¹ ኢየሱስ ሮሮ ላሳ ራስባራ ጴጥሮስቤ፣ ያዕቆብቤ፣ ያዕቆብ እንዳናሳ ዮሃንስቤም ኬም ሶጎ ኣንሳቴ ጌማር ጉዱጲ ካላዛራ ዉትዲና።

² ኦጎታር ኬሳ ዎትሮ ኢየሱስሳ ብሽኖ ሮጲዲና፤ ዎትኖ ክሳኻሞ ሃዮግያ ሮጲዲና፤ ክሳ ኣፓላኖኻሞ ሮሮግያ ቻውሊ ማትዲና። ³ ኣጋዛራ ሙሴቤ ኤልያስቤ ኢየሱስ ላማ ክንካ ኬያሳውካ ኬናንቴ ሃፕንዽዲና።

⁴ ጴጥሮስካሞ ኢየሱስ ግያ፤ “ጌጳዮ፦ ኮታር ዎዳና ዎናንቴ ፃሊና፤ ሃናሻያዳና ጋፓ ካላም ሃናንቴ፣ ካላም ሙሴ ናንቴ፣ ካላም ኤልያስ ናንቴ ጋፓ ማካም እኬ ” ና ክያማዶ።

⁵ ኖኻሞ ኣኻራ ዼላቅቴ ክዳዃ ሉፕኖ ጫውልኖ ናዴ ኬም ክጭዲና፤ ሉፕንሳኻሞ ኢሮ፣ “ናሳ እሳ ይካ እዋዝንዻያ እናሻያ ኣጋ ኖና፤ ዬቲ ኪም ኤሳርማቴ” ሃማያ ዬፆ ኤሳርምዲና።

⁶ ታማርና ክሳኻሞ ዬፃ ኣጋም ይኤሳራና ቃሲማንቴ ፔንዛራ ጳርፅዲና። ⁷ ኢየሱስካሞ ኬኻላ ናዴ ኬም ላኣሳንቴ ይጌይና፣ “ዻጲማቴ፣ ዬኩርትንዽናኖ” ና ኬግያ ክያማዶ። ⁸ ኬኻሞ ዻጳንቴ ኬሼድና ኢየሱስሳ ኦባራ ኤዲ ኣብ ካላካሞ ኬ ሃፓድማሞ። ⁹ ኬኻሞ ጌማርታባራኻ ሃንችቴ ኬዳዃ ኢየሱስ ኬግያ፣ “ኤዲ ናሶ ዴምጲንባራኻ ክሳ ዻጳዛራ ዬራ ዬያፓዳናም ኤዲ ካላናንቴኻሞ ዬጌይናኖ” ሃማንቴ ኬናንቴ ጌይዲና።

¹⁰ ታማርና ክሳኻሞ ክግያ፣ “ታ ኦጎንታ ዳና ኤና ሙሴ ዳንብን ታማርሳይና ‘ኤልያስ ብራንቴ ክኔኤኻናንቴ ዛግሳና ኮዛግሳይ’ ሃማንቴ ኬጌያይኖ ሃርቴ?” ሃማንቴና ኬኦይሳዶ።

¹¹ ኖኻሞ ኬናንቴ ማሳንቴ ይንታና ክያማዶ፦ “ይያማን ኤልያስ ናዴ ዬር ፓይላ ውልም ኣሽካና ክኣሽካይ፤ ¹² ኮዶን እንታ ዬናንቴ ጌያና እጌያይ፤ ኤልያስ ኣና ብራንቴ ናእዲና፤ ይያማን ኬኻሞ ክዛራ ዬራ ይዛጋዳናም ኬኣሽካዲና፤ ኪም ኬ ዼሳድማሞ። ኣጋንታ ኤዲ ናሶ ኬሳ ኣንሮጎ ጋሎ ሃፓና ክያፓይ።” ¹³ ዋዳ ኣጋኻ ታማርና ክሳ ኢየሱስሳ ኤላቅና ኬናንቴ ክጌያዳና ኤያ ኤናም ኑንቆንካ ሻያያ ዮሃንስሳ ክዶን ኬ ጶቅስዲና። ¹⁴ ኬኻሞ ዛርስንዛራ ማታቴ ኬናኣና ኤዲ ካላ ክካላ ናዴ ክሳ ዎትሮ ኮምፓርሳንቴ ክግያ ይንታና ክያማዶ፦ ¹⁵ “ጌጳዮ፣ ባንዞ፣ ናሳ እሳናንቴ ቡርቃዽማ፤ ግርጫን ጂቴ ካልሎን ጋሊቴና ክዶ፤ ኖ ሮሮ ጱፅ ኖሮቤ ኑንቆሮቤና ክዲናይ። ¹⁶ ኪም ሃሳ ታማርናዛራኻሞ ባኣቴ እናኣዃ ኬ ኪም ፓሽሻናቴ ቻላድማሞ።

¹⁷ ኢየሱስካሞ፦ “ዬቲ ክና ኤና ታንጋይና እምነትን ቆልምና ቆሮና፣ ላይ ሃማዛራ ዬላማ ክንካ እዴ፤ ኤ ላይ ሃማዛራ ዬናንቴ እዶንሼ፤ ናሳም ኦራ እናንቴ ባኣማቴ” ና ክያማዶ። ¹⁸ ኢየሱስካሞ ቤራም ክኦይታዃ ናሳ ካላንካ ውትዲና፤ ኣጋዛራ ናሳኻሞ ፓሽዲና።

¹⁹ ታማርና ሶጎ ኢየሱስዛራ ናዴ፤ “ኤ ዎትይ ይንናንቴ ቤራም ቡላን ዎቻላዲሞኖ ሃርቴ?” ሃማንቴ ክካላ ኬኦይሳዶ።

²⁰ ኖኻሞ ይንታና ኬግያ ክያማዶ፦ “ዬቲ ዬቻላድሞኖ ዬሳ እምትንሳ ቶካሞንካና። እንታ ዬናንቴ ጌያና እጌያይ፤ እኒ እምነት ዬሳ ሾሊ ሻፖ ኣፕግያ ኮዳና፣ ጌማርታ ካግያ ‘ያ ካሮኻ ቡጭማንቴ እስ ይማ’ ሃማንቴ ዬጌይና ኖ ያኣና ክያኣይ፤ ዬር ዬም ባሻያኻሞ ቆልማሞ፤ ²¹ ኮዶን ዬራ ካግያማ ባርያም ዋቻጳንቴ ምስካኻቤ ዳቆንካ ባርያም ሚስክንቶቤኻ ኮትምና ውትማሞ።”

²² ኬኻሞ ገሊላ ግዶር ፑጫንቴ ኬዳዃ ኢየሱስ ኬግያ ይንታና ክያማዶ፦ “ኤዲ ናሶም ኤናናንቴ ሳስካንቴ እማና ኬእማይ፤ ²³ ኬኻሞ ኪም ዴሳና ኬዴሳይ፤ ኖኻሞ ሮራ ማክንሳኻ ዴምጲንባራኻ ዻጳና ክዻጳይ።” ታማርና ክሳኻሞ እልሊ ጃይዲና። ²⁴ ኢየሱስቤ ታማርና ክሳቤ ቅፍርናሆም ኬዬስካና፣ ኤና ኣይሁድ ባርዮን ኦኖንሳ ዲራክማ ላማና ግብርን ፑኡሻይና ጴጥሮስ ካላ ናዴ፤ “ኣስተማራ ዬሳ ኣይሁድናሳ ባርዮን ኦኖንናንቴ ግብር ካሻዬው?” ና ክግያ ኬያማዶ።

²⁵ ኖኻሞ “ካሻና ኪካሻይ” ና ኬግያ ክያማዶ። ጴጥሮስካሞ ኦኖን ይኣርዳና ብራንቴ ኢየሱስ ክግያ፣ “ስምኦን፣ ፔን ኮሳ ብትና ግብርን ቻኖ ናና ይናኻላንካሞ ሞ ኤና ዋኒ ካላንካ? ሃኻላ ሃር ኮታኬ?” ና ክያማዶ።

²⁶ ጴጥሮስካሞ ክግያ፦ “ኤና ዋኒ ካላንካና ኬቻይ” ና ክያማዶ። ኢየሱስካሞ ይንታና ኪያማዶ፦ “ኦጎንታ ዳና ናና ግብር ካሽማሞ። ²⁷ ይያማንካሞ ዎዛራ ዻጋሳን ኬጋሬኻናንቴ፣ ያ ቃልቴ ኮርምን ሃሳም ሌኤንዛራ ዻብማ፤ ካራስ ብራንቴ ሃዬዳያሳ ኣፖም ዋሻንቴ ‘ድራክማ’ ካላስ ሃያፓያም ኢቤ ሃቤ ናብንካ ካሽማ።”