9

¹ ኢየሱስ ኤና ይእሳዻዳና ታጲ ላማናም ኬም ክዛራ ግስማንቴ ቤሮና ፓይላም ኬቡሌኻናንቴቤ፣ ቡርቅንምካሞ ኬፓሽሼኻናንቴ ኬናንቴ ካንታንቤ ጌጳሞንቤም እምዲና፤ ² ሃያንቴኻሞ ባርያ ማንግስትንም ኬታማርሴኻናንቴቤ ኤና ሃጅሞናም ኬፓሽሼኻናንቴ ኬም ይእስዲና፤ ³ ይንታኻሞና ኬግያ ክያማዶ፦ “ዬሳ ጎይንናንቴ ሴጋዳናኻሞ፣ ጋላ ባኣያ ኦኾሎ ዳናኻሞ፣ ዳኣኖዳናኻሞ፣ ብሬዳናኻሞ፣ ኣፓላ ኣብካሞ ዬቤኤኻናንቴ ዛግስማሞ። ⁴ ካታማስ ኣጋሮኻ ዬሳ ውታዛራ ኦና ይንዛራን ብራንቴ ዬኣርዳያ ግዶር ካፕማቴ። ⁵ ካታማን ኤና ዬም ኬቾቻድምና ካታማንም ጋራንቴ ዬይና ኬናንቴ ማኚ ኮዴኻናንቴ ቡቡንና ዬሳ ራሮ ዳናም ዹርዹራንቴ ውትማቴ።” ⁶ ኬኻሞ ጎያ ኣጋኻ ሃማንቴ ባርያሳ ዼላቅን ታማርሳዳቴ ራቅና ውል ግዶር ኤና ሃጂሞናም ፓሽሻዳቴ ሞሮናም ሳግዲና።

⁷ ዋዳን ኦጎኻ ገሊላ ፔንሳ ብታ ሄሮዶስ ዬራ ሃምማዳናም ኤሳራንቴ ዬራ ሃማዳናኻ ዋጂዲና፤ ኦጎኖኻሞ ኤዲኖ ዋኒ ዬዋንስ ዴምጲንባራኻ ዻጲዲና ሃማንቴ ጌይቴ ኬዶንታኻና። ⁸ ኤና ዋኒ ኤልያስ ፕር ሃፕንዽዲናና ኬያማይ፣ ሃያንቴ ኤና ዋኒካሞ ኣና ኤና ብራና ባርያሳ ኣፖን ጌያይና ግዶር ኤዲ ካላ ዴምጲንባራኻ ዻጵዲና ሃማንቴ ጌይቴና ኬዶ። ⁹ ሄሮዶስካሞ “ኑንቆንካ ሻያያ ዮሃንስም እንታ ክሳ ዛጋራን እቱምሳዃ ጃይዲና፤ ታ ክሳ ይንታ ሃማንቴ ጌይዻን እኤሳራያ ኣጋ ኤዲ ሃውቴ?” ና ክያማዶ፤ ኪም ይሳ ኣፕካ ሃፓናንቴኻሞ ዛግቴና ክዶ። ¹⁰ ኤና ይእሳዻዳናኻሞ ማታቴ ናዴ ዬራ ይያያዳናም ፓይላ ኢየሱስናንቴ ጌይዲና፤ ኖ ኬም ዋና ኣንሳንቴ ቤቴ ሳይዳ ሃንዻያ ካታማስዛራ ኬላማ ክንካ ያእዲና። ¹¹ ኢየሱስ ሃማዛራ ክያኣይንም ዛርስኖ ይዼሳና ኪም ጫግዲና፤ ኖኻሞ ኬም ቻንቴ ባርያሳ ማንግስትን ታማርስዲና፤ ኤና ፓሻናንቴ ዛግሳይናምካሞ ፓሽሽዲና።

¹² ፔኖ እባናዳቴ ኮያኣና፣ ክሳ ታጲና ላማና ኤና ክካላ ናዴ ክግያ፣ “ይንግዶር ዎዶኖ ዳራ ኮዶንታኻ፣ ዛርስኖ ሞሮናቤ ሞሮና ቄታና ኮታር ዳናቤዛራ ቃልቴ ዎዽንታ ራቅቤ ዳኣኖቤ ኬዛጌኻናንቴ ኬም ይእስማ” ና ኬያማዶ።

¹³ ኮዶን ኖ ኬግያ፣ “ዬር ኬእꬃያ ዬቲ ኬናንቴ እምማቴ” ና ክያማዶ። ኬኻሞ ክግያ “ዛርስን ኮ ውልናንቴ ዬካያ ቃልቴ ዳኣኖ ዎሻናድምና፣ ዎሳ ዳና ሙና ዶጝቤ ካራ ላማቤሳ ኦባራ ኣብ ቆልማሞ” ና ኬያማዶ፤ ¹⁴ ይንታ ይንናንቴ ኬያማዶኖ ኦጎታር ዳና ኤና ኣንጌና ሺ ዶጚያምና ኬዶንታኻና። ኢየሱስካሞ ይሳ ታማርናግያ፣ “ዛርስንም ዶጝታም ዶጝታም ሃያንቴ ዳኣርስማቴ” ና ክያማዶ።

¹⁵ ታማርናኻሞ ኖ ክጌያዳ ጎያኻ ኤና ኬዳርቄኻናንቴ ሃይዲና። ¹⁶ ኖኻሞ ሙናና ዶጝናቤ ካራና ላማናቤም ዬዳንቴ ፖላንዛራ ሼዳንቴ ባርያም ጎሻንቴ፤ ቁንፃንቴኻሞ ዛርስንናንቴ ኬካሼኻናንቴ ይሳ ታማርናናንቴ እምዲና። ¹⁷ ኤዲኖ ፓይላ እꬃንቴ ምሽዲና፤ ኬኻላንካ ማኣሽን ሽዻዶንም ታማርና ክሳ እስሞ ሻርቃ ታጲ ላማና ኬፑኡሻዶ። ¹⁸ ኣጋሳ ራስባራ ኢየሱስ ይዻር ባርያም ምስክቴና ክዶ፤ ታማርና ክሳኻሞ ክላማ ክንካ ዳይዲና። ኖ ኬኻላ “ዛርስኖ እግያ ሃው ኮያሜ?” ሃማንቴና ክኦይሳዶ።

¹⁹ ኬኻሞ ክግያ፣ “ኤና ዋኒ ኑንቆንካ ሻያያ ዬዋንሲና ኬያማይ፣ ዋኒ ኤልያሲና ኬያማይ፣ ኤና ዋኒካሞ ኣና ኤና ባርያሳ ኣፖን ጌያይናሳ ካላ ዴምጲንባራኻ ዻጲዲናና ኬያማይ” ና ኬያማዶ።

²⁰ ኖ ኬግያ፣ “ኤ ዬቲ እግያ ሃው ዬያሜ?” ና ክያማዶ። ጴጥሮስካሞ፣ “ያ ባርያባራንካ ንእሳዻዳ ክርስቶሲና” ሃማንቴ ክናንቴ ማስዲና። ^{1 21} ኢየሱስካሞ ዬራ ካም ኤዲ ካላናንቴኻሞ ጌያን ኬጋሬኻናንቴ ኬም ጌጲ ክሊዲና። ²² ሃያንቴኻሞ ኖ ኬግያ፣ “ኤዲ ናሶ ጋሎ ክቼኻናንቴ ክናንቴ ዛግሳና ኮዛግሳይ፤ ሃያንቴኻሞ ፔን ዞንዛናኻቤ፣ ኤና አይሁድናሳ ዳምብን አሽካይናሳ ጋርናኻቤ፣ ኤና ሙሴ ዳምብን ታማርሳይናኻቤ ኪም ቦውዻምቤ ዴሳዻንቤም ሮራ ማክንሳኻኻሞ ዴምጲንባራኻ ክዻጴኻናንቴ ዛግሳና ክዛግሳይ” ና ክያማዶ። ²³ ሃያንቴ ፓይላ ውልናንቴ ይንታና ክያማዶ፦ “ኤያ ኢም ጫጋናንቴ ዛጋያ ዪም ክጋሬ፤ መስቀልን ይሳምካሞ ሮሮ ውል ባኣንቴ ኢም ክጫጌ፤ ²⁴ ኦጎኖኻሞ ኤዲ ሃውካሞ ይሳ ሳዳን ዻኣሻናንቴ ዛጋያ ሳዳን ይሳም ካይሳና ክካይሳይ፤ ኮዶን ኤያ ሳዳን ይሳም እናንቴ ሃማንቴ ካይሳያ ሳዳን ይሳም ዻኣሻና ክዻኣሻይ። ²⁵ ኮዶን ኤዲ ፔን ኮም ፓይላ ይንቲ ሃያንቴ ሳዳን ይሳም ክካይስና ዎይካሞ ዋጋ ቆልማ ክያይና ክናንቴ ሃር ኮማቴ? ²⁶ ኤዲ ካላኻሞ እቤ እሳ ዼላቅንቤኻ ክቦክንዽና፤ ኤዲ ናሶ ጎሺን ይኖንካቤ፣ ባርያ ዎምባቤ ኤርጎን ኤና ጋዛናቤሳ ጎሽንካ ይንና ክንካ ቦክንዻና ክቦክንዻይ። ²⁷ እንታ ዬናንቴ ጎንዼና እጌያይ፤ ኤና ኮታር ዎያዳናሳ ባክሮ ባርያሳ ማንግስትን ሃፕማ ዴምጲን ጅምና ኤና ዳይዲና። ²⁸ ኢየሱስ ዬራ ክናም ጌያንቴ ሮሮ ሎንካይሳ ራስባራ ጴጥሮስቤ፣ ዬዋንስቤ፣ ያእቆብቤም ኣንሳንቴ ባርያም ምስካናንቴ ኩርባስዛራ ውትዲና። ²⁹ ምስክቴኻሞ ክዳዃ ዎትኖ ክሳ ሮጵዲና፤ ኣፓላኖ ክሳኻሞ ሮጳንቴ ካልሎን ጫውሊ ማትዲና። ³⁰ ሃያንቴ ኤዲ ላማ ዋኒ እግናኻሞ ኤልያስቤ ሙሴቤ ክላማ ክንካ ዼላቅቴና ኬዶ፤ ³¹ ኬ ጎሽንካኻሞ ሃፕንዻንቴ፣ ዬሩሳሌም ግዶር ዬርን ሃምማይን ኦጎኖኻሞ ኖ ፔን ኮባራኻ ሃሞንታ ክያኣይንም ጌይቴና ኬዶ። ³² ዋዳ ኣጋኻ ጴጥሮስቤ ኤና ዋኒ ክላማን ኬሳ ኣፒ ካልሎን ኮግንዻዃ ራትዲና፤ ኮዶን ኬ ራትንባራ ኬዻጲና ክሳ ጎሽንቤ ኤዲ ላማ ክላማ ክንካ ዎያንቴ ኬዳዃና ኬያፓዶ። ³³ ኤናኻሞ ኢየሱስም ጋራንቴ ኬያኣና፣ ጴጥሮስ ክግያ፣ “ጌጳዮ፣ ኮታር ዎዳና ዎናንቴ ፃሊና፤ ኣጋታኻ ጋፓ ማካም ዎኬ፤ ካላም ሃናንቴ፣ ዋም ሙሴናንቴ ዋ ኤልያስ ጋንቲና ክዳይ” ና ክያማዶ። ሃር ጌይቴ ይዶንካሞ ኖ ዼስማሞ።

³⁴ ኖ ኣጋም ኣኻራ ጌይቴ ክዳዃ ሉፕኖ ናዴ ኬም ክጭዲና፤ ሉፕንዛራ ይኣርዳናኻሞ ኬ ኩርትንዽዲና። ³⁵ ሉፕንሳኻሞ ኢሮ “ናሳ እሳ እካማዳ ካና፤ ኪም ኤሳርማቴ” ሃማያ ናቅሲ ናእዲና። ³⁶ ናቅሳ ይኤሳርማዶን ዋዳንካ ኢየሱስ ይዻር ክዳዃና ሃፓዻዶ፤ ታማርናኻሞ ዬራ ይያፓዳም ይሳ ዎይላምካ ዬድዲና፤ ዬራ ይያፓዳምካሞ ዋዳ ኣጋኻ ኤዲ ካላናንቴኻሞ ጌያድማሞ። ³⁷ ዋጋላሞካሞ ጉርባስባራ ኬያንቻዃ፣ ዛርሲ ጱፅ ናዴ ኢየሱስማላ ኬሪዲና። ³⁸ ዋዳን ኦጎኻ ዛርስንሳ ባክሮ ኤዲ ካላ ናቅሲ ይሳም ዼግ ሃያንቴ ይንታና ክያማዶ፦ “ኣስታማራዮ፣ ናሳ እሳ ዳ ኖ ሶጎ ክዶንታኻ ናሳ እሳም ሃሼዴኻናንቴ እንታ ሃም ምስክዲና። ³⁹ ቤራ ኪም ክዬድና ሱን ቃባዽማና ክእላታይ፤ ኣፖንካ ክሳ ዱቦ ንእስቴ ግርጫና ክጃይ፤ ኪም ኦጎንታ ጋሊንሽቴ ዛራን ክሳም ሃጅንሻንቴና ክጋራይ፤ ⁴⁰ ታማርና ሃሳኻሞ ክባራ ኬቡሌኻናንቴ እንታ ኬም ምስክዲና፣ ኮዶን ኬ ቡላናንቴ ቻላድማሞ።”

⁴¹ ኢየሱስካሞ “ዬቲ ኮኖ ሃርያኖ ታን ጋይኖ ቆሮኖ፣ እምነትን ቆልሞኖ፤ ላይ ሃማዛራ ዬላማ ክንካ እዴ? ላይ ሃማዛራ ዬናንቴ እዶንሼ? ሃማንቴ ናሳ ሃሳም ኦራ ባኣማ” ና ክያማዶ።

⁴² ናሳኻሞ ንቴ ክዳዃ ቤራ ፔሮጎ ኪም ዻባንቴ ግርጫ ዴስስዲና፤ ኮዶን ኢየሱስ ቤራ ጎራንቴ ናሳባራኻ ቡላንቴ ናሳም እምባ ናንቴ እምዲና። ^{2 43} ኤናኻሞ ፓይላ ባርያሳ ጌጳሞን ዬርሽዲና። ኖ ዬራ ክያያዳናም ኤዲኖ ፓይላ ዬርሽቴ ኮዳዃ፣ ኢየሱስ ይሳ ታማርናግያ ይንታና ክያማዶ፦ ⁴⁴ “ዬራ ዬናንቴ እጌያያ ካም ካላኻሞ ዬዋልናኖ፤ እ ኤዲ ናሶም ሳስካንቴ ኤናናንቴ እማና እንዻይ” ና ክያማዶ። ⁴⁵ ኮዶን ኬናንቴ ቃባ ኣጋ ኣርዳድማሞ፤ ኬ ጶቅሳን ኬጋረኻናንቴ ዬራ ኣጋ ኬናንቴ ኣቺሚና ክዶ፤ ዬራ ኣጋም ክካላ ኦይሳናንቴኻሞ ኬ ኩርትንዽዲና። ⁴⁶ ኬ ግዶር ሃው ሳጊ ክዳይንም ታማርናሳ ባክሮ ክትሞ ዻጲዲና። ⁴⁷ ኢየሱስካሞ ኬሳ ዎይላምንሳ ቃቦም ዼሳንቴ ናሶ ሾሊ ካላም ባኣንቴ ይሳ ዴሞሮ ዎይስዲና፤ ⁴⁸ ይንታኻሞና ኬግያ ክያማዶ፦ “ናሳ ካም እንካ ሃማንቴ ኤዲ ቻያ ሃውካሞ ይዳና ኢም ቻና ክቻይ፤ ኤያ ኢም ቻያኻሞ ኣባ ኢም ንእሳዳም ቻና ክቻይ፤ ኦጎኖኻሞ ኤያ ዬውልሳ ቾባራን ዳያ ኣጋ ኖ ውልካላ ሳጋና ክሳጋይ።” ⁴⁹ ዮሃንስ ክግያ፣ “ጌጳዮ፣ ኤዲ ካላ ናብን ሃሳኻ ቤሮን ክቡልካ ዎቲ ሃፕዲና፤ ዎላማ ዳንቴ ሃም ክጫግሞንታኻ ዎቲ ኪም ማራናንቴ ሃይዲና” ና ክያማዶ። ⁵⁰ ኢየሱስካሞ ክግያ “ዬማርናኖ፤ ኤና ዬም ቶዛዽምና ፓይላ ዬላማ ክንካና” ና ክያማዶ። ⁵¹ ኢየሱስ ዋዳኖ ይንካ ዞን ፖላንዛራ ክያኣይኖ ኮዬስካዶንታኻ፤ ዬሩሳሌምዛራ ያኣናንቴ ሼካቴ ዻጲዲና። ⁵² ኦጎዛራኻሞ ብርሳንቴ ኤርጎን ኤናም ይእስዲና። ኬኻሞ ክናንቴ ዬራ ዛግሳይናም ሃያናንቴ ሰማርያሳ ሞሮ ካላዛራ ኣርድዲና። ⁵³ ኮዶን ዛርስኖ ኖ ዬሩሳሌምዛራ ይቴ ክዶንም ይዼሳዶንታኻ ኪም ቾቻድማሞ። ⁵⁴ ክሳ ታማርና ያእቆብቤ ዮሃንስቤ ኦጎም ይያፓና ክግያ፣ “ጌጳዮ፣ ኤልያስ ይያያዳግያ ጳ ፖላንባራኻ ኖኖ ሃንቻንቴ ኬም ኮካይሴኻ ዎጌኻናንቴ ናሻው ሃናሻይ?” ና ኬያማዶ። ⁵⁵ ኮዶን ኢየሱስ ኬዛራ ሽራንቴ ኬም ጎራንቴ፤ “ኡስን ሃሞሮ ዬዶንም ዬቲ ዼስማሞ፤ እንታ ኤዲ ናሶ ይንናንቴ እናኣዶኖ ኤዲሳ ሳዳም ዻኣሻናንቴና፤ ካይሳናንቴ ትማሞ” ና ኬግያ ክያማዶ። ⁵⁶ ኣጋሮኻኻሞ ዻጳንቴ ሞሮ ኣብዛራ ኬ ያእዲና። ⁵⁷ ጎይን ይቴ ኬዳኻ ኤዲ ካላ ናዴ ኢየሱስግያ “ራቅና ሃያኣይና ውልዛራ ሃም ጫጋና እጫጋይ” ና ክያማዶ።

⁵⁸ ኢየሱስካሞ ክግያ “ኩዬናንቴ ኦሎ ዳይዲና፣ ካርያና ፖላን ጋይናናንቴኻሞ ኦኖ ኬሳ ዳይዲና፤ ኮዶን ኤዲ ናሶ ይሳ ሜቴም ካውል ይንግዶር ክኣቻያ ቆልማሞ” ና ክያማዶ።

⁵⁹ ሃያንቴ ኤያ ዋግያ፣ “ኢም ጫግማ” ና ክያማዶ። ኤያኻሞ ክግያ “ጌጳዮ፣ ብራቴንካ ቃልቴ ኣባም እዱኬ” ና ክያማዶ።

⁶⁰ ኢየሱስካሞ ክግያ “ኤና ዴምጲና ኤና ይሳ ጃዳናም ኬዱኬኻናንቴ ኬናንቴ ጋርማ፤ ያ ቃልቴ ባርያሳ ማንግስትንም ታማርስማ” ና ክያማዶ።

⁶¹ ፕር ኤያ ዋ ክግያ “ጌጳዮ፣ ሃም ጫጋዻን ጫጋና እጫጋይ፤ ኮዶን ብራቴንካ ቃልቴ እሳ ሞሮን ኤናም እኤልቅሜኻናንቴ እናንቴ ናሽማ” ና ክያማዶ።

⁶² ኮዶን ኢየሱስ ክግያ፣ “ኤያ ጋይታን ዬዳንቴ ራሳዛራ ማታንቴ ሼዳያ ባርያ ማንግስትንናንቴ ኤዲ ዛግሳያ ትማሞ” ና ክያማዶ።