ማቴዮስሳ ወያ 24
1
ኢየሱስ ባርዮን ኦኖንባራኻ ውታንቴ ክይካ፣ ታማርና ክሳ ባርዮን ኦኖን ኣሽካዻዶን ክናንቴ ዻዋናንቴ ክዛራ ናእዲና።
2
ኮዶን ኖ ኬግያ፦ “ዬር ፓይላ ውል ኮም ሃፓዉ ዬያፓይ? እንታ ዬናንቴ ጎንዼና እጌያይ፤ ሱኒኖ ሱኒንዛራ ዶርማንቴ ኮዳዃ ዬያፓይኖ ኮስምማ ሽዻያ ኦጎንታ ይዳዛራ ሱኒ ካላኻሞ ዳማሞ” ና ክያማዶ።
3
ኖ ደብረ ዘይት ጌማርታዛራ ዳርቃንቴ ክዳዃ፦ ክሳ ታማርና ሶጎ ክዛራ ናዴ ክግያ ይጌይና፦ “ይንዳ ዎናንቴ ጌይማ፤ ዬራ ሃጌያይና ክና ሃ ኬያምሜ? ሃሳ ናእንቶንቤ ቤሬ ቦንንሳ ቱንስሮ ዬር ሃሊ ሃምማናንቴን ዳና ዳባ ሃርቴ?” ና ኬያማዶ።
4
ኢየሱስካሞ ማሳንቴ ይንታና ኬግያ ክያማዶ፦ “ኤዲ ካላኻሞ ዬም ሱዳን ኮጋሬኻናንቴ ዬም ማንክማቴ፤
5
ኤዲኖ ጱፅኖ ‘እንታ ክርስቶሲና’
ሃማንቴ እሳ ናብንካ ናኣና ኬናኣይ፤ ኤዲን ጱፅንምካሞ ሱዳና ኬሱዳይ።
6
ባንቆንቤ ባንቆንቤሳ ሜርሜር ኤሳራና ዬኤሳራይ፤ ዬራ እግናኻሞ ጎንዼ ማታኖ ኬሳ ሽዽማሞ፤ ይያማንካሞ ቱንስኖ ኣኻራ ኮዶንታኻ ዬራ እግናኻ ቃꬅማን ጋራንቴ ዬም ማንክማቴ።
7
ዛርስኖ ዛርስን ዋኒዛራ ባንቆን ዻጳና ኮዻጳይ፤ ማንግስታ ዋኻሞ ማንግስታ ዋዛራ ባንቆን ዻጳና ክዻጳይ፤ ራቅ ዋና ዋና ግዶር ዳቆንቤ ዝጋንቤኻሞ ዳና ኮዳይ፤
8
ኮዶን ኦጎኖ ፓይላ እꬅማንሳ ካርሲና።
9
“ዋዳ ኣጋኻ ኤና ዬም ጋሎንናንቴ ሳስካቴ እማና ኬእማይ፤ ሃያንቴኻሞ ዬም ዴሳና ኬዴሳይ፤ ናብን እሳኻ ሃማንቴ ቶርስን ውልካላ ዬቲ ቶዛዻዳና ዬዳይ።
10
ዋዳ ኣጋኻ ኤዲ ጱፅኖ ራስዛራ ማታና ኮማታይ፤ ኪም ሳስካቴ እማና ኬእማይ፤ ኪም ቶዛዻና ኬቶዛዻይ።
11
ዎቲ ‘ባርያሳ ኣፖን ጌያይናና’ ሃማይና ፖጋሞን ኤና ጱፅና ውታና ኬውታይ፤ ኤዲን ጱፅንም ሱዳና ኬሱዳይ።
12
ዛርባሞኖ ኮጱፃዻንታኻ ኤዲ ጱፅሳ ናሽማኖ ካያና ኮካያይ፤
13
ኮዶን ኤያ ቱንስንዛራ ዎቻዻንቴን ዳያ ኣጋ ዻቃና ክዻቃይ።
14
ማንግስትንሳ ሜርሜርን ፃሊን ኮም ቶርስን ፓይላ ውልናንቴ ማኚ ኮዴኻናንቴ፣ ፔ ውል ግዶር ጌያና ጌይዻይ፤ ሃይዻዃ ናንሲ ቱንስኖ ናኣና ኮናኣይ።
15
“ታ ናንሲ ኤያ ባርያሳ ኣፖን ጌያያ ዳንኤልሳ ጌይዻዶኖ ‘ዬር ዛርቦ ካይሶ ባኣያ’ ራቅን ጋዛሮ ዎያንቴ ኮዳዃ ዬያፕና፣ ኤያ ዋርቃትን ናባባዳ ክጶቅሴ።
16
ዋዳ ኣጋኻ ይሁዳ ግዶር ዳና ኤና ጉርባናዛራ ኬጎቤ፤
17
ኤያ ይሳ ኦኖንሳ ዱሪሮ ዳኻሞ ኮይና ይሳ ኦኖንባራኻ ቡላናንቴ ዱሪሮኻ ሃንቻን ክጋሬ፤
18
ኤያ ይሳ ሃምሮን ዳኻሞ ኣፓላን ይሳም ቻናንቴ ማታን ክጋሬ።
19
‘ሮሮና እግናኻ ሜና ስርማናቤ ሜና ናናም ቆኦሻይናናንቴ ሃይ!
20
ታ ናንሲ ሮራ ዬሳ ጎባንናንቴ ባርግንካቤ ኡኩንሳን ሮራ ጋላ ዳን ኮጋሬኻናንቴ ምስክማቴ፤
21
ዋዳ ኣጋኻ ካልሎን ጋሎ ጌጲ ዳና ኮዳይ፤ ጋላ ኣጋ ኣና ፔን ዎዳዻዶሮኻ ካርሳንቴ ሮራ ካዛራ ሃምማንቴ ዼስማና፣ ኣጋሳኻሞ ራስባራ ጋሎ ኪም ዬስካያ ዳማሞ።
22
እኒ ሮሮና እግና ኮቶኻድምና ኤዲ ናሶ ዻቅማሞ፤ ኮዶን ኤና ካማዻዳና ዻቃይናናንቴ ሮሮና እግና ቶኻና ኬዳይ።
23
ዋዳ ኣጋኻ ኤዲ ዬግያ፦ ‘ክርስቶስ ካሼ ኮታ ዳይዲና’ ዎይካሞ ‘ኦ ኦጎታር ዳይዲና’ ክያምና ዬኤሳርናኖ፤
24
ዎቲ ክርስቶሲና ሃማይና ፖጋሞን ኤናቤ ዎቲ ባርያሳ ኣፖን ጌያይናና ሃማይና ፖጋሞን ኤና ውታና ኬውታይ፤ እኒ ይቻላያዳና ኤና ካማዻዳናምካሞ ሱዳናንቴ ዬራ ሃሊና ጌጲና ሃምማንቴን ዼስምናቤ ዬራ ሃሚማንግያንዳናም ሃያና ኬያያይ።
25
ታ ናንሲ እንታ ዬናንቴ ብራንቴ ጌይዲና።
26
“ኣጋታኻ፦ ‘ኦ ኣጋሼ ኖ ዳራሮና ክዶ’ ዬግያ ኬያምና ኦ ኦጎዛራ ዬውትናኖ፤ ‘ኖ ካሼ ኮታር ቆፓሮ ዳይዲና’ ዬግያ ኬያምናኻሞ ኬም ዬኤሳርናኖ፤
27
ጳልቃትኖ ሃዮን ይውታንባራኻ ጳልቃታንቴ ሃዮን ይዋንዛራ ኮሼሽካያግያ፣ ኤዲ ናሶሳ ናኣኖኻሞ ኣጋንታና ኮዳይ።
28
ዬር ይጃዳ ራቅ ግዶር ፓይላ ኩፆና ፑጫና ኬፑጫይ።
29
“ጋሎን ዋዳና እግናሳ ራስባራ ይሪካ ኣጋዛራ፣ ‘ሃዮኖ ፅፓና ኮፅፓይ፤ ኣርፕኖኻሞ ሮጲማሞ፤ ኤዝናኻሞ ፖላንባራኻ ትርካና ኬትርካይ፤ ፖላንሳ ካንታናኻሞ ፓይላ ጄካና ኬጄካይ።’
30
“ዋዳን ኦጎኻ ኤዲ ናሶሳ ናእንቶ ጎይ ጳ ፖላንዛራ ሃፓና ሃፓዻይ፤ ቶርስና ፔሮን ዳና ፓይላ ኤፓና ኬኤፓይ፤ ኤዲ ናሶ ካንታንካቤ ጎሺን ጌጶንካቤ ፖላንሳ ሉፕንዛራ ዳኣንቴ ኪኒካ ሃፓና ኬያፓይ፤
31
ኤርጎን ኤና ይሳምካሞ ሙራን ፑጋዻንሳ ዬፆን ጌጶን ላማ ክንካ ኖ ንእሳና ክንእሳይ፤ ኬኻሞ ኤና ክሳ ካማዻዳናም ፔንሳ ማራና ኦይድናባራንካ፤ ፖላንሳ ማራ ካላባራ ፖላንሳ ማራ ዋዛራ ፑእሻና ኬፑእሻይ።
32
“ትምርታ ኣጋም ባላሳ ሃቃስካላ ዼስማቴ፤ ኣንትና ክሳ ኮዳዳቴ ኬይናቤ፣ ቃልጶናኻሞ ኬጫግና፣ ዋዳ ኦጋኻ ቦናኖ ዬስክቴ ኮዶን ዼሳና ዬዼሳይ።
33
ኦጎንታ ዬራ እግና ፓይላ ውልም ዬያፕና፣ ኖ ሙልዻፖን ካላ ክሳናዶን ዼሳና ዬዼሳይ።
34
እንታ ዬናንቴ ጎንዼና እጌያይ፤ ዬራ ፓይላ እግናሳ ሃምማዛራ ኤዲኖ ታን ጋይኖ ኮኖ ማቅማሞ።
35
ፔንቤ ፖላንቤ ካያና ኮካያይ፤ ኮዶን እሳ ዼላቅኖ ካይማሞ።
36
ኮዶን ሮራ ኣጋቤ ሳኣታቤም ባርያ ዎምባሳ ኦባራ ጳ ፖላሮን ዳና ኤርጎን ኤናኻሞ፣ ናሳ ክሳኻሞ ኤዲ ሃውካሞ ዼስማሞ።
37
ኣና ኤያ ኖሆ ቦንንካ ይያማዳግያ ኤዲ ናሶሳኻሞ ናኣኖ ኣጋንታና ኮዳይ፤
38
ኣና ካይሶን ቶቦሎኖ ኮኒማ ኮሳ ብራሮ ኖሆ ጋግንዛራ ክኣርዳዳ ሮራሳ ዬስካዛራ ኤና እꬅምቴቤ ውጭቴቤ፣ ኬምቴቤ ኪም ኬምስቴቤ ኬዳግያ፤
39
ካይሶን ቶቦሎንሳ ናዴ ኬም ኮሳ ካይሳዛራ ኬዼሳድማግያ፤ ኤዲ ናሶ ክኒናኻሞ ኦጎንታና ኮዳይ።
40
ዋዳ ኣጋኻ ኤዲ ላማ ይሳ ሃምሮና ኬዳይ፤ ኬሳ ካላም ቻና ቻዻይ፤ ዋ ሽዻና ክሽዻይ።
41
ሜ ላማ ዴስምቴና ኬዳይ፤ ኬሳ ካላም ቻና ቻዻይ፤ ዋ ሽዻና ኮሽዻይ።
42
“ታ ናንሲ ጌጳ ዬሳ ክናኣያ ሮራ ዬቲ ዬዼስሞንታኻ ፓኻልዻንቴ ካሊማቴ።
43
ዬራ ክናም ዼስማቴ፤ ኤዲ ይሳ ሞሮካዳ ካላ ሶትንካ ኤያ ዲባሳ ዋዳስ ይንካ ናዻያም እኒ ይዼሳዳና፣ ዻጳንቴ እኒ ካላ ይሳ ኦኖንም ዲባን ጋርዼኻናንቴ ማንካና ክማንካይ።
44
ኤዲ ናሶኻሞ ሳኣታ ዬዼስማኻና ክናኣይ፤ ኣጋታኻ ዬትካሞ ሮሮ ውል ሼክሚ ዳማቴ።
45
“ታ ናንሲ ዋዳስ ልኪ ሃማኻ ዳኣኖንም ይሳ ኦኖን ኤናናንቴ ክእሜኻናንቴ ኤያ ኦኖን እምባ ይጌጵሳዳ ኤያ ካይስታ ጋዛስቤ ፓኻላስቤ ሃውቴ?
46
ክሳ ጌጳ ማታቴ ክንና ኤልቅሞና ክሳም ቻንቴ ዋድምቴን ክዳዃ ክዬስካያ ካይስታ ኣጋ ይንናንቴ ፓፅን እንዻዳና፤
47
እንታ ዬናንቴ ጎንዼና እጌያይ፤ ኤያ እምባኻሞ ኮይና ይሳ ውልዛራ ኤያ ኣጋም ጌጵሳና ክጌጵሳይ።
48
ኮዶን እኒ ኤያ ካይስታ ኣጋ ኤዲ ዛርቦ ዳንቴ፣ ‘ጌጳ እሳ ይሪካ ንማሞ’ ሃማንቴ፤
49
እኒ ኤና ካይስና ዋኒም ዽቴ ክዳናቤ፤ ባርያሞን ኤና ላማኻሞ ክንካ እꬃ ውጫ ሃይቴ ይዳና፤
50
ኖ ሮራ ክዼሳድማኻቤ ዋዳስ ክቃባድማቤኻ ጌጳ ክሳ ናዴ፦
51
ኪም ሱባና ክሱባይ፤ ዴንታን ክሳምካሞ ካይስንሶን ኤና ላማ ክንካና ክያያይ፤ ኦጎታርካሞ ክናንቴ ኤፕቤ ግግሪ ማሳቤና ኮማታይ።