ማቴዎስ ኡኩንሣ 16
1
ፈረስ ኤናቤ ሙሴ ዳምብን ታማርሳይና ኤናቤ ኢየሱስ ካላ ናዴ ዬር ጃኻማ ይዛጋዶንታኻ ፖላሮኻ ዬር ሃሊ ኬናንቴ ክዻዌኻናንቴ ክካላ ኦይስዲና።
2
ኖኻሞ ኬናንቴ ይማሳና ይንታና ክያማዶ፦ “ዬቲ እባንን ‘ፖላኖ ኮዛውና፣ ታ ናንሲ ፔኖ ፓኪና ኮዳዪና’ ዬያማይ፤
3
ፔንሳ ሶጽማ ኣፖኻሞ ‘ፖላኖ ዛውዲና፤ ሉፕኖኻሞ ሃንችዲና፤ ዶቦኖ ዻና ኮዻይ’ ሃማንቴና ዬጌያይ። ዬቲ ፖላንሳ ዴንታንም ዼስዲና፤ ኮዶን ፔን ኮሳ ዴንታንም ዬቲ ዼስማሞ።
4
ኤና ዛርቦና ቡሎና ዬር ሃሊ ሃፓናንቴና ኬዛጋይ፤ ኮዶን ዮናስ ኤናናንቴ ዬር ሃሊ ክማታዳግያ ኣጋሳ ኦባራ ዬር ሃሊ ኣብ ኬናንቴ ዻውዽማሞ።“ ሃማንቴ ኢየሱስ ኬም ጋራንቴ ያእዲና።
5
ኬ ኛፓስን ይሳጋና ክሳ ታማርና ሙና ባኣማ ዋልዲና።
6
ኢየሱስ ኬግያ፤ “ሃይ! ኤና ፈረስ ኤናቤ ኤና ሰዱቅ ኤናቤሳ ኛኻዻንካላንካ ዬም ማንክማቴ” ና ክያማዶ።
7
ኮዶን ኬ ክንካ ማታንቴ ክግያ “ኬዳ ኖ ይንታ ክያማይኖ ዎቲ ሙና ዎባኣድሞንታኻና” ና ኬያማዶ።
8
ኢየሱስካሞ ቃቦ ኬሳም ዼሳንቴ ይንታና ኬግያ ክያማዶ፦ “ዬቲ እምነትንሳ ቶኻና! ክዛራ ማታንቴ ክንካ ሙናን ዬባኣድሞን ሃርናንቴ ዬዼላቄ?
9
ሙና ዶጝ ኤዲ ሺ ዶጝናንቴ ዬካንቴ ኮሽዻዃ ሻርቃ ሜምካሞ ዬፑኡሻዶንም ዬቲ ጶቅሳይዬው?
10
ፕርካሞ ኣጋንታ ሙና ሶጳ ኤዲ ሺ ኦይድናንቴ ዬካንቴ ኮሽዻዃ ሻርቃ ሜም ዬፑእሻዶን ዬቲ ጶቅሳይዬው?
11
ታ ናንሲ እንታ ዬናንቴ እጌያይኖ ሙና ዼላቅ ኮትሞንም ዬቲ ጶቅሳይዬው? ታ ናንሲ ፈረስ ኤናቤ ሰዱቅ ኤናቤሳ ኛኻዻን ካላንካ ዬም ማንክማቴ።”
12
ኖ ኬናንቴ ብራቴንካ ኪሊማስ ክጌያዳ ቡኮንዛራ ዎርሳዻያ ኛኻዻ ዼላቅ ኮትሞንም ኤና ፈረስ ኤናቤ ሰዱቅ ኤናቤሳ ታማርኖ ኮዶኖ ኬናንቴ ማይ ኣርድዲና።
13
ኢየሱስ ፊልጶስ ቂሳሪያ ሃንዻይን ፔን ይዬስካና ታማርና ይሳግያ፤ “ኤሳንካ ኤና ኤዲ ናሶግያ ሃው ኬያሜ? “ሃማንቴ ኬካላ ኦይስዲና።
14
ኬኻሞ ክግያ፦ “ኤና ዋኒ ኑንቆንካ ሻያያ ዮሃንስና ኬያማይ፤ ዋኒ ኤልያስና ኬያማይ፤ ሃያንቴኻሞ ኤና ዋኒ ኤርምያስና ኬያማይ፤ ኤና ዋኒካሞ ኣና ኤና ባርያሳ ኣፖን ጌያይና ግዶር ካላ ኬሳና ሃማንቴና ኬጌያይ” ና ኬያማዶ።
15
ኖኻሞ፦ “ኤ ዬቲ እግያ ሃው ዬያሜ?” ና ኬግያ ክያማዶ።
16
ስምኦን ሃንዻያ ጴጥሮስካሞ ክግያ፦ “ያ ባርያ ላይን ዳያ ናሳ ክርስቶሲና”
ሃማንቴ ማስዲና።
17
ኢየሱስካሞ ክግያ ይንታና ክያማዶ፦ “ዮና ናሳ ስሞኦን፦ ኮም ሃናንቴ ዻዋዳ ጳ ፖላሮን ዳ ኣባና ኤዲ ትማሞ፤ ያ ኤዲ ይንናንቴን ፓፅን እንዻዳና፤
18
ያ ጴጥሮሲና
፤ ላይታስ ካዛራ ኦኖን እሳም ዻኻና እዻኻይ፤ ኦና ኣጋም ጋሃነምንሳ ካንታኖኻሞ ቻልማሞ።
19
ባርያሳ ፖላን ማንግስትንሳ ቁልፍናም ሃናንቴ እማና እእማይ፤ ዬራ ፔሮጎ ሃዻኻዳና ፓይላ ጳ ፖላሮጎኻሞ ዻኻዻዃና ኬዳይ፤ ዬራ ፔሮጎ ሃቡልዳና ፓይላ ጳ ፖላሮጎኻሞ ቡልዻዃና ኬዳይ።”
20
ሃያንቴኻሞ ኖ ክርስቶስ ክዶንም ኤዲናንቴ ጌያን ኬጋሬኻናንቴ ይሳ ታማርናም ክሊዲና።”
21
ኢየሱስ ዋዳ ኣጋኻ ካርሳንቴ ኢየሩሳሌምዛራ ቃልቴ ኦጎታርካሞ ዞንዛናቤ ኤና ኣይሁድናሳ ዳምብን ኣሽካይናሳ ጋርናቤ ኤና ሙሴ ዳምብን ታማርሳይናቤሳ ኣንሮ ክጋሌኻናንቴቤ፣ ክጄኻናንቴቤ፤ ሮራ ማክንሳኻ ዴምጲንባራኻ ክዻጴኻናንቴቤ ኮዛግሳይንም ይሳ ታማርናናንቴ ጌያን ካርስዲና።
22
ጴጥሮስካሞ ኢየሱስም ይዛራ ጉቻንቴ፣ “ጌጳዮ፦ ዬር ኦጎግያማ ካላኻሞ ሃዛራ ዬስካን ኮጋሬ” ሃማንቴ ኪም ጎራን ካርስዲና።
23
ኢየሱስካሞ ጴጥሮስዛራ ሽራንቴ፤ “ያ ካ ሜሻ፦ ኮታርካ እስ ይማ፤ ያ ኤዲ ዼላቂና ሃሳ ኢሮ ዶኖ ባርዮ ቃቦ ሃሳ ኢሮ ኮቆልሞንታኻ፤ ያ እናንቴ ዱርሚ ማትዲና” ና ክግያ ክያማዶ።
24
ሃያንቴ ኢየሱስ ይሳ ታማርናግያ ይንታና ክያማዶ፦ “ኤያ ኢም ጫጋናንቴ ዛጋያ ይባራ ማሳን ክጋሬ፤ መስቀልን ይሳምካሞ ባኣንቴ ኢም ክጫጌ።
25
ኤያ ሳዳን
ይሳም ዻኣሻናንቴ ዛጋያ ሳዳን ይሳም ካይሳና ክካይሳይ፤ ኮዶን ሳዳን ይሳም እናንቴ ሃማንቴ እማያ ኣጋ ኤያ ሳዳን ይሳም ዻኣሻና ክዻኣሻይ።
26
ኤዲ ናሶ ፔን ኮም ፓይላ ይንቲ ሃያንቴ፣ ኮዶን ሳዳን ይሳም ክካይሳያዳና ክናንቴ ሃር ኮማቴ? ዎይካሞ ኤዲ ይሳ ሳዳንሳ ራቅሮ ባዛስ ካሻናንቴ ክቻላያ ሃርቴ?
27
ኤዲ ናሶ እምባሳ ጎሺንካ ኤርጎን ኤናላማ ክንካ ናኣና ክናኣይ፤ ኤና ውልናንቴ ኬሳ ዋድምድዛራ ባዛናም ኬናንቴ ካሻና ክካሻይ።
28
እንታ ዬናንቴ ጎንዼና እጌያይ፤ ኤና ክና ዎያዳናሳ ባክሮ ኤዲ ናሶ ይሳ ማንግስትንካ ክናኣይን ይሳ ሃፓዛራ ዴምጲን ጂምና ዳይዲና።”