ማቴዎስ ኡኩንሳ 4
1
ኣጋሳ ራስባራ ባርያሳ ኡስኖ ጋዛኖ ኢየሱስም ዳቡሎስ ክካላ ጋሮ ኦይሶ ክኦይሴኻናንቴ ዳራንዛራ ኣንስዲና።
2
ኖ ሮሮ ኣይድታምቤ ሶቲ ኣይድታምቤ ዳኣኖ እꬅማ ካፓንቴ ቱንስሮኻሞ ዳቃዽዲና።
3
ጋሮን ኦይሶን ኦይስያ ክዛራ ናዴ ክግያ፦ “ይንዳ ያ ባርያ ናሶ ሃዳና፤ ሱኒና ክናም ዳኣኖ ኬማቴኻኻናንቴ ጌይማ” ና ክያማዶ።
4
ኢየሱስካሞ፦ ማሳንቴ፦ “ ‘ኤዲ ናሶ ባርያሳ ኣፖሮ ዼላቅ ውታያ ፓይላኻና ኮዳይ፤ ዳኣኖኻ ሶጎ ዳማሞ’ ሃማንቴ ኣና ዋርቃትሮ ኡካዽዲና” ሃማንቴ ክናንቴ ማስዲና።
5
ፕርካሞ ዳብሎስ ኢየሱስም ካታማን ጋዛንዛራ ኣንሳቴ ቃልቴ ባርዮን ኦኖንሳ ዱሪሮ ዎይሳንቴ ይንታና ክያማዶ፦
6
“ኣና ዋርቃትሮጎ
‘ሱኒንዛራ ራኖ ሃሳ ዻይማን ኮጋሬኻናንቴ፣
ይሳ ኣንንካኻሞ ሃም ኬካፔኻናንቴ፣
ባርያ ይሳ ኤርጎን ኤናም ሃናንቴ ንእሳና ክንእሳይ’ ሃማንቴ ኡካዻዶንታኻ፤ይንዳ ያ ባርያ ናሶ ሃዳና ካሮኻ ምጫ ፔንዛራ ዲኒማና!” ክግያ ክያማዶ።
7
ኢየሱስካሞ፦ “ኣና ዋርቃትና ግዶር፦ ‘ባርያ ሃሳ ጌጳም ሃዬክንስናኖ’ ሃማንቴ ኡካዽዲና” ሃማንቴ ክናንቴ ማስዲና።
8
ፕርካሞ ዳቡሎስ ጌማር ጉዱጱ ካላዛራ ኪም ዎይሳንቴ፤ ፔን ጋላፕንሳ ማንግስትንምቤ ኮሳ ጎሺንቤም ክናንቴ ዻዋንቴ፤
9
“ ጳርፃንቴ እናንቴ ሃኮምፓርሳያዳና ኮም ፓይላ ውሊም ሃናንቴ እማና ኢማይ ና ክያማዶ።
10
ኢየሱስካሞ ክግያ ይማሳና፤ “ያ ሜሻ እካላንካ እስ ዪማ! ‘ሃሳ ጌጳ ባርያናንቴ ኮምፓርስማ፤ ክናንቴ ሶጎ ዋድምማ’ ሃማንቴ ዋርቃትሮጎ ኡካዽዲና” ና ክግያ ክያማዶ።
11
ናንሲ ሜሻ ኪም ጋራንቴ ያእዲና፤ ባርያሳ ኤርጎን ኤና ናዴ ክናንቴ ዋድምዲና።
12
ኢየሱስ ዮሃንስሳ ዻክን ይኤሳራና ገሊላ ፔንዛራ ማትዲና፤
13
ናዝሬት ካታማንካሞ ጋራንቴ ካታማና ዛብሎንቤ ንፍታሌምቤ ፔየስ ኛፓስን ኣፖን ካላንዳ ቅፍርናሆም ካታማስሮ ዴንታን ይሳም ካርስዲና።
14
ኣጋኻኻሞ ኣና ኤያ ባርያሳ ኣፖን ጌያያ ኢስያስካ ይንታ ሃማንቴ ጌይዻዳ ኣፓ ጎንዼ ማትዲና፦
15
“ዛብሎን ፔኖቤ፣ ንፍታሌም ፔኖቤ፣
ዮርዳኖስ ሌኤንሳ ሳባራ ኛፓስን ጎይንሳ ዴሞሮ
ዶኖ ገሊላ ቶርስኖ፦
16
“ዛርስኖ ፅፓሮን ዶኖ
ሮሮ ጌጲ ሃፕዲና።
ኤና ዴምጵን ፔሮ ዳናናንቴ ሮሮ ናእዲና።”
17
ዋዳስ ኣጋኻ ካርሳንቴ ኢየሱስ፦ “ዬሳ ሴሶንባራ ማትማቴ፤ ባርያሳ ማንግስትኖ ሳንዲና” ሃማንቴ ታማርስዲና።
18
ኢየሱስ ገሊላ ኛፓስንሳ ዴሞሮ ሳግቴ ጴጥሮስ ሃንዻያ ስምኦንቤ ክሳ እንዳ ናሳ እንድርያስቤም ሃፕዲና። ኬኻሞ ካራን ኤማያ ኤዲ ኬዶንታኻ ይሳ ኜፑቴይናም ኑንቆሮጎ ዻብቴና ኬዶ።
19
ኢየሱስ ኬግያ ይንታና ክያማዶ፦ “ንማቴ፤ ኢም ጫግማቴ፤ ዬም ኤዲም ኤማያና እያያይ” ና ክያማዶ።
20
ኬኻሞ ኣጋዛራ ይሳ ኜፑቴይናም ጋራንቴ ኪም ጫግዲና።
21
ኣጋሮኻ ሾሊ ሳጋግያ ይየያና ዛብዴዎስ ናሳ ያዕቆብቤ ክሳ እንዳ ናሳ ዮሃንስቤም ሃፕዲና። ኬኻሞ እምባ ዛብዴዎስ ማላ ክንካ ጋግሮ ይሳ ኜፑይቴይናም ኣሽክቴና ኬዶ። ኖኻሞ ኬም ግስምዲና።
22
ኣጋዛራ ይሳ ጋግንቤ እምባቤም ጋራንቴ ኪም ጫግዲና።
23
ሃያንቴ ኢየሱስ ኣይሁድ ኤናሳ ባርያም ምስካዻን ኦኖና ግዶር ታማርስቴቤ ባርያሳ ማንግስትንሳ ሜርሜርን ፃሊን ጌይቴቤ ዛርስንሳ ባክሮ ቡርቅንቤ ሃጅሞንቤ ፓይላ ፓሽሽቴ ገሊላ ፔናም ፓይላ ያይቴና ክዶ።
24
ኣጋኻ ሃማንቴ ሶሪያ ፔሮ ፓይላ ኜሙቲኖ ክሳ ሻምዲና፤ ዛርስኖካሞ ኤና ሃጂሞቤ ሃጂም ኣብ ኣብካ ኤና ጋሊቴና ዳናቤ ኤና ቤሮን ይእዛቃዳናቤ፤ ኤና ግርጫን ጃይናቤ፤ ኤና ራንሳ ማልግማዳናቤም ክዛራ ባእዲና፤ ኖኻሞ ኬም ፓሽሽዲና።
25
ኣጋኻ ሃማንቴ ገሊላ ካታማንባራቤ፣ “ካታማና ታጲና ሃንዻይናቤ”፣ ኢየሩሳሌምቤ፣ ይሁዳባራቤ፣ ዮርዳኖስ ሌኤንሳ ሳባራባራኻ ኤዲኖ ጱፅኖ ናኣዶኖ ፓይላ ኪም ጫግዲና።