¹ ቡሪን ኤና ኣይሁድናሳ ዳምብን ኣሽካይናሳ ጋርናቤ ዛርስንሳ ዞንዛናቤ ኢየሱስም ጎያ ይንካ ይዴሳያም ክንካ ሃሳውዲና። ² ኪም ዻኻንቴ ኣንሳቴ ቃልቴ ብታ ጲላጦስናንቴ ሳስካቴ እምዲና።

³ ኪም ሳስካቴ እማዳ ይሁዳ ኢየሱስዛራ ዻባሞን ካዻዶንም ይያፓና፦ ዬራ ይየዳናንቴ እልል ጃይዲና፤ ዎርቄን ብሬና ማካንታምና ይቻዳናም ኤና ኣይሁድናሳ ዳምብን ኣሽካይናሳ ጋርናቤ ዛርስንሳ ዞንዛናቤናንቴ ማሳቴ እማንቴ፤ ⁴ “ኤዲ ሴሶ ቆልማም ሳስካቴ ኢማዳኻ እንታ ጌጲ ሴስዲና” ና ክያማዶ። ኬኻሞ ክግያ፦ “ዎም ኦጎታር ዬር ኣርሳያ ቆልማሞ፤ ኦጎኖ ሃሳ ሜቴ ጋንቲና” ና ኬያማዶ።

⁵ ሃያንቴኻሞ ይሁዳ ብሬናም ባርዮን ኦኖሮጎ ይንቅሳንቴ ውታንቴ ቃልቴ ዪም ጩቃቴ ዴስዲና።

⁶ ኤና ኣይሁድናሳ ዳምብን ኣሽካይናሳ ጋርና ብሬናም ቻንቴ፦ “ማኣስ ባዛ ኬዶንታኻ ኮይና ዋኒዛራ ዎኬኻናንቴ ዛስክማሞና“ ኬያማዶ። ⁷ ክንካ ሃሳዋንቴኻሞ ኤና ቾችናናንቴ ዱኪ ራቅ ኮዴኻናንቴ ብሬናኻ ኤያ ዳን ኣሽካያ ሃምንምና ኬሻናዶ። ⁸ ታ ናንሲ ራቃ ኣጋም ላይ ካዛራ “ማኣስ ፔ” ሃማንቴና ግስንዻይ። ⁹ ኦጎንታ ኮማታዶኖ ኣና ኤያ ባርያሳ ኣፖን ጌያያ ኤርምያስሳ ጌይዻዶኖ ጎንዼ ማትዲና፤ ኖ ይንታ ሃማንቴና ክጌያዶ፦ “ክናንቴ ካሺ ኮዴኻናንቴ እስራኤል ናናሳ ዎርቄን ብሬና ማካንታምና ኬጌያዳናም ኬ ቻይዲና፤ ¹⁰ ባርያሳ እናንቴ ጌይዻዳ ጎያኻ ኤያ ዳን ኣሽካያሳ ሃምን ናንቴ ኬ ካሽዲና።” ¹¹ ዋዳን ኣጋኻ ኢየሱስ ኤያ ፔንሳ ብታሳ ዎትሮ ዎይዲና፤ ፔንሳ ብታኻሞ፦ “ያ ኣይሁድናሳ ብታው?” ሃማንቴና ክካላ ክኦይሳዶ። ኢየሱስካሞ፦ “ያ ሃጌያዳግያ ኣጋንታና” ሃማንቴና ክናንቴ ክማሳዶ። ¹² ኮዶን ኤና ኣይሁድናሳ ዳምብን ኣሽካይናሳ ጋራናቤ ዞንዛናቤ ኪም ኬዻብንሻን ኖ ኣፖ ካላኻሞ ማሳዲማሞ፤ ¹³ ዋዳስ ኣጋኻ ጲላጦስ ክግያ፦ “ሃሳ ዬርን ጱፅን ኬጌያይን ኮም ያ ኤሳራዬው?” ና ክያማዶ። ¹⁴ ኮዶን ፔንሳ ብታናንቴ ካልሎን ዬር ዋና ኮሳ ማታዛራ ዻባሞን ኦጎ ውል ክዛራ ካዻንሳ ካላናንቴኻሞ ኖ ክናንቴ ዬር ጌያዲማሞ። ¹⁵ ዛርስኖ ፓሲካ ባኣልንካ ኬናንቴ ቡልዼኻናንቴ ዻክን ኤያ ኬኦይሳያም ቡልዻያ ኤያ ፔንሳ ብታሳ ዳምቢ ዳይዲና። ¹⁶ ዋዳን ኦጎኻ ጋሮንካ ዼሳዻዳ ዻክሮን ዳ ባርባን ሃንዻያ ኤዲ ካላ ዳይዲና። ¹⁷ ጲላጦስካሞ ዛርስኖ ኮፑጫና ኬግያ፦ “ባርባንቤ ክርስቶስ ሃንዻያ ኢየሱስቤሳ ሃውም ዬናንቴ እቡሌኻናንቴ ዬዛጌ?” ና ክያማዶ። ¹⁸ ጲላጦስ ይንታ ሃማንቴ ክኦይሳዶኖ ኬ ኪም ቶዛዻንቴ ሳስካቴ ክናንቴ ኬእማዶንም ይዼሳዶንታኻና። ¹⁹ ኖ ብቶን ቦርኮቶንዛራ ዳርቃንቴ ክዳዃ ሜኖ ክሳ፣ “ኤያ ኣጋኻ ሃማንቴ እንታ ኒይ ሃይማኻ ጌጲ እጋላዶንታኻ፤ ኤያ ሴሶን ቆልማ ኣጋዛራ ዬር ዛርቦ ካላኻሞ ሃይናኖ” ሃማያ ኤዲካ ኣፖ ንእስዲና። ²⁰ ኮዶን ባርባንም ኬናንቴ ቡልዼኻናንቴቤ፣ ኢየሱስም ዴሳዼኻናንቴ ዛርስኖ ብታም ኮምስከኻናንቴ፣ ኤና ኣይሁድናሳ ዳምብን ኣሽካይናሳ ጋርናቤ ዞንዛናቤ ኬም ኪሊቴና ኬዶ። ²¹ ፔንሳ ብታኻሞ ኬኻላ፦ “ኬላማ ግዶርካ ሃውም ዬናንቴ እቡሌ?” ሃማንቴና ክኦይሳዶ። ኬኻሞ “ባርባንም!” ሃማንቴና ክናንቴ ኬማሳዶ። ²² ጲላጦስካሞ ኬኻላ፣ “ኤያ ክርስቶስ ሃንዻያ ኢየሱስም ታ ሃስ እያዬ?” ሃማንቴና ክኣይሳዶ። ኬ ፓይላ ይዳዛራ “ኪም ዚታዼ!” ና ኬያማዶ። ²³ ጲላጦስካሞ “ሃርናንቴ? ሃርቴ ዛርባ ክኣሽካዳ?” ሃማንቴ ኬኻላ ኦይስዲና። ኮዶን “ኪም ዚታዼ!” ሃማንቴ ካልሎን ኬእላትዲና። ²⁴ ጲላጦስ ዴንታ ኬሳ ዼላቅ ሙላሳ ኦባራ ዬራ ካ ዋጋ ኮቆልሞን ዼሳንቴ፤ “እንታ ኤያ ካሳ ማኣስሮኻ ጫራጚና፤ ታ ናንሲ ዬራ ኣጋ ዬሳ ሜቴ ጋንቲና” ሃማንቴ ኑንቆ ባኣሳንቴ ዛርስንሳ ዎትሮ ይሳ ኣኒም ሻይዲና። ²⁵ ዛርስኖ ፓይላ፣ “ማኣስኖ ክሳ ዎቤ ዎሳ ናናቤዛራ ኮዴ” ሃማንቴ ማስዲና። ²⁶ ዋዳ ኣጋኻ ባርባንም ኬናንቴ ቡልዲና፤ ኢየሱስም ዻይሳንቴ ዚታዼኻናንቴ ሳስካቴ እምዲና። ²⁷ ኣጋሳ ራስባራ ፔንሳ ብታሳ ዎታደርና ኢየሱስም ብታ ኦኖንዛራ ኣንስዲና፤ ሳራዊቲናምካሞ ፓይላ ክዛራ ኬ ፑእሽዲና። ²⁸ ኣፓላን ክሳም ቡላንቴ ኣፓላ ኣብ ዛዊ ኪም ኬኣርስስዲና። ²⁹ ኡኩሚን ጋሊን ቆጴግያ ኣሽካንቴ ክሳ ሜቴሮጎ ዎዳንቴ፤ ኣና ክሳ ምዛቃዛራ ባልጉዳን ሴጋን ዬድሳንቴ፤ ክሳ ዎትሮ ኮምፓርሳንቴ፤ “ኣይሁድና ብታ፣ ፃሊኖ ሃናንቴ ኮዴ” ሃማንቴና ኪም ኬቦዋዶ። ³⁰ ፓጺንካሞ ክዛራ ማማንቴ፤ ባልጉዳን ሴጋስም ክካላ ቻንቴ ሜቴ ክሳም ይንካ ማሶኻ ማሶኻና ኬዻዶ። ³¹ ኬ ኪም ኣጋንታ ቦዋንቴ ራስባራ ኣፓላን ዛዎንም ክካላንካ ቡላንቴ፤ ኣፓላ ክንታም ኪም ኣርስሳንቴ ዚታናንቴ ኣንሳቴ ያእዲና። ³² ኪም ኣንሳቴ ኬይካኻሞ ስምኦን ሃማንቴ ግስንዻያ ቃሬና ፔን ኤዲ ካላም ሃፓንቴ ኢየሱስሳ መስቀልን ክቤኤኻናንቴ ኪም ኬ እሽክንሽዲና። ³³ “ራቃ ሜቴንሳ ጉሳ” ሃማንቴን ግስንዻያ ጎልጎታ ራቃም ኬ ይዬስካና፤ ³⁴ ጭሺንላማ ዎይንን ዝኣን ዎርሳዻዶንም ክውጬኻናንቴ ኬ ክናንቴ እምዲና፤ ኮዶን ኖ ሱታንቴ ውጫናንቴ ዛጋዲማሞ። ³⁵ ኬ ኪም ዝታንቴኻሞ ራስባራ ኣፓላን ክሳም ቡኪ ዻባንቴ ኬ ካሽምዲና። ³⁶ ኦጎታር ዳርቃንቴ ዻቃኒቴና ኬዶ፤ ክሳ ሜቴባራኻሞ፦ ³⁷ “ካ ኣይሁድናሳ ብታ ዬሱሲ” ና ሃማያ ይንካ ኪም ዚታዻዳም ዻዋያ ዋርቃት ኡካንቴ ኬ ዚቲዲና። ³⁸ ቃው ኤዲ ላማም ካላም ክሳ ምዛቅባራ ዋም ክሳ ዋርካታባራ ሃያንቴ ክላማ ክንካ ዚታዽዲና። ³⁹ ኤዲኖ ጎይን ሳጋይኖ ፓይላ እሪሞ ጱፅ እሪምቴ፤ ይሳ ሜቴ ጁግቴ፤ ⁴⁰ ክግያ፦ “ያ ኤያ ካ ባርዮን ኦኖንም ኮሳንቴ፤ ሮሮ ማካንሳ ኢር ማሳንቴ ኣሽካያ፤ ይንዳ ሃም ዻኣሽማ፤ ባርያ ናሳ ሃዳና ይንዳ መስቀልንባራንካ ሃንችማ” ሃምቴና ኬዶ። ⁴¹ ኤናኣይሁድናሳ ዳምብን ኣሽካይናሳ ጋርናኻሞ ኤና ሙሴ ዳምብን ታማርሳይናቤ ዞንዛናቤ ላማ ክንካ ማታንቴ ኪም ቦውቴ ይንታ ሃምቴና ኬዶ፦ ⁴² “ኖ ኤና ዋኒም ዻኣሽዲና፤ ኮዶን ዪም ዻኣሻዻን ቻልማሞ፤ እስራኤልናሳ ብቲ ይዳና ይንዳ ታ መስቀልንባራ ክያንቼ፤ ዎቲካሞ ክንካ ኣምናና ዎኣምናይ። ⁴³ ኖ ባርያዛራ ቃሞ ቁንፁዲና፤ ‘እንታ ባርያ ናሳና’ ክያማዶንታኻ፣ ይንዳ ኪም ይናሻያዳና ታ ኪም ክዻኣሼ።” ⁴⁴ ክላማን ዚታዻዳና ቃው ኤናኻሞ ኦጎንታ እሪሞ ጱፅካ ኪም እሪቴና ኬዶ። ⁴⁵ ሮሮንሳ ሳኣት ላኻ ካርሳንቴ ሳኣት ሳልዛራ ፔኖ ውል ሶትዲና። ⁴⁶ ሳኣት ሳል ኮማታና፣ ኢየሱስ ይሳ ቆርጪም ዼግ ሃያንቴ “ኤሎሄ! ኤሎሄ! ላማ ሳባቅታኒ?” ሃማንቴ እላትዲና። ኦጎኖኻሞ “ባርያ እሳ፣ ባርያ እሳ፣ ሃርናንቴ ኢም ሃጋራዴና” ሃንዻዶ።

⁴⁷ ኤና ኦጎታር ዎያንቴን ዳና ግዶር ዋኒ እላቲን ክሳም ኤሳራንቴ፤ “ኖ ኤልያስም ግስምቴና ክዶ” ና ኬያማዶ።

⁴⁸ ኣጋዛራ ኬግዶር ካላ ጎብቴ ቃልቴ ፕራሽ ሾሊ ቻንቴ ዎይንን ዝኣን ጋኣዶሮ ኣርሳንቴ ባልጉዳ ሃቃሳ ብራሮጎ ሃያንቴ ኖ ክውጬኻናንቴ ክሳ ኣፖዛራ ባእዲና። ⁴⁹ ኮዶን ኤና ዋኒ ይጌይና፤ “ኪም ጋርማቴ፤ ይንዳ ኤልያስ ናዴ ኪም ክዻኣሻያም ዎሼዴ” ና ኬያማዶ።

⁵⁰ ኢየሱስ ፕርካሞ ይሳ ቆርጪም ዼግ ሃያንቴ እላታንቴ ኡስን ይሳ ሳስካቴ እምዲና። ⁵¹ ዋዳስ ኣጋኻ ባርዮን ኦኖንሳ ኣፓላኖ ቆፓን ጫራጝን ክጫዶኖ ጳኻ ቻንቴ ቾ ቱንስንዛራ ራቅ ላማ ሃእዲና። ፔኖኻሞ ዝግምዲና፤ ላይታናኻሞ ጳቅዲና። ⁵² ዱክናኻሞ ቡልምዲና፤ ኤና ጫራጝና ራታዳና ጱፅናኻሞ ዱክንባራኻ ዻጲዲና፤ ⁵³ ኢየሱስ ዴምጲንባራኻ ክዻጳዃ ራስባራ ዱክና ግዶርካ ውታንቴ ካታማን ጫራጝንዛራ ኣርዳንቴ ኤዲን ጱፅንናንቴ ሃፕንዽዲና።

⁵⁴ ኤያ ዎታደርና ማቶናሳ ጋራቤ ኤና ክላማ ኢየሱስም ዻቃንቴን ዳና ፔኖ ኮዝግማዶንቤ ዬራ ሃማዳናቤ ይያፓና ጌጲ ኩርትንዻንቴ፣ “ኤያ ካ ጎንዼምባ ባርያ ናሳና“ ና ኬያማዶ። ⁵⁵ ገሊላባራንካ ናኣዳና ኢየሱስናንቴ ዬራ ዛግሳይናም ኣሽካናንቴ ሜና ኪም ጫጋዳና ጱፅና ፔጌ ዳንቴ ዬራ ሃሚቴን ዳናም ሼዲቴና ኬዶ። ⁵⁶ ኬግዶርካሞ መግዳላ ፔን ጋይኖ ማርያምቤ፣ ያዕቆብቤ ዮሴፍቤ እንዳኖ ማሪያምቤ ሃያንቴ ዘብዲዮስ ናና እንዳኖኻሞ ዳይዲና። ⁵⁷ ኮእባናናኻሞ ዮሴፍ ሃንጳያ ኤዲ ዎዲሞ ካላ ኣርማትያባራ ናእዲና፤ ኖኻሞ ኢየሱስሳ ታማሪና። ⁵⁸ ኖኻሞ ጲላጦስካላ ናዴ ኢየሱስሳ ዋኒም ምስክዲና፤ ጲላጣስካሞ ክናንቴ እንዼኻናንቴ ኤናናንቴ ጌይዲና። ⁵⁹ ዮሴፍካሞ ዋን ክሳም ቻንቴ ኣፓላ ጫንቃል ላማኻ ኪም ሳርዲና። ⁶⁰ ኖኻሞ ይናንቴ ሃማንቴ ላይታሮኻ ዱክን ይኮይሳዶሮጎ ዎዲዲና። ሃያንቴ ሱንን ጌጶንካ ዱክንሳ ኣፖን ሹፓንቴ ያእዲና። ⁶¹ ዋዳን ኦጎኻ መግዳላ ፔን ጋይኖ ማርያምቤ ማርያም ዋቤኻሞ ዱክንካ ልኪ ዳርቃንቴና ኬዶ። ⁶² ኤና ባኣልንናንቴ ኬሼካያ ሮራሳ ዋጋላሞን ኤና ኣይሁድናሳ ዳምብን ኣሽካይናሳ ጋርናቤ ፓራስ ኤናቤ ጲላጦስካላ ፑጫንቴ ክግያ፦ ⁶³ “ጌጳ፦ ሱዲማን ኤያ ኣጋ ኣና ሳዳንካ ይዶን ዋዳንካ፣ ‘ሮራ ማካንሳ ራስባራ ዴምጲንባራ ዻጳና እዻጳይ’ ክያማዶንም ዎቲ ዾቅስዲና። ⁶⁴ ኣጋታኻ ታማርና ክሳ ኪም ዱክንባራኻ ዲባንቴ ዛርስንግያ 'ዴምጲንባራ ኖ ዻጲዲና' ሃማንቴ ጌያን ኬጋሬኻናንቴ ዱክንም ሮራ ማክንሳዛራ ኤዲ ዻቃናያ ዎናንቴ ገይማ፤ ኣጋንታ ሃይዻዲምና ሴሳ ብራስካላ ካርናስ ጋፂና ክዳይ” ና ኬያማዶ። ⁶⁵ ጲላጦስካሞ ኬግያ ይጌይና፦ “ኤና ዬና ዻቃናይና ዳይዲና፤ ቃልቴ ጎያ ዬዼሳዳኻ ዻቃንስማቴ” ና ክያማዶ። ⁶⁶ ኬኻሞ ቃልቴ ዱክንዛራ ማይታም ዻንቴ ዻቅማ ኤድ ዎይስዲና።