¹ ዬም ዻብንሻን ጋርዼኻናንቴ፣ ዬቲካሞ ኤናም ዬዻብንሽናኖ፤ ² ኤና ዋኒም ዬዻብንሻያግያ ዬምካሞ ኣጋንታ ዻብንሻና ዻብንሻዻይ፤ ሻርቃስ ይንካ ዬሳፓራዳ ኣጋኻ ዬናንቴኻሞ ሳፓራና ሳፓርዻይ።

³ ኣፕን ሃኖንሳ ኢሮ ሃቃን ጌጶን ዶንም ሼድማ፤ ሃንና ናሳሳ ኣፕሮ ዬራ ሾላ ዳም ሃርናንቴ ሃሼዴ? ⁴ ሃሳ ኣፕንሳ ኢሮ ሃቃኖ ጌጶኖ ኮዳዃ፤ ሃንና ናሳ ግያ ‘ሃሳ ኣፕሮ ዬራ ሾላ ዳ ኣጋም እቡሌ’ ሃማንቴ ሃስ ሃጌዬ? ⁵ ያ ካይስንሶን ኤያ፣ ብርሳንቴ ኣፕን ሃኖሮ ቶፓ ጌጳ ዳኣጋም ቡልማ፤ ሃያንቴ ናንሲ ሃንና ናሳሳ ኣፕሮ ዳም ዬራ ሾላ ቡላናንቴ ፃሊ ሃያንቴ ሼዳና ሃሼዳይ።

⁶ ዬራ ጫራጝምናም ቃስክናናንቴ ዬእምናኖ፤ ዬሳ ዎርቄናምካሞ ጉቱምናሳ ዎትሮ ዬዻብናኖ፤ ኦጎንታ ዬሃያያ ዳና ኬ ዬራ እግናም ራና ይሳኻ ትጋና ኬትጋይ፤ ዬዛራኻሞ ማታንቴ ዬም ቦዋና ኬቦዋይ። ⁷ ኦይስማቴ፣ ዬራ ዬኦይሳይናም ዬናንቴ እማና እንዻይ፤ ዛግማቴ፣ ዬራ ዬዛጋይናም ፓይላ ሃፓና ዬሃፓይ፤ ሙልዻፖን ካላ ናዴ ግስምማቴ፣ ዬናንቴ ቡላና ቡልዻይ። ⁸ ኤና ኦይሳናይ ውልናንቴ እማና እንዻይ፤ ኤና ዛጋይናኻሞ ሃፓና ኬሃፓይ፤ ኤና ሙልዻፖን ካላ ናዴ ግስማይናናንቴኻሞ ቡላና ቡልዻይ።

⁹ ዬሳ ባክሮኻ ናሳ እምባኻላ ዳኣኖ ክኦይስና ሱኒ እማያ እምባ ዳይዲው? ¹⁰ ዎይካሞ ናሳ ካራ ክኦይስና ጉኖ እማያ እምባ ዳይዲው? ¹¹ ታ ናንሲ ዬቲ ዛርቦና ናና ዬሳናንቴ ዬር ፃሊ እማዻን ዬዼሳዳና፤ ዬምባ ጳ ፖላሮን ዳ ኤና ኪም ምስካይና ውልናንቴ ዬርን ፃሊን ሃርቴ ኬናንቴ ሳጊ ክእምሞኖ? ¹² ኤና ዋኒ ዬናንቴ ኬሃዬኻናንቴ ዬዛጋይና ዬራም ዬትካሞ ኬናንቴ ሃይማቴ፤ ሙሴ ዳምብናቤ ኤና ባርያሳ ኣፖን ጌያይናቤሳ ኣፓ ጌይዻዳ ካና። ¹³ ሙልዻፓ ቆቃስካ ኣርድማቴ፤ ጎይኖ ካይሶንዛራ ኣንሳይኖ ዎሪና ኮዶ፤ ኮሳ ሙልዻፖኖኻሞ ዎሪና፤ ኤና ሙልዻፖን ኦጎኻ ኣርዳይና ዼፒና። ¹⁴ ኮዶን ጎያ ሳዳንዛራ ኣንሳያ ቆቃና ክዶ፤ ክሳ ሙልዻፖኖኻሞ ቆቃና፤ ኤና ይንካ ኣርዳይናኻሞ ቶኻ ሶጎና። ¹⁵ ይሳ ኢንካ ዮዮና ሳራይና ዳንቴ፣ እያቲ ኣይ ኣርሳንቴ ዬሳ ባክሮ ኣርዳንቴ ባꬅማንቴ 'ዎቲ ባርያሳ ኣፖን ጌያይናና' ሃማይና ፖጋሞን ኤና ካላንካ ፔግንዽማቴ። ¹⁶ ኤና እግና ፖጋሞ ኤዲ ኬዶንም ኬሳ ዋድማናኻ ዼሳና ዬዼሳይ፤ ካዻላ ግዶርካ ዎይን ኣፕ ሾማው ሾማዻይ? ሃቃ ኡኩምንካ ዳ ግዶርካ ሃቃስ ባላስን ኣፕን ሾማው ሾማዻይ? ¹⁷ ሃያንቴኻሞ ሃቃና ፃልና ፓይላ ኣፒ ፃሊና ኬካይ፤ ሃቃና ዛርቦና ፓይላ ኣፒ ዛርቦና ኬካይ። ¹⁸ ሃቃና ፃልና ኣፒ ዛርቦ ካናንቴ ቻልማሞ፤ ሃያንቴኻሞ ሃቃና ዛርቦና ኣፒ ፃል ካናንቴ ቻልማሞ፤ ¹⁹ ሃቃና ኣፕን ፃሊን ካምናም ፓይላ ጫራቴ ኖንዛራና ዻባዻይ። ²⁰ ታ ናንሲ ኤና እግናም ኬሳ ዋድማናኻ ዼሳና ዬዼሳይ፣

²¹ ኣባ ጳ ፖላሮን ዳሳ ቃቦን ሃይማ፤ ኤና እግያ “ጌጳዮ፦ ጌጳዮ“ ሃማይና ፓይላ ፖላን ማንግስትንዛራ ኣርድማሞ። ²² ሮራ ኣጋኻ ኤና ጱፅና፣ ‘ጌጳዮ፦ ጌጳዮ’ ዎቲ ሃሳ ናብንካ ኣፖን ጌያዳይዮው? ሃሳ ናብንካ ዎቲ ቤሮናም ቡላዳይዮው? ሃሳ ናብንካ ዬራ ሃሊናም ዎቲ ሃያዳይዮውና?’ እግያ ኬያማይ። ²³ ዋዳ ኣጋኻ፦ ‘ካላኻሞ እንታ ዬም ዼሳድማሞ፤ ዬቲ ክና ኤና ዛርቦና እካላንካ እስ ይማቴ’ ሃማንቴ ኬናንቴ ማዪና እጌያይ። ²⁴ ታ ናንሲ እሳ ዼላቃ ካም ኤሳራንቴ ኤያ ይንካ ኣሽካያ ኣጋ ኦሎን ፄሪ ኮያንቴ ኦኖን ይሳም ላይታንዛራ ዻኣኻዳ ኤዲ ሃሚና ክታኻይ። ²⁵ ዶቦ ጌጲ ዻይዲና፤ ምሮኖኻሞ ጉንዝዲና፤ ግባሮኖኻሞ ግባርስዲና፤ ሃያንቴ ኦና ኣጋምካሞ ይቅዲና፤ ኦና ኣጋ ኦሎን ፄሪ ኮያንቴ ላይታንዛራ ዻኻዻዶንታኻ ይፓድማሞ። ²⁶ እሳ ዼላቃ ካም ኤሳራንቴ ኤያ ይንካ ኣሽክማ ኣጋ ኦሎን ፄሪ ኮይማ ኦኖን ይሳም ሻምንዛራ ኣሽካዳ ኤዲ ዼምጲና ክታካይ። ²⁷ ዶቦ ጌጲ ዻይዲና፤ ምሮኖኻሞ ጉንዝዲና፤ ግባሮኖኻሞ ግባርስዲና፤ ሃያንቴ ኦና ኣጋምካሞ ይቅዲና፤ ኦና ኣጋኻሞ ይፕዲና፤ ክሳ ይፕድኖኻሞ ካሎን ዛርቦና ኮዶ።

²⁸ ኢየሱስ ትምርታ ኣጋም ታማርሳቴ ክቱንሳና፤ ዛርስኖ ትምርትን ክሳም ዬርሽዲና፤ ²⁹ ዛርስኖ ትምርትን ክሳም ኬዬርሻዶኖ ኣይሁድ ኤና ሙሴ ዳምብን ታማርሳይናግያ ጋራንቴ ኤዲብትግያ ክታማርሳዶንታኻና።