ማቴዎስ 19
1
ኢየሱስ ዼላቅና እግናም ጌያቴ ይቱንሳና፦ ገሊላባራኻ ውታንቴ ዮርዳኖስ ሌኤንሳ ሳባራን ዶን ይሁዳ ፔናዛራ ያእዲና።
2
ዛርሲኖ ጱፅኖ ኪም ኮጫጋዃ፣ ኖኻሞ ኦጎታር ኬም ፓሽሽዲና።
3
ፈረስ ኤና ኪም ዻብንሻናንቴ ይዛጋዶንታኻ ክካላ ናዴ፦ “ኤሳንካ ኤዲ ካላ ሜን ይሳም ጎይ ኣብ ኣብካ ክቡሌኻናንቴ ዳምብኖ ጌይዱው?” ሃማንቴና ክካላ ኬኦይሳዶ።
4
ኖኻሞ ማሳንቴ ኬግያ ይንታና ክያማዶ፦ “ኣና ብራቴንካ ባርያ ኬም ይዎዳን ኣንጌቤ ሜቤ ሃያንቴ ክዎዳዶንም ዬቲ ናባባዳይዬው?
5
ፕርካሞ ኖ ይንታና ክያማዶ፦ ‘ኤዲ ናሶ ይሳ እንባቤ እንዳንቤም ጋራና ክጋራይ፤ ሜን ይሳ ላማኻሞ ክንካና ኬዳይ፣ ኬላማ ውል ኤዲ ካላና ኬማታይ’ ሃንዻዶኖ ጎያ ካኻሞ?
6
ታ ናንሲ ኬ ኤዲ ካላና፣ ኬ ኤዲ ላማ ትማሞ፤ ኣጋታኻ ባርያሳ ኤዲ ካላ ሃይዻዳናም ኤዲ ፓሻን ኮጋሬ።”
7
ኬኻሞ ክግያ፦ “ታ ኦጎንታዳና ኤዲ ካላ ጎያ ይንካ ይሳ ሜንም ይቡላዳ ዋርቃት ኡካቴ እማንቴ ኮም ክቡሌኻናንቴ ሙሴ ሃርናንቴ ክጌያዴ?” ና ኬያማዶ።
8
ኢየሱስካሞ ይንታና ኬግያ ክያማዶ፦ “ሙሴ ዬቲ ኤዲ ዬር ኤሳርማ ዬዶንም ሼዳንቴና ሜና ዬሳም ዬቡሌኻናንቴ ዬናንቴ ክጌያዶ፤ ኣና ውትንታርካ ኦጎንታ ትማሞ ኮዶ፤
9
እንታ የናንቴ ጌያና እጌያይ፤ ሜኖ ክሳ ቡላሞ ጎይ ኮይማ ኤያ ሜን ይሳም ቡላንቴ ሜ ኣብ ኬማያ ቡሎና ክዳይ፤ ኮምካሞ ቡላሳናክቡላሳይ፤ ኤስን ቡልዻዶንምካሞ ኤያ ኬማያ ኣጋኻሞ ቡሎና ክዳይ።”
10
ታማርና ክሳኻሞ ክግያ፦ “ሜናቤ ኣንጌናቤ ዴንታኖ ኦጎንታ ኮዳና ኦጎናንቴ ሜ ኬሚማ ዳዻይኖ ፃሊና” ና ኬያማዶ።
11
ኮዶን ኢየሱስካሞ ኬግያ ይንታና ክያማዶ፦ “ዬራ ክናም ኤና ይንናንቴ እንዻዳናሳ ኦባራ ኤዲ ካላኻሞ ትምርትን ኮም ቻናንቴ ቻልማሞ፤
12
ኦጎኖኻሞ ኤና ዋኒ እንዳናሳ ኢንባራኻ ቡኡ ዳንቴና ኬውታይ፤ ዋኒካሞ ኤዲሳ ኣንካና ቡኡ ኬማታይ፤ ሃያንቴኻሞ ጳ ፖላን ማንግስትንናንቴ ሃማንቴ ዪም ቡኡ ሃያይና ኤና ዋኒ ዳይዲና። ኦጎም ኤያ ቻናንቴ ዳማያ ክቼ።”
13
ሃያንቴኻሞ ኖ ናና ሾሊናዛራ ኣን ይሳም ዻሳንቴ ኬናንቴ ባርያም ክምስኬኻናንቴ ኬም ክዛራ ኣንሳቴ ናዽዲና። ኮዶን ኤና ናናም ኣንሳቴ ናኣዳናም ታማርና ክሳ ጎሪዲና።
14
ኢየሱስካሞ ኬግያ፦ “ናና እዛራ ኬኔኤ፤ ኬም ዬማርናኖ፤ ጳ ፖላን ማንግስትኖ ኬግያሃምናናንቴና” ና ክያማዶ።
15
ኣኒና ይሳምካሞ ናናዛራ ዻሳንቴ ኬናንቴ ፓፂ እማንቴ ራቃ ኣጋሮኻ ዻጳንቴ ያእዲና።
16
ሃያንቴኻሞ ኤዲ ካላ የሱስ ዛራ ናዴ፤ “ኣስታማራዮ፦ ሳዳን ላይን ዳይንም ሃፓናንቴ ዬር ፃል ሃስ ሃማ እኣሽኬ?” ሃማንቴ ክካላ ኦይስዲና።
17
ኢየሱስካሞ ክግያ፦ “ዬርን ፃሊን እካላ ሃርናንቴ ሃኦይሴ? ፃላ ሃንዻያ ባርያ ሶጎና፤ ኮዶን ሳዳንዛራ ናኣናንቴ ሃዛጋያዳና ዳምብና ኣና ጌይዻዳናም ኣሽክማ” ና ክያማዶ።
18
ኤያኻሞ “እግና ዳምብና ሃምናቴ?” ሃማንቴ ክካላ ኦይስዲና። ኢየሱስካሞ ክግያ ይንታና ክያማዶ፦ “ኤዲ ሃዴስናኖ፦ ቡሎ ሃዳናኖ፣ ሃዲብምናኖ፣ ፖጋሞኻ ማኛሞ ሃዎይናኖ፤
19
ሃምባቤ ሃናቤም ጎብማ፣ ሃም ሃናሻያግያ ሃሪያናም ሃሳም ናሽማ።
20
ኤያ ባርሻስካሞ “እግናም ፓይላ እንታ ኣሽክዲና፤ ክናሳ ኦባራ እካላ ዻቃዳ ሃርቴ?” ና ክግያ ክያማዶ።
21
ኢየሱስካሞ ይማሳና ኤያግያ፦ “ያ ኤዲ ጫንቃል ሃማ ዳናንቴ ሃዛጋዳና፣ ቃልቴ ኮይና ሃሳዳናም ፓይላ ሻንሻንቴ ብሬናም ኤና ኩፑና ናንቴ እምማ፤ ፖላሮኻሞ ዎድማሞን ሃፓና ሃያፓይ፤ ሃያንቴኻሞ ናዴ ኢም ጫግማ” ና ክግያ ክያማዶ።
22
ኤያ ባርሻስካሞ ክናም ኤሳራንቴ ኮይሶኖ ክሳ ጱፅ ኮዶንታኻ እልሊ ጃንቴ ያእዲና።
23
ኢየሱስካሞ ይሳ ታማርናናንቴ ይንታና ክያማዶ፦ “እንታ ዬናንቴ ጎንዼና እጌያይ፤ ኤና ዎድሞና ናንቴ ጳ ፖላን ማንግስትን ኣርዳኖ ካልሎን ኬናንቴ ዋቺና።
24
ፕርካሞ እንታ ዬናንቴ ጌያና እጌያይ፤ ኤዲ ዎድሞ ባርያሳ ማንግስትንዛራ ኮኣርዳን ናንቴ ጋማላ ማርፔሳ ፑላኻ ኮውታይኖ ባዶና።”
25
ታማርና ክሳኻሞ ዼላቅና እግናም ይኤሳራና ካልሎን ዬርሻንቴ “ታ ኦጎንታዳና ሃውቴ ዻቃናንቴ ቻላያ?” ሃማንቴ ኦይስዲና።
26
ኢየሱስካሞ ኬም ሼዳንቴ፤ “ኮኖ ኤዲ ናሶኻ ቻሊምማሞ፤ ኮዶን ባርያ ናንቴ የር ፓይላ ውል ቻሊማና ኮቻሊማይ።”
27
ጴጥሮስካሞ ክግያ ማሳንቴ፦ “ዎቲ ዬር ውልም ጋራንቴ ሃም ጫግዲና፤ ታ ሃር ዎያፔ?” ና ክያማዶ።
28
ኢየሱስካሞ ኬግያ ይንታና ክያማዶ፦ “እንታ ዬናንቴ ጎንዼና እጌያይ፤ ፔን ሃሊን ናኣናንቴን ዶሮጎ፣ ኤዲ ናሶ ይሳ ጎሺን ብታሞን ቦርኮቶንዛራ ክዳርቃን ዋዳንካ፣ ዬቲ ኢም ጫጋዳናኻሞ ብታሞን ቦርኮቶና ታጲ ላማናዛራ ዳርቃንቴ እስራኤልሳ ቢዛና ታጲ ላማናዛራ ብቶን ታኻና ዬታኻይ።
29
እንካ ሃማንቴ ኤያ ይሳ ኦኖናቤ፣ እንዳን ናና ኣንጌናቤ፣ ኣንዛን ናናቤ፣ እምባቤ፣ እንዳንቤ፣
ናና ይሳቤ ዎይካሞ ይሳ ሃምንቤም ፓይላ ውልም ጋራያ፤ ዬራ እግናም ኢ ማቶግያ ቻና ክቻይ፤ ፕርካሞ ሳዳን ላይ ዳይንምካሞ ሃፓና ክያፓይ።
30
ኮዶን ኤና ጱፅና ብራሮን ዳና ራስሮ ዳናኬዳይ፤ ኤና ጱፅና ራስባራን ዳናኻሞ ብራሮ ዳናኬዳይ።