1
ዛርስኖ ኮፑጫዶን ሃፓንቴ ኢየሱስ ጌማር ካላዛራ ውታንቴ ዳርቅዲና፤ ራስባራ ታማርና ክሳኻሞ ክዛራ ናእዲና፤
2
ሃያንቴ ኖ ይንታ ሃማንቴ ኬም ታማርሳን ካርስዲና፦
3
14 ዬቲ ፔንሳ ሮሮና፤ ካታማስ ጌማርታዛራዳ ኣችሚ ዳናንቴ ቻልማሞ፤ 15 ኤና ኩሻ ዬꬃንቴ ኣኻሾኻ ክጭማሞ፤ ኤና ኦኖሮ ዳናናንቴ ፓይላ ኮሮጴኻናንቴ ራቅ ማይ ዻዋያ ግዶሪና ኬዎዳይ። 16 ኣጋግያ ኤና ዬሳ ዋድማን ፃሊን ሃፓንቴ ዬምባ ጳ ፓላሮን ዳም ኬጎሼኻናንቴ ዬሳ ፃላሞኖ ኤና ውልናንቴ ማይ ኮሃፕንዼ። 17 ሙሴ ዳምብናቤ ኤና ባርያሳ ኣፖን ጌያይናቤሳ ኣፖና ጌይዻዳናም ሽእሾታ እናኣዳ ዬቲ ማይሻና፤ እንታ ይንናንቴ እናኣዶኖ ኣፖና እግናም ሃያናንቴና፤ ኬጌያዳናም ሽእሻናንቴ ትማሞ፤ 18 እንታ ዬናንቴ ጎንዼና እጌያይ፤ ፔንቤ ፖላንቤ ኬሳ ካያዛራ ዳምብና ፓይላ ሃምማና ኬሃምማይ፤ ዳምብና ግዶር ዬር ሾሊ ካላ ዎይካሞ ዬር ሾሊና ሃማንቴ ቦዋንቴ ሽእሻዻያ ቆልማሞ። 19 ታ ናንሲ ኤዲ ሃውካሞ ዳምብና ክናግዶር ኬሳ ዬር ሾልካሞ ኮዴ ኤያ ሴሳያቤ ኤና ዋኒካሞ ኬሴሴኻናንቴ ኤያ ታማርሳያ ኣጋ ባርያሳ ፖላን ማግስትሮ ኖ ሾሊና ክዳይ፤ ኮዶን ኤያ ዳምብና ክናኻ ዳያቤ ኤና ዋኒካሞ ዳምብና ክናኻ ኬዴኻናንቴ ኤያ ታማርሳያ ኣጋ ባርያሳ ጳ ፖላን ማግስትሮ ጌጲና ክማታይ። 20 ዬሳ ጫራጝማሞኖ ኤና ፈረስ ኤናቤ፣ ኤና ሙሴ ዳምብን ታማርሳይናኻላንካ ኮሳጋድምና፣ ባርያሳ ፖላን ማንግስትን ዬቲ ኣርድማሞ። 21 ኣና ኤና ብራናናንቴ ኬግያ ‘ኤዲ ዬዴስናኖ፤ ኤያ ኤዲን ዴሳያዛራ ብቶን ታኻና ታኻዻይ’ ሃንዻዶን ዬቲ ኤሳርዲና፤ 22 ኮዶን እንታ ዬናንቴ ይንታና እጌያይ፤ ኤያ እንዳናሳዛራ ዋጭማያዛራ ብቶን ታኻና ታኻዻይ፤ ፕርካሞ እንዳናሳም ኤያ ‘ሽፕ ሃማ’ ሃማንቴ ኢራያ፣ ዞንዛናሳ ዎትሮ ክካላ ኦይሳና ኦይሳዻይ፤ ኤያ እንዳ ናሳግያ ‘ዬርን ዼስማኻ’ ሃማንቴ ኢራያምካሞ ኖን ጋኻነምሮ ኪም ዻባና ዻባዻይ።
23 ታ ናንሲ ባርያናንቴ ቁልን ኡካዻን ሙልዻንዛራ ኡካናንቴ ሃኒና ሃንና ናሳ ሃዛራ ክዻጋሳዶኖ ሃናንቴ ጶቅ ኳምና፤ 24 ኣጋዛራ ቁልን ኡካዻን ሙልዻንሳ ዎትሮ ቆልታም ጋራንቴ ብራቴንካ ቃልቴ ሃንና ናሳ ላማ ቃሽምማ፤ ሃያንቴ ማታቴ ናዴ ባርያናንቴ ቆልታም ኡኩማ።
25 ሃሳ ቁፓሞን ኤያ ሃዛራ ዳኛስካ ብቶን ታክሳን ክጋሬኻናንቴ፤ ኤያ ዳኛስ ሃም ኤያ ዻኻያናንቴ ሳስካቴ እማን ክጋሬኻናንቴ፤ ያኻሞ ዻክን ኦኖን ኣርዳን ሃጋሬኻናንቴ፤ ጎይሮ ሃሳ ቁፓሞን ኤያላማ ዪሪ ቃሽምማ። 26 እንታ ሃናንቴ ጎንዼና እጌያይ፤ ኤያ ኣጋ ሃዛራ ብቶን ክታክስና ሃሳ ባዛናም ሳንቲም 1 ካላኻሞ ኮሽዽማ ፓይላ ሃሳ ካሻቴ ቱንሳዛራ ዻክን ኦኖንባራ ያ ውትማሞ። 27 ኣና “ኩጳሞን ዬይናኖ” ሃማንቴ ጌይዻዶን ዬቲ ኤሳርዲና፤ 28 ኮዶን እንታ ዬናንቴ ይንታና እጌያይ፦ ሜ ካላም ኣፕካ ሃፓንቴ ኤያ ካጃላዳ ይሳ ዎይላምንካ ኮላማ ክንካ ዎዽዲና። 29 ኣፓ ሃሳ ምዛቃ ሴሶ ሃኣሽኬኻናንቴ ክሃያያዳና ኪም ቡላቴ ዻምማ፤ ብሽን ሃሳም ፓይላ ገሃነምን ኖሮጎ ዻባዻንናንቴ፤ ሃሳ ብሽንሳ ካላም ቡላቴ ዻባዻዳና ፃሊና። 30 ኣና ሃሳ ምዛቃስ ሴሶ ሃኣሽኬኻናንቴ ክሃያያዳና ኪም ቱማቴ ዻምማ፤ ብሽኖ ሃሳ ፓይላ ገሃነምን ኖሮ ኮኣርዳንናንቴ ሃሳ ብሽንሳ ካላም ቱማቴ ዻባዻዳና ፃሊና።
31 “ ‘ኤያ ይሳ ሜንም ቡላያ ጎያ ይንካ ይቡላዳም ዋርቃትካ ኡካቴ ክእሜ” ሃማንቴ ጌይዻዶን ዬቲ ኤሳርዲና። 32 ኮዶን እንታ ዬናንቴ ይንታና እጌያይ፤ ኤያ ሜን ይሳም ኩጳሞ ኮይማ ቡላያ ኣጋ ሜን ይሳም ኩጳሞ ኮዬኤኻናንቴና ክሃያይ፤ ኣጋኻ ሃማንቴ ኤያ ኤስን ቡልዻዶን ኬማያኻሞ ኮላማ ክንካ ኩጳሞና ክያኣይ። 33 ኣና ኤና ብራናናንቴ “ዬር ካላም ፖጋሞኻ ዬኣሽንሽናኖ፤ ባርያሳ ዎትሮ ዬራ ዬኣሽንሻዳናም ዋቻዻንቴ ኣሽክማቴ” ሃማንቴ ጌይዻዶን ዬቲ ኤሳርዲና፤ 34 ኮዶን እንታ ዬግያ ካላኻሞ ዬኣሽንሽናኖ ሃማንቴና እጌያይ፤ ፖላንካኻሞ ዬኣሽንሽናኖ፤ ኦጎኖኻሞ ሃርቴ ፖላኖ ባርያሳ ጌጳሞን ቦርኮቶኖና። 35 ፔንካኻሞ ዬኣሽንሽናኖ፤ ኦጎኖኻሞ ፔኖ ባርያሳ ራን ይትጋይኖ ራቅኖና፤ ኢየሩሳሌምካኻሞ ዬኣሽንሽናኖ፤ ኦጎኖኻሞ ና ብታ ጌጳሳ ካታማኖና፤ 36 ዬሳ ሜቴንካኻሞ ዬኣሽንሽናኖ፤ ኦጎኖኻሞ ስትና ዬሳ ግዶር ስቲ ካላም ጫውሊ ዎይካሞ ፂያ ሃያናንቴ ዬቲ ቻልማሞ። 37 ኣጋታኻ ዬቲ ክንካ ዬሃሳውና ኣፖ ዬሳ ኪም ኮናሻዳና ኤኤ ዬሃማያዳና ‘ኤኤ’ ኮዴ፤ ኣፖ ዬሳ ኪም ኮናሻድምና ኢኢ ዬሃማያዳና ‘ኢኢ’ ኮዴ፤ ክናሳ ኦባራ ዬራ ዳና ፓይላ ሜሺባራና ኬናኣይ። 38 “ኤያ ኣፕን ኡካያሳ ኣፕን ኡኩማቴ፤ ኤያ ኣꬅን ቁንፃያሳ ኣꬅን ቁንፅማቴ” ሃማንቴ ጌይዻዶንም ዬቲ ኤሳርዲና። 39 ኮዶን እንታ ዬናንቴ ይንታና እጌያይ፦ ኤያ ዛርቦን ኣሽካያም ዬቶዛዽናኖ፤ ኮዶን ኤያ ሃሳ ካርጫ ምዛቃም ጫኣያናንቴ ዋርካታሲምካሞ እምማ። 40 ኤዲ ካላ ኣፓላ ኢንባራ ሃኣርሳያም ቻናንቴ ሃም ክቤርንስና ኣፓላስ ጳባራ ሃኣርሳያም ካውል ክናንቴ ሻባንቴ እምማ። 41 ኤዲ ካላ ሃግያ ሾሊ ሮት ክላማ ሃዬኤኻ ሃም ክእሽክንሽና፣ ኖ ክጌያዳሳ ጳባራ ሮት ክላማ ክንካ ይማ። 42 ኤና ሃኻላ ምስካይና ዉልናንቴ እምማ፤ ኤና ሃኻላ ብድርን ኦይሳይናዛራ ኑኪ ሃኡክናኖ።
43 “ሃሃርያናም ናሽማ፤ ጋላም ሃሳ ቶዛዽማ“ ሃማንቴ ጌይዻዶን ዬቲ ኤሳርዲና። 44 ኮዶን እንታ ዬግያ ይንታና እያማይ፦ ጋላ ዬሳም ናሽማቴ፤ 2 ኤና ዬም ጋልንሻይናናንቴ ባርያም ምስክማቴ፤ 45 ኣጋንታ ዬኣሽክና ዬቲ ዬምባ ጳ ፖላሮን ዳሳ ናሶና ዬዳይ፤ ኖ ኤና ዛርቦናናንቴቤ ኤና ጋዛናናንቴቤ ሃዮን ቡላና ክቡላይ፤ ኤና ጋዛናናንቴቤ ሴሶን ኤናናንቴቤ ዶቦን እማና ክእማይ። 46 ኤና ዬም ናሻይናም ሶጎ ዬናሻያዳና ዬራ ዬሃፓያ ሃርቴ? ኤና ግብርን ጎራይናኻሞ ኦጎንታ ሃይቴሞ ኬዶኖ? 47 ዬቲ ዬንዳና ናናም ሶጎ ዬጌሳያዳና፣ ኤና ዋኒ ካላንካ ሃርካ ዬሳጌ? ኤና ባርያም ዼስምናኻሞ ኦጎንታ ሃይቴሞ ኬዶኖ? 48 ታ ናንሲ ዬምባ ጳ ፖላሮን ዳ ጫራጚ ክዶንታኻ ዬቲካሞ ጫራጝ ዳማቴ።