¹ ኡኩንሳን ሮራ ክሳጋዃ ራስባራ፣ ሳምንታሳ ሮራ ካርሳጋላ ቡሪ ዋዳ ሶፁማ ኣፖ መግዳላ ፔን ጋይኖ ማርያምቤ ማርያም ዋቤ ዱክን ሼዶታ ያእዲና።

² ዼሳዽማ ፔኖ ጌጲ ዝግምዲና፣ ጌጳሳ ኤርጎን ኤያ ፖላንባራ ሃንቻንቴ ዱክንዛራ ናዴ ዱክንሳ ኣፖን ሱንን ሹፓዶንም ውንኩርሳንቴ ዛራን ዳርቅዲና። ³ ኤርጎን ኤያሳ ብሽኖኻሞ ጳልቃትግያና ኮጳልቃታይ፤ ኣፓላኖ ክሳኻሞ ሺክን ዶቦግያ ጫውሊና ኮዶ። ⁴ ዻቅማን ኤናኻሞ ኤርጎን ኤያም ይኩርቲንዻዶን ናንቴ ግባዚዲና፤ ኤዲ ጃዳግያ ማቲዲና።

⁵ ኤርጎን ኤያኻሞ ሜናግያ ይንታና ክያማዶ፦ “ዬኩርትንዽናኖ፤ ዚታዻዳ ኢየሱስም ዬዛጋይንም እንታ ዼስዲና። ⁶ ኖ ኮታር ቆልማሞ፤ ይጌያዳግያ ዻጲዲና፤ ናዴ ይንግዶር ክዎዻዳ ራቃም ሼዲማቴ። ⁷ ይሪካ ቃልቴ ታማርና ክሳግያ፤ ‘ኖ ዴምጲንባራ ዻጲዲና፤ ዬምካሞ ብራንቴ ገሊላዛራ ያኣና ክያኣይ፤ ኦጎታር ኪም ሃፓና ዬያፓይ' ሃማንቴ ጌይማቴ። ታ ናንሲ እንታ ዬናንቴ ጌይዲና!”

⁸ ሜናኻሞ ኩርታሞቤ ዋዛ ጌጲቤኻ ማታንቴ ታማርና ክሳ ናንቴ ጌዮታ ጎባኻ ዱክን ራቅንም ጋራንቴ ያእዲና። ⁹ ኣጋዛራ ኢየሱስ ኬም ሃፓንቴ “ፃልኖ ዬናንቴ ኮዴና!” ኬግያ ክያማዶ። ኬኻሞ ኢየሱስዛራ ናዴ ራን ክሳም ዬዳንቴ ክናንቴ ጉንስምዲና። ¹⁰ ኢየሱስኻሞ ኬግያ “ዬኩርቲንዽናኖ፤ ቃልቴ ገሊላዛራ ኬዬኤኻናንቴ ኣባ ናና ናንቴ ጌይማቴ፤ ኦጎታርኻሞ ኢም ሃፓና ኬያፓይ” ና ክያማዶ። ¹¹ ሜናኻሞ ኣኻራ ጎይሮ ኬዳዃ፤ ዻቅማን ኤናሳ ዋኒ ካታማንዛራ ቃልቴ ዬራ ሃማዳናም ኤና ኣይሁድናሳ ዳምብን ኣሽካይናሳ ጋርና ናንቴ ጌይድና። ¹² ኤና ኣይሁድናሳ ዳምብን ኣሽካይናሳ ጋርናኻሞ ዞንዛና ላማ ክንካ ፑጫንቴ ሃሳዋንቴ፤ ዎታደርናናንቴ ብሬ ኬናንቴ ዬካያ እማንቴ፤ ¹³ ይንታና ኬግያ ኬያማዶ፦ “ ‘ዎቲ ዎዻንቴ ዎዳዃ፣ ክሳ ታማርና ናዴ ኪም ዲብዲና’ ሃምማቴ፤ ¹⁴ ዼላቅና ክና ፔንሳ ብታኻላ ኬዬስካዳና፣ ዎቲ ክናንቴ ፃሊ ጌያና ዎጌያይ፤ ዬር ዛርቦ ዬዛራ ዬስካን ኮጋሬኻናንቴኻሞ ሃያና ዋያይ። ¹⁵ ዎታደርናኻሞ ብሬናም ቻንቴ ኬናንቴ ጌይዻዳግያ ሃይዲና፤ ዼላቃ ካ ላይ ታዛራ ኣይሁድ ኤናሳ ባክሮ ጌይቴና ዳዻዶ። ¹⁶ ሃያንቴኻሞ ታማርና ክሳ ታጲ ካላና ኢየሱስ ኬናንቴ ይጌያዳ ጌማርታ ገሊላ ግዶር ዳዛራ ያእዲና። ¹⁷ ኬ ኪም ይያፓናኻሞ ክናንቴ ጉንስምዲና፤ ኮዶን ዋኒ ኬሳ ኪም ሃኪዲና። ¹⁸ ኢየሱስኻሞ ይሳ ታማርና ኻላ ናዴ ይንታና ኬግያ ክያማዶ፦ “ፔንቤ ፓላንቤ ግዶር 'ጌጳሞን ፓይላ እናንቴ እንዽዲና። ¹⁹ ታ ናንስ ቃልቴ ዛርስንናም ባርያ ዎምባቤ ናሳቤ ኡስን ጫራጝንቤሳ ናብንካ ሻያንቴ ታማርና ሃይማቴ። ²⁰ ኤልቅሞና እሳ ዬናንቴ እጌያዳናም ፓይላ ኬሼዴኻናንቴ ኬም ታማርስማቴ፤ እንታኻሞ ፔንሳ ቱንስንዛራ ሮሮ ውል ዬላማ ክንካና እዳይ።”