ማቴዎስ - ኡኩንሳ 11
1
ኢየሱስ ታማርና ታጲና ላማናናንቴ ኤልቅሞን ጌያቴ ይቱንሳና፦ ታማርሳናንቴቤ ኣፖን ጌያናንቴቤ ገሊላ ካታማናዛራ
ያእዲና።
2
ዮሃንስ ዻክን ኦኖሮ ዳንቴ ኢየሱስ ክርስቶስሳ ዬራ ሃይቴን ዳዻዳናም ይኤሳራዶን ዋዳንካ ታማርና ይሳም ክዛራ ይእሳንቴ፦
3
“ናኣና ክናኣይ ሃማንቴን ካላዻያ ያሞ? ሞ ኤዲ ኣብ ዎካሌ?” ሃማንቴና ክኦይሳዶ።
4
ኢየሱስ ኬናንቴ ይንታ ሃማንቴና ክማሳዶ፦ “ዬራ ዬኤሳራዳናቤ፣ ዬራ ዬሃፓዳናቤም ቃልቴ ዮሃንስናንቴ ጌይማቴ፦
5
ኤና ኣፕን ካያና ሃፓና ኬያፓይ፤ ኤና ኤላና ያያና ኬያያይ፤ ሙልካምባን ኤና
ፓሻና ኬፓሻይ፤ ኤና ቃሞን ካያና ኤሳራና ኬኤሳራይ፤ ኤና ጃዳና ዻጳና ኬዻጳይ፤ ኤና ኩፕናናንቴኻሞ ሜርሜርን ፃሊን ጌይቴና ዳዻዶ፤
6
ኤያ እዛራ ኢን ካዽማ ኣጋ ኤዲ ፑጋዻዳና።
7
ዮሃንስሳ ታማርና ማታቴ ኬያኣዃ ራስባራ ኢየሱስ ዛርስንናንቴ ዮሃንስሳ ዬር ይንታ ሃማንቴና ክጌያዶ፦ “ዳራንዛራ ሃር ሼዶታ ዬውታዴ? ባልጉዳናሳ ግባሮንካ ሾዋዻይንም ሼዶታው ዬውታዶ?
8
ሞ ሃር ሼዶታ ዬውታዴ? ኤያ ኣፓላን ባሽን ኣርሳዳም ሼዶታው ዬውታዶ? ኤና ኣፓላን ባሽን ኣርሳዳና ብትና ኦኖሮና ኬዶ!
9
ታ ናንሲ ሃር ሼዶታ ዬውታዴ? ኤያ ባርያሳ ኣፖን ጌያያም ሼዶታው ዬውታዶ? ዪኒ ሊክና ኤያ ባርያሳ ኣፖን ጌያያ ካላንካ ካሎን ኖ ሳጊና።
10
ኣና ዋርቃትሮ ሃም ብራንቴ ጎይን ሃሳም ሃናንቴ ክኣሽኬኻናንቴ እሳ ኤርጎን ኤያም ሃሳ ብራሮ ይእሳና እይእሳይ’ ሃማንቴን ይንሳ ኡካዻዳ ኣጋ ኖና፤
11
እንታ ዬናንቴ ጎንዼና እጌያይ፤ ኤና ሜናሳ ኣዻዻዳና ግዶርካ ኑንቆንካ ሻያያ ዮሃንስሳ ሳጊ ካላኻሞ ውታድማሞ፤ ይያማንካሞ ፖላን ማንግስትሮ ውልሳ ሾሊን ዳያ ኣጋ ክሳ ሳጊና ክዳይ።
12
ኣና ኑንቆንካ ሻያያ ዮሃንስ ዋዳንካ ካርሳንቴ ላይ ታ ካ ዎዳዛራ ፖላን ማንግስትኖ ጋሎ ጱፅ ግዶር ሳግቴና ኮዶ፤ ኮም ጋልንሽቴን ዳናኻሞ ካንታናና።
13
ኤና ባርያሳ ኣፖን ጌያይናቤ ሙሴ ዳምብንቤ ላይ ዮሃንስዛራ ኣፖንም ጌይዲና።
14
ታ ናንሲ ኪም ቻናንቴ ዬዛጋዳና ናኣና ክናኣይ ይንግያን ሃንዻዳ ኤልያስ ኣጋ ኖና።
15
ኤያ ቃሞን ኤሳራንካ ዳ ክኤሳሬ።
16
ኤድን ታንጋን ኮም ሃርካ እዬክንሴ? ጳልሮጎ ዳርቃንቴ ሃርያና ይሳም ይንታ ሃማንቴ ግስማይና ናናምና ኬታኻይ፦
17
“ ‘ዬናንቴ ቱሉጞን ዎፑጓዃ ዬቲ ክርባድማሞ፤ ዬናንቴ ዙልሞ ዎቡላዃ፤ ዬቲ ኤፓድማሞ።’
18
ዮሃንስ እꬅማቤ ውጭማቤ ክናኣዶንናንቴ፣ ‘ቤሮ ክዛራ ዳይዲና’ ና ኬያማዶ።
19
ኤዲ ናሶ እꬃዳቴቤ ውጫዳቴቤ ክንና፦ ‘ኢ ኤዲቤ፣ ውጮ ኤዲቤ ሃያንቴ ኤና ግብርን ጎራይናቤ ሴሶን ኤናቤሳ ናሽዽና’ ና ኬያማዶ። ኮዶን ሃማሞኖ ይሳ ዋድማንካ ጎንዽምዲና።”
20
ሃያንቴ ኢየሱስ ዬራ ሃሊናም ይንግዶር ክሃያዳና ካታማና ሴሶንባራኻ ኬማታድሞንታኻ ኬም ጎሪዲና፦
21
“ያ ኮራዚን ሃዪ! ያ ቤተ ሳይዳ ሃዪ! ዬራ ሃሊና የግዶር ሃይዻዳናም እኒ ጢሮስቤ፣ ሲዶናቤ ግዶር ሃይዻዳና ሲዮ ኣፓላ ኣርሳንቴ ካሎን ሞይካዻንቴ ሴሶንባራኻ ኣና ማትዲና ኬዳይ።
22
ኣጋታኻ እንታ ዬናንቴ ጌያና እጌያይ፦ ብቶን ታኻዻያ ሮራ ጋላ ብቶን ዬዛራ ታኻዻንካላ ጢሮስቤ፣ ሲዶናቤዛራ ዻባሞኖ ኬዛራ ካዻይኖ ሾሊና ኮዳይ።
23
ያ ኮኖ ቅፍርናሆም፣ ያ ፖላንዛራ ዼግ ዼግ ሃማናንቴው ሃዛጋዶ? ኮዶን ያ ጋሃነምንዛራ ሃንቻና ሃያንቻይ፤ ዬራ ሃሊና ሃግዶር ሃይዻዳናም ሰዶም ግዶር ሃይዻዳና እኒ ና ላይ ካዛራ ዳና ኮዳይ።
24
ኣጋታኻ እንታ ሃናንቴ ጌያና እጌያይ፦ ብቶን ሮራጋላ ዻባሞን ሃዛራ ካዻንካላ ሰዶም ጋይኖ ባዶና።
25
ዋዳን ኦጎኻ ኢየሱስ ይንታና ክያማዶ፦ “ኣባ፣ ፖላንቤ ፔንቤሳ ጌጳ፣ ዬርን ኮም ኤና ሃምናቤ ኤና ዬርን ዼሳዳናቤባራኻ ኣቻንቴ፣ ናና ሾሊናናንቴ ሃዻዋዶንናንቴ፣ ጎሺኖ ሃናንቴ ኮዴ።
26
ዪኒ ኣባ፣ ኮኖ ዬር ፃል ማታንቴ ሃሳ ዎትሮ ሃፕንዽዲና።
27
“ዬር ፓይላ ውሊም ኣባባራኻ እናንቴ እንዽዲና፤ ባርያ ዎምባሳ ኦባራ ናሳም ኤዲ ኣብ ዼሳያ ቆልማሞ፤ ናሳሳ ኦባራ ናሳ ይዻርካ ናሻንቴ ኤና ይንናንቴ ክዻዋይናሳ ኦባራ ባርያ ዎምባም ኤዲ ኣብ ዼሳያ ቆልማሞ።
28
“ዬቲ ካንታን ቃጅና፣ ይንሳን ባስኮን ይዴፃዻዳና ፓይላ እዛራ ንማቴ፤ እንታ ዬም ኡሲ ቻይሻና እቻይሻይ።
29
ሃቃን እሳም ባስክስማቴ፤ እካላ ታማርማቴ፤ እንታ ኤዲ ዎይላምሳ ቃጅቤ ኢም ይርክ ሃያ እዶንታኻ፣ ሳዳኖ ዬሳ ኡሲ ቻና ኮቻይ፤
30
እሳ ሃቃንቤ ባስኮንቤ ሾልጲና።”