ማቴዎስ ኡኩንሳ - 3
1
ዋዳን ኦጎኻ ኤናም ኑንቆንካ ሻያያ ዮሃንስ ይሁዳ ፔንሳ ዳራሮ ባርያሳ ኣፖን ጌያዳቴ ናእዲና።
2
ኖ ኣፓ ጌይቴ ክዳኻሞ ካና፦ “ባርያሳ ማንግስኖ ዬስክዲና፤ ዬሳ ሴሶንባራንኻ ማትማቴ” ሃማያና።
3
ኣጋ ዮሃንስ ኣና ኤያ ባርያሳ ኣፖን ጌያያ ኢስያስካ ኣፓ ጌይዻዳ ኖና:-
“ዳራሮጎ ዳንቴ፣
ጌጳሳ ጎይን ፓትማቴ፣
‘ክሳ ጎይንም ፕሽክሽማቴ’ ሃማንቴን እላታያ ናቅሳና።”
4
ዮሃንስ ኣፓላኖ ክኣርሳይኖ ጋማላን ስትንካ ኣሽካዻዳና፤ ካርናሮኻሞ ካቲ ቃልሺና ክዻኻይ። ዳኣኖ ክሳ ሳር ኣይኮቤ፣ ቆዋ ኩሮቤና።
5
ኤዲኖ ኢየሩሳሌምባራቤ ይሁዳ ፔን ፓይላ ባራቤ ዮርዳኖስ ሌኤንሳ ፔና ዴሞሮ ዳና ኤና ፓይላ ዮሃንስዛራ ናዴ፤
6
ይሳ ሴሶናም ጌይቴ ዮርዳኖስ ሌኤሮ ዮሃንስካ ሻይዽቴና ኬዶ።
7
ፈረስ ኤናቤ፣ ሰዱቅ ኤናቤ ኤናም ክሻያይን ራቅንዛራ ኬኒካ ሃፓንቴ ይንታና ኬግያ ክያማዶ፦ “ዬቲ ክና ጉንቶን ኦፖን ናና! ካይሶን ናኣናንቴን ዶሮኻ ዬዻቄኻናንቴ ዬም ኪላዳ ሃውቴ?
8
ታ ናንሲ ሴሶንባራ ዬማታዶን ዬር ዻዋያ ኣሽክማቴ፤ ሃያንቴኻሞ ዬሳ ዎይላምንካ ‘ዎምባ ኣብርሃም ዳይዲና’ ሃማንቴ ዬቃብናኖ፤ ባርያ ሱኒና ክና ግዶርካ ኣብርሃምናንቴ ናሶ ዻሳናንቴ ክቻላይንም ዬናንቴ ጌያና እጌያይ።
9
‘ኣብርሃም ዎምባና’ ሃማንቴ ዬም ዬታይስናኖ፤ እንታ ዬናንቴ ጌይዲና፤ ባርያ ኣብራሃም ናንቴ ሱኒና ክና ግዶርካ ናሶ ሃይዻን ቻላና ክቻላይ።
10
ታ ሹኮኖ ሃቃናሳ ጫጭን ጫራናንቴ ሼክሚና ኮዶ፤ ሃቃና ኣፕን ባሽን ካሚናም ፓይላ ጫራንቴ ኖንዛራ ዻባና ዻባዻይ።
11
“እንታ ዬም ሴሶንባራ ዬማታዶን ዻዋናንቴ ኑንቆሃ ሻይንቶና ዬም እሻያይ፤ ኮዶን ይንሳ ዱጙሪን ካትን ቡልዻን እቻልማ እሳ ሳጋ ጌጳ ራስባራ ናኣና ክናኣይ። ኖ ኡስን ጋዛንካቤ ኖንካቤና ዬም ሻያና ክሻያይ።
12
ሻርቃስ እስንን ቡቡንሳያ ክሳ ኣንሮጎና ክዶ፤ ቆይድንናም ፃሊ ሃያንቴና ክፓስሳይ፤ እስናሳ ኣፕናም ኮናሮጎና ክካይ፤ ኮዶን ቱፖናም ኖን ካይሞሮጎ ካና ክካይ።”
13
ዋዳ ኣጋኻ ኢየሱስ ዮሃንስካ ሻይዾታ ገሊላ ባራኻ ዮርዳኖስ ሌኤንዛራ ናእዲና።
14
ኮዶን ዮሃንስ ክግያ ይንታና ክያማዶ፦ “ኦጎንታ ዳማሞ፤ እንታ ሃንካና እሻይዻ ያ እንካ ሻይዻናንቴ እዛራ ሃስ ሃኔኤ?” ሃማንቴ ኪም ሻያን ጋርዲና።
15
ኢየሱስካሞ ክግያ፦ “ዛርቦ ቆልማሞ፦ ያ እናንቴ ኤኤ ሃምማ፤ ዬራ ክናም ኣሽክንቶኻ ባርያሳ ቃቦንም ፓይላ ሃይንቶ ዎናንቴ ዛግሳና ኮዛግሳይ።” ሃያንቴ ዮሃንስ ኣፖ ክሳም ቻይዲና።
16
ኢየሱስ ሻይዻንቴ ኑንቆንባራ ክውታዃ፤ ኣጋዛራ ፖላኖ ኮቡልሟዃ ባርያሳ ኡስኖ ጋዛኖ ዎሌ ማታንቴ ክዛራ ኮያንችካና ክያፓዶ።
17
“ናሳ እሳ እናሻያ ይንካ እዋዝንዻያ ኣጋ ኖና” ሃማያ ዬፆ ፖላንባራ ኤሳርምዲና።