¹ ኣጋሳ ራስባራ ኢየሱስ ጋግንካ ኛፓስንም ሳጋንቴ ካታማን ይኖንዛራ ማታቴ ናእዲና። ² ኦጎታርካሞ ኤና ኤዲ ራንሳ ማልግማዳ ካላም ሻላንካ ባኣቴ ክዛራ ናእዲና። ኢየሱስ እምነት ኬሳም ሼዳንቴ ኤያግያ፦ “ያ ናሳ ዎይላማ ታክናኖ፣ ሴሶን ሃሳም ጋርዽዲ” ና ክያማዶ።

³ ዋዳስ ኣጋኻ ኤና ኣይሁድ ዳምብን ታማርሳይና፤ “ኤያኻ ባርያም እሪቴና ክዶ” ሃማንቴ ይሳ ኢንካ ጉንድምዲና።

⁴ ኢየሱስካሞ ቃቦ ኬሳም ዼሳንቴ ይንታና ኬግያ ክያማዶ፦ “ዬሳ ዎይላምሮካ ዬርን ዛርቦን ሃርናንቴ ዬቃቤ? ⁵ ኤሳንካ ‘ሴሶን ሃሳም ሃናንቴ ጋርዽዲና’ ሃንዻያቤ ‘ዻጳንቴ ይማ’ ሃንዻያቤሳ ሃማቴ ባዶን ዳያ? ⁶ ኮዶን ኤዲ ናሶ ፔሮጎ ሴሶንም ጋርሳናንቴ ጌጳሞ ክሳ ኮዶንም ዬዼሴኻናንቴና።” ኢየሱስ ኣጋንታ ሃማንቴ ኤያ ራንሳ ማልግማግያ፦ “ዻጲማ! ሃሳ ሻላንም ባኣቴ ሃሳ ኦኖንዛራ ዪማ ና ክያማዶ። ⁷ ኣጋዛራ ኤያ ራንሳ ማልግማ ዻጳንቴ ይሳ ኦኖንዛራ ያእዲና። ⁸ ዛርስኖኻሞ ዬራ እግናም ይያፓና፦ ካሎን ዬርሻንቴ ጌጳሞን ኮግያሞንም ኤዲናንቴ እማዳ ባርያም ጎሽዲና። ⁹ ኢየሱስ ኦጎታርካ ውታንቴ ኪይና ኤዲ ካላ ማትዮስ ሃማንቴ ግስንጳያ፤ ግብርን ጎራዻን ራቅሮ ዳርቃንቴ ክዳዃ ሃፓንቴ፦ “ኢም ጫግማ” ና ክግያ ክያማዶ፤ ኖኻሞ ዻጳንቴ ኪም ጫግዲና።

¹⁰ ኢየሱስ ማትዮስ ኦኖሮጎ ዳርቃንቴ እꬅምንቴ ክዳዃ ኤና ግብርን ጎራይና ጱፅናቤ ሴሶን ኤናቤ ክቤ ክሳ ታማርናማላ ክንካ እꬅማናንቴ ዳርቅዲና። ¹¹ ፈረስ ኤናኻሞ ኦጎም ይያፓዶን ዋዳንካ ክሳ ታማርናግያ፦ “ዬሳ ኣስታማራ ኤና ግብርን ጎራይናቤ ሴሶን ኤናቤላማ ክንካ ሃርናንቴ ክእꬅሜ?” ሃማንቴና ኬኦይሳዶ።

¹² ኢየሱስካሞ ኬጌያዳናም ኤሳራንቴ ይንታና ኬግያ ክያማዶ፦ “ኤና ሃጅሞና ና ይናንቴን ኣክምን ይዛግሳይና፣ ኤና ጫንቃል ሃምና ናንቴ ትማሞ። ¹³ ዬቲ ቃልቴ ‘እንታ ፃላሞንና እናሻይ፤ እናንቴ ቁሊን ዬኡካይንም ትማሞ’ ሃማንቴ ባርያሳ ጌይዻዳ ዎኻላ ኣጋም ሃርክዶንም ዼስማቴ። እንታ ሴሶን ኤናም ግስሞታና እናኣዶ፤ ኤና ጋዛናም ግስማናንቴ እንታ ናኣድማሞ።” ¹⁴ ኑንቆንካ ሻያያ ዮሃንስሳ ታማርና ኢየሱስ ዛራ ናዴ፤ “ዎቤ ፈረስ ኤናቤ ቶሮንዻና ዎቶሮንዻይ፤ ታማርና ሃና ሃርቴ ይንናንቴ ኬቶሮጲሞኖ?” ሃማንቴና ክካላ ኬኦይሳዶ።

¹⁵ ኢየሱስካሞ ይንታና ኬግያ ክያማዶ፦ “ኡታስ ኬላማ ክንካ ክዳዃ ሃርያና ሃርናንቴ ኬሞይካዼ? ኡታስም ኬካላንካ ይንካ ቻዻያ ዋዳስ ናኣና ክናኣይ፤ ናንሲ ዋዳ ኣጋኻ ኬ ቶሮንዻና ኬቶሮንዻይ።

¹⁶ ኣፓላ ጌቾዛራ ጫርቄ ሃሊ ዎዳንቴ ኤዲ ጋራያ ቆልማሞ፤ ኦጎንታ ሃይዻያዳና ጫርቃ ሃላ ኣፓላን ጌቾን ክያኣስና ሃኣሞኖ ካሎን ዎራዻና ኮዎራዻይ። ¹⁷ ቁንጫ ሶርብ ጌቾ ግዶር ዎይንን ዝኣን ሃሊን ኤዲ ካያ ካላኻሞ ቆልማሞ፤ ኦጎንታ ሃይዽና ቁንጫን ሶርባ ዻቃና ክዻቃይ፤ ዎይንን ዝኣኖኻሞ ይንቅማና ኮይንቅማይ፤ ቁንጫን ሶርባኻሞ ስያና ክስያይ፤ ኮዶን ዎይንን ዝኣን ሃሊንም ሶርብ ሃሊ ግዶሪና ካዻይ፤ ጎያ ኣጋኻ ሶርባቤ ዎይንን ዝኣንቤ ፃሊንካ ዳና ኬዳይ። ¹⁸ ኢየሱስ ኬናንቴ ዬራ ክናም ጌይቴ ክዳዃ ኣይሁድናሳ ምስኮን ኦኖንሳ ጋራ ክዛራ ናዴ ኢየሱስሳ ዎትሮ ኮምፓርሳንቴ፤ “ናኖ እሳ ጃይዲና፤ ና ኮጶቄኻናንቴ ቃልቴ ሃሳ ኣኒም ኮዛራ ዎዲማ።” ¹⁹ ኢየሱስ ዻጳንቴ ክላማ ክንካ ያእዲና፤ ታማርናኻሞ ኪም ጫግዲና።

²⁰ ዋዳ ኣጋኻ ኤዲ ሜ ካላ ቦን ታጲ ላማ ማኣስን ይንቅስቴ ጋልቴን ዶኖ ኢየሱስሳ ራስባራ ናዴ ክሳ ኣፓላንሳ ብራንም ላኣስዲና። ²¹ ና ይሳ ዎይላምካ፦ “ክሳ ኣፓላንሳ ብራኒም ዳናኻም እላኣስና ፓሻና እፓሻይ” ሃማንቴና ኮቃባዶ።

²² ኢየሱስካሞ ራስዛራ ማታቴ ኤስንም ሼዳንቴ ኮግያ፤ “ናኖ እሳ ዎይላም ሃታክናኖ፤ ሃሳ እምነትኖ ሃም ዻኣሽዲና” ና ክያማዶ። ኤስኖኻሞ ኣጋዛራ ፓሽዲና።

²³ ኢየሱስ ኣይሁድናሳ ምስኮን ኦኖንሳ ጋራ ኦኖን ክዬስካና ኤና ቱሉጞን ፑጋይናቤ ኤና እላታይናቤም ሃፓንቴ፤ ²⁴ ኬግያ፦ “ኦኖሮኻ ውትማቴ፤ ናኖ ዎዻንቴና ኮዶ፤ ና ጃድማሞ” ና ክያማዶ። ኮዶን ኬ ክዛራ ሃንጭዲና። ²⁵ ዛርስኖ ኮውታዃ ራስባራ ኦኖንዛራ ኣርዳንቴ ኣኒን ኮሳም ዬድዲና፤ ናኖኻሞ ዻጳንቴ ዎይዲና። ²⁶ ዬራ ኣጋ ሃይዻዳሳ ዼላቅኖ ራቅ ውሊም ሻምዲና። ²⁷ ኢየሱስ ኦጎታርካ ውታንቴ ክይና ኤዲ ኣፒካያ ላማ ክግያ፦ “ዳዊት ናሳ፣ ዎም ዻኣሽማ” ሃማንቴ እላታንቴ ኪም ጫግዲና።

²⁸ ኤና ኣፕን ካያናኻሞ ኢየሱስ ክኣርዳዳ ኦናዛራ ኪም ጫጋቴ ኣርድዲና፤ ኢየሱስካሞ ኬግያ፦ “ኣፕን ዬሳም ፖችንሻናንቴ እቻላይንም ዬቲ ኣምናው ዬኣምናይ?” ሃማንቴና ኬኻላ ክኦይሳዶ። ኬኻሞ ክግያ፦ “ይኒ ጌጳዮ ኣምናና ዎኣምናይ” ሃማንቴና ኬማሳዶ።

²⁹ ሃያንቴ ኢየሱስ ኣፕና ኬሳም ላኣሳንቴ ኬግያ፦ “ዬኣምናዳግያ ዬናንቴ ኮዴ” ና ክያማዶ። ³⁰ ኣፕና ኬሳኻሞ ፖችምዲና። ኢየሱስ ኬግያ፦ “ዬራ ካም ኤዲ ካላካሞ ዼሳን ኮጋሬ“ ሃማንቴ ኬም ኪሊዲና። ³¹ ኮዶን ኬ ኦጎታርካ ይውታና ሞሮና እግናሳ ኢሮ ኢየሱስሳ ኜሙትን ሻምሽዲና።

³² ኣጋባራ ኬውታና ኤዲ ቤሮን ይዬዳዳ ኣፖንሳ ዱዲ ካላም ክዛራ ኣንሳቴ ናዽዲና። ³³ ቤራ ክባራ ክውታዃ ራስባራ ኤያ ኣፖን ዱዳ ዼላቃን ካርስዲና፤ ዛርስኖኻሞ ዬርሻንቴ፣ “ዬር ካግያማ እስራኤልና ፔሮጎ ካላኻሞ ሃፓንቴ ዼሳዻድማሞ” ና ኳማዶ።

³⁴ ኮዶን ፈረስ ኤና፦ “ቤሮናም ክቡላይኖ ቤሮናሳ ጋራኻና” ና ኬያማዶ። ³⁵ ኢየሱስ ኣይሁድናሳ ምስኮን ኦኖና ግዶር ታማርስቴ፤ ባርያሳ ማንግስትንሳ ሜርሜርን ፃሊን ኤናናንቴ ጌያዳቴ፤ ሃጅሞንቤ ቡርቅምቤም ፓይላ ፓሽሻዳቴ ካታማናቤ ሞሮናቤም ፓይላ ሽርዲና። ³⁶ ዛርስን ጱፅን ይያፓዶን ዋዳንካ እያቲ ግሽሞ ኤዲ ይንሳ ይቆልማግያ ጋርዻዳግያ ቃብማንቴ ኬዶንታኻ ክሳ ላፖም ዴስዲና። ³⁷ ኣጋኻ ሃማንቴ ይሳ ታማርናግያ ይንታና ክያማዶ፦ “ሃምኖ ጌጲና፤ ኮዶን ዋድማን ኤና ቶኻና፤ ³⁸ ኣጋታኻ ኤያ ሃምንሳ እምባ ዋድማን ኤናም ሃምንዛራ ክይእሴኻናንቴ ምስክማቴ።”