¹ ፓላሮ ዮር ሀፓጳን ዮር ሀሊ ሀፕንጵድናሜ ካላ ሀዮን አፓላ ግያ አርሳዶኖ፣ አንፕን ዛራ ዎያዶኖ፣ ዩስ ሜቴሮ ኤዝኒ ታጵላማ ዎዳዶኖ ሀፕጵንድና፡፡ ² ናሀሞ ስርማና ኮዶ፣ ሀጳናንቴሀሞ አስጳንቴ እለትድና፡፡ ³ ናንሲ ፕር ዮር አብ ፓላሮ ሀፕንጵድና ቃሮዛዊ ሜቴንሳ ሶጵንካዳ፣ ቁሽሞን ሶጵንካዳ ሀፕንጵድና፡፡ ⁴ ክሳ ስማኖ ኤዝንንስ ባሀለሞ ፓለንባራ ተርሽድና ኤስኖ ኮአጳኋ ናስ ኮሳም ይዛቃናንቴ ኤስን ካላ ቃራስ ናዕድና፡፡ ⁵ ናሀሞ ኤና ውልስ ብታ ኤና ሻናያ ናሳም አጵድና ናሳሀሞ ኪም ባርያ ዛራቤ ባርያሳ ብታሞን ራቅን ዛራ ኪም ቻጵድና ዞን፡፡ ⁶ ኤስሀሞ ኮም ሮሮ ሺህ ካለቤ ሮሮ ማቶ ለማቤ ለምታቤ ናንቴ ኮም ቶጵሀናንቴ ባርያሳ ራቃ ኮናንቴ አሽካጶን ራቅ ደራን ዛራ ያዕድና፡፡ ⁷ ጳ ፓላሮ ባንቆ ማትድና ሚካኤል ኤርጎን ኤና ዋኒ ማላ ሜሽ ማላ ኡሮ ዳምድን ሜሽቤ ክስ ካይስናቤ ኤማላ ዳምድና፡፡ ⁸ ኖ ሜሽቤ ክስ ካይስናቤ ኬም ባሽጵድና፣ ጳ ፓሮ ራቅን ዩሳ ዶንም ኬም ጋርሳጵድና፡፡ ⁹ ቃራጌጳ አናን ጋንታ ኪም ጳባጵድና፣ ኖሀሞ ሜሺ ሀንጳያ ፔን ጋላፍን ውልም ሴሳያና ኖ ፔን ዛራ ኪም ጳባጵና ኪስ ካይሳናሀሞ ክማ ጳባድና፡፡ ¹⁰ ናሲ ጳ ፓላንባራ እለት ዩንታ ሀማያ እንታ ኤሳርድና " ታ ጳአሾኖ፣ ካንታኖ ጌጳሞኖ ኖ ክርስቶሳ ብታሞኖ ናዕድና፡፡ ሮሮረንቤ ሶትንቤ ዎሳ ባርያሀላ ዎሳ ሴሶናም ጌያያ ሜሻ ኪም ጳባጵና፡፡ ¹¹ ኬ ባርዮን ኤና ባርያ ናሳሳ ማአስንካ ባርያስ አፓን ጴላውን ዩጌያዶንካ ኬ ባሽድና፣ ላይህ ዩሳ ዴንጵንዛራ ዩስ ሳዳን ናንቴ ቃባድማ ዩም፡፡ ¹² አጋታሀ ኤና ፓላሮን ዳና ዩቲ ዋዝንጵማቴ ፔንቤ ሴኤንቤ ዩቲ ሀዩ! አጋሀሞ ሀርቴ ሜሻ ክሳ ሮሮ ክስ ቄታ ኮሽጶን ክጴሳዶንታሀ ዮዛራ ጌጵ ጳጋሳንቴ ሀንችድና፡፡ ¹³ ሜሽ ኪሚ ፔሮ ጳባጎንታሀ ሀፓንቴ ኤስን አንጌን ስም አጳዶንም ኦይትድና፡፡ ¹⁴ ኤስኖሀሞ ራቅን ዳራን ኮናንቴ አሽካጶን ዛራ ከልካ ጳጳንቴ ኮዮኤሀ ናንቴ ኮናንቴ ባረኑንቆስ ኮሊ ጌጵ ለማ እንጵድና፣ ኦጎኖ ዩንታ ሀይጳደኖ ጉንታ ካላ ፔግንጳንቴ ቦን ካላናንቴ ኦጎታ ኮም ቶራጳኋ ኮዴሀናንቴ፡፡ ¹⁵ ጉንታሀሞ ኤስናም ሚሮኖ ሳቴ ኮዮኤሀ ናንቴ ዩስ አፓን ባራ ዮ ኑንቆ ሚሮግያሀማ፡፡ ዩንቅስድና፡፡ ¹⁶ ኮን ፔኖ ኤስንም ጳአሽድና፣ ፔን ዋጭ ሀማንቴ ኑንቆን ኦጎም ዩዛራ ማስድና፡፡ ¹⁷ ቃርታሀሞ ኤስንዛራ ጳጋሳንቴ ኤና ባርም ምሥካይናም የሱስሳ አፓን ፃሊ ዮዳዳ ናና ኮሳ ማላ ኡሮ ዳማናንቴ ኬዛራ ያዕድና ¹⁸ ቃርታሀሞ ኑንቆን አፓን ካላ ዎያንቴና ክዶ፡፡