¹ ኢየሱስ ፕርካሞ ኬናንቴ ዻይንሶ ይንታ ሃማያ ጌይዲና፤ ² “ጳ ፖላን ማንግስትኖ ኤዲ ብቲ ካላ ይሳ ናሳሳ ኬሞንናንቴ ሼካዳሚና ኮታኻይ፤ ³ ብታኻሞ እꬅሞንዛራ ኤና ግስንዻዳናም ኬግስሜኻናንቴ ይሳ ካይስናም ይእስዲና፤ ኮዶን ኬ ዎቲ ንማሞና ኬያማዶ።

⁴ “ፕርካሞ ኖ ካይስና ዋኒም ይእሳንቴ፦ ‘ኤና ግስንዻዳናናንቴ፦ ዋጛቤ ዋጛ ዱርፕናቤም ማቻንቴ እንታ ኣሽክዲና፤ ዬር ፓይላ ውል ሼክሚና ኮዶ፤ ኣጋታኻ እꬅሞንዛራ ንማቴ’ ሃማንቴ ጌይማቴና ኬግያ ክያማዶ። ⁵ “ኮዶን ኤና ግስንዻዳናኻሞ እꬅሞን ዬርዛራ ፓይድማ፤ ካላ ይሳ ሃምንዛራ ያእዲና፣ ዋኻሞ ይሳ ሃሚ ጎይዛራ ያእዲና፤ ⁶ ዋኒ ኬሳ ሽዻዳናኻሞ ካይስናም ዬዳንቴ ጋልንሻንቴ ዴስዲና። ⁷ ብታኻሞ ዻጋሳንቴ ሳራዊትና ይሳም ይእሳንቴ ኤና ካይስናም ዴሳዳናም ዴስስዲና፤ ካታማን ኬሳምካሞ ኮቅዲና።

⁸ “ሃያንቴኻሞ ኖ ካይስና ይሳግያ ይንታና ክያማዶ፦ ‘ኬሞንሳ እꬅሞኖ ሼክሚና ኮዶ፤ ኮዶን ኤና እꬅሞንዛራ ግስንዻዳና እꬅሞንናንቴ ኤና ዳይና ኬትሞንታኻ፤ ⁹ ጎይና ሳግማታናዛራ ውታንቴ ኤና ዬያፓይናም ፓይላ ኬሞንሳ እꬅሞንዛራ ግስምማቴ።' ¹⁰ ካይስናኻሞ ጎይንዛራ ውታንቴ ኤና ይያፓዳናም ፓይላ ኤና ፃልናቤ ኤና ዛርቦናቤም ፑኡሻንቴ ኬሞንሳ ኦልማንም ኤና ቾችናኻ ፆኦስዲና። ¹¹ “ብታኻሞ ኤና ቾችና ግስንዻዳናም ሼዳናንቴ ክኣርድና፣ ኦልማንሳ ኢሮ ኤዲ ካላ ኬሞን ኣፓላን ኣርሳድማም ሃፓንቴ፤ ¹² ክግያ ይንታና ክያማዶ፦ ‘እያርያ፣ ጎብማ ኮታ ሃስ ኣርዳናንቴ ሃቻላዴ?’ ኮዶን ኤያ ኣፖ ካላኻሞ ክማሳያ ካይዲና።

¹³ “ብታኻሞ ይሳ ካይስናግያ ይጌይና፦ ‘ክሳ ኣንናቤ ራናቤም ዻኻንቴ ፅፓን ጳልሎን ዶንዛራ ቡላንቴ ዻምማቴ፤ ኦጎታርካሞ ኤፕቤ ግግሪ ማሳቤና ኮዳይ’ ና ኬግያ ክያማዶ፤ ¹⁴ ኤና ግስንዻዳና ምርጊና፣ ኮዶን ኤና ካማዻዳና ቶኻና።“ ¹⁵ ኣጋሳ ራስባራ ፋራሳዊና ውታንቴ ቃልቴ ዬራ ክጌያይና ግዶርካ ሴሶ ሃፓንቴ ኪም ይዻብንሻይንም ክንካ ሃሳውዲና። ¹⁶ ታማርና ይሳም ሄሮድስ ኤና ላማ ክንካ ክዛራ ይእሳንቴ ይንታና ክግያ ኬያማዶ፦ “ኣስታማራ፤ ያ ጎንዼ ኤዲ ሃዶንቤ፣ ባርያሳ ጎይን ጋዛሞኻ ሃታማርሳንቤ፣ ኤዲ ካላዛራ ዎዽማ ኤና ውልም ልክ ሃያንቴ ሃሼዳይንም ዎቲ ዼስዲና፤ ¹⁷ ሃኻላ ሃር ኮታኬ? ኤሳንካ ቄሳርናንቴ ግብርን ካሻዻያ ጎይ ልኪሞ ሞ ልክታይ? ይንዳ ያ ዎናንቴ ጌይማ።

¹⁸ ኮዶን ኢየሱስ ኬሳ ጃኻማን ቃቦናም ዼሳንቴ ኬግያ፦ “ዬቲ ክና ካይስንሶን ኤና ኢም ዻብንሻናንቴ ሃርናንቴ ዬዛጌ? ¹⁹ ይንዳ ዲናራ ግብርን ካሻዻያም እናንቴ ዻውማቴ” ሃምዲና። ኬኻሞ ዲናር ካላም ክናንቴ ባእዲና። ²⁰ ኖኻሞ ኬግያ፦ “ዲናራ ካዛራን ዶኖ ዎትኖ ሃው ጋይኖቴ? ኤ ዬራ ዛራን ኡካዻዳ ሃውጋንታቴ?” ና ክያማዶ። ²¹ ኬኻሞ ክግያ “ቄሳር ጋንቲ” ና ኬያማዶ። ኖኻሞ ኬናንቴ ይማሳና፦ “ታ ናንሲ ቄሳር ጋይናም ቄሳርናንቴ እምማቴ፣ ባርያ ጋይናምካሞ ባርያ ናንቴ እምማቴ” ና ኬግያ ክያማዶ። ²² ኬኻሞ ዬራ ክናምካሞ ይኤሳራና ዬርሻንቴ፤ ኪም ጋራንቴ ያእዲና። ²³ ሮራ ኣጋኻ ኤና ጃዳና ዴምጲንባራኻ ዻጲማሞ ሃማንቴን ቃባይና ኤና ሰዱቃዊና ኢየሱስዛራ ናዴ ክግያ፦ ²⁴ “ኣስታማራ፦ ኣና ሙሴ ይጌይና ‘ኤዲ ካላ ሜን ኬማንቴ ናሶ ኣዽማ ክጅና እንዳን ናሳ ሜን ክሳም ኬማንቴ ሜቴ ክሳም ክዎይሴ’ ሃማንቴና ክጌያዶ። ²⁵ ታ ዎግዶርካሞ ኤና ክሳ እንዳ ናና ꬆጳና ዳና፤ ኬግዶር ናሳ ብራስ ሜን ኬማንቴ ናሶ ኣዽማ ክጃዶንታኻ ሜን ክሳም እንዳን ናሳ ኬምዲና፤ ²⁶ ፕርካሞ ጎያ ኣጋኻ እንዳን ናሳ ላንሳኻሞ፣ እንዳን ናሳ ማክንሳኻሞ ላይ እንዳን ናሳ ꬆጲሳዛራ ዴንታ ኣጋኻ ናሶ ኣዽማ ጃይዲና። ²⁷ ናንሲ ቱንስሮ ኤስኖኻሞ ጃይዲና። ²⁸ ኣጋታኻ ኬ ፓይላ ውል ኮም ኬኬማዶንታኻ ቤሬ ዴምጵንባራ ዻጳዻያ ሮራጋላ እንዳ ናና ꬆጳና ግዶር ሃው ሜ ኮዴ?” ሃማንቴና ኬኦይሳዶ። ²⁹ ኢየሱስካሞ ይንታ ሃማንቴና ኬናንቴ ክማሳዶ፦ “ዋርቃትን ጋዛንቤ ባርያሳ ካንታንቤም ዬዼስሞንታኻ ዬቲ ዻምባና ዬዻምባይ፤ ³⁰ ኤናኻሞ ዴምጵንባራኻ ይዻጲና ባርያሳ ኤርጎን ኤና ጋንታግያና ኬዳይ፤ ኬምማሞ፣ ኬማዽማሞ። ³¹ ኮዶን ኤና ዴምጲንባራኻ ኬዻጳይንም ባርያ ይንታ ሃማንቴ ክጌያዶንም ዬቲ ናባባዳይዬው? ³² ‘እንታ ኣብራሃም ባርያ፣ ይስሐቅ ባርያ፣ ያዕቆብ ባርያና’ ሃማንቴ ክጌያዶንም። ኣጋታኻ ባርያ ኤና ሳዳንካ ዳና ባርዮና፤ ኤና ጃዳና ባርዮ ትማሞ።” ³³ ዛርስኖኻሞ እግናም ይኤሳራና ክሳ ትምርትንም ዬርሽዲና። ³⁴ ኤና ሰዱቃዊናም ኢየሱስ ዼላቅካ ጫክ ክያያዶንም፣ ፈረስ ኤና ኤሳራንቴ፤ ክዛራ ፑጭዲና፤ ³⁵ ኬግዶርካሞ ኤዲ ሙሴ ዳምብን ዼሳዳ ካላ ኪም ዻብንሻናንቴ ዛጋንቴ ይንታና ክግያ ክያማዶ፦ ³⁶ “ኣስታማራ፦ ዳምብንሳ ኢሮጎ ውል ካላንካ ሳጋያ ዳምባ ሃማቴ?”

³⁷ ኖኻሞ ይንታና ክግያ ክያማዶ፦ “ ‘ባርያ ጌጳ ሃሳም ዎይላም ሃሳ ካላኻቤ፣ ሃሳ ሳዳንካቤ፣ ሃሳ ቃቦ ካላቤኻ ናሽማ፤’ ³⁸ ካ ውል ካላንካ ሳጋያ ዳምባ ብራሲና፤ ³⁹ ዳምባ ላንሳኻሞ ኣጋምና ክታኻይ፤ ኣጋኻሞ፣ ‘ሃሪያም ሃግያ ናሽማ’ ሃማያና፤ ⁴⁰ ዳምብናቤ ኣና ኤና ባርያሳ ኣፖን ጌያይናሳ ኣፖና ጌይዻዳና ፓይላ ዳምብና ላማ ክናሳ ኢሮና ኬዶ። ⁴¹ ኢየሱስካሞ ፈረስ ኤና ፑጫንቴ ኬዳዃ ኬኻላ፦ ⁴² “ክርስቶስባራ ¹ ሃርቴ ዬሳ ቃባ ዳ? ኤ ኖ ሃዉ ናሶቴ?” ሃማንቴና ክኦይሳዶ፤ ኬኻሞ ክግያ “ኖ ዳዊት ናሶና” ና ኬያማዶ። ⁴³ ኖኻሞ ይንታና ኬግያ ክያማዶ፦ “ታ ኦጎንታ ዳና፣ ዳዊት ኡስን ጋዛንሳ ካንታንካ ሃርናንቴ ‘ጌጳ እሳ’ ክግያ ክያሜ? ሃርናንቴ ክግያ ይንታ ክያሜ? ⁴⁵ ታ ናንሲ ዳዊት ኪም ‘ጌጳ እሳ’ ሃማንቴ ክግስማዳና፤ ታ ሃስ ዳዊትሳ ናሶ ክዴ?” ⁴⁶ ኤዲ ኣፖ ክዛራ ማሳናንቴ ቻላዳ ዎይካሞ ሮራ ኣጋኻ ካርሳንቴ ኤዲ ክካላ ኦይሶ ኦይሳናንቴ ዛጋዳኻሞ ቆልማሞ።