¹ ኢየሱስ ዬራ እግናም ጌያንቴ ይቱንሳና፦ ይሳ ታማርናግያ፦ ² “ሮሮ ላማሳ ራስባራ ፋሲካን ባዓልኖ ኮዶንም ዬቲ ዼስዲና፤ ኤዲ ናሶም ዚታዼኻናንቴ ሳስካቴ እማና እንዻይ” ና ኬግያ ክያማዶ።

³ ኣጋሳ ራስባራ ኤና ኣይሁድናሳ ዳምብን ኣሽካይናሳ ጋርናቤ ዛርስንሳ ዞንዛናቤ ኤያ ቀያፋ ሃንዻያ ኤና ኣይሁድናሳ ዳምብን ኣሽካይናሳ ጋራ ሞሮሮ ፑጫንቴ፤ ⁴ ጎይ ዼሳዽማኻ ኢየሱስም ዬዲሳናንቴቤ ዴስሳናንቴ ክንካ ኦሺዲና። ⁵ ኮዶን፣ “ዛርስኖ ጄካን ኮጋሬኻናንቴ በዓል ሮሮ ዳን ኮጋሬ” ሃማንቴና ኬታኻዶ። ⁶ ኢየሱስ ብታንያ ግዶር ስምኦን ሃንዻያ ኤያ ኣና ሙልካምባንካዳ ኦኖሮጎ ክዳዃ፤ ⁷ ሜ ካላ ሻንንሳ ዋቻ ዋኣታም ኣልባስጥሮስ ሃንዻያ ቃርምሻኻ ባኣቴ ናዴ፣ ኖ እꬅምቴ ክዳዃ ክሳ ሜቴንዛራ ካይዲና።

⁸ ታማርናኻሞ ኦጎም ይያፓና ኬ ዋጭማንቴ ይንታና ኬያማዶ፦ ''ኮውሊም ሱን ሃርናንቴ ኮም ካይሳዼ? ⁹ ዋኣታም ካም ብሬ ዼፕዛራ ሻንሻንቴ ኤና ኩፕናናንቴ እኒ እንዻይንም!’’

¹⁰ ኢየሱስ እግናም ዼሳንቴ ይንታና ኬግያ ክያማዶ፦ “ኤስን ኮም ሃርናንቴ ዬጋልንሼ? ና እናንቴ ዬር ፃሊና ኮሃያዶ። ¹¹ ኤና ኩፕና ሮሮ ውል ዬላማ ክንካና ኬዳይ፤ ኮዶን እንታ ሮሮ ውል ዬላማ ክንካ ዳማሞ። ¹² ና ዋኣቲን እሳ ዛራንዛራ ይንቅሳዳኻ ኢም ዱንክንዛራ ሼክሺዲና፤ ¹³ እንታ ዬናንቴ ጎንዼና እጌያይ፤ ና ዬራ ኮያዳኻ ኮም ይንካ ዾቅሳናንቴ መርመርን ፃሊን ኮም ፔና ይንግዶር ጌይዻይናሳ ውል ግዶር ጌያና ጌይዻይ።’’ ¹⁴ ኣጋሳ ራስባራ ታማርና ታጲ ላማና ግዶር ካላ ኣስቆሮንቱ ፔን ጋንታ ይሁዳ ሃንዻያ ኤና ኣይሁድናሳ ዳምብን ኣሽካይናሳ ኤና ጋርናዛራ ቃልቴ፤ ¹⁵ ኬግያ “ኪም ዬናንቴ ሳስካቴ ኢምና ዬቲ እናንቴ ሃር ዬእሜና?’’ ና ክያማዶ። ኬኻሞ ክናንቴ ዎርቄን ብሬናም ማካንታም ፓይዳንቴ እምድና። ¹⁶ ዋዳስ ኣጋኻ ካርሳንቴ ይሁዳ ኢየሱስም ሳስካቴ እማናንቴ ዋዳ ልኪ ሃማ ዛግቴና ክዶ። ¹⁷ ባላሽን በዓላሳ ሮራ ካርሳጋላ ታማርና ኢየሱስ ካላ ናዴ፤ “ፋስካን ሃእሤኻናንቴ ሃንታር ሃናንቴ ዎኣሽኬኻናንቴ ሃዛጌ?’’ ሃማንቴና ኬኦይሳዶ።

¹⁸ ኖ ኬግያ “ካታማንዛራ ቃልቴ ኤዲ ካላግያ ‘ኣስታማራ፦ “ዋዳኖ እሳ ኮዬስዶንታኻ ፋስካን በዓልን እሳ ታማርና ላማ ኦኖ ሃኖሮጎና እእሳይ’’ ና ክያማዶ’ ሃማንቴ ጌይማቴ።’’ ¹⁹ ታማርና ክሳኻሞ ኢየሱስ ይጌያዳ ጎያኻ ፋስካን ዳኣኖን ኣሽክዲና።

²⁰ ክእባናናኻሞ ኢየሱስ ይሳ ታማርና ታጲ ላማናላማ ክንካ እꬅማናንቴ ዳርቅዲና። ²¹ እꬅምቴኻሞ ዳንቴ ኬግያ፦ “እንታ ዬናንቴ ጎንዼና እጌያይ፤ ዬሳ ካላ ኢም ሳስካቴ እማና ክእማይ’’ ና ክያማዶ።

²² ኬኻሞ ፓይላ ይዳዛራ እልሊ ጃንቴ ካላ ካላኻ ክናንቴ፦ “ጌጳዮ፦ ይንዳ ሙሽ እንታው እዳይ?’’ ና ኬያማዶ።

²³ ኖ ማሳንቴ ኬግያ ይንታና ክያማዶ፦ “ኤያ ኢም ሳስካቴ እማያ እላማ ክንካ ሻርቃንሳ ኢሮ ኣኒን ይሳም ኣርሳያ ኣጋ ኖና። ²⁴ ኤዲ ናሶ ኣና ክሳ ዬራ ዋርቃትሮኻ ጌይዻዳ ጎያኻ ያኣና ክያኣይ። ኮዶን ኤዲ ናሶም ኤያ ሳስካቴ እማያ ኣጋናንቴ ሃይ! ኤያ ኣጋ እኒ ኣዻዽማ ክሺዻዳና ክናንቴ ባሺና።

²⁵ ኪም ሳስካቴን እማያ ይሁዳኻሞ ክግያ፦ “ራቢ፦ ይንዳ ሙሽ እንታው?’’ ና ክያማዶ። ኖኻሞ ክግያ፦ “ያ ሃጌያዳ ልኪና ’’ ና ክያማዶ።

²⁶ እꬅምቴ ኬዳዃ ኢየሱስ ባላሻን ቻንቴ ምስካንቴ ቁንፃንቴ ይሳ ታማርና ናንቴ እማንቴ፤ “ችማቴ፣ እꬅማቴ ኮኖ እሳ ዋኖና ’’ ና ኬግያ ክያማዶ።

²⁷ ሻርቃንኻሞ ቻንቴ ምስካንቴ ይሳ ታማርናናንቴ እማንቴ ይንታና ክያማዶ፦ “ዬቲ ፑጭ ዬዳዛራ ሻርቃ ኣጋ ግዶርካ ውጭማቴ። ²⁸ ኤና ውልሳ ሴሶን ጋርዼኻናንቴ ይንቅማይኖ ኣሽንሾን ማኣስኖ እሳ ኮኖና። ²⁹ እንታ ዬናንቴ ጌያና እጌያይ፤ ኣባሳ ማንግስትሮ ዬላማ ክንካ ዴንታ ሃሊካ እሳ ውጫን ሮራ ክሳ ዬስካዛራ ካሃ ካርሳንቴ ዎይንን ኣፒን ኮሮኻ እንታ ውጭማሞ።’’

³⁰ ኬ ባርዮን ዋርሳን ዻሳንቴ፤ ዳብረ ዘይት ጌማርታዛራ ውትዲና። ³¹ ፕርካሞ ኢየሱስ ኬናንቴ ይንታ ሃማንቴና ክጌያዶ፦ “ ‘ግሽሞን ኤያም እንታ ዻና እዻይ፤ እያናኻሞ ላልማና ኬላልማይ’ ሃማንቴ ኡካዻዶንታኻ፤ ሶታካኻ ዬቲ ፓይላ ኢም ዬዳዻያኻ ሃማንቴ ኢም ጋራንቴ ጎባና ዬጎባይ። ³² ኮዶን እንታ ዴምጲንባራ እዻጲና ዬም ብራንቴ ገሊላዛራ ያኣና እያኣይ።’’

³³ ጴጥሮስካሞ ክግያ ማሳንቴ፤ “ኤና ዋኒ ሃም ዬዳዻያኻ ሃማንቴ ሃም ጋራንቴ ኬጎብና እንታ ካለካሞ ሃም ጋራንቴ ጎብማሞ’’ ና ክያማዶ።

³⁴ ኢየሱስካሞ ክግያ፦ “እንታ ሃናንቴ ጎንዼና እጌያይ፤ ሶታ ካሮ ኣኻራ ባቻስ ክኤልማሳ ብራሮ እይ ማካምግያ 'እንታ ኪም ዼስማሞ' ሃማንቴ ጌያና ሃጌያይ’’ ና ክያማዶ።

³⁵ ኮዶን ጴጥሮስ ክግያ፦ “ሃላማ ክንካ ዴምጲዳና ኮዛግሳያዳናኻሞ እንታ ሃም ጋራንቴ ካላኻሞ ጎብማሞ’’ ና ክያማዶ፤ ታማርና ዋኒኻሞ ፓይላ ኣጋንታና ኬያማዶ። ³⁶ ኣጋሳ ራስባራ ኢየሱስ ኬላማ ክንካ ራቃ ጌቴሰማኒ ሃንዻያዛራ ያእዲና፤ ይሳ ታማርናግያኻሞ፣ “እንታ ኦ ኦጎታ ቃልቴ እምስክና ዬቲ ኮታር ዳርቅማቴ’’ ና ክያማዶ። ³⁷ ይላማኻሞ ክንካ ጴጥሮስቤ ዘብድዮስ ናና ላማ ውልቤም ኣንሳንቴ ቃልቴ እልል ጃንቤ ቃቦቤ ካርስዲና። ³⁸ ሃያንቴኻሞ “እሳ ሳዳኖ እሳ ጃዛራ እልል ጃይዲና፤ እላማ ክንካ ዋቻዻንቴ ምስክቴ ኮታር ካፕማቴ’’ ና ኬግያ ክያማዶ።

³⁹ ሾሊ ያኣግያ ሃያንቴ ዎትንካ ይሳ ፔንም ኡካንቴ፤ “ኣባዮ፣ ሃናሻዳና ጋላኻ እካላንካ ክሳጌ፤ ኮዶን እንታ እዛጋያ ግያ ጋራንቴ ቃባ ሃንታግያ ኮዴ’’ ሃማንቴና ክምስካዶ።

⁴⁰ ሃያንቴኻሞ ማታቴ ይሳ ታማርናዛራ ክንና ኬ ፓይላ ራታንቴ ኬዳዃና ክዬስካዶ፤ ጴጥሮስ ግያኻሞ ይንታና ክያማዶ፦ “ታ እላማ ክንካ ሳኣት ካላናንቴ ዋቻዻንቴ ምስካዻያ ዬም ባሽዲው? ⁴¹ ታናንሲ ጋሎንዛራ ኣርዳን ጋራናንቴ ዎቻዻንቴ ምስክማቴ፤ ኡሳ ሼክሚና፤ ይያማን ዋስ ክሳ ቃጂና።

⁴² ፕርኻሞ እያ ላንሳም ቃልቴ፤ “ኣባ፣ ካ ጋላ እም ዬስክማን ሳግማስ ክዳና፤ ኦጎኻሞ ቃባ ሃንታ ክያምሜ’’ ሃማንቴ ምስክዲና።

⁴³ ፕርካሞ ማታቴ ክንና ኣፕ ኬሳ ኮግንዿዃ ዎዻንቴ ኬዳዃና ክያፓዶ። 44 ፕርካሞ ኬም ጋራንቴ ማታቴ ቃልቴ ምስካ እኒብራን ይምስካዳም እያ ማክንሳም ምስክዲና።

⁴⁵ ሃያንቴኻሞ ይሳ ታማርናዛራ ማታቴ ናዴ ይንታና ክያማዶ፦ “ታኻሞ ዬቲ ዎዻንቴው ዬዶ? ታ ናንሲ ሳኣቲኖ ዬስክዲና፤ ኤዲ ናሶም ሴሶን ኤና ኣኒሮ ሳስካቴ እማና እንዻይ፤ ⁴⁶ ዻጲማቴ! ዎኤ፤ ኢም ሳስካቴ እማያ ኤያ ንቴና ክዶ። ⁴⁷ ኣኻራ ጌይቴ ክቡልማ ታማርና ታጲ ላማናሳ ካላ ይሁዳ ናእዲና፤ ኤና ኤና ኣይሁድናሳ ዳምብን ኣሽካይናሳ ጋርናቤ ዛርስንሳ ዞንዛናቤ ይኒእሳዳና ቢላባቻንቤ ቁራንቤ ባኣንቴን ዳና ኤና ዹፂና ክላማን ዳና። ⁴⁸ ይሁዳኻሞ ኤና ናንቴ፣ “ኤያ እንታ እሱንቃያ ኣጋ ኖና፤ ኪም ዬዲማቴ” ሃማንቴ ክጌያዶንታኻ፤ ⁴⁹ ኖ ኢየሱስዛራ ናዴ፦ “ራቢ፣ ፃልኖ ሃናንቴ ኮዴ” ሃማንቴ ኪም ሱንቅዲና።

⁵⁰ ኢየሱስኻሞ ክግያ፦ “እያርያ፣ ዬራ ይናንቴ ሃናኣዳም ሃይማ” ና ክያማዶ። ዋዳስ ኣጋኻ ኤናኻ ኢየሱስም ዬዳንቴ ዻክዲና። ⁵¹ ኤና ኢየሱስ ላማ ዳና ግዶር ካላ ኣን ይሳም ይእሳንቴ ቢላባቻን ጉቻንቴ ኤና ኣይሁድናሳ ዳምብን ኣሽካይናሳ ጌጳሳ ካይስታም ጫራንቴ ክሳ ቃሞን ታክዲና። ⁵² ኢየሱስካሞ ክግያ ይንታና ክያማዶ፦ “ቢላባቻን ሃሳም ኮሳ ኦኖንዛራ ማሳቴ ኣርስማ፤ ኤና ቢላባቻን ጉቻይና ቢላባቻንካና ኬካያይ። ⁵³ እንታ ኣባም ኦይሳዻን እቻልማግያቤ ኖኻሞ እናንቴ ሳራዊትን ራቅ ታጲ ላማን ቡካዶንካላ ሳግን ኤርጎን ኤናም እናንቴ ክንእስማግያው ሃኻላ ኮታኻይ? ⁵⁴ እኒ ኦጎንታ ኮዳያዳና ዬራ ዋርቃትን ጋዛንሳ ሃምማና ኬያማይ ሃንዻዳና ሃስ ኬያምሜ?”

⁵⁵ ዋዳ ኣጋኻ ኢየሱስ ዛርስንግያ ይንታና ክያማዶ፦ “ቃው ኤዲ ዬዳያግያ ቢላባቻንቤ ቁራንቤም ባኣንቴ ኢም ዬዶታው ዬናኣዶ? ሮሮ ውል ባርዮን ኦኖሮጎ ዳርቃንቴ እታማርሳን ዋዳንካ ዬቲ እም ዬዳዲምናይ፤ ⁵⁶ ኮዶን ዬራ ክና ፓይላ ይንካ ኬያማዳ ኤና ባርያሳ ኣፖን ጌያይና ዋርቃትን ጋዛሮኻ ዬራ ኬጌያዳና ጎንዼ ኮማቴኻናንቴና።” ዋዳ ኣጋኻ ታማርና ፓይላ ኪም ይዻር ጋራንቴ ላሊሚዲና። ⁵⁷ ዋዳ ኣጋኻ ኢየሱስም ኤና ዬዳዳናኻሞ ኤና ሙሴ ዳምብን ታማርሳይናቤ ዛርስንሳ ዞንዛናቤ ይንግዶር ይቡካዶንዛራ ኤያ ኤና ኣይሁድናሳ ዳምብን ኣሽካይናሳ ጌጳ ቃያፋዛራ ኣንሳዽዲና። ⁵⁸ ኮዶን ጴጥሮስ ፔጌኻ ኤና ኣይሁድናሳ ዳምብን ኣሽካይናሳ ጌጳ ሞሮንዛራ ኪም ጫግቴና ክዶ፤ ሞሮንሳ እንዛራ ኣርዳንቴ ዬራሳ ቱንስናም ሼዳናንቴ ዛበኛና ላማ ክንካ ዳርቅዲና።

⁵⁹ ዋዳ ኣጋኻ ኤና ኣይሁድናሳ ዳምብን ኣሽካይናሳ ኤና ጋርናቤ ኣይሁድናሳ ኤና ብቶን ታኻይናቤ ኢየሱስም ዴስሳናንቴ ፖጋሞኻ ኤዲ ክዛራ ማኛሞ ዎያያና ኬዛጋይ። ⁶⁰ ኮዶን ማኚና ጱፅና ፖጋሞን ጋይና ኪም ኬዻብንሻዲማታኻ፤ ቱንስሮ ኤዲ ላማ ናዴ፦ ⁶¹ “ኤያ ካ ‘እንታ ባርዮን ኦኖንም ኮሳንቴ፣ ሮሮ ማካምንሳ ኢሮጎ ማሳንቴ ኣሽካና እኣሽካይ’ ሃምዲና” ሃማንቴና ኬጌያዶ። ⁶² ዋዳስ ኣጋኻ ኤና ኣይሁድናሳ ዳምብን ኣሽካይናሳ ጌጳ ዻጳንቴ ክግያ፦ “ኤና ክናሳ ሃም ዬራ ይንካ ኬዻብንሻይና ክና ውልናንቴ ኣፖ ሃማሳያ ቆላዮው?” ክያማዶ። ⁶³ ኮዶን ኢየሱስ ኣፖ ማሳዲማሞ።

ኤና ኣይሁድናሳ ዳምብን ኣሽካይናሳ ጌጳ ክግያ፦ “ባርያ ላይን ዳያ ናብንካ ኣሽንሽማ፤ ያ ባርያ ናሳ ክርስቶስ ሃዳና ዎናንቴ ጌይማ” ና ክያማዶ።

⁶⁴ ኢየሱስ ክግያ፦ “ያ ልኪ ጌይዲና፤ ኮዶን ዬውልናንቴ እጌያይ፤ ብራዛራ ኤዲ ናሶ ባርያ ካንታስሳ ምዛቅባራ ዳርቃንቴ ፖላን ሉፕንሳ ጳባራ ዳንቴ ክንና ሃፓና ዬያፓይ” ና ክያማዶ። ⁶⁵ ዋዳስ ኣጋኻ ኤና ኣይሁድናሳ ዳምብን ኣሽካይናሳ ጌጳ ኣፓላን ይሳም ሃኣሳንቴ፤ “ኖ ባርያም እሪድና፤ ካሳ ጳባራ ማኚ ኣብ ሃሳማ ክካላ ዎዛጌ? ባርያዛራ እሪሞ ዼላቅ ክጌያዶንም ዬቲህ ኤሳርዲና። ⁶⁶ ታ ዬቲ ሃር ሃማንቴ ዬጌዬ” ና ክያማዶ። ኬኻሞ “ክጄኻናንቴ ዛግሳና ኮዛግሳይ!” ሃማንቴና ኬማሳዶ። ⁶⁷ ዋዳስ ኣጋኻ ኤና ክሳ ዎትሮ ፓፂን ማማ፣ ኪም ፆቅዲና፤ ዋኒካሞ ኪም ጫኣቴ፤ ⁶⁸ “ካ ክርስቶስ፣ ሃም ዻዳ ሃውቴ? ዬራ ሃምማዳናም ይንዳ ዎናንቴ ጌይማ” ና ክግያ ኬያማዶ። ⁶⁹ ኣጋሳ ራስባራ ጴጥሮስካሞ ኤና ኣይሁድናሳ ዳምብን ኣሽካይናሳ ጌጳ ሞሮንሳ ኢሮ ዳርቃንቴ ክዳዃ፤ ሜ ካይሲ ካላ ክካላ ናዴ፤ “ያኻሞ ገልላ ጋንታ ኢየሱስ ላማ ክንካና ሃዶ” ና ክግያ ኮያማዶ።

⁷⁰ ኮዶን ኖ፣ “ያ ሃጌያን ኦጎም እንታ ዼስማሞ” ሃማንቴ ኤና ውልሳ ዎትሮ ዜርምዲና።

⁷¹ ኖ ሙልዻፖንዛራ ክይካ ካይሲኖ ዋ ኪም ሃፓንቴ ኤና ኦጎታር ዳናግያ፤ “ኤያ ካ ናዝሬት ጋንታ ኢየሱስ ላማ ክንካና ክዶ” ና ኮያማዶ።

⁷² ኖኻሞ ኣሽንሻንቴ፦ “ኤያ ኣጋም እንታ ዼስማሞ” ሃማንቴ ፕርካሞ ዜርምዲና።

⁷³ ዋዳ ቶኻሳ ራስባራ ኤና ኦጎታር ዎያንቴን ዳናኻሞ ጴጥሮስ ካላ ናዴ ክግያ፤ “ሃሳ ዼላቅካ ሃዛራ ኬንሻና ኬንሻዻይ፤ ያኻሞ ኬግዶር ዋና” ና ኬያማዶ።

⁷⁴ ኖኻሞ ኣሽንሻንቴ ዪም ኣሽቴ ኬግያ፦ “እንታ ኤያ ኣጋም ዼስማሞ” ና ክያማዶ። ኣጋዛራ ባቻ ኤሊዲና። ⁷⁵ ዋዳስ ኣጋኻ ጴጥሮስ ኢየሱስ ክግያ፦ “ኣኻራ ባቻ ኮኤሊማ፤ ያ ኢም ‘እንታ ኪም ዼሰማሞ’ ሃማንቴ እይ ማካም ዜርማና ሃዜርማይ” ክያማዳም ጶቅሳንቴ ጳልንዛራ ውታንቴ ጌጲ ኤፕዲና።