¹ ዋዳን ኦጎኻ ገሊላ ፔንሳ ብታ ሄሮድስ ኣንቲጳስ ኢየሱስሳ ኘሙቲን ኤሳራንቴ፤ ² ይሳ ዋድማን ኤናግያ፦ “ኦጎንታዳና ኑንቆንካ ሻያያ ዮሃንስ ዴምጲባራኻ ዻጳንቴ ናእዲና፤ ዬራ ክና ፓይላ ሃሚማን ግያንዳናም ይንናንቴ ክንካ ኮያማይኖ ኣጋናንቴና።”

³ ኣና ብራንቴ ሄሮድስ ይሳ እንዳናሳ ፊልጶስ ሜን ሄሮድያዳኻ ሃማንቴ ዮሃንስም ዻክን ኦኖሮ ዻክሳንቴና ክዶ፤ ⁴ ይንካ ኪም ክዻክሳዳ ዬራ ዮሃንስ ክግያ፦ “ያ ኮም ሃኬሜኻናንቴ ዳምብኖ ጌይማሞ” ክያማዶንታኻና። ⁵ ሄሮድስ ዮሃንስም ዴሳናንቴ ዛግቴና ክዶ፤ ኮዶን ዛርስኖ ኪም ኤዲ ባርያሳ ኣፖ ጌያያ ሃያንቴ ኬሼዳዶንታኻ ኖ ዛርስን ኩርትንዽዲና።

⁶ ሄሮድስ ክም ኣዻዻዳ ሮራም ጎሽቴ ክዳዃ፤ ሄሮድያዳ ናኖ ዋርሳ ዻሳንቴ ክርባንቴ ኪም ኮዋዝንሳዶንታኻ፤ ⁷ ና ዬራ ክካላ ኮኦይሳይናም ፓይላ ኮናንቴ እማናንቴ ኖ ኣሽንሽዲና። ⁸ ናኻሞ እንዳኖ ኮም ኮክላዃ፦ ሄሮድስ ግያ ይጌይና፤ “ኤናም ኑንቆንካ ሻያያ ዮሃንስሳ ሜቴንም ቱምሳንቴ ሻርቃሮ ሃያንቴ ታ እናንቴ እምማ” ና ክግያ ኮያማዶ። ⁹ ና ይንታ ኮጌያና ብታ እልሊ ጃይዲና፤ ይያማንካሞ ዬራ ይኣሽንሻዳናንቴቤ ቾችና ክላማን ዳናናንቴ ሃማንቴ ዬራ ኮኦይሳዳም ኮናንቴ ኤና ኬሃዬኻናንቴ ኬናንቴ ጌይዲና፤ ¹⁰ ዮሃንስ ዻክን ኦኖሮ ክዳዃ ብታ ኤናም ይእሳንቴ ሜቴን ክሳም ቱምስዲና፤ ¹¹ ሜቴን ክሳ ቱዻዶንም ሻርቃሮ ሃያንቴ ናንናንቴ እንዽዲና፤ ናኖኻሞ ባኣቴ ቃልቴ እንዳንናንቴ እምዲና። ¹² ዮሃንስሳ ታማርና ክሳ ዋን ባኣቴ ቃልቴ ዱክዲና፤ ኬ ዬራ ሃምማዳም ቃልቴ ኢየሱስ ናንቴ ጌይዲና። ¹³ ኢየሱስ ዬራ ሃምማዳም ይኤሳራና ይዶሮኻ ዻጳንቴ ኤዲ ይቆልማ ራቅንዛራ ጋግንካ ያእዲና፤ ዛርስኖካሞ ራቃ ክያኣዳም ዼሳንቴ ካታማናባራኻ ኪም ጫጋቴ ያእዲና። ¹⁴ ኢየሱስ ጋግንባራኻ ፔንዛራ ሃንቻንቴ፤ ኤዲ ጱፅ ይያፓና ኬናንቴ ቡርቃዽዲና፤ ሃያንቴ ኬሳ ኤና ሃጅሞናምካሞ ፓሽሽዲና።

¹⁵ ፔኖኻሞ እባናዳቴ ኮያኣና፤ ክሳ ታማርና ክካላ ናዴ ክግያ፦ “ኮኖ ራቅኖ ዳራና ኮዶን ይንግዶር ዳኣኖ ኬሻንኻ ዳናኻሞ፤ ሃንቴኻሞ ፔኖ ሶትቴ ኮዶንታኻ ኬ እሳሮ ኬሻኔኻናንቴ ዛርስንም ሞሮናዛራ ይእስማ” ና ክግያ ኬያማዶ።

¹⁶ ኮዶን ኢየሱስ ኬናንቴ ይማሳና፤ “ዛርስኖ ኮዬኤኻናንቴ ዛግስማሞ፤ ዬቲ ዬራ እሳይናም ኬናንቴ እምማቴ” ና ኬግያ ክያማዶ።

¹⁷ ኬኻሞ ክናንቴ ይማሳና፤ “ኮታ ዎኻላ ዳና ባላሻ ዶጝቤ ካራ ላማቤ ሶጎና ዳና” ና ክግያ ኬያማዶ።

¹⁸ ኖኻሞ ኬግያ ይጌይና፤” ይንዳ እግናም እናንቴ እምማቴ” ና ክግያ ክያማዶ። ¹⁹ ሃያንቴ ዛርስንም ሾቆንዛራ ኬዳርቄኻናንቴ ኖ ጌይዲና፤ ሙናና ዶጝናቤ ካራና ላማናቤም ቻንቴ፣ ፖላንዛራ ሼዳንቴ፣ ባርያም ምስካንቴ ባላሻን ፑጋንቴ ቁንፃንቴ ይሳ ታማርናናንቴ እምዲና፤ ኬኻሞ ዛርስንናንቴ እምዲና። ²⁰ ኤዲኖ ፓይላ ውል እሳንቴ ምሽዲና፤ ሃያንቴ ሽዻዶንም ታማርና ሻርቃ ታጲ ላማና ኬፑኡሻዶ። ²¹ ኤና እꬃዳና ግዶርካ ሜናቤ ናና ሾሊናቤም ፓይዳዽድማሞ ኤና ኣንጌና ሶጎ ሺ ዶንጚግያና። ²² ኣጋዛራ ኖ ታማርና ኪም ብራንቴ ጋጊንካ ኛፓስንሳ ሳባራ ኬሳጌኻናንቴ ኬናንቴ ጌይዲና፤ ኖኻሞ ዛርስን ይእሳናንቴ ራስዛራ ሽዽዲና። ²³ ኖ ዛርስን ይእሳንቴ ቱንስሮ ባርያም ምስካናንቴ ጌማርዛራ ይዻር ውትዲና፤ ፔኖ ኮእባናዃ ኦጎታር ይዻሪና ክዶ። ²⁴ ዋዳ ኣጋኻ ጋግኖኻሞ ኛፓስንሳ ግዶን ¹ ያእዲና፤ ግባሮኖ ኮናኣዃ ቱልማይካ ኬ ጋላን ካርስዲና።

²⁵ ሶትንሳ ሶፅማ ኣፖኻ ኢየሱስ ኛፓስንዛራ ያያዳቴ ታማርና ይዶንዛራ ናእዲና። ²⁶ ታማርናኻሞ ኖ ኛፓስንዛራ ያያዳቴ ኬዛራ ክኒካ ይያፓዶን ዋዳንካ ኩሪትንዽዲና፤ ሃያንቴ ኬ “ኮኖ ቤሮና” ሃማንቴ ኬ ኩሪትንዻንቴ እላትዲና።

²⁷ ኢየሱስ ይሪካ ኬግያ “ሃይ እንታና፣ ዬኩሪትንዽናኖ ” ና ክያማዶ። ²⁸ ሃያንቴ ጴጥሮስ ክግያ፤ “ጌጳ፦ ያ ሃዳና ኑንቆንዛራ ያያዳቴ ሃዛራ እኔኤኻናንቴ ኢም ኤርግማ” ና ክያማዶ።

²⁹ ኖኻሞ ክግያ “ንማ” ና ክያማዶ። ጴጥሮስ ጋግሮኻ ሃንቻንቴ ኑንቆንዛራ ያያዳቴ ኢየሱስዛራ ያእዲና። ³⁰ ኮዶን ግባሮንሳ ካንታን ይያፓና ኩርትንዽዲና፤ ፁዋንካሞ ይካርሳና “ጌጳ፦ ኢም ዻኣሽማ” ሃማንቴ ኖ እላትዲና።

³¹ ኣጋዛራ ኢየሱስ ኣን ይሳም ይእሳንቴ ኪም ዬዳንቴ፤ “ያ ካ እምነትንሳ ሾላ፤ ሃርናንቴ እይ ሃካዼ?” ና ክግያ ክያማዶ።

³² ኢየሱስቤ ጴጥሮስቤ ጋግንዛራ ኬያንቻና ግባሮኖ ጫክ ሃምዲና። ³³ ሃያንቴ ኤና ጋግንሳ ኢሮ ዳና ክግያ፤ “ያ ጎንዼ ባርያ ናሳና” ሃማንቴ ክናንቴ ኮምፓርስዲና። ³⁵ ኤና ኦጎታር ዳና ኖ ኢየሱስ ክዶን ይዼሳና ሞሮና ኦጎታር ዳናዛራ ፓይላ ኣፖ ይእስዲና፤ ሃያንቴ ኤና ሃጂሞናም ፓይላ ክዛራ ባኣሳንቴ፤ ³⁶ ኤና ሃጅሞና ክሳ ኣፓላንሳ ብራን ኬላኣሴኻ ክናሼኻናንቴ ኬ ኪም ምስክዲና፤ ኤና ላኣሳዳናኻሞ ፓይላ ፓሽዲና።