ማቴዎስ ኡኩንሳ 8
1
ኢየሱስ ጉርባስባራኻ ክያንቻና ዛርስኖ ጱፅኖ ኪም ጫግዲና።
2
ሙልካምባ
ኤዲ ካላ ክዛራ ናዴ ክሳ ዎትሮ ኮምፓርሳንቴ፦ “ጌጳዮ፦ ሃናሻያዳና ኢም ፓሽሻዻን ቻላና ሃቻላይ” ና ክያማዶ።
3
ኢየሱስካሞ ኣን ይሳም ይእሳንቴ ክዛራ ዎዳንቴ ክግያ “እንታ ናሽዲና፤ ያ ፓሽማ” ና ክያማዶ። ኣጋዛራ ኤያ ሙልካምባንራኻ ፓሽሽዲና።
4
ሃያንቴ ኢየሱስ ክግያ፦ “ሃፓሻዶንም ኤዲ ካላናንቴኻሞ ሃጌይናኖ፤ ኮዶን ያ ቃልቴ ሃም ካናናንቴ ዻውማ፤ ሙሴ ይጌያዶን ባርያናንቴ ዬራ እንዻይናም ካናናንቴ እምማ፤ ኦጎኖኻሞ ኬናንቴ ማኚ ኮዴ” ና ክያማዶ።
5
ኢየሱስ ቅፍርናሆም ክዬስካና ዎታደርና ማቶናሳ ጋራ ክካላ ናዴ ይንታ ሃማንቴ ኪም ምስክዲና፦
6
“ጌጳዮ፦ እሳ ካይስታ ራ ማልግማንቴ ኦኖሮ ዎዻንቴ ጌጲ ጋልቴ ክዶ” ና ክግያ ክያማዶ።
7
ኢየሱስካሞ ክግያ፦ “እንታ ናዴ ኪም ፓሽሻና እፓሽሻይ” ና ክያማዶ።
8
ዎታደርና ማቶናሳ ጋራ ክግያ ይንታና ክያማዶ፡- “ጌጳዮ፦ እንታ ኤዲ ሃግያማ ይንሳ ኦኖንዛራ ይኣርዳያ ኤዲ ትማሞ፤ ኮዶን ያ ኮታር ዳንቴ ኣፖ ሶጎ ቡልማ፤ ካይስታ እሳ ፓሻና ክፓሻይ።
9
ኢም ኤርጋይና ኤና እሳ ጋርና ዳይዲና፤ እንታኻሞ ኤርጎን እቡላይና እሳ ቾባራን ጋይና ኤና ዳይዲና፤ ኬግዶር ካላግያ ‘ይማ!’ እያምና ኖ ያኣና ክያኣይ፤ ካላግያኻሞ ‘ንማ!’ እያምና ኖኻሞ ናኣና ክናኣይ፤ ካይስታ እሳምካሞ ‘ኣጋም ሃይማ’ እያምና ኖ ሃያና ክያያይ።”
10
ኢየሱስ ዎታደርና ማቶናሳ ጋራ ዼላቃ ክማሳዳም ዬርሻንቴ ኤና ኪም ጫጋይናግያ ይንታና ክያማዶ፦ “እንታ ዬናንቴ ጎንዼና እጌያይ፤ እስራኤል ኤና ግዶር ኤዲ እምነት ይንታ ሃማኻ ዳ ካላኻሞ እንታ ሃፓድማሞ፣
11
እንታ ዬናንቴ ጌያና እጌያይ፤ ኤድኖ ጱፅኖ ሃዮን ይውታንባራቤ፣ ሃዮን ይዋንባራቤ ናዴ፤ ፖላን ማንግስትሮ እꬅማናንቴ ኣብርሃምቤ፣ ይሳቅቤ፣ ያእቆብቤ ላማ ክንካ ዳርቃና ኬዳርቃይ፤
12
ኮዶን ፖላን ማንግስትን ይናንቴ ኣሽካዻዳናም ጳልንዛራ ቡላንቴ ፅፓንዛራ ዻባና ዻባዻይ፤ ኦጎታርካሞ ኤፕቤ ግግር ማሳቤና ኮዳይ።”
13
ኢየሱስካሞ ዎታደርና ማቶናሳ ኤያ ጋራግያ፦ “ይማ! ሃሳ እምነትንግያ ሃናንቴ ዳና ኮዳይ” ና ክያማዶ። ኣጋዛራ ካይስታ ክሳ ፓሽዲና።
14
ኢየሱስ ጴጥሮስ ኦኖን ክኣርዲና፤ ጴጥሮስሳ ባይስኖ ግባዛንቴ ዎዻንቴ ኮዳዃና ክያፓዶ፤
15
ሃያንቴ ኖ ኮሳ ኣኒም ክላኣሳዃ፤ ግባዝኖኻሞ ኮም ጋርዲና፤ ና ዻጳንቴኻሞ ኪም ቾችንሽዲና።
16
ኮእባናናኻሞ ኤና ጱፅና ቤሮን ይሽማዳናም ኢየሱስዛራ ኤና ባእዲና፤ ኢየሱስ ቤሮናም ኬግዶርካ ዼላቅካ ሶጎ ቡልዲና፤ ኤና ሃጅሞናምካሞ ኖ ፓይላ ፓሽሽዲና፣
17
ኣጋኻሞ ኢሳይያስሳ ኣና ኣፓ ይንታ ሃማንቴን ክጌያዳ ኣፓ ሃምዲና።
“ኖ ቡርቅና ዎሳም ቻይዲና፤
ሃጅሞና ዎሳምካሞ ባእዲና።”
18
ኢየሱስ ኤዲ ጱፅ ኪም ታኻንቴ ኮቡካዶን ይያፓና፤ ክሳ ታማርና ኛፓስንሳ ሳባራ ኬሳጌኻናንቴ ጌይዲና።
19
ዋዳ ኣጋኻ ኣይሁድና ባርዮን ኦኖንሳ ዳምብን ታማርሳያ ኤዲ ካላ ኢየሱስዛራ ናዴ ክግያ፦ “ኣስታማራዮ ራቅና ፓይላ ሃያኣይናዛራ እንታ ሃም ጫጋና እጫጋይ” ና ክያማዶ።
20
ኢየሱስካሞ ክናንቴ ይማሳና፤ “ኩዬናሳ ኦሎ ዳይዲና፤ ካርያና ፖላንጋይናሳኻሞ ኦኖ ዳይዲና፤ ኮዶን ኤዲ ናሶናንቴ ሜቴን ይንዛራ ክጌክንሳያ ራቅ ቆልማሞ” ና ክግያ ክያማዶ።
21
ኤና ኪም ጫጋይና ግዶር ኤዲ ካላ ክካላ ናዴ፦ “ጌጳዮ ብራቴንካ ቃልቴ ኣባም እዱኬኻናንቴ ናሽማ” ና ክግያ ክያማዶ።
22
ኮዶን ኢየሱስ ክናንቴ ይማሳና፦ “ኤና ዴምጵና ይሳ ኤና ጃዳናም ኬዱኬ፤ ያ ኢም ጫግማ” ና ክግያ ክያማዶ።
23
ሃያንቴ ኢየሱስ ጋግንዛራ ሃንችዲና፤ ታማርና ክሳኻሞ ኪም ጫጋንቴ ጋግንዛራ ሃንቻንቴ ያእዲና።
24
ኬኬንሽማ ቱልማይ ጌጲካሞ ቱልማይስዲና፤ጋግኖኻሞ ኮሳ ፁዋዛራ ኬም ጁክዲና፤ ኮዶን ኢየሱስ ዎዻንቴና ክዶ።
25
ታማርና ክሳኻሞ ክካላ ናዴ ኪም ቃንሳንቴ፦ “ጌጳዮ ዎቲ ካይቴና ዎዶ፣ ዎም ዻኣሽማ” ክግያ ሃምዲና።
26
ኢየሱስካሞ ኬግያ፦ “ዬቲ ክና እምነትንሳ ቶኻና ሃርናንቴ ኮንታ ዬኩርትንዻዴ!” ሃምዲና። ሃያንቴ ኖ ዻጳንቴ ግባሮንቤም ኛፓስንቤም ጎርዲና፤ ኣጋዛራ ጫክ ሃምዲና።
27
ኤናኻሞ፦ “ካ ኤዲ ሃርቴ ይናንቴን ግባሮንቤ ኛፓስንቤሳ ካውል ኤሳርዻያ?” ሃማንቴ ዬርሽዲና።
28
ኢየሱስ ኛፓስን ሳጋንቴ ፔን ጌርጌሴኖን
ሃንዻይንም ክዬስክና፤ ኤዲ ላማ ቤሮን ይሽማዳና ዱክን ራቅን ይንግዶር ይዶሮኻ ውታንቴ ክዛራ ናእዲና። ኤዲኖ ጎያ ኣጋኻ ሳጋን ኮሳ ባሻዻዛራ ኤና እግና ካሎን ዛርቦና ኬዶ።
29
ኬኻሞ፡- “ያ ባርያ፣ ናሳ ዎላማ ሃሳ ሃርቴ ዶኖ? ዋዳኖ ኮዬስክማ ዎም ጋልንሾታው ሃናኣዶ?” ሃማንቴ እላታንቴ።
30
ኬኻላንካ ሾሊ ራቅ ፔጌ ግዶር ጉቱምና ጱፅና ዼዲቴና ኬዶ።
31
ቤሮናኻሞ ኢየሱስግያ፦ “ዎም ሃቡላያዳና ጉቱምናዛራ ዎኣርዴኻናንቴ ዎም ይእስማ” ሃማንቴና ኪም ኬምስካዶ።
32
ኢየሱስ ኬግያ፦ “ይማቴ!” ሃምዲና። ቤሮናኻሞ ኤና ግዶርካ ውታንቴ ጉቱምናዛራ ኣርድዲና፤ ጉቱምናኻሞ ፓይላ ድሪማንቴ ቃልቴ ኛፓስንዛራ ካይማንቴ ጃይዲና።
33
ኤና ጉቱምናም ግሻይና ካታማንዛራ ጎብቴ ቃልቴ ዬርን ሃምማዶንቤ ኤና ቤሮን ይሽማዳናዛራ ዬራ ሃይዻዳናም ፓይላ ኤናናንቴ ጌይዲና።
34
ሃያንቴ ኤዲኖ ካታማሮን ዶኖ ፓይላ ኢየሱስም ሃፓናንቴ ክዛራ ናእዲና፤ ኪም ሃፓንቴ ፔን ኬሳም ጋራንቴ ክዬኤኻናንቴ ኪም ምስክዲና።