1
ኢየሩሳሌም ካላ ፄድን ዳ ደብረ ዘይት ጉርባስዛራን ዳ ራቃ ቤቴ ፋጌ ሃንዻያ ኬዬስካና፤ ኢየሱስ ይሳ ታማርና ላማም ይእሳንቴ፤
2
ይንታና ኬግያ ክያማዶ፦ “ሞራ ዬኻላ ፄድን ዳዛራ ይማቴ፤ ኦጎታር ዬዬስክና ኡኩሊ ካላ ዻክማንቴ ናን ይሳ ላማ ክንካ ኮዳዃ ሃፓና ዬያፓይ፤ ኬም ቡላንቴ እዛራ ዻቴ ንማቴ።
3
ኤዲ ካላ ሃርናንቴ ኦጎንታ ዬያዬ ሃማንቴ ዬኻላ ክኦይስና፤ “ጌጳ ኬም ዛጋና ክዛጋይ” ሃማንቴ ጌይማቴ፤ ኖኻሞ ኣጋዛራ ኬም ይእሳና ክይእሳይ።”
10 ኖ ኢየሩሳሌም ክኣርዳና ዛርስኖ ካታማሮ ዶኖ ፓይላ ይዳዛራ “ካ ሃውቴ?” ሃማንቴ ጄክዲና።
11 ዛርስኖ ይጌይና “ኣጋ ገሊላ ፔን ናዝሬት ባራንኻ ናኣዳ ባርያሳ ኣፖን ጌያያ ዬሱሲ” ና ኬያማዶ። 12 ሃያንቴኻሞ ኢየሱስ ባርዮን ኦኖን ኣርዳንቴ ባርዮን ኦኖሮጎ ኤና ሻንሻይናቤ ሻናይናቤም ኦይትዲና፤ ኤና ብሬን ኦስካይናሳ ጣራጴዛንቤ ኤና ዎሌን ሻንሻይናሳ ቦርኮቶንም ውንኩርሳንቴ፤ 13 “ ‘እሳ ኦኖኖ ባርያም ምስካዻያ ኦኖና ሃንዻይ’ ሃማንቴ ዋርቃትሮጎ ኡካዽዲና፤ ኮዶን ዬቲ ‘ኮም ዲብናሳ ውልማ’ ሃይዲና” ና ኬግያ ክያማዶ።
14 ባርዮን ኦኖንሳ ኢሮኻሞ ኤና ኣፕን ካያናቤ ኤና ኤላናቤ ክዛራ ናእዲ፤ ኖኻሞ ኬም ፓሽሽዲና። 15 ኮዶን ኤና ኣይሁድናሳ ዳምብን ኣሽካይናሳ ጋርናቤ ኤና ሙሴ ዳምብን ታማርሳይናቤ፣ ኖ ክያያዳና ዬራ ሃሚማን ግያንዳናቤ፣ 'ዳዊት ናሳናንቴ ሆሳዕና’ ሃማንቴን ናና እላታይናቤም ይያፓና ዻጋስዲና።
16 ኬኻሞ “ናና ክናሳ ዬራ ጌይዻይናም ኤሳራው ሃኤሳራይ?” ና ክግያ ኬያማዶ። ኢየሱስካሞ “ዪኒ፣ ኤሳራና እኤሳራይ፤ ዬቲ ‘ናናቤ፣ ናና ሾሊና ኣምን ቆጫይናቤሳ ኣፖሮጎ ዬርሽን ያ ዎድዲና’ ሃማንቴ ጌይዻዳም ናባባዳይዬው?”
17 ሃያንቴኻሞ ኖ ኬም ጋራንቴ ቢታንያዛራ ቃልቴ ኦጎታር ዎዽዲና። 18 ኢየሱስ ቡሪን ካታማንዛራ ማታቴ ይቴ ዳንቴ ዳቃዽዲና፤ 19 ጎይንሳ ዴሞሮኻሞ ሃቃስ ባላስ ሃንዻያም ሃፓንቴ ክዛራ ክይና ቃልጶሳ ኦባራ ኣፒ ካላኻሞ ሃፓድማሞ፤ ኖኻሞ ሃቃስግያ “ካኻ ካርሳንቴ ኣፒ ሃሳ ዳን ኮጋሬ!” ና ክያማዶ። ባላሳ ሃቃስካሞ ኣጋዛራ ዋችዲና።
20 ታማርና ክሳኻሞ ዬራ ሃምማዳናም ሃፓንቴ ዬርሻንቴ፤ “ባላሳ ሃቃስካሞ ኦጎንታ ሃስ ካላኻ ክዋቻዴ?” ና ኬያማዶ።
21 ኢየሱስካሞ ኬግያ ይንታና ክያማዶ፦ “እንታ ዬናንቴ ጎንዼና እጌያይ፤ ዬሳ እምነት ኮዳና እኒ ዬሳ ሃኾ ኮቆልምና፣ ባላሳ ሃቃስ ካዛራ ዬራ ሃምማዳናም ሃያ ሶጎ ጋራንቴ፣ ጌማርታ ካግያ፦ 'ካሮኻ ቡጭማንቴ ኛፓስንዛራ ኣርድማ’ ዬያምናኻሞ ሃምማና ክያማይ፤ 22 እኒ ዬሳ እምነት ኮዳና ዬራ ምስኮሮጎ ዬኦይሳዳናም ፓይላ ቻና ዬቻይ።” 23 ኢየሱስ ባርዮን ኦኖን ኣርዳንቴ ታማርስቴ ክዳዃ፦ ኤና ኣይሁድናሳ ዳምብ ኣሽካይናሳ ጋርናቤ ዛርስንሳ ዞንዛናቤ ክካላ ናዴ፤ “ያ ሃር ጌጳሞኻ ዬር ኮውልም ሃኣሽኬ? ጌጳሞን ኮም ሃናንቴ እማዳ ሃውቴ?” ሃማንቴና ክካላ ኬኦይሳዶ። 24 ኢየሱስ ኬግያ ይማሳና ይንታና ክያማዶ፦ “እንታኻሞ ኦይሶ ካላ ዬኻላ ኦይሳና እኦይሳይ፤ እናንቴ ኦይሳ እኦይሳዳም ዬማስና፣ እንታኻሞ ዬራ ክናም ሃር ጌጳሞኻ እኣሽካይንም ዬናንቴ ጌያና እጌያይ፤ 25 ኤሳንካ ዮሃንስሳ ኤናም ኑቆንካ ሻይዻይኖ ዳምብኖ ሃምባራኻ ኮናኣዴ? ፖላንባራሞ ሞ ኤዲ ባራኻ?”
ኬኻሞ ክንካ ሃሳዋንቴ ይንታና ክግያ ኬያማዶ፦ “ ‘ፖላንባራኻና ዎያምና ‘ታ ሃርናንቴ ክንካ ኣምናን ዬጋራዴና?’ ዎግያ ክያማይ፤
26 ‘ኤዲ ባራና ዎያምና’፤ ዛርስኖ ፓይላ ዮሃንስም ኤያ ባርያሳ ኣፖን ጌያያ’ ሃያንቴ ኮኣምናንታኻ ኩርትንዻና ዎኩርትንዻይ።”27 ኣጋታኻ ኬኻሞ ኢየሱስናንቴ “ዎቲ ዼስማሞ” ሃማንቴና ኬማሳዶ። ኖኻሞ “እንታኻሞ ዬራ ክናም ሃር ጌጳሞኻ እያያይንም ዬናንቴ ጌይማሞ” ና ኬግያ ክያማዶ። 28 ኢየሱስ ኬግያ ይንታና ክያማዶ፦ “ይንዳ ዬናንቴ ሃር ኮታኬ? ኤዲ ካላሳ ኣንጌ ናሶ ላማና ዳና፤ ናሳ ጌጳዛራ ቃልቴ ይጌይና፦ ‘ናሳ እሳ፤ ሃይታላ ዎይንን ሃምንዛራ ቃልቴ ዋድማና’ ክግያ ክያማዶ።
29 “ኮዶን ናሳኻሞ፦ ‘እንታ ይማሞና’ ክግያ ክያማዶ፤ ሃያንቴ ራስባራ ቃብማይካ ያእዲና።
30 “ፕርካሞ እምባ ናሳ ላንሳዛራኻሞ ቃልቴ ኣጋንታና ክጌያዶ፤ ናሳኻሞ ‘ኤኤ፣ እሳ ጌጳ እንታ ያኣና እያኣይና’ ክያማዶ። ኮዶን ኖ ይማ ሽዽዲና። 31 “ናና ላማ ግዶርካ እምባሳ ዼላቃም ኤሳራንቴ ሃያዳ ሃማቴ?” ኬኻሞ ክግያ ይጌይና “ናሳ ብራሲና ” ና ኬያማዶ። ኢየሱስካሞ ይንታና ኬግያ ክያማዶ፦ “እንታ ዬናንቴ ጎንዼና እጌያይ፤ ኤና ግብርን ጎራይናቤ ኤና ቡሎናቤ ባርያ ማንግስትንዛራ ኣርዳንካ ዬም ብራና ኬብራይ፤ 32 ኤናም ኑንቆንካ ሻያያ ዮሃንስ ዬናንቴ ጋዛሞን ጎይን ዻዋናንቴ ዬዛራ ናእዲና፤ ኮዶን ዬቲ ኪም ኣምናድማሞ፤ ኤና ግብርን ጎራይናቤ ኤና ቡሎናቤ ኪም ኣምንዲና። ዬራ ሃማዳናም ሃፓንቴኻሞ ጎይን ዬሳ ዛርቦን ባራኻ ማታንቴ ዬቲ ኪም ኣምንድማሞ። 33 “ዻይንሶ ኣብካሞ ኤሳርማቴ፤ ኤዲ ካላ ዎይንን ሃምንሳ እምባ ዳይዲና፤ ይሳ ሃምንሳኻሞ ቡዶንም ካርሚ ጫእዲና፤ ዎይንን ኣፕንም ይንግዶር ጩባዻን ኦሎንም ኮይዲና፤ ዎይንን ዻቃንዼኻናንቴ ኣንሳ ካይዲና፤ ሃያንቴኻሞ ሃምን ይሳም ኤና ሃምን ፓኻይናናንቴ ክራይ እማንቴ ፔ ኣብዛራ ያእዲና። 34 ሃምንም ይንካ ቡራዻያ ኣርፓ ክዬስካና፦ ይሳ ዎይንን ኣፕናም ቻናንቴ ይሳ ካይስናም ኤና ሃምን ፓኻይናዛራ ይእስዲና።
35 “ኤና ሃምን ፓኻይናኻሞ ክሳ ካይስናሳ ካላም ዻይዲና፤ ካላምካሞ ዴስዲና፤ ዋምካሞ ሱንንካ ፓክዲና። 36 ሃምንሳ እምባኻሞ ፕር ካይስና ብራናኻላንካ ሳጊ ካይስና ዋኒም ይእስዲና፤ኤና ሃምን ፓካይናኻሞ ፕር እኒ ኤና ብራናም ይያያዳግያ ሃይዲና። 37 ቱንስሮ ኖ ይጌይና ‘ናሳ እሳም ጎባና ኬጎባይ’ ሃማንቴ ናሳ ይንታም ይእስዲና።
38 “ኮዶን ኤና ሃምን ፓኻይና ናሳ ክሳም ይያፓና፤ ‘ካ ክሳ ሃምን ዻላያና፤ንማቴ፣ ኪም ዴሳንቴ ሃምንም ዎዻሌና’ ክግያ ኬያማዶ። 39 ኬኻሞ ኪም ዎይንን ሃምንሳ ቡዶንዛራ ቡላንቴ ዴስዲና።
40 “ታ ናንሲ ኤያ ዎይንን ሃምንሳ እምባ ይንና ኤና ሃምን ፓኻይናም ዬኻላ ሃስ ክያያያ ኮታኬ?”
41 ኬኻሞ ክግያ “ኤና ዛርቦና እግናም ጋልንሽቴ ዴሳንቴ፤ ሃምን ኦጎም ኤና ዎይንን ሃምንሳ ኣፕናም ክናንቴ ዋዳስካ እማይና ዋኒናንቴ እማና ክእማይ” ና ኬያማዶ።
42 ኢየሱስካሞ ኬግያ “ዋርቃትን ጫራጝሮ
43 “ኣጋታኻ እንታ ዬናንቴ ጌያና እጌያይ፤ ባርያሳ ማንግስትን ዬኻላንካ ቻንቴ ኤና ዋድማን ኮሳም ኣሽካይናናንቴ እማና እንዻይ፤ 44 ኤያ ሱና ኣጋዛራ ዲናያ ኣና ክኣይ፤ ኤያ ሱናሳ ይንዛራ ዲናዻያኻሞ ቁርሽ ቁርሺና ክያማይ።”
45 ኤና ኣይሁድናሳ ዳምብን ኣሽካይናሳ ጋርናቤ ፈረስ ኤናቤ ዻይንሶና እግናም ይኤሳርዶን ዋዳንካ፣ ኖ ኬም ክጌያይንም ኬ ዼስዲና። 46 ኮዶን ኢየሱስም ዬዳንቴ ዻኻናንቴ ኬዛግና ኤዲኖ ኪም ባርያሳ ኣፖን ጌያያግያ ሃያንቴ ኮሼዳንታኻ ኬ ዛርስን ኩርትንዽዲና።