¹ ኣጋሳ ራስባራ ኢየሱስ ኣይሁድናሳ ኡኩንሳን ሮራ ጋላ ሃምንሳ ግዶንካ ያእዲና፤ ታማርና ክሳኻሞ ዳቃዻንቴ ትሻን ቁንፃንቴ ጋኣን ካርስዲና። ² ፈረስ ኤና ኦጎም ሃፓንቴ ኢየሱስግያ፤ “ታማርና ሃሳ ኣይሁድናሳ ኡኩንሳን ሮራ ጋላ ዬርን ሃይዽማን ግያንዶን ሃይቴና ኬዶ” ና ኬያማዶ።

³ ኖኻሞ ኬግያ ይንታና ክያማዶ፦ “ዳዊትቤ ኤና ክላማን ዳናቤ ይዳቃዻዶን ዋዳንካ ዬራ ክሃያዳናም ዬቲ ዋርቃትሮ ናባባዳይዮው? ⁴ ኖ ባርዮን ኦኖንዛራ ኣርዳንቴ ክቤ ኤና ክላማንዳናቤ ኬእꬅሞን ኤና ኣይሁድናሳ ዳምብን ኣሽካይና ሶጎ ይእꬃን ባላሻን ጫራጝን እꬅዲና። ⁵ ሞ ኡኩንሳን ሮራጋላ ኤና ኣይሁድናሳ ዳምብን ኣሽካይና ባርዮን ኦኖሮ ዋድማ ኬኣሽክና ኬናንቴ ሴሶ ኮማትሞንም ዬቲ ሙሴ ዳምብሮ ናባባዳይዮው? ⁶ ኮዶን እንታ ዬናንቴ ጌያና እጌያይ፦ ኤዲ ባርዮን ኦኖን ካላ ሳጊ ¹ ኮታር ዳይዲና። ⁷ ‘እንታ ቁልን ኡካዻን ካላንካ ፃላሞኒና እናሻይ’ ሃማንቴ ጌይዻዳ ኣፓ ሃር ክዶን ዬዼሳዳና ኤና ጋዛናዛራ ዬቲ እኒ ዻባሞን ካማሞ። ⁸ ኤዲ ናሶ ኡኩንሳን ሮራሳ ጌጲና።

⁹ ኢየሱስ ራቃ ኣጋሮኻ ሾሊ ሳጋንቴ ኬሳ ምስኮን ኦኖንዛራ ኣርድዲና። ¹⁰ ኦጎታርካሞ ኤዲ ካላ ኣኒንሳ ማልግማዳ ዳይዲና፤ ኬ ኢየሱስም ቤርንሳናንቴ ይዛጋዶንታኻ፤ “ኡኩንሳን ሮራ ጋላ ኤናም ፓሽሻዼኻናንቴ ጌይዽዲው?” ሃማንቴ ክካላ ኦይስዲና።

¹¹ ኖኻሞ ኬግያ፤ “ዬግዶርካ ኤዲ ካላሳ እያቲ ኡኩንሳን ሮራ ጋላ ኦሎሮ ኮኣርዳዳና እያታም ኦሎን ክኣርዳዶሮኻ፣ ጉቻቴ ቡላይዬው? ¹² ታ ናንሲ ኤዲ ናሶ እያቲ ካላንካ ሳጊ ዳይዮው? ኣጋታኻ ኡኩንሳን ሮራ ጋላ ዋድማ ፃል ኣሽካዼኻናንቴ ጌይዽዲና” ና ክያማዶ።

¹³ ሃያንቴ ኤያግያ፦ “ኣና ሃሳም ፕክ ሃይማ” ና ክያማዶ። ኤያኻሞ ኣና ይሳም ፕክ ሃይዲና፤ ኣና ክሳ ኣና ዋግያ ፕክዲና። ¹⁴ ኮዶን ፈረስ ኤና ኦጎታርካ ውታንቴ ኢየሱስም ሃሞንታ ሃያንቴ ይዴሳይንም ኦሽዲና። ¹⁵ ኢየሱስ ቃቦ ኬሳም ዼሳንቴ ራቃ ኣጋሮኻ ሃር ሃምዲና። ኤዲኖ ጱፅኖኻሞ ኪም ጫግዲና፤ ኖ ኤና ሃጅሞናምካሞ ፓይላ ፓሽሽዲና፤ ¹⁶ ኖ ሃው ክዶንም ኤዲ ካላናንቴኻሞ ጌያን ኬጋሬኻናንቴ ኬም ክሊዲና። ¹⁷ ኣጋ ይንታ ሃማንቴ ክግያዳ ኤያ ባርያሳ ኣፖን ጌያያ ኢስያስሳ ኣፖ ጌይዻዳ ክያምሜኻናንቴና፤ ¹⁸

“እንታ እካማዳ፣

እናሻያቤ ይንካ እዋዝንዻያ፣ እሳ ዋድማን ኤያ ኣጋና፤

እንታ ኡስን እሳም ክዛራ ዎዳና እዎዳይ፤

ኖኻሞ ብቶን ልክ ሃሞን ቶርስን ውልናንቴ ኬራፓና ክኬራፓይ።

¹⁹ ኖ ዋጭምማሞ፤ እላትማሞ፤

ናቅስን ክሳም ቦዋሮ ኤሳርዽማሞ።

²² ኣጋሳ ራስባራ ኤዲ ካላ ኣፖንቤ ኣፕንቤ ካያስ ቤሮን ይሽማዳም ኤና ክዛራ ኣንሳቴ ናእዲና፤ ኢየሱስ ኤያም ክፓሽሻዃ ኖ ሃፓንቤ ዼላቃንቤ ካርስዲና። ²³ ዛርስኖኻሞ ዬርሻንቴ፦ “ካ ዳዊት ናሳሞ?” ሃምዲና።

²⁴ ኮዶን ፈረስ ኤና ኦጎም ይኤሳራና፤ “ኤያ ካ ቤሮናም ይንካ ክቡላይኖ ቤሮናሳ ጌጳ ብዔልዜቡል ካንታንካና” ና ኬያማዶ።

²⁵ ኢየሱስካሞ ቃቦ ኬሳም ዼሳንቴ ይንታና ክያማዶ፡- “ማንግስት ኪም ፓላያ ፓይላ ላልማና ኮላልማይ፤ ካታማ ኪም ፓላያ፤ ዎይካሞ ኦኖ ኪም ፓላያ ዎይማሞ። ²⁶ ሜሺ ሜሺም ይቡላያዳና ኪም ላላና ኬላላይ፤ ኦጎንታ ዳና ክሳ ማንግስትኖ ሃስ ዋቻዻንቴ ኮዎዬ? ²⁷ እንታ ቤሮናም እቡላይኖ ኬሳ ጌጳ ብኤልዜቡልካ ዳና፤ ናና ዬሳ ሃርካ ኬቡሌ? ኣጋታኻ ናና ዬሳ ዬም ዻብንሻና ኬዻብንሻይ። ²⁸ ኮዶን እንታ ቤሮናም ባርያሳ ኡስንካ እቡላያ ዳና፤ ባርያሳ ማንግስትኖ ዬዛራ ናእዲና።

²⁹ ዎይካሞ ኤዲ ካላ ኤዲ ዋች ካላሳ ኦኖን ኣርዳንቴ ኮይና ክሳም ቡራናንቴ ይዛግና፣ ብራቴንካ ኤያ ዋቻ ኣጋም ዻክማ፣ ሃስ ሃያንቴ ክቡሬ? ኮዶን ኪም ይዻክና ኦኖን ክሳም ቡራዻን ቻላና ክቻላይ። ³⁰ ኤና እላማ ክንካን ትምና ፓይላ ኢም ቶዛዻና ኬቶዛዻይ፤ ኤና እላማ ክንካ ፑኡሽምና ፓይላ ላላና ኬላላይ። ³¹ ኣጋታኻ እንታ ዬናንቴ ጌያና እጌያይ፤ ሴሶን ኣሽክንቶንቤ፣ እሪሞንቤም ፓይላ ኤናናንቴ ጋራና ጋርዻይ፤ ኮዶን ኤያ ኡስን ጋዛን ኢራያ ሴሶን ክሳም ክናንቴ ጋርዽማሞ። ³² ኤዲ ካላ ኤዲ ናሶዛራ ዼላቅ ዛርቦ ክጌያዳና ሴሶን ክሳም ክናንቴ ጋራና ጋርዻይ፤ ኮዶን ኤያ ኡስን ጋዛንዛራ ዼላቅ ዛርቦ ጌያያናንቴ፣ ሴሶን ክሳም ፔን ኮሮቤ ፔን ቤሬ ብራዛራ ናኣናንቴ ዶሮኻሞ ክናንቴ ጋርዽማሞ።

³³ ሃቃናም ፓይላ ኬሳ ኣፒንካ ዼሳዻንታኻ፣ ኣፒ ፃል ሃፓናንቴ ሃቃ ፃል ዬሳ ኮዴ፤ ኮዶን ሃቃ ዛርቦ ዬሳ ኮዳና ኣፒ ዛርቦና ዬሃፓይ። ³⁴ ዬቲ ክና ጉንቶን ኦፖን ናና፤ ዬቲ ኤና ዛርቦና ዬር ፃሊ ጌያናንቴ ሃስ ዬቻሌ? ኤዲሳ ዎይላምሮጎ ቃቦን ፆፃዶኒና ኣፖኖ ኮጌያይ። ³⁵ ኤዲ ጋዛ ካላ ይሳ ዎይላምሮ ዬርን ፃሊን ይፑኡሻዶሮኻ ዬር ፃሊና ክጌያይ፤ ኤዲ ዛርቦ ካላ ይሳ ዎይላምሮ ዬርን ዛርቦን ይፑኡሻዶሮኻና ዬር ዛርቦ ክጌያይ። ³⁶ ኮዶን እንታ ዬናንቴ ጌያና እጌያይ፤ ኤና ሱን ኣፖ ጉሮ ዼላቃይና ዬራ ዬጌያዳናሳ ብቶን ሮራጋላ ዬፓይላ ውልካላ ኦይሳና ኦይሳጳይ። ³⁷ ኣጋኻሞ ኣፓ ሃጌያዳኻ ሃማንቴ ያ ጋዛና ሃማታይ፤ ኣፓ ሃጌያዳኻካሞ ሃማንቴ ሃም ዻብንሻና ዻብንሻዻይ። ³⁸ ሃያንቴ ፈረስ ኤናቤ ኤና ሙሴ ዳምብን ታማርሳይናቤ ኢየሱስግያ፦ “ኣስታማራ ዎቲ ሃኻላ ዬር ሃሊ ሃፓናንቴ ዛጋና ዎዛጋይ” ሃምዲና።

³⁹ ኮዶን ኖ ማሳንቴ ኬግያ ይንታና ክያማዶ፦ “ሃርያኖ ታንጋይኖ ዛርቦን ኮቤ፣ ቡሎን ኮቤ ዬር ሃሊ ሃፓናንቴና ኬኦይሳይ፤ ኮዶን ኤያ ባርያሳ ኣፖን ጌያያ ዮናስ ዬር ሃሊ ማታንቴ ኤናናንቴ ክያፕንዻዳሳ ኦባራ ዬር ኣብ ኬናንቴ እንዽማሞ። ⁴⁰ ዮናስ ካራን ጌጶንሳ ኢሮ ሮሮ ማካምቤ ሶቲ ማካምቤ ክዎዻዳግያ ኤዲ ናሶኻሞ ኦጎንታ ፔንሳ ኢሮ ሮሮ ማካምቤ ሶቲ ማካምቤ ዎዻና ክዎዻይ። ⁴¹ ነነዌ ኤና ዮናስሳ ኣፖን ጌይዻዶን ኤሳራንቴ ጎይን ዛርቦንባራ ኬማታዶንታኻ፣ ብቶን ታኻዻያ ሮራጋላ ኤዲኖ ታንጋይን ኮላማ ክንካ ዻጳንቴ ኤዲን ታንጋን ኮም ዻብንሻና ኬዻብንሻይ፤ ኮዶን ታ ኮታር ዮናስ ካላንካ ኤዲ ሳጊ ዳይዲና። ⁴² ፔን ሳባ ሃንዻንሳ ኤስኖ ብትኖ ሰሎሞንሳ ሃማሞን ኤሳራናንቴ ፔንሳ ማራሮኻ ኮናኣዶንታኻ፣ ብቶን ታኻዻን ሮሮጋላ ኤዲኖ ታንጋይን ኮላማ ክንካ ዻጳንቴ ኤዲን ታንጋን ኮም ዻብንሻና ኮዻብንሻይ፤ ኮዶን ታ ኮታር ሰሎሞን ካላንካ ኤዲ ሳጊ ዳይዲና።

⁴³ “ቤሮኖ ኤዲባራኻ ይውትና ኡሲ ቻናንቴ ኑንቆ ይንግዶር ይቆልማ ቦናን ራቅንዛራ ቃልቴ ኦጎታር ጋላና ክጋላይ፤ ኮዶን ኡስን ቻናንቴ ይዛጋዶንም ኖ ሃፕማሞ። ⁴⁴ ሃያንቴ ‘ኦና ይንግዶር እዳዛራ ማታቴ እዬኤና’ ክያማይ፤ ኖ ማታቴ ክኒና ኦና ጉሮ ማታንቴ ጫንቃል ሳዻዃ ኣሽክሚ ክዳዃና ክያፓይ። ⁴⁵ ሃያንቴኻሞ ቃልቴ ቤሮና ይካላንካ ካሎን ዛርቦናም ኣንሳቴና ክናኣይ፤ ኬኻሞ ኤያ ግዶር ካይማንቴ ዳና ኬዳይ፤ ኤያ ኣጋሳኻሞ ዴንታኖ ታንጋይኖ ኣናን ጋይን ካላ ካሎን ዛርቦ ሳጊና ኮዳይ። ኤድን ታንጋይን ዛርቦን ኮዛራ ኦጎንታና ኮዳይ። ⁴⁶ ኢየሱስ ዛርስንናንቴ ጌይቴ ክዳኻ፣ እንዳንቤ እንዳ ናናቤ ኪም ዼላቅሳናንቴ ይዛጋዶንታኻ ጳሎ ዎያንቴና ኬዶ። ⁴⁷ ኤዲ ካላኻሞ ክግያ፦ “ሃንናቤ ሃንና ናናቤ ሃም ዼላቅሳናንቴ ጳሎ ዎያንቴና ኬዶ” ና ክያማዶ። ²

⁴⁸ ኢየሱስካሞ፦ “እንና ሃውቴ? ኤ እንና ናና ሃውቤቴ?” ሃማንቴና ክናንቴ ክማሳዶ። ⁴⁹ ኢየሱስ ይሳ ታማርናም ዻዋንቴ ይንታና ክያማዶ፦ “እንናቤ እንና ናናቤ ክናና፤ ⁵⁰ ኣባ ጳ ፖላሮን ዳሳ ቃቦን ኣሽካይና ፓይላ እንና ናሳቤ፣ እንና ናንቤ እንናቤና” ና ክያማዶ።