አፓ 21

1 ሜሽን ራቅን ዛራ ጌጵሳጳቤ ዛዊን ጳሀይን ዮዳዳ ባርዮ ኤርጎ ኤድ ካላ ፓላንባራ ክያንችካ እንታ ሀፕድና፡፡ 2 ኖሀሞ ጉንታ አና ኤናም ጳብሳዳም ሜሽም ቦን ሺህ ካላ ናንቴ ጳክድና፡፡ 3 ቦና ሺያሳ ማቃዛራ ናንሲ ከሀ ካርሳንቴ ኤናም ሴሳን ክጋሬሀናንቴ ኦሎሮ ኪም ጳባንቴ ክዛራ ሙልጳፓን ድፅድና፣ ክዛራሀ ሞ ኡታን ክጋሬሀ ናቴ ማህታምን ክዛራ ጳይድና፡፡ ናንሲ ዮራ አጋሳ ራስ ባራ ሮሮረ ቄታናንቴ ኪም ቡልጴሀና ኮዘግሳይ፡፡ 4 ናንሲ ባርቶ ጱፅ እንታ ሀፕድና፣ ቦርኮቶና ግዶር ኤና ብቶን ኤና ዴንጵንባራ ጳጳንቴ ክርስቶ ጌጳጵና፡፡ 5 ኤና ዋኒ ካርናን ቻዳና ሽጳደና እግና ቦና ሺያስ ማቃዛራ ዴንጵንባራ ጳባድማሞ፡፡ አጋ ዴንጳ ብራንቴ ጳጳጳያና፡፡ 6 ዴንጵን ብራን ጳጵንቶሮ ኤና ዳና እግና ጎሽጳና ጫራኚናና፡፡ ዴንጳ ላንሲ ኬም ላአስማሞ፣ ኮን ኬ ባርያሳቤ ክርስቶስሳቤ ዋድማ ኤድና ኬዳና ኬዳይ ክማላ ቦን ሺህ ካላ ጌጳጳና ኬጌጳጳይ፡፡ 7 ቦና ሺያ ክማቅና ክማቅና ሜሽም ጳክንባራ ቡላና ቡልጳይ 8 ኤና ፔና ውል ግዶ ዳና ኤና ጎግ ሀንጳይናቤ ማጎግ ሀጳይናም ኤና ፔን ጋላፍሮ ዳናም ኬምሴሳ ዳቴ ባንቆ ኤድ ሀያናንቴ ኡታና ክኡታይ ኤናሳ ጱፃሞና ሻሚግና ኮዶ፡፡ 9 ኬሀሞ ፔን ውል ዛራ ኡታንቴ ባርዩን ኤናሳ ራቅንቤ ኬ ፔን ጌጶን ናሽጶንም ካርድ ካደን ኖ ፓላንባራ ሀንቻንቼ ኬም ቆቃቴ ካይስድና፡፡ 10 ኤና እግናም ጳብሳዳ ሜሽቤ ዳብጻቤ ጋን ጋንጻ ዳብጻ ኑንቆንባራ ኡታዳሳ ዩንግዶር ኪም ጳባጶን ራቅን ኖን ሮጵናንዛራ ኪም ጳባጵና፣ ኬሀሞ ሮሮንቤ ሶትንቤ ላይህ ላይህ ሮሮውል ጋላናኬጋላይ፡፡ 11 ናንሲ ብታሞን ቦርኮቶን ጫውልንቤ ይንግዶር ዳርቃዳ ብያም አንታ ሀፕድና፡፡ ፔንቤ ፓላንቤ ክሳ ላንካ ጎብቴ ካይድ ራቅካሞ ኬሳ ቆልማሞ፡፡ 12 ኤና ጃዳና ባርዮን ኤናቤ ባርያም ምሥክምናቤ ባርያሳ ብታሞን ቦርኮቶንሳ ዎትሮ ዎያንቴ ኬዳሀ እንታ ሀፕድና ዋርቃትና ናብን ጋይናም ቡልጵድና፡፡ ዋርቀቃታ ዋ አጋሀሞ ሳዳን ጳቆን ጋንታም ቡልጵድና፣ ኤና ጃዳና ናብን ኬሳሀ ሀማንቴ ኬሳ ዋድማና ዛራ ኬናንቴ አሽካጵና፡፡ 13 ኑንቆኖሀም ኤና እሳዳናም ማስድና፡፡ ዴንጵንቤ ዴንድን ራቅንቤ ኬግዶር ዳና ኤና ዴንጵናም ማስድና፣ ኬ እግና ፓይላ ናንቴ ኬስ ዋድማና ዛራ ኬናንቴ አሽካጵና፡ 14 ናንሲ ዴንጵንቤ ዴንጵን ኦሎንቤ ኖን ዛራ ጳባጵናኬም ኖን ራቃ ዴንጳ ተንሳና፡፡ 15 ኤና ናብንሳ ሳዳን ጳቆን ዋርቃትሮ ፃፋጵምና ውልኖን ራቅሮ ጳባጵና፡፡