ማትዮስሳ ወያ 23
1
ሃያንቴኻሞ ኢየሱስ ዛርስንቤ ይሳ ታማርናቤናንቴ ይንታ ሃማንቴና ክጌያዶ፦
2
“ኤና ሙሴ ዳምብን ታማርሳይናቤ ፈረስ ኤናቤ ሙሴ ቦርኮቶንዛራ ዳርቅዲና።
3
ኣጋታኻ ዬራ ዬናንቴ ኬጌያናም ፓይላ ኣሽክማቴ፤ ይንካኻሞ ዳማቴ፤ ኮዶን ኬ ይጌያያግያ ኬኣሽክሞንታኻ ዬራ ኬኣሽካይናም ዬኣሽክናኖ።
4
ሃያንቴኻሞ ባስክሳናንቴ ቻልዽሞን ባስኮን ዴፆን ዻኻንቴ ኤናሳ ካፓናሮጎና ኬዎዳይ፤ ኮዶን ኬ ይናንቴ ይሳ ኣንሳ ብራኻ ላኣሳኻሞ ላኣስማሞ።
5
“ኬ ሼዳዻናንቴ ይዛጋንታኻ ዬራ ይኣሽካይናም ፓይላ ኤናሳ ዎትሮና ኬኣሽካይ፤ ኬ ሙሴ ዳምብናም ኡካንቴ ይንግዶር ካንቴ ቆቴሮ ይዻኻይና ካንካልናምና
ኬጌጵሳይ፤ ይሳ ኣፓላንሳ ብራኒምካሞ ጉድጵሳና ኬጉድጵሳይ።
6
ኬ እꬅሞን ራቅሮጎ ኤና ጋርና ራቅና ግዶር ዳርቃናንቴና ኬዛጋይ፤ ኣይሁድናሳ ባርያም ምስካዻን ኦኖሮጎ ቦርኮቶና ፃልና ግዶርና ዳርቃናንቴ ኬዛጋይ።
7
ሃያንቴኻሞ ጋባን ኢሮ ኬም ጌሳዼኻናንቴቤ ኤና ኬግያ ‘ራብና’ ሃማንቴ ኬግስሜኻናንቴና ኬዛጋይ።
8
“ኮዶን ዬቲ ‘ራብና’ ሃማንቴ ዬግስንዽናኖ፤ ኣስታማራ ዬሳ ካላ ሶጎና፤ ዬቲ ፓይላ ክሳ እንዳናሶና።
9
ጳ ፖላሮን ዳ ዬምባ ካላ ክዶንታኻ፣ ኮታ ፔሮጎ ኤዲ ካላምካሞ ‘ኣባ’ ሃማንቴ ዬግስምናኖ።
10
ኣስታማራ ዬሳኻሞ ክርስቶስ ሶጎ ክዶንታኻ፤ ዬቲ ‘ኣስታማርና’ ሃማንቴ ዬግስንዽናኖ።
11
ዬሳ ባክሮጎ ኤያ ዬውል ካላንካ ሳግን ዳያ ዪም ዪርክ ሃያንቴ ዬናንቴ ክዋድሜ፤
12
ኤያ ዪም ዼግ ዼግ ሃያያ ኣጋ ቦዋዻናክቦዋዻይ፣ ኤያ ዪም ዪርክ ሃያያ ኣጋ ዼጊና ክዳይ።
13
“ዬቲ ክና ካይስንሶን ኤና ሙሴ ዳምብን ታማርሳይናቤ ፈረስ ኤናቤ፤ ኤና ጳ ፖላን ማንግስትንዛራ ኣርዳን ኬጋሬኻናንቴ ሙልዻፖን ኬዛራ ዬድፃንታኻ ሃይ! ዬትካሞ ዬናንቴ ኣርድማሞ፣ ኤና ኣርዳናንቴ ዛጋይናምካሞ ዬቲ ኣርስማሞ።
14
ዬቲ ክና ካይስንሶን ኤና ሙሴ ዳምብን ታማርሳይናቤ ፈረስ ኤናቤ ሃይ! ጎላ ዳልሶናሳ ኦኖንሳ ኢሮጎ ኮይናም ቡሪቴ፤ ጎንዼ ኤዲና ዬግያ ሃንዼኻናንቴ ባርያም ጉድጲና ዬምስካይ፤ ኣጋታኻ ዬቲ ዻባሞ ዛርቦ ቻና ዬቻይ።
15
“ዬቲ ክና ካይስንሶን ኤና ሙሴ ዳምብን ታማርሳይናቤ ፈረስ ኤናቤ፤ ኤዲ ካላም ኣይሁድና ዳምብን ጎይን ጫግሻናንቴ ኛፓስንቤ ፔንቤኻና ዬያያይ፤ ኖ ክማታን ዋዳንካ ካልሎን ዬሳ ሳጊ ገሃነም ኖን ካይሞን ናሶ ዬያያንታኻ ሃይ!
16
“ዬቲ ክና ኤና ኣፕን ካያና ኤናም ኣንሳይና ሃይ! ‘ኤዲ ካላ ባርያ ኦኖንካ ክኣሽንሽና ኦጎኖ ዬርካሞ ትማሞ፤ ኮዶን ባርዮን ኦኖንሳ ኢሮጎ ዎርቃ ዳኻ ክኣሽንሽና ኣሽንሻ ኣጋ ክዛራ ዬስካና ክዬስካይ’ ሃማንቴና ዬጌያይ።
17
ዬቲ ክና ኣፕን ካያና ኤና ዬርን ዼስምና! ዎርቃቤ ዎርቃም ጫራጝሻዶን ባርዮን ኦኖንቤሳ ሳጋ ሃውቴ?
18
ሃያንቴኻሞ ‘ኤዲ ካላ ባርያናንቴ ይንግዶር ቁሊን ኡካዻን ሙልዻንካ ክኣሽንሽና ኦጎኖ ዬርካሞ ትማሞ፤ ኮዶን ቆልታ ኮዛራ ታኻዻዳኻ ክኣሽንሽና ኣሽንሻ ኣጋ ክዛራ ዬስካና ክዬስካይና’ ሃማንቴና ዬጌያይ።
19
ዬቲ ክና ኣፕን ካያና፣ ቆልታ ኡካዻዳኻቤ ቆልታ ኡካዻዳም ጫራጝሻዶን ሙልዻንቤሳ ሳጋ ሃማቴ?
20
ኣጋታኻ ኤያ ሙልዻንካ ኣሽንሻያ፤ ሙልዻንካቤ ዬራ ኮዛራን ዳና ውልካና ክኣሽንሻይ።
21
ሃያንቴኻሞ ኤያ ባርያሳ ኦኖንካ ኣሽንሻያ፣ ባርዮን ኦኖንቤ ኮሳ ኢሮ ዳ ባርያኻና ክኣሽንሻይ።
22
ኤያ ፖላንካ ኣሽንሻያ፣ ባርያሳ ብታሞን ቦርኮቶንቤ ብታሞን ቦርኮቶንቤዛራ ዳርቃዳቤኻና ክኣሽንሻይ።
23
“ዬቲ ክና ካይስንሶን ኤና ሙሴ ዳምብን ታማርሳይናቤ ፋርሳዊናቤ ሃይ! ዬቲ ኣዝሙድቤ፣ እንስላልቤ ከሙን ሃንዻይና ቅመምናም ባርያናንቴ ታጲና ግዶር ካላም እማ እማ፤ ዳምብንሳ ኢሮጎ ዳና ብቶንም ጎይ ልኪካ ታክንቶቤ፣ ዬሳ ፃላሞንቤ ጋዛሞንቤ ጋይና ዬራ ዋናናም ዬቲ ቦውዲና፤ ኮዶን ዬቲ ዬራ እግናም ኣሽካ ኣሽካ ክናምካሞ እኒ ዬኣሽኬኻ ዬናንቴ ዛግሳና ኮዛግሳይ።
24
ዬቲ ክና ኤና ኣፕን ካያና ኤናም ኣንሳይና፤ ቃሮናም ካማቴ ዻባና ዬዻባይ፤ ኮዶን ጋማላናም እዛቃና ዬእዛቃይ።
25
ዬቲ ክና ካይስንሶን ኤና ሙሴ ዳምብን ታማርሳይናቤ ፈረስ ኤናቤ ሃይ! ኑንቆን ሻርቃንቤ እꬅሞን ሻርቃንቤሳ ዙሎኒና ዬሻያይ፤ ኮዶን ኬሳ ኢሮጎ ዛላሞቤ ዬር ዛርቦቤና ፆፃዶኖ።
26
ያካ ፋራሳዊያ ኣፕን ካያስ! ብራቴንካ ኑንቆን ሻርቃንቤ እꬅሞን ሻርቃንቤሳ ኢን ሻይማ፤ ሃያንቴ ዙሎኖኻሞ ኬሳ ጫንቃልና ኮዳይ።
27
“ዬቲ ክና ካይስንሶን ኤና ሙሴ ዳምብን ታማርሳይናቤ ፈረስ ኤናቤ፤ ዱክና ጳልባራ ሳሊንካን ቃዻዻዃን ፃልና ግያ፦ ኮዶን ኢንሳ ኤና ጃዳናሳ ላፖምካቤ ዬርን ኤናም ሴሳንቤኻ ፆፃንቴን ዳናም ዬታኻንታኻ ሃይ!
28
ዬትካሞ ዱክና እግና ግያ ዎቲባራ ሼዳዽና ኤና ናንቴ ኤዲ ጋዛና ዬታኻይ፤ ኮዶን ኢኖ ዬሳ ካይስንሶቤ ዛርባሞቤኻ ፆፃንቴና ኮዶ።
29
“ዬቲ ክና ካይስንሶን ኤና ሙሴ ዳምብን ታማርሳይናቤ ፈረስ ኤናቤ ሃይ! ኤና ባርያሳ ኣፖን ጌያይናሳ ዱክን ሃሊስቴቤ ኤና ጋዛናሳ ዱክና ጎብስቴ፤
30
‘እኒ ኣና ዎምባና ዋዳንካ ዎዳና፤ ኤና ባርያሳ ኣፖን ጌያይናም ዴሳናንቴ ዎትይ ኬላማ ክንካ ኣን ኣርስማሞ' ሃማንቴና ዬጌያይ።
31
ዬሳ ዼላቅና እግናኻ ኣና ኤና ባርያሳ ኣፖን ጌያይናም ዴሳዳና ዬምባናሳ ናና ዬዶንም ዬቲ ዬዻር ዬዛራ ማኛሞን ዎያና ዬዎያይ።
32
ታናንሲ ዬምባና ይካርሳዶን ዴንታንም ዬቲ ኣሽካቴ ቱንስማቴ!
33
“ዬቲ ክና ጉኖና፤ ኦፖን ናና! ዻባሞን ገሃነምን ጋይንባራኻ ሃስ ሃያንቴ ዬዻቄ?
34
ኣጋታኻ እንታ ዬናንቴ ኤና ባርያሳ ኣፖን ጌያይናቤ፤ ኤና ሃምናቤ ኤና ታማርሳይናቤም ንእሳና እንእሳይ፤ ኬግዶርካሞ ኤና ዋኒም ዬቲ ዴሳና ዬዴሳይ፤ ዋኒምካሞ ዚታና ዬዚታይ፤ ዋኒምካሞ ባርያም ዬምስካይና ኦኖና ግዶር ዻና ዬዻይ፤ ዋኒምካሞ ካታማና ዋኒ ግዶርካ ካታማና ዋኒዛራ ኦይታና ዬኦይታይ።
35
ኣጋታኻ ኣና ኤያ ጋዛስ ኣቤል ማኣስንካ ካርሳንቴ ባርዮን ኦኖንቤ ቁሊን ኡካዻን ሙልዻንቤሳ ባክሮጎ ዬዴሳዳ በራክዩ ናሳ ዘካርያስ ማኣስንዛራ ዶን፤ ማኣስን ጋዛን ፔሮጎ ይንቅማዶን ኦጎም ፓይላ ዬኻላና ኣይሳና ኦይሳዻይ።
36
እንታ ዬናንቴ ጎንዼና እጌያይ፤ ዬራ ኣና ሃምማዳና ፓይላ ውል ኤዲን ታን ጋይናዛራ ዬስካና ኮዬስካይ።
37
“ያ ኢየሩሳሌም፣ ያ ኢየሩሳሌም ኤና ባርያሳ ኣፖን ጌያይናም ዴሳይኖ፤ ሃዛራ ኒእሳዻዳና ኤናም ሱንንካ ፓኻይኖ ካታማኖ! ባቻ ይሳ ናናም ኮሊንሳ ኢሮጎ ኮፑኡሻያግያ፦ ናና ሃሳም ፑኡሻናንቴ እንታ እይ ሜም እዛጋዴ! ኮዶን ዬቲ ናሻድማሞ፤
38
ኣጋታኻ፤ ዬሳ ኦኖና ጎልቂ ማታንቴ ሽዻና ኬሽዻይ!
39
እንታ ዬናንቴ ጌያና እጌያይ፤ ‘ኤያ ጌጳ ናብንካ ናኣያ ፓፅን ይንናንቴ እንዻዳና’ ዬሳ ሃማዛራ ዬቲ ኢም ናንሲ ሃፕማሞ።”