¹ ናሲ ዳቢ ካላ ኑንቆን ሌኤንባራ ከኡትስ እንታ ሀፕድና፣ ኖሀሞ ክሳ ቁሽሞ ታጵቤ ሜቴ ሶጳና ክስ ኮደ፣ ክስ ቁሽሞና ሳ ብራሮ ጉምፓ ብታሞ ጋንት ኬዛራ ዳይድና፣ ክሳ ሜቴሮ ኢሪሞ ናብ ዳይድና፡፡ ² ዳታ እያፓዳ ሸዊ ታሀደና፣ ክሳራኖ ዳብታ ዲብ ሀንጳያ ራን ግያ ጌጵና ኮዶ፣ አፓኖ ክሳ ዞቦ ግያና ኮ ሜስ ቃራ ዩሳ ካንታቤ ዩስ ጌጳሞን ቦርኮቶንቤ ብታ ጌጵቤ ዳብታ ናንቴ እምድና፡፡ ³ ኣብታስ ሜቴናስ ካላ ሀጅም ቆራ ጌጵ ዴሳ ጋንትግያና ክዛራ ኮዶ፡፡ ኮደን ሀጅሞኖ ቆራሮ ኪም ዴሶታ ናአዶኖ ባሽድና ኤድኖ ፔሮ ዶኖ ፓይላ ኪም ዮርሻንቴ ጫግድና፡፡ ⁴ ኤና ፓይለ ቃራ ሜሻ ናንቴ ኮንፖርስድና፣ አጋሀሞ ሀርቴ ኖ ጌጳሞን ዳብታ ናንቴ እምድና፡፡ ሀያንቴ ኤና ይጌይና "ዳብታም ግያ ዳዮ ሀውቴ? ክማላ ዳማንቴ ኪም ባሻያ ሀውቴ? ሀማንቴ ኤና ክናንቴ ኮንፓርስድና፡፡ ⁵ ዳብታ ሾያሞ አፓቤ ኢሮሞ አፓቤ ክናንቴ እንጵድና፣ አርፒ ኦድታሞ ለማ ክአሽኬሀናንቴ ክናቴ ጌጳሞን እንጵድና፡፡ ⁶ ኖሀሞ ባርም ኢራናንቴ ሀያንቴ ፕር ባርያሳ ናብንካ ክሳ ብታሞን ራቅን ካሞ ኤና ጳ ፓላሮንዳናም ኢራን ካርስድና፡፡ ⁷ ባርዮን ኤናም ክባሼሀ ናንቴ ክናንቴ ካንታን አንጵድና፡፡ ኤድን ቢዛን አብ አብን ዛራ፣ አፓን ውል ጴላቃንዛራ ኤድ ዛርስን ውልዛራ ጌጳሞን ክናንቴ እንጵድና፡፡ ⁸ ፔንስ ዎድድዛራ ካርሳንቴ ባርያ ናሳ ኤና ናንቴ ሀማንቴ ጃዳሳ ሳደን ጳቆን ዋርትሮ ናብንሳ ይቆልምና ኤና ፔሮ ዳና ዳብታ አጋናንቴ ኮፓርስና ኬኮንፓርሳይ፡፡ ⁹ ኤድ ቃሞሀዳ ክኤሳሬ፡፡ ¹⁰ ኤያ ላሽጳያ ኪም በሽነ በሽጳይ፣ ኤያ ሀልፓንካ ዴስጳያ ኪም ዴስዴሳጳይ፡፡ ዮራ አጋሀሞ ባርዩን ኤናሳ ዋቻሞቤ ካንታቤ ኮሳ ሀፓጳኖ ዮራ ካሀ ዶደንና ሼዳጳይ፡፡ ¹¹ ናንሲ ፕር ዳቢ አብ ፔን ባራ ኮኡትስ እንታ ሀፕድና ብራስ ባያና ክጴላቃይ፡፡ ¹² ዳብታ ብራስ ጌጳሞንካ ክግያና ክአሽካይ፣ ፔሮ ኤና ዳና ፓይ ዳብታ ብራስ ሀጅምንሳ ዩፓሻ ዳናንቴ ኬዶንፓርሴሀ ሀይድና ኖ፡፡ ¹³ ኤናሳ ዎት ፓላንባራ ፔንዛራ ኖ ክስ ጳባራዛራ ዮር ጌጵ አና አሽክማ ድማና ክአሽካዶ፡፡ ¹⁴ ዳብታ ብራስሳ ናብንካ ዮር ሌሌ ሀማድማ ክአሽኬሀ ጌጳሞን ክናንቴ እንጵድና፣ ኤና ፔሮ ዳናም ፓይላ ዩዛራ ሀይድ ሀልፓንካ ታሀጳዳ ዳብታ ካዳንካ ዳ ናንቴ ዮር ኤድግያ ሀማ ኬአሽኬሀ ኤና ናንቴ ጌይድና፡፡ ¹⁵ ፕር ብራንቴ ዳብን ግያ አሽካጳ አጋ ክጴላቄሀ ክናንቴ ኡስን እማንቴ ዮራ አጋ ናንቴ ኮንፓርስምና ኤና ፓይላ ዴሳ ጴሀናንቴ ክናንቴ ጌጳሞን አንጵድና፡፡ ¹⁶ ሀያንቴሀሞ ናና ካናናቤ ኤና ኬሳ ጋርናቤመ ኤና ዎድሞናቤ ኡና፣ ኩፍናቤ ኤና ጌጵናቤ፣ ዋድን ኤና ፓይ አንና ዩስ ዋርታናሀ ወይ ዩሳ ዎት ዮር ኬም ዋና ሀያያ ማይጴ ኬዎዴሀ ኬም ሀይድና፣ ¹⁷ አጋ ዩንታ ክታዶኖ ዳታሳ ናብኖ ወይ ዩንዛራ ማይጴን ይቆልማ ዳብታሳ ናብንሳ ፓይደን ይቆልማ ኤድ ሀውካሞ ዮራ አጋም ሻናንቴ ወይ ሻንሻናንቴ ሀያን ክጋሬሀ ናንቴና፡፡ ¹⁸ ዮራ ካናንቴ ባሀልማሞና ኮዛግሳይ ኤና ሜቴንካ ፓሀላስ ሀውካሞ ዳብታሳ ፓይዶን ክጴሴሀ፣ አጋሀሞ ሀርቴ ፓይዶኖ ኤድ ፓይዶ፡፡ ፓይዳ ማቶ ለቤ ላታምቤ ላና፡፡