1 ናሲ ፓላ ሀሊቤ ፔ ሀሊቤ አንታ ሀፕድና፤ ፓን ብራንቤ ፔን ብራንቤ እግና ሳግድና፣ ኑንቆ ሌኤሀሞታ ናንሲ ዳማሞ፡፡ 2 ፔኖ ጋዛኖ፣ ሀሊኖ እየሩሌም ሜ ዩ አንጌ ናንቴ ሼሽካጳግያ ሺ ሽ ካጳንቴ ፓለንባራ ኮሀንችካ እንታ ሀፕድና፡፡ ፕርካሞ አፓ ፓላንባራ እንታ ኤሳርድና፣ "ባርያሳ ዴንታኖ ኤናሳ ባክሮና ኖ ኤላማ ዳናክዳይ ኬሀሞ ክሳ ዛርክናና ኬዳይ፣ ባርያ ኖ ኬለማ ዳክዳይ ኬሳ ጌጳ ማታና ክማታይ፡፡ 3 4 ኖ ኤሳ እርማቆቆን ኬሳ አፕሮሀ ጱቃ ክጴቃይ፣ ታ ካሀ ካርሳንቴ ዴንጵ፣ ወይ ቃቦ ወይ ኤፒ ወይ ጋሎ ዳማሞ፣ ደንብኖ አናን ጋይኖሳግድና፡፡ 5 ፓላሮ ዳርቃዳ የሱ ይጌይና "እንታ ዮር ውልም ሀሊ ሀያ እያያይሀ ሀምድና ፕር አፓ አጋ ጋዛስቤ ጎነጳቤ ክዶንታሀ እግያ ፃፍማ" ሀምድና፡፡ 6 እግያ ይንታ ሀምድ፣ ዮር ውል ፓይላ ማቅድና ብራሮ ዳቤ ቱንሳሮ ዳቤ አንታና ኤያ ባሀርጳ ዳናቴ ስዳን ኑንቆን እንታ ክናንቴ ሽኒ ቆልማ እማናእማይ ፡፡ 7 ኤያ ባሻያ ዮር ውል ኦሞ ቻናክቻይ እንታሀሞ ክሳ ባርዩ ማታና እማታይ ኖሀሞ እሳ ናሲ ማታና ክማታይ፡፡ 8 ኮደን ኤና ኩርታና፣ ባርያሀ ዳድማና፣ ሴሶን ኤና ፣ ዴሶን ኤና፣ ኤና ሜና ማላ ጎባያይና፣ አሽኮን ኤና ዮር ባርዩን ትሞን ምሥካይና፣ ፓጋሞን ኤና ፓይላ ቤሬ ኬሳ ቱንስኖ ኬም ኖን ጅሞሮ ጳባጳያና ኮማታይ፡፡ አጋ ዴንጳ ላንሳና፡፡ 9 ዮራ ካይሶን ባኣይና ኩስን ሶጳና ግዶር ፃኦሳጳና ዮዳዳና ኤርጎን ኤና ሶጰና ግዶር ካላ ኤሳ እካላ ሀምድና፡፡ 10 ባርያሳ ኡስኖ ጋዛኖ ኢም ጌማር ጌጵ ጉድጲ ካላዛራ ቻንቴ ፔኖ ጋዛኖ እየሩሳሌም ፓላንባራ ባርያባራ ኮሀንችካ እናንቴ ጳውድ፡፡ 11 ናሀሞ ባርያሳ ጌጳሞንካና ኮሮጳይ፣ ኮሳ ሮጵንቶኖ ካን ሱና ረኸ ረአ ሀማያ ግቤ ሼዳያቤ ግያና ረኸ ረኸ ኳማይ፡፡ 12 ኮሳ ምልጳፓ ታጅ ላማቤ ኮ ካርሚ ጌጵ ጉድ ዳድ ሙልጳፓና ዛራ ኤርጎን ኤና ዎያንቴቤ ሙልጳፓንዛራ እሥራኤል ቢዛናሳ ናብን ፃፋጵኋ ዳይድና፡፡ 13 ሪዮን ዮኡንባራ ሙልጳፓ ማካም፣ ዋርካታ ባራ ሙልጳፓ ማካምምዛቅባራ ሙልጳፓ ማካም፣ ሀዮን ዩዋይንባራ ሙልጳፓ ማካም ዳይድና፡፡ 14 ፔን ሞሮን ኦጎሳ ሱኒና ካርሚን ይንዛራ ዎይሳጳ ሱኒንና ታጵ ላማና ዳና ኬዛራ ኤያ እንታ የሱስ ዩእስድናሳ ናብናም ኬሳ ፃፋጳኋና ኬዶ፡፡ 15 እላማ ጴለቅቴዳ ኤርጎን ኤያ ከታማን ፔን ኦጎሳ ሙልጳፓንቤ ከረሚንቤ ዮክንሳያ ዛው ዎርቄ ጋንት ታስ ሀማ ካላ ክሳ ድይድና፡፡ 16 ሞሮንሳ ጉድጳሞቤ ጌጳሞቤ ራቅ ኦድ ባሀላበራ ውል ባራ ልኪና ኮዶ፡፡ ኖሀሞ ሞሮንናም ዛውታሀ ዮክንስድና፣ ኮሳ ጉድጳሞኖ ዮክንስ ሽህ ታጵ ላማ ማትድና፣ ኮዳ ጌጳሞንቤ ዞን ካሞ ካስ አጋንታ ማትድና፡፡ 17 ሀያንቴ ፕር ሞሮንሳ ከርሚን ዮክንስድና ኮካ ጉድሞኖ መቶ ኦይድታም ኦይድ ዮክንሶና፡፡ 18 ሞሮንሳ ካርሚን ዩንካ አሽጶኖ ዎርቃ ሱና ኢያሶጲድካና ሞሮናም ኮሳ አሽካጵድ ዎርቄ ሼካያ ግያ ረኸ ረኸ ሀማያሀና፡፡ 19 ሞሮን ኦጎም ኮ አሽካጵድ ዎርቄና ሱንን ጋይና እግናበና፣ ብራንቴ ዩንካ አሽካጳ ዋርቃሱና እንን ጋንታ ኢያሰጲድና፣ ላንካ ስንፔርና፣ ማክንሳ ኬቄዶንና ኦይድሳ መረግድና፣ 20 ዶንግሳ ሰርዶንክስና፣ ላይስ ሰርድዮንና፣ ሶጵሳ ክርስቲሎቤና፣ ሎንካይሳ ቢረሌና ስልሳ ወራውሬና፣ ታጵሳ ክስጵራስስና፣ ታጵካልሳ ያክንትና፣ ታጵ ላንሳ አሜቴስጢኖስና፡፡ 21 ሙልጳፓና ታጵና ለማና ዎርቄና እንቁ ሀንጳይናና ኬ ፓይላ ሙልጳፓና ዎርቃ እንቁ ሀንጳያሀና አሽካጰ፡፡ ሞሮንሳ ጎይኖ ቦዋኖ ሼዳያ ረኸ ረኸ ሀማያቤዎርቄ ግያና ኮዶ፡፡ 22 ውልም ቻላዳ ጌጳ ባርያቤ እያቴ የሱስቤ ኮ ኦኖ ኮደን ታሀ ፔን ኦጎሳ አኖ እንታ ባርዮ ኦኖ ሀአብ ሀፓድማሞ፡፡ 23 ባርያሳ ጌጳሞኖ ሮሮ ከናንቴ ኮማንታሀ እያታ የሱስ ሮሮ ኮ ሮሮ ክዶን ታሀ ፔን ኦጎ ናንቴ ሀዩ ወይ አርፒ ዛግስባሞ፡፡ 24 ኤድኖ ኮሳ ሮሮንካና ኮያያይ ኤና ፔሮ ዳና ብትና ኮናንቴ ጎሽን ባአናሴባአይ፡፡ 25 ኦጎታር ሶቲ ኮቆልማታሀ ኮሳ ሙልጳፓና ሮሮ ውል ድፅሚ ዳማሞ፡፡ 26 ኤድን ፔሮ ዶንሳ ጎሽኖ ቃይስኖ ኮዛራና ናአና ኮናአይ፡፡ 27 አያተ የሱስሳ ጳኦሾን ዋርቃትሮ ኤና ዳናሳ ኦባራ ዮር ዛርቦ፣ ዮር ሲዮ ኤና ፓግማይና ሾልካሞ ኮዛራ አርድማሞ፡፡