ማቴዎስ - 6
1
“ዬሳ ዋድማን ፃሊን ሼዳዼኻናንቴ ሃማንቴ ኤናሳ ዎትሮ ዬኣሽካንባራ ዬም ማንክማቴ፤ ሼዳዻናንቴ ሃማንቴ ዋድማን ዬኣሽክና ዬምባ ጳ ፖላሮን ዳኻላ ዬር ዬሃፓያ ቆልማሞ።
2
ካይስንሶን ኤና ምስኮን ኦኖናቤ ጎይናቤ ግዶር፣ ኤና ኬም ኬጎሼኻናንቴ ሃማንቴ ኬሃያያግያ፤ ዬትካሞ ኤና ኩፕናም ዬኬልሽና ሼዳዻናንቴ ሃማንቴ ሙራ ዬፑግስናኖ፤ እንታ ዬናንቴ ጎንዼና እጌያይ፤ ኤና ኦጎንታ ሃያይና እግና ባዛና ይሳም ፓይላ ቻይዲና።
3
ኮዶን ዬቲ ኤና ኩፕናናንቴ ዬር ካላም ዬእምና ዬሳ ኣና ምዛቃ ይእማያም ኣና ዬሳ ዋርካታስ ዼሳን ክጋሬ፤
4
ኤናናንቴ ዬራ ዬእማይናም ኣቻንቴ እምማቴ፤ ኣቻንቴ ዬራ ዬእማይናም ሃፓያ ዬምባ ዬናንቴ ባዛን ካሻና ክካሻይ።
5
ዬቲ ባርያም ዬምስክና ካይስንሶን ኤናግያ ዬዳናኖ፤ ኬ ኤና ኬም ኬያፔኻናንቴ ኣይሁድናሳ ምስኮን ኦኖና ግዶርቤ፣ ጎይናሳ ፓሽንታና ግዶር ዎያንቴና ባርያም ኬምስካይ፤ እንታ ዬናንቴ ጎንዼና እጌያይ፤ ኤና እግና ይሳ ምስኮንሳ ባዛን ፓይላ ቻይዲና።
6
ኮዶን ዬቲ ባርያም ዬምስክና፤ ዬሳ ኦኖንም ኣርዳንቴ ዬዛራ ሙልዻፖን ዲፃንቴ ዬምባ ሃፕንዽማም ምስክማቴ፤ ዬራ ኣዽሚ ኣሽካዻዳናም ሃፓያ ባርያ ባዛን ዬናንቴ ካሻና ክካሻይ።
7
ዬቲ ባርያም ዬምስክና ኤና ባርያም ዼስምና ጋንታግያ ሱን ዬር ቆልማ ጌይቴ ምስኮንም ዬሳ ዬጉዱጵስናኖ፤ ኬ ማሶኻ ጉዱጵ ምስክቴ ምስኮን ኬሳም ባርያ ኬናንቴ ክኤሳራያግያና ኬማይሻይ።
8
ዬምባ ዬቲ ብራንቴ ኪም ዬምስክማ ዬራ ዬናንቴ ዛግሳይናም ኖ ብራንቴ ፓይላ ዼስዲና፤ ታ ናንሲ ዬምስክና ኬግያ ዬማትናኖ።
9
ኮዶን ዬቲ ባርያም ይንታ ሃማንቴ ምስክማቴ፦
“ ‘ጳ ፖላሮን ዳ ዎምባ፣
ናብኖ ሃሳ ጫራጚሚ ኮዴ፤
10
ማንግስትኖ ሃሳ ኮኔኤ፤
ቃቦን ሃሳም ጳ ፖላሮ ሃይዻያግያ፣
ቾ ፔሮኻሞ ሃይዼ።
11
ሮራኻ ዳኣንናም ዎናንቴ እምማ።
12
ዎቲ ኤና ዎም ሴሳይናሳ ሴሶንም ኬናንቴ ዎጋራያግያ፣
ሴሶን ዎሳምካሞ ዎናንቴ ጋርማ።
13
ጋሎንዛራ ዎም ሃኣርስናኖ፤
ሜሽንባራ ዎም ዻኣሽማ፤
ማንግስትኖ፣ ካንታኖ፣ ጎሺኖ
ላይ ሃንቲና፤
ኣሜን።’
14
ዬቲ ኤና ዬም ሴሳዳናሳ ሴሶንም ዬጋርና፣ ዬምባ ጳ ፖላሮን ዳ ዬሳ ሴሶንም ዬናንቴ ጋራና ክጋራይ።
15
ኮዶን ዬቲ ኤናሳ ሴሶናም ዬጋርምና፣ ዬምባኻሞ ሴሶና ዬሳም ዬናንቴ ጋርማሞ።
16
ዬቲ ቶሮንዻንቴ ባርያም ዬምስክና፣ ካይስንሶን ኤናግያ ጋሮ ዎቲ ዬሳም ጎኦል ዬሃይናኖ፤ ኬ ቶሮንዻንቴ ባርያም ምስክቴ ኬዶንም ኤና ኬዼሴኻናንቴ ዎቲ ይሳም ጋሮ ሲዮ ኤድግያና ኬሃያይ፤ እንታ ዬናንቴ ጎንዼና እጌያይ፤ ኤና ኦጎንታ ሃያይና እግና ባዛና ይሳም ፓይላ ቻይዲና።
17
ኮዶን ያ ቶሮንዻንቴ ባርያም ሃምስካን ዋዳንካ ዎትን ሃሳም ሻይማ፤ ሜቴን ሃሳምካሞ ዋኣትካ ቃዽማ፤
18
ኣጋኻኻሞ ቶሮንዻንቴ ባርያም ሃምስካን ሃምባ ኣችምን ዳ ሶጎ ይዼሳዳ፣ ኮዶን ኤናናንቴ ኣችሚና ኮዳይ፤ ኣችምን ሃይዻዶንም ሃፓያ ሃምባ ባዛን ሃሳም ካሻና ክካሻይ።
19
“ኦሎሎን ይእꬃይሮቤ፣ ፔን ዛውሳንቴ ይሴሳይሮቤ፣ ዲብን ይዲባን ፔን ኮሮ ዬናንቴ ኮይሶን ዬፑኡሽናኖ፤
20
ኮዶን ኦሎሎን ይእꬅሞሮቤ፣ ፔን ዛውሳንቴ ይሴስሞሮቤ፣ ዲቢን ይዲቢሞሮ ጳ ፖላሮ ዬናንቴ ኮይሶን ፑኡሽማቴ።
21
ኣጋኻሞ ኮይና ሃሳ ይዳሮጎ ዎይላም ሃሳኻሞ ኦጎታሪና ኮዳይ።
22
ኣፕኖ ብሽንሳ ሮሮና፤ ኣጋታኻ ኣፕኖ ሃሳ ጫንቃል ኮዳና፣ ብሽኖ ሃሳ ፓይላ ፓኪና ኮዳይ።
23
ኮዶን ኣፕኖ ሃሳ ሃጅሞ ኮዳና፣ ብሽኖ ሃሳ ፓይላ ፅፓና ኮዳይ፤ ታ ናንሲ ሃሳ ኢሮን ዶኖ ሮሮኖ ፅፓ ኮዳና፣ ፅፓኖ ካሎን ሃሞንታ ኮፅፔ?
24
ኤዲ ካላ ብቲ ላማናንቴ ዋድማናንቴ ቻልማሞ፤ ኖ ብቲ ካላም ጋራንቴ ብታ ዋም ናሻና ክናሻይ፤ ዎይካሞ ብታ ዋም ጎባና ክጎባይ ዋም ቦዋና ክቦዋይ። ኣጋግያ ኤዲ ካላ ባርያቤ ብሬምቤናንቴ ክዛራ ዋድማናንቴ ቻልማሞ።
25
ታ ናንሲ እንታ ዬናንቴ ይንታና እጌያይ፦ ዬሳ ዴንታንናንቴ ሃር ዎእꬄ? ሃር ዎውጬ? ሃር ዎዻክዼ?' ሃማንቴ ዬሞይካዽናኖ። ሳዳኖ ዳኣኖ ካላ ሳጊ ዳይዮው? ኤ ብሽኖ ኣፓላን ካላ ሳጊ ዳይዮው?
26
ይንዳ ካርያና ፖላን ጋይናም ሼድማቴ፤ ኬ እꬅን ጲማሞ፣ ዎይካሞ ፓትማሞ፣ ኮናሮኻሞ ካማሞ፤ ኮዶን ዬምባ ጳ ፓላሮን ዳ ኬም እꬅንሳና ክእꬅንሳይ። ታ ናንሲ ዬቲ ኬኻላንካ ካሎን ሳጊ ዳይዮው?
27
ታ ዬሳ ባክሮ ኤዲ ካላ ሞይካዻንቴ ይሳ ቦንናዛራ ሳኣት ካላም
ሻባናንቴ ቻላያ ዳይዲው?
28
ታ ናንሲ ኣፓላናንቴ ሃማንቴ ሃርናንቴ ዬሞይካዼ? ይንዳ ጳሎን ዳና ኡሽምናም ሼድማቴ፤ ኬ ጋልማሞ ዎይካሞ ኬ ፑታ ዽማሞ።
29
ኮዶን እንታ ዬናንቴ ይንታና እጌያይ፤ ብታ ጎሺዳ ሰሎሞን ይሳ ጎሺን ኦጎ ውልካ ኣፓላን ኣርሳንቴ ኡሽምና ክናሳ ካላግያ ጎባድማሞ።
30
ዬቲ ክና እምነትንሳ ቄታና፤ ባርያ ሃይታላ ሃፕንዻንቴ ሳኻ ኖሮ ዻባዻይና ሾቆናም ኦጎንታ ክጎብሳዳና፤ ዬም ኬኻላንካ ሳጊ ሃርቴ ክጎብስሞኖ?
31
ታ ናንሲ ‘ሃር ዎእꬄ? ሃር ዎውጬ? ሃር ዎዻክዼ?’ ሃማንቴ ዬሞይካዽናኖ።
32
ኤና ባርያም ዼስምና ዬራ እግናም ፓይላ ሃፓናንቴ ሞይካዻና ኬሞይካዻይ፤ ዬራ እግናም ፓይላ ዬናንቴ ኬዛግሳይንም ዬምባ ጳ ፖላሮን ዳ ዼስዲና።
33
ኮዶን ዬቲ ዬር ፓይላ ውል ካላንካ ብርሳንቴ ባርያሳ ማንግስትንቤ፣ ክሳ ጋዛሞንቤም ዛግማቴ፤ ዬራ ክናም ፓይላ ዬናንቴ ሻባና ሻባዻይ።
34
ታ ናንሲ ሳኻናንቴ ሞይካዽቴ ዬጋልናኖ፤ ቃብማስ ሳኻንጋንታ ሳኻም ክካሌ፤ ሮሮና ፓይላ ጋሎ ይንቲ ይንቲካና ኬዶ።