¹ ዋዳስ ኣጋኻ ኢየሱስሳ ታማርና ክካላ ናዴ፤ “ባርያሳ ፖላን ማንግስትሮ ፓይላ ውልሳ ሳግን ዳያ ሃውቴ?” ሃማንቴ ክካላ ኬኦይሳዶ።

² ኢየሱስካሞ ናሶ ሾሊ ካላም ግስማንቴ ኬሳ ግዶሮ ዎይሳንቴ ይንታና ኬግያ ክያማዶ፦ ³ “እንታ ዬናንቴ ጎንዼና እጌያይ፤ ዬም ዬጶቃድምናቤ ናና ሾልናግያ ዬማታድምና ካላኻሞ ፖላን ማንግስትንዛራ ዬቲ ኣርድማሞ። ⁴ ታ ናንሲ ፖላን ማንግስትሮ ኤዲ ውል ካላንካ ሳግን ዳያ ናሳ ካ ጋንታግያ ኤያ ይም ይርክ ሃያያና፤

⁵ “ናሳ ካግያማ ኤያ እሳ ናብንካ ቻያ ኢም ቻና ክቻይ። ⁶ ኮዶን እንካ ኣምናይና ክና ናና ሾሊና ግዶርካ ካላም ኬሳ ካይሶን ጎይንዛራ ኣንሳያ ኤያ፣ ሱኒ ዴስማያ ጌጲ ክሳ ቆርጪሮ ዻኻዻዃ ኛፓስን ፄሪሮን ግዶሮ ዻባዻዃ ክፁዋዳና ክናንቴ ባሺና። ⁷ ኤናም ካይሶን ጎይንዛራ ኣንሳይን ፔን ኮናንቴ ሃይ! ኤናም ካይሶን ጎይንዛራ ኣንሳያ ዬር ኮሳ ናኣኖ ሽዽማሞ፤ ኮዶን ኤያ ኤናም ካይሶን ጎይንዛራ ኣንሳያ ኣጋናንቴ ሃይ! ⁸ ኣኒን ሃሳ ዎይካሞ ራ ሃሳ ሃም ካይሶንዛራ ክኣንሳያዳና፣ ኪም ቱማቴ ዻብምማ፤ ኣኒን ላማቤ ራ ላማቤኻ ዳሃንቴ ኖን ላይ ዳይንዛራ ሃም ዻባዻንናንቴ፤ ኤላ ዳንቴ ዎይካሞ ኣኒ ካላ ዳሃንቴ ሳዳን ዻቆንዛራ ሃኣርዳዳና ባሺና። ⁹ ሃያንቴኻሞ ኣፒኖ ሃሳ ሃም ካይሶንዛራ ኮይኢሳያዳና፣ ኮቻራቴ ዻብምማ፤ ኣፒ ላማኻ ዳንቴ ገሃነም ኖንዛራ ሃም ዻባዻንናንቴ፤ ኣፒ ካላ ዳንቴ ሳዳን ዻቆንዛራ ሃኣርዳዳና ሃናንቴ ባሺና። ¹⁰ “ክና ናና ሾሊና ግዶርካ ካላም ቦውዻንባራኻ ዬም ማንክማቴ፤ እንታ ዬናንቴ ጌያና እጌያይ፤ ፖላሮን ዳና ኬሳ ኤርጎን ኤና ኣባ ፖላሮን ዳሳ ዎትንም ሮሮ ውል ሼዳናኬሻዳይ፤ ¹¹ ኮኖ ኮንታ ኮማዶኖ፣ ኤዲ ናሶ ኤና ካያዳናም ዻኣሻናንቴና ክናኣዶ። ¹² ”ይንዳ እናንቴ ጌይማቴ፤ ኤዲ ካላሳ እያና ማቶ ካላ ኬዳና፣ ኬግዶርካ ካላ ክካይና ሳልታም ሳልናም ጌማርንዛራ ጋራንቴ ካያዳም ዛጎታ ኖ ያኣይዬው? ¹³ እንታ ዬናንቴ ጎንዼና እጌያይ፤ እያታ ካያዳም ይያፕና፣ እያና ሳልታም ሳልና ካያድምናሳ ጳባራ ካላንብሻ ይያፓዳኻ ካልሎን ዋዝንዻና ክዋዝንዻይ። ¹⁴ ኣጋግያ ናና ሾልና ኪና ግዶርካ ካላ ክካዬኻናንቴ ዬንባ ጳ ፖላሮን ዳሳ ቃቦ ትማሞ። ¹⁵ ሃምባ ናሳ ሃዛራ ዬር ዛርቦ ክኣሽካዳና ¹ ክካላ ቃልቴ ሃቤ ክቤ ሶጎ ዳንቴ ክሳ ዛርቦናም ክናንቴ ጌይማ። ሃናንቴ ክኤሳራዳና፣ ሃምባ ናሳም ፕርካሞ ኪም ጎይ ፃልዛራ ያ ማስዲና። ¹⁶ ኮዶን ሃናንቴ ክኤሳርድምና፤ ዼላቅኖ ፓይላ ኤዲ ማኚ ላማቤ ማካምቤካ ታኻዻንታኻ፣ ኤዲ ካላ ዎይካሞ ኤዲ ላማ ኣንሳቴ ቃልቴ ኪም ዼላቅስማ። ¹⁷ ኤና እግናም ክኤሳርድምና ኣይሁድናሳ ባርያም ምስካዻን ኦኖን ኤናናንቴ ጌይማ፤ ኤና እግና ናንቴኻሞ ክኤሳርድምና፣ ናንሲ ኪም ኤዲ ባርያም ዼስማግያቤ ኤዲ ግብሪ ጎራግያ ፓይድማ።

¹⁸ “እንታ ዬናንቴ ጎንዼና እጌያይ፤ ዬቲ ፔሮጎ ዬዻኻዳና ፓይላ ፖላሮኻሞ ዻክሚና ኬዳይ፤ ዬቲ ፔሮጎ ዬቡላዳና ፓይላ ፖላሮኻሞ ቡልሚና ኬዳይ።

¹⁹ “ፕርካሞ እንታ ዬናንቴ ጎንዼና እጌያይ፤ ፔሮጎ ላማ ዳንቴ ዬር ፓይላ ውልም ኪም ናሻንቴ ዬምስክና ኣባ ጳ ፖላሮን ዳ ዬናንቴ ኣሽካና ክኣሽካይ፤ ²⁰ ኤና እሳ ናብንካ ላማ ዎይካሞ ማካም ዳንቴ ቡካይናሳ ባክሮ እንታ ዳና እዳይ።” ²¹ ዋዳ ኣጋኻ ጴጥሮስ ኢየሱስ ካላ ናዴ ይጌይና፦ “ጌጳዮ! ኣባ ናሳ እዛራ ዬር ዛርቦ ክኣሽክና ኢ ሜም ክናንቴ እጋሬ? ኢ ꬆጳግያው ክናንቴ እጋራይ?” ና ክያማዶ።

²² ኢየሱስካሞ ክግያ “ኢ ꬆጳ ሶጎ እንታ ሃምማሞ፤ ኢ ꬆጳታም ꬆጳግያ ሃጋሬኻ ሃናንቴ ጌያና እጌያይ” ና ክያማዶ።

²³ “ኣጋታኻ ፖላን ማንግስትኖ፣ ኤዲ ብቲ ካላ ይሳ ካይስና ኮይናም ኣኒሮን ዳናም ኬንሻናንቴ ዛጋያሚና ኮታኻይ፤ ²⁴ ኮይናም ኬንሻን ክካርሳና ካይስና ግዶርካ ካይሲ ካላ ታላንት ሺ ታጲ ² ይንዛራን ባዛን ይዳም ክዛራ ኣንሳቴ ናዽዲና። ²⁵ ካይስታ ካ ባዛን ካሻዻን ክቻላድሞንታኻ፣ ክቤ፣ ክሳ ሜንቤ፣ ክሳ ናናቤ፣ ኮይና ክሳ ዳናቤም ፓይላ ሻንሻንቴ ክሳ ባዛን ካሻዼኻናንቴ ጌጳ ክሳ ጌይዲና።

²⁶ “ዋዳስ ኣጋኻ ካይስታ ኣጋ ይሳ ጌጳሳ ራሮ ጳርፃንቴ፤ “እናንቴ ዶንሽማ፤ ባዛና እዛራን ዳናም እንታ ሃናንቴ ካሻና እካሻይ” ሃማንቴ ብታም ምስክዲና። ²⁷ ክሳ ጌጳኻሞ ክናንቴ ቡርቃዻንቴ ባዛና ክዛራን ዳናም ክናንቴ ጋራንቴ፤ ኪም ሱን ይእስዲና።

²⁸ “ካይስታ ኣጋ ይሳ ጌጳሳ ዎትሮኻ ክውትና ዲናር ማቶ ካላ ³ ይንዛራን ባዛን ክሳ ይዳ ሃርያስም ሃፓንቴ ኪም ጩቃንቴ፤ ‘እሳ ባዛና ሃዛራን ዳናም እናንቴ ካሽማና!’ ክግያ ክያማዶ።

²⁹ “ካይስታሳ ሃርያስካሞ ክሳ ዎትሮ ጳርፃንቴ፦ ‘እናንቴ ሾሊ ዶንሽማ፤ ባዛና ሃሳ እዛራን ዳናም እንታ ሃናንቴ ካሻና እካሻይ’ ሃማንቴ ኪም ምስክዲና።

³⁰ “ኮዶን ክናንቴ ዶንሻናንቴ ይዛጋድሞንታኻ፤ ባዛና ክዛራን ዳናም ክሳ ካሻዛራ ዻክን ኦኖንዛራ ኪም ኣርስዲና። ³¹ ዬራ ሃምማዳናም ሃፓዳና ካይስና ዋኒካሞ እልሊ ጃይዲና፤ ኬ ቃልቴኻሞ ዬራ ይያፓዳናም ፓይላ ይሳ ብታ ናንቴ ጌይዲና።

³² “ዋዳ ኣጋኻ ክሳ ጌጳኻሞ ካይስታ ኣጋም ግስማንቴ ክግያ ይንታና ክያማዶ፦ ‘ያ ካይስታ ዛርባ ካ፣ ኢም ሃምስካዶንናንቴ ባዛን ሃሳም ፓይላ እንታ ሃናንቴ ጋርዲና፤ ³³ ኣጋግያ እንታ ሃናንቴ ባዛን ሃዛራን ዶን እጋራዳግያ፤ ያኻሞ እኒ ሃሃርያናንቴ ባዛን ክሳም ሃጋሬኻናንቴ ዛግሳይዬው?’ ³⁴ ዻጋሳንቴኻሞ ባዛና ክዛራን ዳናም ፓይላ ካሻቴ ክሳ ቱንሳዛራ ኤና ኤናም ዻኻይናናንቴ ኪም ሳስካቴ እምዲና።

³⁵ “ኣጋታኻ ዬቲ ፓይላ ሃምባ ናናናንቴ ዬራ ዛርቦና ኬሳም ዬሳ ዎይላምሮኻ ቡላቴ ዬጋራድምና፤ ኣባ ጳ ፖላንጋንታኻሞ ዬዛራ ኦጎንታና ክያያይ።