴ አፓላን ጫውልንቤ ኢም ሀሼዴሀ ሀያያ አፓም እካላ አፓላን ጫውልንቤ ኢም ሀሼዴሀ ሀያያ አፓም እካላ ሀቼሀ ናንቴ ሀም ክላና እክላይ፡፡ ¹⁹ እንታ ኤና እናሻይና ዛራውል ዋጭማና እዋጭ፣ ጳሀሞጳናእጳይ፡፡ አጋታሀ ዋቻጵማ ሴሶንባራ ማትማ፡፡ ²⁰ ታ እንታ ሙልጳፓሮ ዎያንቴና እግስማይለ ኤድ ሀውካ እሳ ናቅሲም ኤሳራንቴ ሙልጳፓን ክቡልና እንታ ክካላ አርዳና አአርዳይ ክማላ እንታ ዳአኖን እሳና እሳይ ኖሀሞ እማ አጲማና ክእሲማይ፡፡ ²¹ እንታ ዴንጵን በሽንቴ አባ ማላ ጌጳሞሮ እደርቃዳግያ፡፡ ኤያ ዋቻጳያሀሞ እላማ ጴግ ክዳርቄሀናንቴ ሀያና እያያይ፡፡ ²² ባርያሳ አፓኖ በርዩን ኦኖና ናንቴ እጌ ያይን ቃሞሀዳ ክኤሳሬ፡፡