¹ “ዋዳን ኦጎኻ ጳ ፖላን ማንግስትኖ ኣንዛን ናና ታጵና ኖና ይሳ ዛይትንካ ሮጳይናም ዬዳንቴ ኡታስም ቾቻናንቴ ውታዳናምና ኮታኻይ። ² ኬግዶርካሞ ኣንዛና ዶጝና ዴምጲና፤ ዶንጝ ኬሳ ፓኻላና፤ ³ ኣንዛና ዴምጲናኻሞ ይሳ ኖናም ሶጎና ኬዬዳዶ፤ ዛይቲ ሻብካሞ ዬዳድማሞ። ⁴ ኮዶን ኣንዛና ዶጝና ፓኻላና ይሳ ኖና ላማ ክንካ ዛይት ሻብካሞ ቀርምሽካ ዬዲና። ⁵ ኡታስካሞ ክካፓና፤ ኬኻሞ ኣፕ ኬሳ ኮግንዻዃ ራትዲና።

⁶ “ፔኖ ግዶጋልት ኮያማና፣ ‘ኡታስ ንቴና ክዶ፤ ዉታንቴ ቾችማቴ!’ ሃማያ ዬፆ ኤሳርምዲና።

⁷ “ዋዳን ኦጎኻካሞ ኣንዛና ፓይላ ዻጳንቴ ኖና ይሳም ግዶር ዛይትን ካንቴ ሼካን ካርስዲና። ⁸ ኣንዛና ዴምጵናኻሞ ኣንዛና ፓኻላናግያ፦ ‘ኖና ዎሳ ካያናንቴ ኬዶንታኻ፣ ዎናንቴ ዬሳ ዛይትሮኻ እምማቴ’ ና ኬያማዶ።

⁹ “ኮዶን ኣንዛና ፓኻላናኻሞ ማሳንቴ፦ ‘ዛይትና ዎሳ ዳና ዎቤ ዬቤናንቴ ኬዬክሞንታኻ፣ ኤና ዛይትን ሻንሻይናኻላ ቃልቴ ዬናንቴ ሻንማቴ’ ና ኬግያ ኬያማዶ።

¹⁰ “ዛይትን ሻናናንቴ ኬሳ ያኣ፣ ኡታስ ናእዲና፤ ኣንዛና ሼካንቴን ካላዳናኻሞ ኬሞን ድግስንዛራ ኡታስ ላማ ክንካ ኣርድዲና፤ ሙልዻፖንካሞ ድፃዽዲና።

¹¹ “ኣንዛና ዋኒካሞ ካፓንቴ ናዴ፦ ‘ጌጳዮ! ጌጳዮ! ዎናንቴ ሙልጳፖን ቡልማና’ ክግያ ኬያማዶ።

¹² “ኮዶን ኖ ማሳንቴ፦ ‘እንታ ዬናንቴ ጎንዼና እጌያይ፤ እንታ ዬም ዼስማሞና’ ኬግያ ክያማዶ።

¹³ “ታ ናንሲ ሮራቤ ሳኣታቤም ዬዼስሞንታኻ ሼካንቴ ካሊማቴ። ¹⁴ “ባርያ ማንግስትኖ ኤዲ ካላ ይሳ ካይስናም ግስማንቴ ኮይና ይሳም ኬናንቴ ኤልቅማንቴ ፔ ኣብዛራ ያኣናንቴ ዳሚና ኮታኻይ፤ ¹⁵ ኬውልናንቴ ኬሳ ዋቻሞዛራ፣ ካላናንቴ ብራ ታላንት ¹ ሃንዻያም ዶጝ፣ ዋናንቴኻሞ ታላንት ላማ፣ ዋናንቴኻሞ ታላንት ካላ እማንቴ ያእዲና። ¹⁶ ኤያ ታላትን ዶጝን ቻዳኻሞ ኣጋዛራ ይንካ ካሚ ካርሳንቴ ታላንትና ዶጝናዛራ ታላንት ዶጝና ክኣዽሳዶ፤ ¹⁷ ኤያ ታላንትን ላማን ቻዳኻሞ ታላንት ላማና ክኣዽሳዶ፤ ¹⁸ ኮዶን ኤያ ዋ ታላትን ካላን ቻዳ ይሳ ጌጳሳ ታላንታም ኦሎን ኮያንቴ ዱክዲና።

¹⁹ “ካይስና እግናሳ ኤያ ጌጳ ዋዳ ጱፅሳ ራስባራ ይያኣዶን ባራኻ ናዴ ይሳ ካይስናናንቴ ኮይና ይእማዳናም ኬንሻናንቴ ዛግዲና። ²⁰ ካይስና ግዶርካ ኤያ ታላንትን ዶጝን ቻዳኻሞ፣ ታላንት ኣብ ዶጝ ባኣንቴ ናዴ ክግያ፦ ‘ጌጳዮ፦ ክሼ፦ ታላንትና እዛራ ኤልቅማንቴ ሃያኣዳና ዶጝና፤ እንታ ኬዛራ ታላንት ዶጝ ኣዽስዲናና’ ክያማዶ።

²¹ ጌጳ ክሳኻሞ፦ ‘ያ ፃሊና ሃያዶ፤ ያ ካይስታ ፃላና፤ ዬራ ሾላዛራ ጋዛ ሃዶንታኻ ዬር ጌጲዛራና ሃም እጌጵሳይ፤ ሃሳ ጌጳሳ ዋዛንዛራኻሞ ኣርድማና’ ክግያ ክያማዶ።

²² ሃያንቴኻሞ ኤያ ዋ ታላንት ላማን ቻዳካሞ ናዴ ክግያ፦ ‘ጌጳዮ፦ ክሼ፣ እናንቴ ኤልቅማንቴን ሃያኣዳና ታላንት ላማና፤ እንታካሞ ኬዛራ ታላንት ላማ ኣዽስዲና’ ና ክያማዶ።

²³ ጌጳ ክሳኻሞ፦ ‘ያ ፃሊና ሃያዶ፤ ያ ካይስታ ፃላና፤ ዬራ ሾላዛራ ጋዛ ሃዶንታኻ ዬር ጌጲዛራና ሃም እጌጵሳይ፤ ሃሳ ጌጳሳ ዋዛንዛራኻሞ ኣርድማ’ ና ክግያ ክያማዶ።

²⁴ “ኤያ ታላንት ካላ ቻዳኻሞ ናዴ፦ ‘ጌጳዮ፦ ያ ሃጲያድሞሮኻ ፓታያ፣ ሃይንቅሳድሞሮኻ ፑእሻያ ጋሮ ኤዲ ሃዶንም እንታ ዼስዲና፤ ²⁵ ኣጋታኻ እንታ ሃም ኩርትንዽዲና፤ ሃያንቴ ቃልቴ ታላንታ ሃሳም እንታ ኦሎ ኮያንቴ ኪም ዱክዲና፤ ታ ታላንታ ሃሳ ካሼና“ ክግያ ክያማዶ።

²⁶ “ጌጳ ክሳኻሞ ክግያ፦ 'ያ ካይሳ ዛርባቤ ዴጋስቤ፣ እጲያድሞሮኻ እፓታንቤ፣ እይንቅሳድሞሮኻ እፑኡሻንቤም ዼሳንቴው ሃዶ? ²⁷ ታ እኒ እማታን ዋዳንዛራ ታላንታ እሳም ክኣዻዳና ማላ እያፔኻናንቴ ኤና ብሬን ኦስካይናናንቴ ሃእሜኻናንቴ ዛግሳና ኮዛግሳይ።

²⁸ ታ ናንሲ ታላንታም ቻንቴ ኤያ ታላንት ታጵንካ ዳናንቴ እምማቴ፤ ²⁹ ኤያ ይንሳ ዳናንቴ ሻባና ሻባዻይ፤ ክናንቴ ጱፃዻዳቴ ያኣና ኮያኣይ፤ ኮዶን ኤያ ይንሳን ይቆልማምካሞ ክሳ ዳስ ካላሲም ክካላንካ ቻና ቻዻይ። ³⁰ ካይስታ ዋጋን ቆልማ ኣጋም ኤፕንቤ ግግሪን ማሳንቤ ይዶን ራቅን ፅፓን ጳልባራ ዶንዛራ ቡላንቴ ዻብማቴ’ ና ክያማዶ። ³¹ “ኤዲ ናሶ ይሳ ጎሺንካ ባርያሳ ኤርጎን ኤና ውልላማ ዪንና፣ ይሳ ብታሞን ቦርኮቶንዛራ ዳርቃና ክዳርቃይ፤ ³² ኤዲኖ ፔ ውል ግዶር ዶኖ ፓይላ ክሳ ዎትሮ ፑጫና ኮፑጫይ፤ ግሽሞን ኤያ እያናም ቁላ ጛሜይና ግዶርካ ክእዳያግያ፣ ኖኻሞ ዛርስን ኮሳ ባክሮ ዛርስንም ዛርስን ዋ ካላንካ እዳና ክእዳይ፤ ³³ እያናም ይሳ ምዛቅባራ ዎይሳናክዎይሳይ፣ ቁላ ጛሜይናምካሞ ይሳ ዋርካታባራ ዎይሳና ክዎይሳይ።

³⁴ “ዋዳ ኣጋኻ ብታኻሞ ይሳ ምዛቅባራ ዳናግያ ይንታና ክያማይ፦ 'ዬቲ ክና ኣባሳ ይንናንቴን ፓፅን እንዻዳና፤ ንማቴ፤ ፔን ዎዳዻዶሮኻ ካርሳንቴ ዬናንቴ ኣሽካዻዶን ማንግስትንዛራ ኣርድማቴ፤ ³⁵ ኦጎኖኻሞ፣ እዳቃዻዃ ዬቲ ኢም እꬅንስዲና፤ እባኻርዻዃ ዬቲ ኢም ውሽዲና፤ቾቻሞን እናኣዃ ዬቲ ኢም ቾችዲና፤ ³⁶ ፑርዱንቆ እዳዃ ዬቲ ኢም ክጭዲና፤ እያጃዻዃ ዬቲ ኢም ቶሪዲና፤ ዻክን ኤኖሮጎ እዳዃ ዬቲ ኢም ሼድዲና።’

³⁷ “ኤና ጋዛናምካሞ ማሳንቴ ይንታና ክግያ ኬያማይ፦ ‘ጌጳዮ፦ ሃዳቃዻዃ ሃም ሃ ዎእꬅንሳዴ? ዎይካሞ ሃባኻርዻዃ ሃም ሃ ዎውሻዴ? ³⁸ ቾቻሞን ሃናኣዃ ሃም ሃ ዎቾቻዴ? ዎይካሞ ፑርዲንቆ ሃዳዃ ሃም ሃ ዎክጫዴ? ³⁹ ሃያንቴኻሞ ሃያጀዻዃ ዎይካሞ ሃም ዻኻዻዃ ሃም ሃ ዎኦይሳዴ? ’

⁴⁰ “ብታኻሞ ኬናንቴ ይማሳና፦ ‘እንታ ዬናንቴ ጎንዼና እጌያይ፤ እንና ናና ሾልና ክናሳ ካላናንቴ ዬሃያዳና፣ እናንቴ ዬያያዳግያና’ ኬግያ ክያማይ።

⁴¹ “ፕርካሞ ዋርካታባራን ዳናግያኻሞ ይንታና ክያማይ፦ ‘ዬቲ ክና ኣሻዻዃን ዳና፤ ዳቡሎስቤ ክሳ ኤርጎን ኤናቤናንቴ ፕጃዻዶን ኖን ካይሞን ላይን ዳንዛራ እካላንካ እድማንቴ ይማቴ፤ ⁴² ኦጎኖኻሞ ሃርቴ፣ እዳቃዻዃ ዬቲ ኢም እꬅንሳዲማሞ፤ እባኻርዻዃ ዬቲ ኢም ውሻዲማሞ። ⁴³ ቾቻሞን እናኣዃ ዬቲ ኢም ቾቺንሻዲማሞ፤ ፑርዲንቆ እዳዃ ዬቲ ኢም ክጫዲማሞ፤ እያጃዻዃቤ ኢም ዻኻዻዃቤ ዬቲ ኢም ቃልቴ ሼዳዲማሞ።

⁴⁴ ኬኻሞ ማሳንቴ፦ ‘ጌጳዮ፦ ሃዳቃዻዃቤ ዎይካሞ ሃባኻርዻዃቤ፣ ቾቺ ሃዳዃቤ ዎይካሞ ፑርዱንቆቤ፣ ሃያጃዻዃቤ ዎይካሞ ሃም ዻኻዻዃ ሃም ሃፓንቴ ሃ ሃም ዬስካን ዎጋራዴ?’ ና ክግያ ኬያማይ።

⁴⁵ ዋዳ ኦጋኻ ኖኻሞ ማሳንቴ፤ ‘እንታ ዬናንቴ ጎንዼና እጌያይ፤ እንና ናና ሾልና ክናሳ ካላናንቴ ዬያያድማኻ፣ እናንቴኻሞ ዬያያዲማግያና’ ኬግያ ክያማይ።

⁴⁶ ክናኻሞ ካይሶን ብቶን ላይን ዳይንዛራ ዬኣና ኬያኣይ፤ ኮዶን ኤና ጋዛና ሳዳን ላይን ዳይንዛራ ያኣና ኬያኣይ።”