¹ ብታ ሄሮድስ ዋዳንካ ኢየሱስ ፔየስ ይሁዳ ግዶር ዳ ቤተልሔም ግዶር ኣዻዻዃ፤ ኤና ሃምና ሃዮን ይውታምባራኻ ኢየሩሳሌምዛራ ናዴ፦ ² “ኣይሁድ ብታ ኣዻዻዳ ሃንታር ክዴ? ሃዮን ይውታምባራ ¹ ክሳ ኤዝንታም ሃፓንቴ ውቲ ክናንቴ ኮምፓርሳናንቴ ናእዲና” ሃማንቴና ኬኦይሳዶ።

³ ብታ ሄሮድስ ዬራ ኣጋም ኤሳራንቴ ጄክዲና፤ ኢየሩሳሌም ፔኖኻሞ ፓይላ ክማላ ጄክዲና። ⁴ ኤና ኣይሁድናሳ ዳምብን ኣሽካይናሳ ጋርናቤ ኣይሁድናሳ ዳምብን ታማርሳይናቤም ፓይላ ኖ ፑኡሻንቴ ክርስቶስም ² ሃንታ ኣዻዻይንም ኬኻላ ኦይስዲና። ⁵ ኬኻሞ ይንታና ክግያ ኬያማዶ፦ “ክርስቶስ ፔየስ ይሁዳ ጋንታ ቤተልሄም ግዶር ኣዻዻይንም ኣና ኤያ ባርያሳ ኣፖን ጌያያ ይንታ ሃማንቴ ኡክዲና፦ ⁶ ‘ይሁዳ ፔሮ ዶኖ ያ ኮኖ ቤተልሄም፣ ብትና ዋኒ ይሁዳ ፔሮ ዳና ግዶርካ ያ ሾሊ ትማሞ፤ ዛርስን እኖን እስራኤልም ኤያ ግሻያ ሃባራንካ ውታና ክውታይ።”

⁷ ሃያንቴኻሞ ሄሮድስ ኤና ሃምናም ኣዽምካ ግስንሳንቴ ዋዳስ ኤዝንቶንሳ ሃፕንዻዳም ኬኻላ ኦይሳንቴ ኤሳርዲና፤ ⁸ ኤና ሃምናም ቤተልሄምዛራ ይእሳንቴ ይንታና ኬግያ ክያማዶ፦ “ቃልቴ ናሳም ዛግማቴ፤ እንታኻሞ ክናንቴ እኮምፓርሴኻናንቴ፤ ኪም ዬሃፕና ኮኻ ማትማቴ፤ ናሳ ሃንታ ክዶንም እናንቴ ጌይማቴ” ና ክያማዶ።

⁹ ኤና ሃምና ብታ ሄሮድስ ክጌያዳናም ኤሳራንቴ ይሳ ጎይን ያእዲና። ኣጋ ሃዮን ይውታንባራ ኬያፓዳ ኤዝንታ ኬም ኣንሳቴ ራቃ ይንግዶር ናሳም ኣዻዻዳዛራ ኬም ዬስክስዲና። ¹⁰ ኬኻሞ ኤዝንቶን ይያፓና ካልሎን ዋዝንዽዲና። ¹¹ ናንሲ ኬኻሞ ኦኖን ኣርዳንቴ ናሳም እንዳን ማርያም ማላ ሃፕዲና፣ ሃያንቴ ክናንቴ ኮምፓርስዲና። ይሳ ሳጥንናም ቡላንቴ ዎርቄምቤ፣ ቁኛንቤ፣ ከርቤ ሃንዻያ ቁኛን ጌያንዳቤም ክናንቴ እምዲና። ¹² ሃያንቴ ኬኻሞ ብታዛራ ማታን ኬጋሬኻናንቴ ባርያ ሃይማንካ ኬናንቴ ክጌያዃ ጎይ ኣብካ ይሳ ፔናዛራ ማታቴ ያእዲና። ¹³ ኤና ሃምና ኬያኣዃ ባርያሳ ኤርጎን ኤያ ዮሴፍናንቴ ሃይማንካ ናዴ ክግያ፦ “ዻጵማ፣ ይንካ ሃማታያ ዋዳስ ሃናንቴ እሳ ጌያዛራ፤ ናሳቤ እንዳንቤም ግብፅ ፔንዛራ ኣንሳቴ ይማ፤ ኦጎታር ዳማ፤ ሄሮድስ ናሳም ዴሳናንቴና ክዛጋይ” ሃማንቴ ክናንቴ ጌይዲና።

¹⁴ ናንሲ ዮሴፍ ሶትንካ ዻጳንቴ ናሳቤ እንዳንቤም ግብፅ ፔንዛራ ኣንሳቴ ያእዲና፤ ¹⁵ ኦጎታርካሞ ሄሮድስሳ ጃዛራ ዳርቅዲና። ኣጋ ይንታ ክያማዳ ኤያ ባርያሳ ኣፖን ጌያያኻ ባርያሳ ጌይዻዳ ኣፓ “ናሳ እሳም እንታ ግብፅ ፔንባራ ግስምዲና” ሃማንቴ ክጌያዳ ጎንዼ ማትዲና።

¹⁶ ሄሮድስም ኤና ሃምና ክም ኬታይሳዶን ይዼሳና ጌጲ ዻጋስዲና። ኖ ኤና ሃምናሳ ክናንቴ ጌይዻዳኻ ሃማንቴ ፖሊስናም ኤርጋንቴ ቤተልሄምቤ ኮሳ ሞሮና ዴሞሮዳና ግዶር ኣንጌን ናና ቦን ላማ ግዶርካ ካርሳንቴ ቦን ላማሳ ቾባራንዳናም ፓይላ ዴስስዲና። ¹⁷ ኣጋኻ ሃማንቴ ኤያ ባርያሳ ኣፖን ጌያያ ኤርምያስሳ ጌይዻዳ ይንታ ሃማያ ኣፓ ሃምዲና፦ ¹⁹ ሄሮድስ ክጃዃ ባርያሳ ኤርጎን ኤያ ዮሴፍ ካላ ሃይማንካ ናዴ፦ ²⁰ “ዻጵማ፥ ናሳቤ እንዳንቤም ኣንሳቴ እስራኤል ፔንዛራ ማትማ፤ ናሳም ዴሳናንቴ ኤና ዛጋይና ጃይዲና ” ና ክግያ ክያማዶ።

²¹ ዮሴፍ ዻጳንቴ ናሳቤ እንዳንቤም ኣንሳቴ እስራኤል ፔንዛራ ማትዲና። ²² ኮዶን ሄሮድስ ናሳ ኣርኬላዎስ እምባ ክጃዃ እምባ ራቃሮጎ ይሁዳ ፔሮ ክብትማዶንም ዮሴፍ ይኤሳራና፤ ኦጎዛራ ያኣን ኩርትንዽዲና። ባርያ ክናንቴ ሃይማንካ ኦጎዛራ ያኣን ክጋሬኻናንቴ ክጌያዶታኻ ገሊላ ፔንዛራ ያእዲና፤ ²³ ኖ ናዝሬት ሃንዻይን ካታማን ቃልቴ ኦጎታር ዴንታን ይሳም ካርስዲና። ኣጋኻ ሃማንቴ ኤና ባርያሳ ኣፖን ጌያይና ይጌያዳግያ “ኖ ናዝሬት ፔን ጋንትና” ሃማንቴ ጌይዻዳ ጎንዼ ማትዲና።