ማቴዎስ ኡንሳ 13
1
ሮራ ኣጋኻ ኢየሱስ ኦኖንባራኻ ውታንቴ ኛፓስንሳ ዴሞሮ ዳርቅዲና።
2
ዛርስኖ ጱፅኖ ኪም ኮታኻዶንታኻ ኖ ኬም ኛፓስንሳ ዴሞሮ ጋራንቴ ጋግንዛራ ሃንቻንቴ ዳርቅዲና።
3
ኖ ዬር ጱፅካሞ ዻይንሶኻ ይንታ ሃማንቴ ኬናንቴ ጌይዲና፦ “ኤዲ ካላ ሃምን ጲዮታና ክያኣዶ፤
4
ኖ ጲይቴ ክዳኻ ጴንታና ግዶርካ ዋኒ ጎይንሳ ዴሞሮ ዲኒዲና፤ ካርያናኻሞ ናዴ ካማቴ እꬅዲና፤
5
ጴንታና ግዶር ዋኒካሞ ፔ ሾሊ ሺታ ይንግዶር ይዳ ራቅ ሃርቾር ግዶርና ኬዲናዶ፤ ኬ ፔኖ ሺታ ኮዶንታኻ ይሪካ ባቃልዲና፤
6
ኮዶን ሃዮኖ ኮይዻዃ ዋቃቅዲና፣ ጫጪካሞ ይዎዳድሞንታኻ ዋችዲና።
7
ጴንታና ዎኒካሞ ኡኩምንሳ ባክሮጎና ኬዲናዶ፤ ኬባቃላናኻሞ ኡኩምኖ ኬም ክጫንቴ ሽእሽዲና።
8
ሃያንቴ ጴንታና ዋኒካሞ ፔን ባሽሮና ኬዲናዶ፤ ኬኻሞ ኣፒ ካይዲና፤ ኬሳ ካላ ማቶ፣ ዋኻሞ ላታም፣ ዋኻሞ ማካንታም ኣፒና ኬካዶ።
9
ኤያ ቃሞን ኤሳራን ካዳ ክኤሳሬ!” ና ክያማዶ።
10
ሃያንቴ ታማርና ክሳ ክካላ ፑጫንቴ፦ “ዛርስንናንቴ ሃርናንቴ ዻይንሶኻ ሃጌዬ”? ና ክግያ ኬያማዶ።
11
ኖኻሞ ኬናንቴ ይንታ ሃማንቴና ክማሳዶ፦ “ዬናንቴ ፖላን ማንግስትንሳ ኢን ኑንቆን ዬዼሴኻናንቴ እንዽዲና፤ ኮዶን ኬናንቴ እንዻድማሞ።
12
ኤያ ይንሳን ዳናናንቴ እማና እንዻይ፤ ክናንቴኻሞ ጱፃዻና ኮጱፃዻይ፤ ኮዶን ኤያ ይንሳ ቆልማኻላ ካላስ ክሳ ዳምካሞ ቻና ቻዻይ።
13
ታ ናንሲ ይንናንቴ ኬናንቴ ዻይንሶኻ እጌያይኖ ኣጋናንቴና፦ “ኬ ሼድቴ ኬያፕሞንታኻ፤ ኤሳርቴ ዳንቴ ኬኤሳርሞንታኻ ዎይካሞ ኬጶቅስሞንታኻና።
14
ኤያ ባርያሳ ኣፖን ጌያያ ኢሳይያስሳ ኣፖኖ ጌይጳዶኖ ኬዛራና ጎንዼ ኮማታይ። ኣፖኖ ኢሳይያስሳ ጌይዻዶኖ ይንታና፦
“ኤሳራዻን ኤሳራና ዬኤሳራይ፣ ኮዶን ዬቲ ጶቅስማሞ፤
ሃፓዻን ሃፓና ዬሃፓይ ኮዶን ዬሳ ዎይላምሮ ዬቲ ዎድማሞ።
15
ዛርስን ኮሳ ዎይላምሮ ዲፅምዲና፤
ቃሞኖ ኬሳኻሞ ኤሳርማሞ፤
ሃፓን ጋራናንቴ ኣፒ ይሳም ኬ ዱምዲና፤
እኒ ኬ ኦጎንታ ይየየድምና ይሳ ኣፕንካ ሼዳንቴ፣
ይሳ ቃሞንካ ኤሳራንቴ፣
ይሳ ዎይላምንካኻሞ ጶቅሳንቴ
እኒ እዛራ ማታና ኬማታይ፤ እንታኻሞ ኬም ዻኣሻና እዻኣሻይ።”
16
ኮዶን ዬቲ ኣፕኖ ዬሳ ኮሃፓንታኻ ዬሳ ቃሞኖኻሞ ኮኤሳራንታኻ ዬቲ ፑጋዻዳና።
17
እንታ ዬናንቴ ጎንዼና እጌያይ፤ ኤና ባርያሳ ኣፖን ጌያይና ጱፅናቤ ኤና ጋዛና ጱፅናቤ ዬቲ ዬራ ዬሃፓይናም ሃፓናንቴቤ ዬራ ዬኤሳራይናም ኤሳራናንቴ ዛጋና ኬዛጋይ፤ ኮዶን ዬራ እግናም ኬ ሃፓድማሞ።
18
ታ ናንሲ ኤያ ጴንታናም ጲያያሳ ዻይንሳም ኤሳርማቴ።
19
ኤና ባርያ ማንግስትን ዼላቅን ኤሳራንቴ ይሳ ዎይላምሮጎ ዎድምና ፓይላ ውልሳ ኢሮጎ ጴንታን ጲዻዶንም ሜሻ ናዴ ቻና ክቻይ። ናንሲ ጴንታስ ጎይንሳ ዴሞሮጎ ዲናዳ ኣጋና።
20
ጴንታና ፔን ሃርቾሮ ዲናዳና እግና ኤና ባርያሳ ዼላቅን ኤሳራንቴ ይሪካ ዋዛንካ ቻይናና።
21
ኮዶን ጫጪ ይዎድሞንታኻ፣ ኬ ጌጲ ካፕማሞ፤ ባርያሳ ዼላቅንካ ሃማንቴ ጋሎ ዎይካሞ ባቆ ኬዛራ ኮኒና ጋራንቴ ራስዛራ ማታና ኬማታይ።
22
ጴንታና ኡኩምንሳ ባክሮ ዲናዳና እግና ኤና ባርያሳ ዼላቅን ኤሳራንቴ፤ ፔን ኮሳ ዴንታንቤ፣ ኮሳ ዎድማሞንቤም ቃብቴ ኤና ኣፕን ካማ ሽዻዳናና።
23
ጴንታና ፔን ባሽሮ ጲዻዳና እግና ኤና ባርያሳ ዼላቅን ኤሳራንቴ ይሳ ዎይላምሮጎ ዎዳዳናና፤ ኬ ጎንዼ ኣፕን ካና ኬካይ፤ ኬግዶርካሞ ዋ ኣፒ ማቶና ክኡሻይ ፣ ዋኻሞ ኣፒ ላታሚና ክኡሻይ፣ ዋኻሞ ኣፒ ማካንታሚና ክኡሻይ።
24
ኢየሱስ ዻይንሶ ኣብካሞ ይንታ ሃማንቴና ኬናንቴ ክጌያዶ፦ ፖላን ማንግስትኖ ኤያ ይሳ ሃምሮ ጴንታ ፃሊ ጲያዳሚና ኮታኻይ።
25
ኮዶን ኤና ፓይላ ራትሮ ኬዳኻ ጋልታ እስንንሳ ባክሮ ዎርዎሮን ጲያንቴና ክያኣዶ።
26
እስናኻሞ ጌጳንቴ ኬፑዻዃ፤ ዎርዎሮናኻሞ ኬሳ ባክሮ ሃፕንዽዲና።
27
ክሳ ዋድማን ኤናኻሞ ኤያ ሃምን እምባኻላ ናዴ፦“ጌጳዮ ኤ ሃሳ ሃምሮ ጴንታ ፃሊጋኬ ሃጲያዶ? ዎርዎሮኖ ሃባራኻ ኮናኣዴ” ና ክግያ ኬያማዶ።
28
ኖኻሞ ኬግያ፦ “ኦጎንታ ሃያዳ ጋልታና” ና ክያማዶ። ክሳ ዋድማን ኤናኻሞ ክግያ፦ “ቃልቴ ዎርዎሮናም ዎቡጬኻናንቴ ዛጋው ሃዛጋይ?” ሃማንቴ ክካላ ኦይስዲና።
29
ኮዶን ኖ ኬግያ፦ “ኦጎንታ ዳማሞ፤ ዎርዎሮናሚና ዎቡጫይ ሃማንቴ እስናም ካውል ቡጫና ዬቡጫይ።
30
እስናሳ ዋቻዛራ ጋርማቴ ክንካ ኬጌዼ። እንታ ቤሬ ኤና እስናም ፓታይናግያ፦ ‘ብራቴንካ ዎርዎሮናም ኮቃዼኻናንቴ ዋና ዋና ፑኡሻንቴ ዻክማቴ፤ ኮዶን እስናም ፑኡሻንቴ እሳ ኮናሮ ካማቴ’ ሃማንቴ ኬናንቴ እጌያና እጌያይ” ና ኬግያ ክያማዶ።
31
ኢየሱስ ዻይንሶ ኣብካሞ ይንታ ሃማንቴና ኬናንቴ ክጌያዶ፦ “ፖላን ማንግስትኖ ኤዲ ካላ ኮልፒ ኣፕ ይሳ ሃምሮጎ ጲያዳምና ኮታኻይ።
32
ኮልፒ ኣፕ ሃቃናሳ ኣፒና ፓይላ ውል ካላንካ ሾሊ ይዳናኻሞ፤ ቤሬ ኖ ይጌጲና ሃምሮጎ ጲዻይና እስና ግዶርካ ሳጋና ክሳጋይ፤ ካርያና ፖላን ጋይና ክሳ ኣንትናዛራ ይዳርቃያ ሃቃ ጌጲ ማታና ክማታይ።”
33
ፕርካሞ ዻይንሶ ኣብ ይንታ ሃማንቴና ኬናንቴ ክጌያዶ፤ “ፖላን ማንግስትኖ ሜ ካላ ዹሎ ሻርቃ ማካምን ዎርሳንቴ ኛኻዻን ኣፕንላማ ቡኮ ኮቡካዳና ኮታኻይ።
34
ኢየሱስ ዬራ ክናም ፓይላ ዛርስንናንቴ ዻይንሶኻና ክጌያዶ፤ ኖ ዛርስንናንቴ ዻይንሶ ቆልማ ክጌያዳ ዬር ካላኻሞ ቆልማሞ።
35
ኦጎኖ ይንታ ኮዶኖ ኤያ ባርያሳ ኣፖን ጌያያ
“እንታ ኣፖን እሳም ዻይንሶኻና እጌያይ፤
ፔኒም ዎዳዻዶሮኻ ካርሳንቴ ዬራ ኣችምን ዳናም ጌያና እጌያይ” ሃማንቴ ጌይዻዶኖ ጎንዼ ማትዲና።
36
ሃያንቴኻሞ ኢየሱስ ዛርስን ጋራንቴ ኦኖንዛራ ኣርድዲና፤ ክሳ ታማርና ክካላ ናዴ ክግያ፦ “ሃምንሳ ኢሮ ዎርዎራ ዳሳ ዻይንሶም ዎናንቴ ዎኻልማ” ና ኬያማዶ።
37
ኖኻሞ ይንታ ሃማንቴና ኬናንቴ ክማሳዶ፡- “ጴንታን ፃሊን ጲያዳ ኤዲ ናሶና፤
38
ሃምኖኻሞ ፔኖ ኮኖና፤ ጴንታስ ፃላ ባርያ ማንግስትንሳ ናና ና፤ ዎርዎራኻሞ ሜሻ ናናና፤
39
ጲያንቴ ያኣዳ ኣጋ ኖ ጋልታ ዳቡሎስና፤ እስንን ፓታዻይን ዋዳኖ ፔንሳ ቱንስኖና፤ ኤና እስንን ፓታይና ባርያሳ ኤርጎን ኤናና፤
40
ዎርዎሮናም ቡጫንቴ ኖንካ ኮቃዻያግያ፤ ቤሬ ፔንሳ ቱንስሮኻሞ ኦጎንታና ኮዳይ።
41
ቤሬ ኤዲ ናሶ ኤርጎን ኤና ይሳም ኒእሳና ክኒእሳይ፤ ኬኻሞ ናዴ ዬራ ሴሶን ጎይንባራ ማታድናምቤ ኤና ዛርቦናም ክሳ ማንግስትንባራ ቡላና ኬቡላይ።
42
ኤፒንቤ ግግርን ማሳዻንቤ ይዶንዛራ ኖን ካሎን ሮጳንዛራ ኬም ዻባና ኬዻባይ።
43
ዋዳን ኦጎኻ ኤና ጋዛና እምባሳ ማንግስትሮ ሃዮግያና ኬሼሽካይ። ኤያ ቃሞን ኤሳራን ካዳ ክኤሳሬ።”
44
“ጳ ፖላን ማንግስትኖ ሃምንሳ ኢሮ ኮይሶ ኣቻዻዳና ኮታኻይ፤ ኤዲ ካላ ኮይሳ ኣጋም ይያፓዳ ዋዳስካ ማሳቴ ኣቻይዳና፤ ይዋዝዻዳኻ ሃማንቴ ቃልቴ ኮይና ይሳ ዳናም ፓይላ ሻንሻቴ ሃምን ኦጎም ሻንዲና
45
“ፕርካሞ ፖላን ማንግስትኖ እንቁ ባሽ ዎርቄ ሻናናንቴ ዛጋያ ኤዲና ኮታኻይ።
46
ኖ ዎርቃ ሻንንሳ ዋቻ ኣጋም ይያፓና ቃልቴ ይሳ ኮይና ዳናም ፓይላ ሻንሻቴ ዎርቃ ኣጋም ሻንዲና።
47
“ፕርካሞ ጳ ፖላን ማንግስትኖ ኛፓስሮጎ ዻባዻዃ ካራ ውልሳ ሜቴ ኜፑቴይ ዬዳምና ኮታኻይ፤
48
ኜፑቴይኖ ኮፆፃና ኤና ካራን ኤምማይና ኮም ጉቻቴ ኛፓስንሳ ማራንዛራ ቡልዲና፤ ሃያንቴ ኬ ዳርቃንቴ ካራናሳ ፃሊ ፃሊናም እዳንቴ ዛብቆሮ ካንቴ፤ ናንሲ ካራና ዛርቦና ዛርቦናም ዻብዲና።
49
ቤሬ ፔንሳ ቱንስሮኻሞ ኦጎንታና ኮዳይ፤ ባርያሳ ኤርጎን ኤና ናዴ ሴሶን ኤናም ኤና ጋዛናኻላንካ እዳንቴ፤
50
ኤፒንቤ ግግር ማሳዻቤ ይዶን ራቅንዛራ ኖን ካልሎን ሮጳንዛራ ኬ ኬም ዻባና ኬዻባይ።”
51
ኢየሱስ ኬግያ፦ “ዬራ ክና ፓይላ ዬናንቴ ኣርድዲው?” ሃማንቴና ኬኻላ ክኦይሳዶ፦ ኬኻሞ፦ “ዪኒ ዎናንቴ ኣርድዲና” ና ክግያ ኬያማዶ።
52
ኖኻሞ ኬግያ፣ “ኣጋታኻ ኤና ፖላን ማንግስትንሳ ኢን ኑንቆን ዼሳዳ ሙሴ ዳምብን ታማርሳይና፣ ኮይና ይሳ ሻንሳ ዋቺና ይፑእሻዳና ኮይና ሃሊንቤ ጌቾንቤም ቡላያ ኤዲ ዎዱሞና ክታካይ” ና ክያማዶ።
53
ኢየሱስ ዻይንሶና እግናም ጌያንቴ ይቱንሳና፤ ራቃ ኣጋሮኻ ዻጳንቴ ያእዲና፤
54
ይሳ ፔንዛራ ናኣንቴ ኣይሁድናሳ ባርዮን ምስካዻን ኦኖሮጎ ዛርስንም ታማርሳን ካርስዲና፤ ኬኻሞ ክሳ ትምርትን ዬርሻንቴ ይንታና ኬያማዶ፦ “ኤያ ካ ሃማሞንቤ ዬርን ሃሊን ይንካ ይኣሽካን ካንታን ሃንታርካ ክቻዴ?
55
ካ ኤያ ሃማ ኦኖን ኣሽካያ ናሳሞ? ኤ ክሳ እንዳንሳ ናብኖ ማርያሚሞ? ኤ እንዳናና ክሳ ያእቆብቤ፣ ዮሴፍቤ፣ ስምኦንቤ፣ ይሁዳቤሞ?
56
ኤ ክሳ እንዳንሳ ኣንዛን ናና ዎላማ ክንካሞ ኬዶኖ? ታ ኤያ ካ ዬር ኮውሊም ሃንታርካ ክቻዴ?”
57
ኣጋታኻ ኬኻሞ ኪም ኣምንማ ጋርዲና። ኮዶን ኢየሱስ ኬናንቴ ይጌይና፦ “ኤያ ባርያሳ ኣፖን ጌያያ ይንግዶር ጎባዽሞኖ ፔን ክኖሮቤ ኦኖን ክኖሮቤ ሶጎና” ና ኬግያ ክያማዶ።
58
ኬ ኪም ኬኣምናድሞንታኻ ዬር ሃሊ ጱፅ ራቃ ኣጋሮ ኖ ሃያድማሞ።