¹ “ጳ ፖላን ማንግስትኖ ኤያ ካሪንትን ይሳ ኦኖሮኻ ውታንቴ ዎይንን ሃምን ይሳናንቴ ዋድማን ኤናም ዛጋቴ ያኣዳ ሃምንሳ እምባምና ኮታኻይ። ² ዋድማን ኤናናንቴኻሞ ሮራሳ ኢሮ ዲናር ካላ ካላ ካሻናንቴ ሃሳዋንቴ ቱንስሮኻሞ ይሳ ዎይንን ሃምንዛራ ኬም ይእስዲና።

³ “ቡሪንሳ ሳኣት ማካምካ ቦዋንዛራ ኖ ውታንቴ ኤና ዋድማን ካይሳንቴ ዎያንቴን ዳና ዋኒም ሃፓንቴ ኬግያ፦ ⁴ 'ዬትካሞ ቃልቴ እሳ ዎይንን ሃምሮ ዋድምማቴ፤ ካሽና ዛግሳይናም እንታ ዬናንቴ ካሻና እካሻይ” ና ክያማዶ። ⁵ ኬኻሞ ሃምንዛራ ያእዲና። ኤያኻሞ ሮሮንሳ ሳኣት ላቤ ሳኣት ሳልቤ ግዶር ዋድማን ኤና ዋኒም ኤርግዲና። ⁶ እባን ሮሮ ሳኣት ታጲ ካላቤ ግዶር ኖ ውታንቴ ኤና ዋኒ ሱን ዎያንቴን ዳናም ሃፓንቴ፤ “ቡሪ ቻንቴ ካዛራ ካውል ዋድማ ኣሽካን ጋራንቴ ኮታር ሃርናንቴ ዬዎያዴ?” ሃማንቴ ኬኻላ ኦይስዲና።

⁷ “ኬኻሞ ክግያ፣ ‘ኤዲ ዎናንቴ ዋድማ እማያ ኮቆልሞንታኻና ዎያዶ’ ና ኬያማዶ።”

“ኖኻሞ ኬግያ፦ ‘ዬትካሞ ቃልቴ እሳ ዎይንን ሃምሮጎ ዋድምማቴ” ና ክያማዶ።

⁸ “ሃዮኖኻሞ ኮእባናና ኤያ ዎይንን ሃምንሳ እምባ ኤያ ዋድማን ኤናሳ ጋራም ግስማንቴ ይጌይና፤ ‘ኤና ዋድማን ራስባራ ኣርዳዳና ግዶርካ ካርሳንቴ ኤና ብራንቴ ኣርዳዳናዛራ ኬም ፓይላ ግስማንቴ ባዛና ኬሳም ካሽማ’ ና ክግያ ክያማዶ።

⁹ “ኤና ሳኣት ታጲ ካላ ግዶር ዋድማን ካርሳዳና ናዴ፣ ኬ ፓይላ ይዳዛራ ዲናር ካላ ካላ ቻይዲና። ¹⁰ ኤና ብራንቴ ዋድማን ካርሳዳናኻሞ ይናኣና ኬናንቴ ዋድማን ኤና ዋኒሳ ሳጊ ካሻዻያና ኬማይሻዶ፤ ኮዶን ኬናንቴኻሞ ዲናር ካላ ካላና ካሻዻዶ። ¹¹ ካሽን ይሳም ይቻናኻሞ ኤያ ሃምን እምባዛራ ኬጉንድማንቴ ይጌይና፦ ¹² “ኤና ክና ቱንስሮ ኤርጋዻዳና ሳኣት ካላ ሶጎና ኬኣሽካዶ፤ ዎቲ እኒ ቡሪ ካርሳንቴ ሃዮንካ ኣትቴ ዋድምቴን ሃቃዳናላማ ክንካ ሃስ ልክ ሃካሼ?” ና ኬያማዶ።

¹³ “ኖኻሞ ዋድማን ኤናሳ ካላግያ ይንታና ክያማዶ፦ 'እያርያ፣ እንታ ሃዛራ ዬር ዛርቦ ኣሽካድማሞ፤ ዲናር ካላኻ ዋድማናንቴ ያ እላማ ክንካ ሃሳዋዳይዬው? ¹⁴ ታ ናንሲ ያ ባዛና ሃሳም ባኣቴ ይማ፤ ሃናንቴ እካሻዳናግያ ኤያ ቱንስሮ ናኣዳናንቴኻሞ ካሻናንቴ ዛጋና እዛጋይ። ¹⁵ ታ እንታ ኮይና እናኻ ዬራ እዛጋዳናም ሃያናንቴ ቻላይዬው? ሞ ፃላሞኖ እሳ ሃሳ ኣጝርማው ኮዻሳዶ?’

¹⁶ “ኣጋታኻ ኤና ራስሮን ዳና ብራሮና ኬዳይ፤ ኤና ብራሮን ዳናኻሞ ራስሮና ኬዳይ።” ¹⁷ ኢየሱስ ኢየሩሳሌምዛራ ይቴ ዳንቴ ይሳ ታማርና ታጲ ላማናም ኬም እስ ዋና ቡላንቴ ይንታና ክያማዶ፦ ¹⁸ “ታ ናንሲ ኢየሩሳሌምዛራ ዞን ዎሳ ውታኖና፤ ኤዲ ናሶ ኤና ኣይሁድናሳ ዳምብን ኣሽካይናሳ ጋርናቤ ኤና ሙሴ ዳምብን ታማርሳይናቤናንቴ ሳስካንቴ እማና እንዻይ፤ ኬኻሞ ክጄኻናንቴ ክዛራ ብቶን ታኻና ኬታኻይ፤ ¹⁹ ክንካ ኬኣልሜኻናንቴቤ፣ ኬዼኻናንቴቤ ኬዚቴኻናንቴ ቶርሲን ኤና ናንቴ ሳስካቴ እማና ኬእማይ፤ ኖኻሞ ዴምጲንባራኻ ሮራ ማክንሳጋላ ዻጳና ክዻጳይ።” ²⁰ ኣጋሳ ራስባራ ዘብዴዎስ ናና እንዳኖ ይሳ ናና ላማናማላ ክንካ ኢየሱስ ካላ ናዴ ክሳ ዎትሮ ኮምፓርሳንቴ፣ ዬር ካላ ኮናንቴ ክያዬኻናንቴ ምስክዲና።

²¹ ኖኻሞ ኮግያ፦ “ሃራ ሃዛጌ?” ና ክያማዶ። ናኻሞ ክግያ ይማሳና፦ “ናና እሳ ላማና ክናም፣ ማንግስትን ሃኖሮጎ ካላ ኬሳም ሃሳ ምዛቅባራ፣ ዋም ሃሳ ዋርካታባራ ኬዳርቄኻናንቴ ሃይማ” ና ኮያማዶ።

²² ኢየሱስካሞ ኬግያ ይማሳና፦ “ዬቲ ዬር ዬምስካያ ዼስማሞ፤ እንታ ሻርቃስ ይንካ እውጫያኻ ዬቲ ውጫናንቴ ቻላው?” ና ክያማዶ። ኬኻሞ ይማሳና ክግያ “ዪኒ፣ ቻላና ዎቻላይ” ና ኬያማዶ።

²³ ኖኻሞ ኬግያ ይጌይና፦ “ይያማን ሻርቃ እውጫያኻ ዬቲ ውጫና ዬውጫይ፤ ኮዶን እሳ ምዛቅባራቤ ዋርካታባራቤ ዳርቃዻይኖ ኣባሳ ኤና ይንናንቴን ቃባዻዳናናንቴና፤ እንታ ዬር እእማያ ትማሞ” ና ክያማዶ።

²⁴ ታማርና ክሳ ታጲና ዼላቅና ክናም ይኤሳራና፦ እንዳ ናና ላማናዛራ ዋጭምዲና። ²⁵ ኢየሱስካሞ ኬም ክዛራ ግስማንቴ ይንታና ክያማዶ፦ “ኤና ቶርስናሳ ብትና ይሳ ዛርስንዛራ ጌጲ ይዳግያ፤ ሃያንቴኻሞ ኬሳ ጋርናኻሞ ኬም ካንታኻ ኬግሻይንም ዬቲ ዼስዲና። ²⁶ ኮዶን ዬሳ ባክሮ ኦንጎታ ዳን ኮጋሬ። ዬግዶር ኤያ ጌጲ ዳናንቴ ዛጋያ ዬሳ ካይሲ ክዴ፤ ²⁷ ኤያ ሳጊ ዳናንቴ ዛጋያ ዬሳ ቾባራ ክዴ፤ ²⁸ ኤዲ ናሶ ክናንቴ ዋድንዼኻናንቴ ናኣድማሞ፣ ኖ ይዻር ዋድማናንቴቤ ሳዳን ይሳምካሞ ውልናንቴ ሳስካቴ እማናንቴና ክናኣዶ።” ²⁹ ኢየሱስቤ ታማርና ክሳቤ ኢያራኮ ግዶርካ ውታንቴ ይቴ ኬዳኻ ኤዲ ጱፅ ኪም ጫግዲና። ³⁰ ኦጎታርካሞ ኤዲ ኣፕ ካያ ላማ ጎይንሳ ዴሞሮ ዳርቃንቴና ኬዶ፤ ኢየሱስካሞ ኦጎኻ ክሳጋይንም ኬ ይኤሳራና፤ “ጌጳ፤ ዳዊት ናሳ ዎናንቴ ቡርቃዽማ!” ሃማንቴና ኬእላታዶ። ³¹ ዛርስኖኻሞ ኬም ጎራንቴ ላይ ዳማቴ ሃማንቴ ጌይዲና፤ ኮዶን ኬ ካልሎን ይሳ ናቅሲም ዼግ ሃያንቴ፦ “ጌጳ፤ ዳዊት ናሳ ዎናንቴ ቡርቃዽማ!” ና ኬያማዶ።

³² ኢየሱስካሞ ዎያንቴ ኬም ግስማንቴ፤ “ዬናንቴ ሃር እያዬኻናንቴ ዬዛጋዴ?” ሃማንቴ ኬኻላ ኦይስዲና።

³³ ኬኻሞ ክግያ፦ “ኣፕና ዎሳ ኮያፔኻናንቴ ዛጋና ዎዛጋይ” ና ኬያማዶ።

³⁴ ኢየሱስካሞ ኬናንቴ ቡርቃዻንቴ፤ ኣፕና ኬሳም ክላኣሳዃ፤ ኬኻሞ ኣጋዛራ ሃፕዲና፤ ሃያንቴ ኪም ጫግዲና።